SAN MATEO 9
9
Jesús joinchexingamehe ná xí que c̈hoha vacji
(Mr. 2.1‑12; Lc. 5.17‑26)
1Cottimeja Jesús coani barco iná co sacjoi para toenxin jinda ngain rajna Capernaum, rajné Jesús tiempo mé. 2Nttiha joicaohe na Jesús ná tti xí que c̈hoha vacji, tajitsingataha xa ná camilla. Are Jesús vicon que cain chojni que joicao tti nihi mé chonda seguro que Jesús sinchexingamehe jehe tti nihi mé, Jesús ndac̈ho ngain tti nihi:
―Ẍaonha, janha ojointtatjañaha cain tti jianha que jaha rrica.
3Co cainxin ximaestroe ley Israel que te nttiha vintteẍaxaon xa: “Nchaoha tti jinichja xí jihi; Dios tsoñaohe xa.” 4Pero Jesús ovenohe tti teẍaxaon xí mé, co jehe ndac̈ho ngain xa:
―¿Quedonda anto jianha tti jaha ra ẍaxaon ra? 5¿Quexehe tti icha tanguiha rroc̈hjan: “Ovitjañaha jaha cain tti jianha que joinchehe”, o rrondac̈hjan: “Dingattjen co sattjixin rottea”? 6Nchao remé, janha tsjagoha ra que janha, tti Xí que joixin de ngajni, chonda joachaxin nttihi ngataha nontte para nttatjañá chojni tti jianha que nchehe na.
Cottimeja ndac̈ho Jesús ngain tti c̈hoha vacji mé:
―Dingattjen co tsinhi camillá co sattjixin rottea para nchiandoi.
7Co ngain rato mé jehe tti c̈hoha vacji, vingattjen co sacjoi para nchiandoha. 8Co cain chojni que te nttiha are vicon na milagro jihi, jehe na vintteẍaon na co ndac̈ho na que ixin Dios jian ixin joanjo joachaxin mé ngain chojni.
Jesús nichjé Mateo
(Mr. 2.13‑17; Lc. 5.27‑32)
9Cottimeja Jesús sacjoixin de nttiha, co ngatja nttiha Jesús vicon Mateo tají ngaca mesa tti jinchexin cobro cain impuesto. Co Jesús ndac̈ho ngain:
―Ẍacoi, chjin na.
Co ngain rato mé jehe Mateo vingattjen co sacjoi conixin Jesús.
10Co después Jesús tajine ngain nchiandoha Mateo. Co nttiha conchienhe tsje xicobrador de impuesto, co icha chojni que nchehe jianha, co cain nimé joine na ngain mesa conixin Jesús conixin cain chojni que jehe vacao. 11Pero canxion xifariseo vintteguicon xa jihi, co después vinttejanchiangui xa ngain tti chojni que vacao Jesús co vinttendac̈ho xa:
―¿Quedonda ximaestroa ra jinecaho xa cain xicobrador de impuesto, co icha chojni que nchehe jianha?
12Jesús coinhi jihi, co jehe ndac̈ho ngain xa:
―Chojni que niha, chojni mé rrogondeha xincheẍoan, jeho tti chojni nihi, mé tti rrogondehe xincheẍoan. 13Sattji ra co diquinxin ra quehe rroc̈ho tti parte ngain Palabré Dios que jitaxin: “Janha rinaho que jaha ra tsiaconoehe ra chojni, co nahi ixin sonhe ra coxigo para tsín ra para ixin janha.” Mexinxin janha joiha para joinichjá chojni jian, sino que janha joihi para joinichjá chojni jianha para que tsentoxinhi na de tti jehe na tenchehe na.
Are joanchianguihi na Jesús ixin quedonda chojní jehe dinttecjañoha na
(Mr. 2.18‑22; Lc. 5.33‑39)
14Cottimeja chojni que vacao Juan, tti vancheguitte chojni, conchienhe na ngain Jesús co ndac̈ho na:
―¿Quedonda janha na, conixin cain xifariseo anto dinttecjáño na para ixin Dios, co chojni que c̈hjiho jaha dinttecjañoha na?
15Jesús ndac̈ho ngain na:
―¿Apoco cain chojni que ttji ngain ná vandango tti tottehe na nchao sinttecjáño na si xinovio ẍa jí xa ngayehe na? Pero, ján, tsí tiempo que xinovio satsjixin xa de ngain na, cottimeja jehe na sinttecjáño na.
16’Ẍonhi chojni tteyehe lontto naroa ngain rioho lontto nttaxí, ixin lontto naroa ndadixehe co ndattinchje lontto nttaxí, co tti diguichje icha tojie. 17Ni cai ẍonhi chojni ttequia ẍan que jidatsoxinhi ngá ná roanẍan nttaxí ixin ẍan mé anto daca tsonc̈hintaon ẍan roanẍan mé, co cayoi cosa mé ndasitján. Mexinxin ẍan que jidatsoxinhi siquia ẍan ngain ná roanẍan naroa para que sitjanha cayoi cosa mé, ixin roanẍan mé sichjeha co ẍan mé singoha ẍan. Jañá tti costumbre que jaha ra chonda ra jiha de acuerdo ngain tti janha rrindattjo ra.
