Luki 22
22
1 Xwe e è nɔ ylɔ́ ɖɔ Dǐndínwáyixwe, bɔ è nɔ ɖu wɔ̌xúxú e mɛ è ma dó tɔ́n ǎ é ɔ́ kó ɖo sisɛyá wɛ. 2Vɔ̌sánú-xwlémawutɔ́gán lɛ́ɛ, kpódó sɛ́nkplɔ́nmɛtɔ́ lɛ́ɛ kpán ɖo lě e yě ná hu Jezu gbɔn ɔ́ sín wě ɖe wɛ; lo ɔ́, yě ɖo xɛsi ɖi nú to lɛ́ɛ wɛ.
Judási jló ná sa Jezu
(Matíe 26.14-16; Maki 14.10-11)
3 Satáan ka byɔ́ ayi mɛ nú Judási e è nɔ ylɔ́ ɖɔ Isikaliɔ́ti, bɔ é ɖo ahwanvú Jezu tɔn wěwe lɛ́ɛ mɛ é; 4bɔ Judási yi mɔ vɔ̌sánú-xwlémawutɔ́gán lɛ́ɛ kpódó sɔ́jagán lɛ́ɛ kpán, bó ɖɔ xó xá yě dó lě e é ná jó Jezu nú yě gbɔn ɔ́ wú. 5Énɛ́ ɔ́, xomɛ hun yě tlala, bɔ yě ɖɔ gbo xá Judási ɖɔ émí ná ná akwɛ́ ɛ, 6bɔ Judási yí gbe, bó jɛ hwenu e ná nyɔ́, bɔ é ná jó Jezu nú yě, bɔ mɛ lɛ́ɛ ma ná tunwun ǎ é ba jí.
Jezu zɔ́n Dǐndínwáyixwe ɔ́ sín nǔɖuɖu ɖa
(Matíe 26.17-25; Maki 14.12-21; Jǎan 13.21-30)
7Wɔ̌xúxú e mɛ è ma dó tɔ́n ǎ é sín xwezán e gbe è nɔ hu lɛ̌ngbɔ́ví dó ɖu Dǐndínwáyixwe ɔ́ ná ɔ́ su. 8Jezu ka sɛ́ Piyɛ́ɛ kpódó Jǎan kpó dó, bó ɖɔ nú yě ɖɔ: “Mi yi bló tɛnmɛ ɖó, bó ɖa nǔɖuɖu e mǐ nǎ dó ɖu Dǐndínwáyixwe ɔ́ ná é.”
9Yě ká kanbyɔ́ ɛ ɖɔ: “Fítɛ́ a jlǒ ɖɔ mǐ ní yi sɔ́ xwe ɔ́ sín nǔ ɖe?”
10É ka yí gbe nú yě ɖɔ: “Éɖíe: mi ɖo toxo ɔ́ mɛ ná byɔ́ wɛ ɔ́, mi ná mɔ nya ɖé, bɔ é ná hɛn sin dó tɔyizɛ́n mɛ wá xweyǐgbe; mi xwedó e káká yi xwé e gbe é ná byɔ́ é, 11bó ɖɔ nú xwétɔ́ ɔ́ ɖɔ: ‘Mɛ̌si ɖɔ mǐ ní wá kan xɔ e mɛ émí kpódó ahwanvú émítɔn lɛ́ɛ kpó ná ɖu Dǐndínwáyixwe ɔ́ ɖe ɔ́ byɔ́ we.’ 12Énɛ́ ɔ́, xwétɔ́ ɔ́ ná xlɛ́ xɔ ɖaxó ɖé mi ɖo síngbó jí, bɔ nǔ bǐ ko sɔgbe ɖ'é mɛ; fínɛ́ wɛ mi ná sɔ́ xwe ɔ́ sín nǔ ɖ'ayǐ ɖe.”
13Ahwanvú tɔn we lɛ́ɛ ka yi, bó mɔ nǔ lɛ́ɛ bǐ lě e Jezu ɖɔ gbɔn nú yě ɔ́, bɔ yě ɖa xwe ɔ́ sín nǔɖuɖu ɖo fínɛ́.
