Tavaꞌu 1
1
Lataua Mukoinu Mimii Latala Mukalusi
1Tatei manina no voxo ane Lataua musokou sou mukoinu mimii latala loxo loxotolo ilou lia 'o, 2la lia 'o ne, loxo tamaisou vaimomo 'o uasi. Muxolu muxovulaulau vitanisi mo xalusousi. Isivoxo musu'asou lexa toxoxa'a ia Lataua Uleenusi muxixaoxao no loxou lexa ne. 3#2Ko 4:6Ioxe, Lataua muavuti la muvikala aloxo 'o, “Lamana upaa!”, la lamana muxali. 4Anu mumaisou la muxali laixe misevile. Xe muavuti la mukalipala'ane'i lamana ilou isivoxo. 5Lamana mumoxo'u lexe “Aso” xe isivoxo lexe “'Olovoxo”. 'Olovoxo xe kakau la anu voxo vile a mukalu ne.
6 # 2Pi 3:5 Xe ili'i la, la Lataua muvikala aloxo 'o, “Vimelu vile upaa no lexa lixinu mo ukalipala'anu lexa ulai no xalee tamei.” 7La anu vimelu ane ne, muxali vitanisi. Lataua mu'oxonu vimelu ane ne sou utaluxu lexa teitexi xe lexa no lia. 8Anu mumoxo'u vimelu ne lexe, “Loxotolo”. 'Olovoxo xe kakau la anu voxo tamei a mukalu ne.
9Xe ili'i, la Lataua muvikala aloxo 'o, “Lexa no laaxu loxotolo ulai upita no xalee vile mo sou tani 'esi'esi upaa.” La anu tani 'esi'esi mupaa muxali vitanisi. 10Tani 'esi'esi ne, anu Lataua mumoxo'u lexe “Lia” xe lexa ane mulai mutavo no xalee vile 'ole ne, mumoxo'u lexe “Luaki”. Xe Lataua mumaisou la muxali laixe. 11Xe Lataua muavuti, la muvikala aloxo 'o la, “Lia uxalixu ia'eia'e ilou kamakala xe ovuovu iouiou ane unene'a la uxalixu ngiangiaxu xe tematemanu.” La mimii ane ne, lia muxalixu mukalusi. 12Xe anu mumaisou la muxali laixe. 13'Olovoxo xe kakau la anu voxo tatalu a mukalu ne.
14Xe ili'i la, la Lataua muvikala aloxo 'o, “Ta mimii sou ikaakaa ipaa teitexi no loxotolo sou ikalipala'a aso ilou 'olovoxo xe sou ivikalanengexu voxo iouiou mo voxovoxo mo tauutauu ie. 15Ta mimii ane ne ipaa no loxotolo sou ikaa ulu'e no lia.” La ta mimii ane ne ane'i mixali. 16Lataua muxalixa'a ta mii tamei sou iiei. Vile uiei no aso xe vile sou uiei no 'olovoxo. Anu muxalixa'a ta oto kalumo. 17Anu mumulaxa'a ta mii ane ne teitexi no loxotolo sou ikaa ulu'e no lia 18xe sou isaxila'a aso ilou 'olovoxo xe sou ikalipala'ane'i lamana ilou isivoxo. Xe Lataua mumaisi'a la mixali laixe. 19'Olovoxo xe kakau la anu voxo tami'a a mukalu ne.
20Xe ili'i la, la Lataua muvikala aloxo 'o, la “Ta mimii iouiou ane sou lexa tanu no nano, ipaa no lexa sou imauli ukalusi mo ta ngiala iouiou ixali sou ivavava teitexi.” 21La sou Lataua mukoine'i ta mimii ta toxotoxoxa'a sou luaki xe mukoine'i ta mimii se'i la ane mauli uxolu noxi'a kalumo sou lexa. Mo ta ngiala iouiou. Xe mumaisi'a la mixali laixe. 22Xe anu Lataua muavuti la mualusi'a ta mimii ane ne la muvikala aloxo 'o, “Ta mimii iouiou 'o ipaa tavu'alo sou i'ana'ana no luaki. Mo ta ngiangiala ipaa tavu'alo kalumo.” 23'Olovoxo mulai mukalu xe kakau la anu voxo ta'uve a mukalu ne.
24Xe ili'i la, la Lataua muvikala aloxo 'o, “Ta mimii iouiou ane mauli uxoo noxi'a ipaa no lia 'o. Ane'i ane ta temene mo ane'i ane ta vova ta tatila mo ta kitukitu'a mo ane'i ane ixalaxala.” La ane'i ta mimii ane ne mixali. 25Xe mumaisi'a la mixali laixe.
26 # 1Ko 11:7 Xe ili'i, la Lataua muvikala aloxo 'o la, “Ioxe, nenge takoine'i ta mitema mo ixali loxo nenge. Tamuxaxa'a sou isaxila'a ta sinana ilo'a ta ngiala mo ta mimii iouiou latala ane ta temene mo ta vova mo ta mimii iouiou ane ixaxalaxala no lia.” 27#Mat 19:4; Mak 10:6 #Tav 5:1-2Mukoine'i la mixali loxo anu, Lataua. Mukoine'i ta mulu xe ta sema aloxo anu nesi. 28Lataua mualusi'a la muvikala aloxo 'o, “Ngapalaane'i ta 'ilinge tavu'alo mo i'ana'ana no xalexalee lia mo ngasaxisaxila'a ta sinana ilo'a ta ngiala mo ta mimii iouiou ane imauli no lia 'o.” 29Xe Lataua muavuti la muvikala aloxo 'o la, “Eni aitingenge kamakamakala iouiou mo ovuovu iouiou ane unene'a la ngiangiaxu xe tematemanu ne lexe ngingi la'ilalingenge ane. 30Mo eni aitixa'a ta mimii iouiou ane imauli no voxosila ilo'a ane'i ane ixaxalaxala no lia mo ta ngiala ia'eia'e iouiou mo ovuovu iouiou volovoloxu mo seseseenu.” La ta mimii ane ne mixali aloxo Lataua muvikala ne. 31Lataua mumaisi'a ta mimii ane anu molusi mukoine'i la mixali laixe. 'Olovoxo mulai mukalu xe kakau la voxo muxatele vile a mukalu ne.
Àwon tá yàn lọ́wọ́lọ́wọ́ báyìí:
Tavaꞌu 1: ataNTpo
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2013, Wycliffe Bible Translators, Inc. All rights reserved.