Are xingamehe xannc̈hichjenhe Jairo conixin tti nc̈hí que catte lonttoe Jesús
(Mr. 5.21‑43; Lc. 8.40‑56)
18Jesús ẍa jindac̈ho cain palabra yá are joí ná xí que ttetonha ngain nihngo nttiha. Vettoxin nttajochjihi xa ngain Jesús co ndac̈ho xa:
―Ná xannc̈hichjanhna jaxon joexin ndavenhe xan. Pero si soixin sihi co tsín rá ngataha xan, jehe xan rrocjan rroxechon xan iná.
19Jesús vingattjen co sajoicao xí mé conixin tti chojni que vacao. 20Co are ongatja nttiha conchienhe ná nc̈hí que ovechonda tteyó nano que veguenguihi nc̈ha jni. Jimao conchienhe nc̈ha toenxin Jesús co catte nc̈ha ngandehe tti manta que jitsá, 21ixin jehe nc̈ha ẍaxaon nc̈ha: “Conixin jeho rrocatte lonttoe Jesús, janha rroxingamana.” 22Pero Jesús ngaria co jehe vicon nc̈hí mé, co ndac̈ho ngain nc̈ha:
―Ẍaonha, jaha oxingamaha ixin vitticaon.
Co desde ngain rato mé, nc̈hí mé ondaxingamehe nc̈ha.
23Co después are Jesús joiji ngain nchiandoha xí que vaquetonha ngain nihngo, Jesús vicon que onttiha te ximusico para sasicjavá na xannc̈hichjan mé. Co icha chojni anto tetsjanga na. 24Jesús ndac̈ho ngain na:
―Dac̈hjexin cain ra de nttihi, ixin xannc̈hichjan yá jeha ndadiguenhe xan, jeho tajijoa xan.
Cain chojni nttiha cjoanoa na Jesús ixin jehe ndac̈ho jañá. 25Pero jehe coetonhe na que vac̈hjexin na de nttiha, cottimeja jehe joixinhi co tsehe rá xannc̈hichjan mé, co jehe xan vingattjen xan. 26Co ngoixin región mé anto daca conohe chojni de ixin tti milagro jian que joinchehe Jesús.
Jesús joinchexingamehe yó xí que vaguiconha
27Are Jesús sacjoixin de nttiha, rroé yó xí que vaguiconha co vinttendac̈ho xa sén:
―¡Ttiaconoana ni ra soixin, tti razé David co tti chonda joachaxin que vechonda rey David!
28Co are Jesús joixinhi nchiandoha, jehe cayoi tti vaguiconha mé vintteconchienhe ngaca Jesús co jehe joanchianguihi cayoi xí mé:
―¿Aditticaon ra que janha nchao sinttaẍoán jmacon ra?
Cayoi xí mé ndac̈ho xa:
―Ján ditticanho na que soixin nchao sincheẍoanna ni ra.
29Cottimeja Jesús catte ngataha jmacon cayoi xí mé co ndac̈ho:
―Tsonhe inchin jaha ra ditticaon ra.
30Co ngain rato mé ndaxingamehe jmacon cayoi xí mé. Cottimeja Jesús anto coetonhe xa co ndac̈ho ngain xa:
―Ẍonhi chojni ttequinhi ra quehe conha ra.
31Pero are sacjoixin xa de nttiha, jehe xa coexinhi xa coequín xa chojni ngoixin región mé tti joinchehe Jesús.
Jesús joincheẍoenhe ná tti c̈hoha vanichja
32Are cayoi xí mé tedac̈hjexin xa de nttiha, canxion chojni joiaohe na Jesús iná xí que c̈hoha vanichja ixin vechonda ná espíritu jianha. 33Are Jesús joantsje espíritu jianha mé, jehe tti xí mé coexinhi nichja. Cain chojni que vicon nttiha vinttegoan na admirado co ndac̈ho na:
―Nttihi Israel ẍonhi tiempo vocon na ná cosa inchin jihi.
34Pero xifariseo vinttendac̈ho xa:
―Xí jihi nchao dengui xa espíritu jianha de ixin joachaxín Satanás ixin Satanás tti ttetonhe cain espíritu jianha.
Jesús ttiaconoehe cain chojni
35Jesús vacji ngain cain ningoe cain rajna nttiha co ngain ningoe cain rajnanchjan para vandache chojni de ixin Dios. Jehe vandac̈ho tti jian joajna de ixin queẍén ttetonha Dios, co vanchexingamehe cain chojni que vinttechonda quexeho chin. 36Are Jesús vicon cain chojni jihi, jehe coiaconoehe na ixin jehe na chonda na joachjaon co tedoan na desanimado inchin coleco que chondaha va tti ttingaria va. 37Cottimeja jehe ndac̈ho ngain tti chojni que vacao:
―Ján ndoa, que cosecha atto tsje pero ninchehe ẍa tsjeha na. 38Mexinxin ndache ra Xinajni que rrorroanha Xa icha ninchehe ẍa para que satse na cain cosecha jihi.
Àwon tá yàn lọ́wọ́lọ́wọ́ báyìí:
SAN MATEO 9: plsNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 1982, Wycliffe Bible Translators, Inc.