Jezu ɖu kɔnɖókpɔ́ nǔɖuɖu ɔ́ xá ahwanvú tɔn lɛ́ɛ
(Matíe 26.26-30; Maki 14.22-26; 1 Kɔlɛ́ntinu 11.23-25)
14Ée hwe ɔ́ nu su é ɔ́, Jezu kpódó mɛsɛ́dó tɔn lɛ́ɛ kpán ja nǔ ɖu gbé, 15bɔ Jezu ɖɔ nú yě ɖɔ: “Un ko jló tlala ɖɔ ma ɖu Dǐndínwáyixwe sín nǔɖuɖu élɔ́ xá mi, cóbó ná jɛ ya ji jí; 16ɖó ma ɖɔ nú mi: un sɔ́ ɖo ɖě ná ɖu wɛ gbeɖé, káká yi jɛ hwenu e Mawu ná ɖe nǔ e xwe ɔ́ nyí ɔ́ xlɛ́, ɖo axɔ́súɖuɖu tɔn mɛ dó é ǎ.”
17É ká wá sɔ́ kɔ́fu ɖokpó, bɔ vɛ̌ɛn ɖ'é mɛ, bɔ é dó kú nú Mawu, bó ɖɔ: “Mi yí, bó má nu, 18ɖó má ɖɔ nú mi, bɛ́ sín din ɔ́, vɛ̌ɛn ɖě sɔ́ ɖo nu ce ná jɛ wɛ káká yi jɛ hwenu e axɔ́súɖuɖu Mawu tɔn ná wá dó é ǎ.”
19Ée Jezu ɖɔ mɔ̌ ɔ́, é sɔ́ wɔ̌xúxú, bó dó kú nú Mawu, bó kán, bó ná yě bó ɖɔ: “Élɔ́ ɔ́, agbaza ce wɛ; [agbaza ce e un sɔ́ jó dó mi ta mɛ ɔ́ wɛ; mi nɔ bló lě, dó flín mì ná.”
20 Ée yě ɖu nǔ gúdo ɔ́, é sɔ́ vɛ̌ɛn kɔ́fu ɔ́ lɔmɔ̌ nú yě, bó ɖɔ: “Vɛ̌ɛn élɔ́ ɔ́, hun ce wɛ; hun ce e Mawu dó sɔ́ akɔjijɛ yɔ̌yɔ́ ɔ́ sín afɔ ɖó te ná ɔ́ wɛ; é wɛ kɔn nyi ayǐ dó ta mitɔn mɛ.]
21 “Mɛ e ka ɖo nǎ sɔ́ mì jó wɛ é ɖíe ɖo nǔ ɖu xá mì wɛ e. 22Gbɛtɔ́ví ɔ́ ɖó ná kú, lě e Mawu kó ɖɔ gbɔn é, amɔ̌ mɛ e ná sɔ́ ɛ jó ɔ́, heelú i.”
23Yě ká jɛ kinkanbyɔ́ yěɖée jí ɖɔ mɛ̌ ka ɖo nǔ mɔ̌hunkɔtɔn ná dó sin wɛ ɖo émí mɛ a jí.
Mɛ̌ ká ná nyí nǔɖaxó?
24 Yě jɛ nǔ dɔn jí kpó adǎn kpó ɖo yěɖée tɛ́ntin, ɖɔ mɛ̌ ká ɖó ná nyí nǔɖaxó ɖo émí mɛ a jí. 25 Jezu ka ɖɔ nú yě ɖɔ: “Togun e ma nyí Jwifu ǎ lɛ́ɛ sín axɔ́sú lɛ́ɛ nɔ́ kpa acɛ gannaganna nú yě, bɔ mɛ e nyí gǎn lɛ́ɛ nɔ́ ba ɖɔ è nǐ ylɔ́ émí ɖɔ ‘Đagbewatɔ́.’ 26 Lo ɔ́, nǔ ná nyí mɔ̌ ɖo midɛɛ lɛ́ɛ mɛ ǎ; é nyɔ́ wa ɔ́, mɛ e nyí nǔɖaxó ɖo mi mɛ é ní cí yɔkpɔ́vú ɖɔhun; mɛ e ka nyí gǎn é ní cí mɛsɛntɔ́ ɖɔhun. 27 Đo mɛ e ɖo nǔ ɖu wɛ é kpódó mɛ e ɖo mɛ sɛn wɛ ɔ́ kpán mɛ ɔ́, mɛ̌ wɛ hú gǎn mɛ ɖě? Mɛ e ɖo nǔ ɖu wɛ é wɛ ǎ cé? É ɖo mɔ̌ có, nyɛ ka ɖo mi mɛ mɛsɛntɔ́ ɖɔhun.
