San Marcos 14

Okitemojkej kenik kimiktiskej in Jesús

(Mt. 26:1-5; Lc. 22:1-2; Jn. 11:45-53)

1Sa ome tonale opoliwia para ilwitl de pascua nijkuak mokua in pan katlej mach kipia levadura. In saduceos iwan tlamachtijkej de itlanawatil in Moisés, okitemoliayaj in Jesús kenik welis kikitzkiskej ika tlakajkayawalistle iwan ijkón kimiktiskej. 2Pero okimolwiayaj:

―Mach tikitzkiskej itech ilwitl para amo kualaniskej in tlakaj iwan yomoniskej.

Se siwatl okiteekilij ajwiakayotl in Jesús ipan itzontekon

(Mt. 26:6-13; Jn. 12:1-8)

3Jesús oyeka itech pueblo de Betania ichan Simón katlej okipiaya se kokolistle, katlej opalania inakayo. Jesús ijkuakón oewatoka itech mesa, oejkok se siwatl kiwalkui se boteyajtzin de alabastro tentok de ajwiakayotl de nardo katlej kuale iwan patíoj, okitlapanke in boteyajtzin iwan okiteekilij in ajwiakayotl ipan itzontekon in Jesús. 4Sekimej katlej ompa oyekaj okualankej iwan okimolwiayaj:

―¿Tlanik san okawiltij in ajwiakayotl? 5Welini monamakani patíoj ken tlan kitlani se tlakatl katlej tlapalewia de se xiwitl, iwan se kinmakaskia in tomin katlej pobrestin.

Iwan okajwakej chikawak in yon siwatl. 6Jesús okijtoj:

―Xikkawakan, ¿tlanik ankajwaj? Yej kuale tlan onechtoktij. 7In pobrestin nochipa ankinpiaskej iwan welis ankinpalewiskej san keman ankinekiskej, pero Nej mach nochipa annechpiaskej. 8Yin siwatl okichij tlan owelik. Yonechajwialij para ijkuak nimotookas. 9Ipan melajka namechilwia ke nian nepa ixko yin tlaltikpak, kan motematiltis in tlajtole katlej temakixtia, noijki motematiltis tlan okichij in yin siwatl iwan ijkón se kelnamikis.

Judas okitemaktij (okitemaktilij) in Jesús

(Mt. 26:14-16; Lc. 22:3-6)

10Judas Iscariote, se de yen majtlaktle iwan omen, oyáj okinmitato in tlayekankej tiopixkej para kinmaktilis in Jesús. 11San niman nijkuak okikakej, opakej iwan okilwijkej kimakaskej tomin in Judas. Ijkón yej okitemoaya keman okachi kuale para kinmaktilis in Jesús.

Tiotlakantlakuale de toSeñor

(Mt. 26:17-29; Lc. 22:7-23; Jn. 13:21-30; 1Co. 11:23-26)

12Nijkuak opéj ilwitl de pascua yakin se tonale, nijkuak mokua in pan katlej mach kipia levadura, nijkuak noijki okimiktiayaj in ichkatzin de pascua, in momachtijkej okitlajtlanijkej in Jesús:

―¿Kan tikneki ma tikyektlalitij in tiotlakantlakuale de pascua?

13Ijkuakón okintitlanke omen imomachtijkawan okinmilwij:

―Xiwian itech pueblo, ompa ankajsitiwej se tlakatl katlej kitki iatekon. Xiwian iwan. 14Iwan kan ajsiti ompa xiktlajtlanikan iteko in kale: “In Tlamachtij tlajtlani: ¿Katlij yen kuarto kan nikuas in tiotlakantlakuale de pascua inwan nomomachtijkawan?” 15Yej amechititis se kuarto weyi katlej kajki ajkopan iwan ya tlayektlalitok. Ompa xikchiwakan in tiotlakantlakuale de pascua.

16In momachtijkej okiskej iwan oyajkej itech pueblo. Okajsitajsikej nochi ken Jesús okinmilwij iwan okichijkej in tiotlakantlakuale de pascua.

