THRÜNTAN 11
11
Babel Rünchang
1Kheakü alomi alala thiyutha khülang tüsho rukhüh yu lakheah. 2Mihtsürübo aniakhiuklimnü yüde alachoki, arünü Shinar ching adükhün khülang ngü tüsho ju ching la. 3Arü khülangnü khülang ki thaachih, “Arang, isanü lotaklung thsanü tüsho düshihde zünanü.” Arünü lung müthri lotaklung, tüsho alozhihzhih müthri dükhüh lu. 4Tüsho arünü tha, “Arang, isanü kiuto khülang, tüsho rünchang thüning khiungde thsanü; isanü isa thsungkheak mung khülang thsanü, judü yungsho alomi alala ching isa hiumüzütabahbah.”
5Tüshe mihtsürü tsührübonü athsükhi kiuto tüsho rünchang kheahpü Atungpuh aki. 6Tüsho Atungpuhnü tha, “Mihtsürübo khülang ah tüsho arü alala thiyutha khülang lah, tüsho ha rhimopü tankihchoh; arünü arhimopü lümkhi thsükhi arü thsungkheaknü amukukpü mülade alabah. 7Arang, isanü yükianü tüsho arü yutha yingyingde kamshihanü, junangde arü khülangnü khülang manikhitachihde alabah.” 8Jumonü Atungpuhnü arübo ju chingnü alomi alala ching hiumüzütshih, tüsho arünü kiuto thsüpü tukloabah. 9Jude athsükhinü ha ki Babel de ji, tümütüsho Atungpuhnü alomi yutha alala yingyingabahshih. Ju chingnü Atungpuhnü arü alomi alala ching hiumüzütshih.
Shem Tsühsoniusobo
(1 Kiuthsü 1.24-27)
10Ha Shem lünkhe: Shem kam 100 azorü lakheah, tüsho keking hobah kam mahne dunglim atsührü Arphaxad lakheah. 11Arphaxad lashu, Shem kam 500 la, tüsho tsührübo le tsührübebo lakheah.
12Arphaxad kam 35 la, tüsho atsührü Salah lakheah. 13Salah lashu, Arphaxad kam 403 la, tüsho tsührübo le tsührübebo lakheah.
14Salah kam 30 la, tüsho atsührü Eber lakheah. 15Eber lashu, Salah kam 403 la, tüsho tsührübo le tsührübebo lakheah.
16Eber kam 34 la, tüsho atsührü Peleg lakheah. 17Peleg lashu, Eber kam 430 la, tüsho tsührübo le tsührübebo lakheah.
18Peleg kam 30 la, tüsho atsührü Reu lakheah. 19Reu lashu, Peleg kam 209 la, tüsho tsührübo le tsührübebo lakheah.
20Reu kam 32 la, tüsho atsührü Serug lakheah. 21Serug lashu, Reu kam 207 la, tüsho tsührübo le tsührübebo lakheah.
22Serug kam 30 la, tüsho atsührü Nahor lakheah. 23Nahor lashu, Serug kam 200 la, tüsho tsührübo le tsührübebo lakheah.
24Nahor kam 29 la, tüsho atsührü Tera lakheah. 25Tera lashu, Nahor kam 119 la, tüsho tsührübo le tsührübebo lakheah.
26Kheakü Tera kam 70 la, tüsho atsührübo Abram, Nahor, tüsho Haran lakheah.
Tera Tsühsoniusobo
27Ha Tera lünkhe: Tera tsührübo Abram, Nahor, tüsho Haran. Haran tsührü Lot. 28Abuh Tera rhangdung lachoki, Haran a anihbuh asürü lo Kaldearü yo Ur ching sheabah. 29Judüki Abram tüsho Nahor ane niuberü lu: Abram niube mung Sarai, tüsho Nahor niube mung Iska abuh Haran tsührübe Milka lakheah. 30Tüshe Sarai aniungyüh lakheah; alibe tsührü mülakheah.
31Teranü atsührü Abram le Haran tsührü Lot, tüsho atsühmeakbe Abram niube Sarai bea lu, tüsho arünü Kanan lo ching yüpü Kaldearü yo Ur chingnü wukhiuk; arünü Haran ching arü tüsho ju ching la. 32Tera kam 205 la, tüsho Haran ching sheabah.
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.