28“Midɛɛ lɛ́ɛ ɔ́, mi wɛ nɔ gúdo ce hwebǐnu, ɖo adǎngbomɛ ce lɛ́ɛ mɛ. 29Énɛ́ wú ɔ́, nyɛ ɔ́, un sɔ́ axɔ́súɖuto ɔ́ ɖó te nú mi, lě e Tɔ́ ce sɔ́ ɖó te nú nyɛ gbɔn é, 30 bónú mi na ɖu nǔ, bó nu sin xá mì, ɖo axɔ́súɖuto ce mɛ, lobo na jínjɔ́n axɔ́súzinkpo jí, bó na ɖɔ hwɛ xá Izlayɛ́li sín akɔta wěwe lɛ́ɛ.”
Jezu ɖɔ Piyɛ́ɛ ná gbɛ́ ɖɔ émí kún tunwun émí ó
(Matíe 26.31-35; Maki 14.27-31; Jǎan 13.36-38)
31“Aklúnɔ ɖɔ: Sinmɔ́ɔ! Sinmɔ́ɔ! Đǒtó; Satáan byɔ́ mi, bó na fún mi lě e è nɔ fún jinukún gbɔn é. 32Lo ɔ́, un sa vo nú Mawu ɖó ta towe mɛ, bónú nǔɖiɖi má wá hwe dó we ó. Hwenu e a ka ná lɛ́ kɔ wá gɔ̌n ce ɔ́, dǒ wǔsyɛ́n lanmɛ nú nɔví towe lɛ́ɛ.”
33Piyɛ́ɛ ka ɖɔ n'i ɖɔ: “Aklúnɔ! Un ɖo gbesisɔ mɛ, bó ná xwedó we yi ganxó, bó ná xwedó we yi kú.”
34Jezu ka yí gbe n'i ɖɔ: “Má ɖɔ nú we Piyɛ́ɛ! Kokló ná kó kɔ́ así égbé cóbɔ a nǎ kó gbɛ́ azɔn atɔn ɖɔ émí kún tunwun mì ó ǎ.”
Mi hɛn akwɛ́hɛnnú; mi hɛn glo; mi hɛn hwǐ
35 Jezu ka ɖɔ nú yě ɖɔ: “Hwenu e un sɛ́ mi dó, bɔ mi ma hɛn akwɛ́kpo ǎ, bó ma ka hɛn nǔbyɔ́ɖutɔ́glo ǎ, lobo ma ka hɛn afɔkpa ǎ ɔ́, mi jɛ nǔɖé dó wɛ a?” Bɔ yě yí gbe n'i ɖɔ: “Éeǒ, mǐ jɛ nǔ ɖěbǔ do ǎ.”
36É ka ɖɔ nú yě ɖɔ: “Amɔ̌, din ɔ́, mɛɖé ɖó akwɛ́kpo hǔn, ní sɔ́ hɛn; mɛɖé ɖó nǔbyɔ́ɖutɔ́glo hǔn, ní sɔ́ hɛn; mɛ e ma ka ɖó hwǐ ǎ é ɔ́, ní sa awu tɔn dó xɔ ná. 37 Đó má ɖɔ nú mi: nǔ élɔ́ e è wlǎn ɔ́ ɖó ná jɛ dó jǐ ce. ‘È lɛ̌n ɛ dó dǎkaxotɔ́ lɛ́ɛ sín ahwan mɛ.’ Nǔ e è wlǎn dó wǔ ce lɛ́ɛ ɖó ná jɛ.” 38Yě ká ɖɔ n'i ɖɔ: “Aklúnɔ, hwǐ we ɖíe ɖo fí e.” É ka yí gbe nú yě ɖɔ: “É ko kpé.”
Jezu yi xo ɖɛ ɖo olívutín só ɔ́ jí
(Matíe 26.36-46; Maki 14.32-42)
39Jezu tɔ́n, bó ɖidó olívutín só ɔ́ ta, lě e é kó nɔ́ bló gbɔn ɖ'ayǐ é, bɔ ahwanvú tɔn lɛ́ɛ xwedó e. 40Ée é jɛ fínɛ́ ɔ́, é ɖɔ nú yě ɖɔ: “Mi xo ɖɛ, bó ma wá jɛ tɛ́nkpɔ́n ɖaxó mɛ ó.” 41Ée é ɖɔ mɔ̌ ɔ́, é sɛ yi zɔ nú yě, nǎ yi mɛ̌tlukpo gban mɔ̌, bó jɛ kpo, bó jɛ ɖɛ xo jí 42ɖɔ: “Daá! Ényí a jlǒ hǔn, sɛ wǔvɛ́ kɔ́fu élɔ́ dó zɔ nú mì; amɔ̌, ní má nyí jlǒ ce ó, lo ɔ́, ní nyí lě e é jló hwɛ gbɔn é.”