17Nijkuak owaltlatleyuak, Jesús iwan majtlaktle iwan omen imomachtijkawan oejkokej kalijtik. 18Nijkuak otlakuajtokaj ipan mesa, Jesús okinmilwij:

―Ipan melajka namechilwia, nik se de amejwan katlej nian nowan tlakuajtok, nechtemaktis (nechtemaktilis).

19Yejwan omoyolkokojkej iwan opéj kitlajtlaniaj se por se:

―¿Kox nej?

20Jesús okinmilwij:

―Se de yen namejwan anmajtlaktin iwan amomen, katlej kajakia ipan ijtik in plato kan Nej noijki nikajakia. 21Nej katlej onimochij nitlakatl nipanos ijkón ken kijta in tiotlajkuilole, pero ¡pobre akin nechtemaktis (nechtemaktilis)! Mejor amo tlakatini.

22Nijkuak otlakuajtokaj, in Jesús okitilanke in pan iwan omotlasojkamatke inawak Dios. Okipojpostekke in pan iwan okinmajmakak imomachtijkawan, iwan Jesús okijtoj:

―Xikkuakan, yin yen notlalnakayo.

23Ijkuakón okitilanke in kopa iwan omotlasojkamatke inawak Dios, satepan okinpanoltilij imomachtijkawan iwan nochtin okonikej. 24Okinmilwij:

―Yin yen noeso, katlej yankuik akuerdo inawak Dios, katlej toyawis para miekej. 25Ipan melajka namechilwia, ke mach ok nikonis iayo uvas asta itech nekáj tonale nijkuak nikonis iayo uvas yankuik katlej onkaj kan Dios tlanawatia.

Pedro okijtoj mach kixmati in Jesús

(Mt. 26:30-35; Lc. 22:31-34; Jn. 13:36-38)

26Satepan de okitlakuikakej se tiotlakuikale, oyajkej ipan Olivostepetl. 27Ijkuakón Jesús okinmilwij:

―Namejwan aminochtin annechkajtewaskej noselti, porke kajki ijkuilitok kijta: “Nikmiktis in tlajpixke iwan ichkamej xixiniskej.” 28Satepan de ijkuak nimoyolkuis (nimoyolitis), namechyekanas ik estado de Galilea.

29Pedro okijtoj:

―Maski nochtin ma mitzkajtewakan, nej mach nimitzkawas.

30Jesús okilwij:

―Ipan melajka, yin yuak antes de tzajtzis in kaxtil ome buelta, tej ijkuakón yotikijtoj ya eyi buelta nik mach tinechixmati.

31Pedro okachi omochijchikawaya:

―Maski mowan ma nechmiktikan, nej mach keman nimitzkawas.

Iwan nochtin ijkón okijtojkej.

Jesús omotiotzajtzilij kan tlatokkuawyoj itoka Getsemaní

(Mt. 26:36-46; Lc. 22:39-46)

32Satepan oyajkej ik tlatokkuawyoj kan kilwiaj Getsemaní, iwan Jesús okinmilwij imomachtijkawan:

―Ximotlalikan nian mientras Nej niawi nimotiotzajtziliti.

33Okinwikak in Pedro, Jacobo iwan Juan, iwan opéj moyolkokoa iwan opéj mosentiroa sa tekitl. 34Okinmilwij:

―Nikmachilia itech noanima ya niixpoliwi de neyolkokole. Nian ximokawakan iwan xiijsatokan.

35Oyáj achitzin ik tlayakapan, ompa omotlankuaketzke asta okitennamikke in tlale. Iwan okimotlatlawtilij in Dios, tla kualtini, amo ma kawili ma pano tekokojkayotl itech nekáj ora. 36Itech itiotzajtzilis okijtoj:

―Abba, Papan, tejwatzin nochi tiweli tikchiwa, xinechkixtili yin tekokojkayotl, pero amo ma mochiwa ken Nej nikneki, sino ken tejwatzin tikmonekiltia.