[ 43Hwenɛ́nu ɔ́, wɛnsagun Mawu tɔn ɖokpó gosín jǐxwé wá tɔ́n dó jǐ tɔn, bó ná ɛ akɔ́nkpinkpan. 44Jezu ka ɖo kúsukpɔ xo wɛ, bó lɛ́ ɖo ɖɛ xo wɛ syɛ́nsyɛ́n, bɔ dɛ̌n e jɛ wɛ é ɖe ɔ́ cí hun ɖɔhun, bó nɔ kun kɔn nyi ayǐ.]
45Ée é xo ɖɛ gúdo ɔ́, é sí te, bó yi ahwanvú tɔn lɛ́ɛ gɔ́n, bó mɔ yě ɖo amlɔ mɛ wǔbláwúblá, 46bó ɖɔ: “Étɛ́! Amlɔ dɔ́ wɛ mi ɖe a? Mi sí te bó xo ɖɛ, bó má wá jɛ tɛ́nkpɔ́n ɖaxó mɛ ó.”
È wlǐ Jezu
(Matíe 26.47-56; Maki 14.43-50; Jǎan 18.3-11)
47Mɔ̌ ɖɔ wɛ Jezu ɖe kɛ́ɖɛ́, bɔ mɛɖé lɛ́ɛ nyi ahwan wá xwetɔ́n, bɔ mɛ e è nɔ ylɔ́ ɖɔ Judási ɖo ahwanvú tɔn wěwe lɛ́ɛ mɛ ɔ́ zɔn yě nu. Judási sɛ yá Jezu, bó ná kí si n'i, 48bɔ Jezu ɖɔ n'i ɖɔ: “Judási, é má nyí si wɛ a kí nú Gbɛtɔ́ví ɔ́ bó dó jó e a?”
49Ée mɛ e ɖo Jezu kpá lɛ́ɛ mɔ nǔ e ɖo nǎ jɛ wɛ é ɔ́, yě kanbyɔ́ ɛ ɖɔ: “Aklúnɔ, mǐ ní jɛ hwǐ xú mɛ jí a?” 50Mɛ ɖokpó ka ɖo yě mɛ, bó xú hwǐ vɔ̌sánú-xwlémawutɔ́ ɖaxó ɔ́ sín mɛsɛntɔ́, bó kpa tó tɔn ɖisíxwé tɔn ɔ́. 51Jezu ka ɖɔ: “Mi gbɔ; ní nɔ mɔ̌!” É ka ɖó alɔ tó ɔ́ wú, bɔ tó jɛ tó tɛnmɛ. 52Jezu ka ɖɔ nú vɔ̌sánú-xwlémawutɔ́gán lɛ́ɛ kpódó sinsɛnxɔcɔ́tɔ́ sín gǎn lɛ́ɛ kpó, kpódó tomɛxó e wá gbě tɔn mɛ lɛ́ɛ kpán ɖɔ: “Ajotɔ́ axánsúnxó wɛ un ka nyí, bɔ mi hɛn hwǐ kpódó kpo kpó jɛ gbě ce mɛ a? 53 Ayǐhɔ́ngbe ayǐhɔ́ngbe wɛ nyɛ kpódó mi kpán nɔ́ ɖo sinsɛnxɔ mɛ, bɔ mi ka wlí mì ǎ; lo ɔ́, mi kpódó ablu mɛ hlɔ̌nhlɔ́n lɛ́ɛ kpó sín gan wɛ xo din.”
Piyɛ́ɛ gbɛ́ ɖɔ émí kún tunwun Jezu ó
(Matíe 26.57-58, 69-75; Maki 14.53-54, 66-72; Jǎan 18.12-18, 25-27)
54Ée yě wlí Jezu ɔ́, yě dɔn ɛ yi vɔ̌sánú-xwlémawutɔ́ ɖaxó ɔ́ xwé. Piyɛ́ɛ jɛ gǔdo yětɔn, é ka lɔn bó sɛkpɔ́ yě ǎ. 55Mɛ ɖé lɛ́ɛ ka bɔ myɔ ɖo kɔ́xo ɔ́ ta, bó jínjɔ́n ayǐ lɛ́ lɛ̌ dó, bɔ Piyɛ́ɛ wá yi jínjɔ́n yě mɛ. 56Nyɔ̌nu mɛsɛntɔ́ ɖokpó mɔ ɛ ɖo ayǐjínjɔ́n ɖo myɔ ɔ́ kɔn; é kpɔ́n ɛ tlítlí, bó ɖɔ: “Mɛ élɔ́ lɔmɔ̌ nɔ zɔn xá ɛ!” 57Piyɛ́ɛ ka gbɛ́ bó ɖɔ: “Nyɔ̌nu, un tunwun i ǎ.” 58É nɔ zaan, bɔ mɛ ɖěvo lɛ́ wá mɔ ɛ, bó ɖɔ: “Hwi lɔmɔ̌ ɖo mɛ tɔn lɛ́ɛ mɛ!” Piyɛ́ɛ ka gbɛ́, bó ɖɔ: “Éeǒ, un ɖo yě mɛ ɖě ǎ!” 59É ná yi gan xixo ɖokpó mɔ̌, bɔ mɛ ɖěvo lɛ́ wá, bó tɛ ɖɛ̌ jí syɛ́nsyɛ́n ɖɔ: “Nya élɔ́ nɔ́ zɔn xá ɛ dandan, ɖó Galilée nu wɛ!” 60Piyɛ́ɛ ka ɖɔ: “Nya ce, un mɔ nǔ jɛ nǔ e ɖɔ wɛ a ɖe ɔ́ mɛ ǎ.” Xó énɛ́ ɖɔ wɛ é ɖe kɛ́ɖɛ́ bɔ kokló kɔ́ así. 61Aklúnɔ ká lílɛ́, bó kpɔ́n Piyɛ́ɛ, bɔ Piyɛ́ɛ flín xó e Aklúnɔ kó ɖɔ n'i ɖ'ayǐ é; é wɛ nyí ɖɔ: “Cóbónú kokló ná kɔ́ así égbé ɔ́, a nǎ kó gbɛ́ azɔn atɔn ɖɔ émí kún tunwun mì ó.” 62Bɔ é tɔ́n jɛ hɔnto, bó ya avǐ kpódó vǐvɛ́ kpó.
È zun Jezu bó xo e
(Matíe 26.67-68; Maki 14.65)
63Mɛ e è sɔ́ ɖó Jezu kɔn, bɔ yě ɖo cícɔ́ ɛ wɛ lɛ́ɛ ɖo kiko e wɛ, bó ɖo xixo e wɛ. 64Yě sɔ́ avɔ dó blá nukún mɛ n'i, bó ɖɔ n'i ɖɔ: “Đɔ mɛ e dó nǔ we din ɔ́ nú mǐ.” 65Yě ɖɔ nǔyá gěgé ɖěvo n'i.
È kplá Jezu yi vɔ̌sánú-xwlémawutɔ́ ɖaxó Kayífu nukɔn
(Matíe 26.59-66; Maki 14.55-64; Jǎan 18.19-24)
66Ayǐ ká wá hɔ́n, bɔ tomɛxó lɛ́ɛ kpódó vɔ̌sánú-xwlémawutɔ́gán lɛ́ɛ kpó, kpódó sɛ́nkplɔ́nmɛtɔ́ lɛ́ɛ kpán wá kplé, bó dɔn Jezu yi hwɛɖɔxɔsá yětɔn ɖaxó ɔ́, 67bó ɖɔ n'i ɖɔ: “Ényí hwi wɛ nyí Klísu ɔ́ hǔn, ɖɔ nú mǐ.” Jezu ka yí gbe nú yě ɖɔ: “Un ɖɔ nú mi ɔ́, mi ná ɖi ǎ; 68un ka kan nǔ byɔ́ mi ɔ́, mi ná yí gbe nú mì ǎ. 69Amɔ̌, sín din ɔ́, nyɛ Gbɛtɔ́ví ɔ́ ná jínjɔ́n Mawu Nǔbǐwúkpétɔ́ ɔ́ sín ɖisíxwé.” 70Yě bǐ ka ɖɔ: “Hǔn Mawu ví wɛ nú we nɛ́ hǔn?” É ká yí gbe nú yě ɖɔ: “É jɛ́n nɛ́ mi ɖɔ nɛ́.” 71Ée Jezu ɖɔ mɔ̌ ɔ́, yě yí xó, bó ɖɔ: “Kúnnuɖetɔ́ tɛ́ ba wɛ mǐ ká sɔ́ kpo ɖe? É ɖésú nɛ́ kó sɔ́ nu tɔn dó ɖɔ ná din bɔ mǐ se nɛ́.”
È kplá Jezu yi tokpɔngán Pilátu nukɔn
(Matíe 27.1-2, 11-14; Maki 15.1-5; Jǎan 18.28-38)
Àwon tá yàn lọ́wọ́lọ́wọ́ báyìí:
Luki 22: Fon13
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
La Bible en langue fon © Alliance Biblique du Bénin, 2012.