37Satepan omokuepke kan oyekaj eyin imomachtijkawan iwan okinmajsito kochtokej, iwan okilwij in Pedro:

―Simón, ¿tikochi? ¿Amo otikxikoj tiijsatok nion se ora? 38Xiijsatokan iwan ximotiotzajtzilijtokan, para amo ma amechmayawi in tlajtlakole, namoespíritu kineki kichiwas tlan kuale, pero namotlalnakayo mach tlaxikoa.

39Jesús oyáj oksemi omotiotzajtzilito iwan oksemi okijtoj tlan achtoj yokijtoj. 40Nijkuak omokuepato, oksemi okinmitajsik kochtokej porke inpan omopachoj in kochilistle. Iwan mach ok okimatiaj tlan kijtoskej. 41Nijkuak omokuepato ya eyi buelta, okinmilwij:

―¿Ankiseguiroaj anmosewiaj iwan ankochij? ¡Xiijsakan! Yoajsik ora, porke Nej katlej onimochij nitlakatl ya nechtemaktiskej (nechtemaktiliskej) inmak in tlakaj tlajtlakolejkej. 42¡Ximewakan ma tiwian! Xikitakan, ya ompa witz katlej nechtemaktis.

Jesús okikitzkijkej

(Mt. 26:47-56; Lc. 22:47-53; Jn. 18:2-11)

43Jesús ok otlapojtoka iwan ijkuakón oejkok in Judas, se de yen majtlaktle iwan omen imomachtijkawan, kualinwika miekej tlakaj kiwalkuij espada iwan kiwalkuij kuawitl. In yonmej tlakaj okualintitlankej in tlayekankej tiopixkej, in tlamachtijkej de itlanawatil in Moisés iwan tlayekankej tetajtzitzintin. 44Iwan Judas antes de kitemaktis (kitemaktilis) in Jesús, ijkín okinmilwij in tlakaj:

―Akin nej nikixpipitzos yen yon Jesús, xikitzkikan kuale iwan xikwikakan.

45Niman nijkuak oejkok in Judas, omijkuanij inawak Jesús iwan okilwij:

―¡Tlamachtij!

Iwan ijkuakón okixpipitzoj. 46San niman ijkuakón omijkuanijkej in tlakaj iwan okitzkijkej in Jesús. 47Pero se imomachtijkaw in Jesús okikixtij iespada iwan okinakastzontekke itekipanoj in weyi tiopixke. 48Iwan Jesús okinmilwij:

―¿Tlanik anwalajkej annechkitzkikoj ika espada iwan ika kuawitl? Mach niichtekke. 49Nochipa onieka amowan itech in weyi tiopan onitlamachtijtoka iwan mach keman annechkitzkijkej. Pero ijkín nipanoa para ma mochiwa tlan kijta in tiotlajkuilole.

50Nochtin imomachtijkawan ochocholojkej iwan okikajtejkej iselti in Jesús.

51Se telpochtle ompa oyaya otlakentitiaya san ika se sábana katlej kuale, pero nijkuak okitzkijkej, 52omoxolkopinke iwan ocholoj sa xitlatztik.

Jesús okiwikakej kan tlaixkomakaj (tlatzonmanaj)

(Mt. 26:57-68; Lc. 22:54-55, 63-71; Jn. 18:12-14, 19-24)

53Okiwikakej in Jesús imak in weyi tiopixke, iwan omololojkej in tlayekankej tiopixkej, in tlayekankej tetajtzitzintin iwan tlamachtijkej de itlanawatil in Moisés. 54Pedro oyaya san wejka iwan omokaj kan patio de yen ichan in weyi tiopixke, iwan ompa omotlalij omototonijtoka itech tlikuile inwan sekimej tlamonekuitlawijkej de ompa.

55In tlayekankej tiopixkej iwan nochtin katlej tlatlanawatijkej tlaixkomakakej (tlatzonmankej), okistlakawiayaj ika san tlan amo, tlan ika welis kimayawiskej in Jesús iwan ijkón kualtis kimiktiskej, pero mach itlaj okajxiliayaj. 56Miekej okijtojkej tlan amo melawak (tlen amo ijkón). Sekimej okijtoayaj se tlamantle iwan oksekimej okijtoayaj oksé tlamantle. 57Sekimej tlakaj mach kualtin omoketzkej iwan okistlakawijkej in Jesús okijtojkej:

58―Tejwan otikkakej okijtoj: “Nikxitinis yin weyi tiopan katlej okichijkej in tlakaj, iwan san ika eyi tonale nikkewaltis oksé katlej mach akaj tlakatl kichiwas.”

59Maski ijkón okijtoayaj mach oajsiaj san se tlajtole. 60Ijkuakón omoketzke tlatlajko in weyi tiopixke iwan okitlajtlanij in Jesús:

―¿Amitlaj tikijtos de tlan yinmej mitzistlakawiaj?

61Jesús mach otlanankilij. Iwan in weyi tiopixke oksemi okitlajtlanij:

―¿Yen tej tiCristo titeKone de Dios katlej tikweyitenewaj?

62Jesús okinankilij in weyi tiopixke:

―Aján, yen Nej, iwan namejwan annechitaskej Nej katlej onimochij nitlakatl niewatos ik iyekma in Dios katlej kipia weyi ipoder, iwan namejwan annechitaskej niwitz de ilwikak ijtik mixtle.

63Iwan in weyi tiopixke omotlakentzayanke iwan okijtoj:

―¿Tlan para moneki okachi ankistlakawiskej? 64¡Namejwan ya ankikakej nik otlajtoj kej yeskia yen Dios! ¿Tlan ankijtaj?

Nochtin okijtojkej nik tlajtlakolej iwan moneki ma kimiktikan. 65Sekimej opéj kichijchijchaj, okixilpiayaj iwan okimaitemayaj, iwan okilwiayaj:

―¡Tla xitlajto (xikadibinaro), akin omitzmaak!

Iwan mayoltin noijki okixtlajtlatziniayaj.

Pedro okijtoj mach kixmati in Jesús

(Mt. 26:69-75; Lc. 22:56-62; Jn. 18:15-18, 25-29)

66Pedro oyeka tlatlampa kan patio, iwan ik ompa opanok se siwatl itlapalewij in weyi tiopixke. 67Nijkuak okitak in pedro mototonijtok, omoketzke iwan okitlatak, iwan okijtoj:

―Tej noijki otinemia iwan Jesús de pueblo de Nazaret.

68Pedro mach okimokuitij iwan okijtoj:

―Mach nikixmati iwan nion mach nikmati tlan tikijta.

Iwan okiske ik kalan iwan ijkuakón otzajtzik in kaxtil. 69In tlapalewijkasiwatl, oksemi okitak in Pedro iwan opéj kinmilwia katlej ompa oyekaj:

―Yin se de yejwan.

70Pedro oksemi mach okimokuitij. Ok achitzin satepan, katlej ompa oyekaj oksemi okilwijkej in Pedro:

―Ipan melajka, tej se de yejwan, porke in tej noijki de estado de Galilea.

71Ijkuakón Pedro opéj tlawikaltia iwan okijtoj nik in Dios tlachixtok nik melawak tlan kijta. Okijtoj:

―Mach nikixmati yon tlakatl katlej namejwan ankitenewaj.

72Ijkuakón in kaxtil otzajtzik oksemi. Pedro ijkuakón okelnamikke tlan achtoj okilwijka in Jesús: “Antes de tzajtzis in kaxtil ome buelta, tej ijkuakón yotikijtoj ya eyi buelta nik mach tinechixmati.” Iwan ochokak sa tekitl.

Àwon tá yàn lọ́wọ́lọ́wọ́ báyìí:

San Marcos 14: nhy

Ìsàmì-sí

Pín

Daako