Masmur 5
5
Sambaya Amisye anajo indamu tuna inautan
1Masmur Daud po ratoe. Nto irati akari po vatano matayao ukiny maugavo ransyerane rai ai. Ukiny dai, wo suline ramawisyo rai.
2Sya AMISY, syare namarikoame rasakinade sya ana danajo ore so rai,
sya anonae mamo syare Nyo ranaun.
3Sya Amisy, Winyirati sya Akari Titi,
syare Nyo sya anonae raraniv muno Nyo rinaeno rai,
weye Wibuiny irati sya sambaya so raura ore Nai.
4Sya AMISY, arono akane ntipu, Winyi Nyo sya ana daura ore Nai ranaun.
Arono awatan ngkov, sya ana idanajo ratodi nanentabove ore Winai,#5:4 Kuruno Ayao Amisy inta wo ratantona ware ayao Ibrani ama ine maisyare so: ‘‘arono akane ntipu, syo anakotare ratayao indamu syo rameseo Nai.’’
muno syo Nya ana ndaura akare rinaije ranyut.
5Weye Winyamo Amisyo nyonae irati ana ngkakainoanive rai,
vatano mamune nawamo nyonae ude umararai Winaiji.
6Vatano mararine nawamo umamaisyo usayae no namune ramu,
muno Winyamo nanuga mamuno vatano awa ana udave mamune mai.
7Vatano wo aarurijate rakedije nawamo, Winyo maupaeta vintabo,
vatano maneme nijam muno wo anapamponae rave nawamo, AMISY winanuga mamuno mai.
8Yara risyamo syore siso no Nya Yavar,
weye Winyamo Nya muinyo no tawane manakoe rave.
Rinamumbeto no tanoano ndandinit,
ribeaje irati Nai inanuga mpayaje rai, weye syo nasyaniv.
9Sya AMISY, syare Nyo inaugavo Nya mbekere raron, mamaisyo Nya ananyao rai,
weye sya marova wanui rave.
Syare Nyo Nya unanuijo nsarokire ratayao da syanya rai.
10Sya marova awa ana udaura mamo ayao mamaisye ma jewen,
mansanuga mamo ntairijo ana ngkakainoanive rai.
Awa ayao muje no mansanuga rai mamo ngkakainoanive,
maisyare vatane anasino kopa mandami ti mbaug no aipapo wemaisy.
Aarurijate ntairi mansawa rai.#5:10 Aneme so ama ayao inta ratoe akato no Roma 3:13.
11Sya AMISY, awa ayao kakai mamo koveamo Nyo ama mangke raude mai ra wo ranawan,
koveamo awa ana wo ratantona ti ngkakai so raugakare ra mo taune makep asyo.
Syare Nyo mavakano marambe, weye awa ayao kakai manui rave,
muno wonae ubeta Winaiji.
12Yara koveamo vatan tenambe ugaugambe Nai nawamo mansananibe,
syare ukinyo manamoto manakoe rai, umananibea ntoa nuge nuganui.
Syare Winyi no mansaora kijani,
indamu vatano umuinyo Nai mananibe weye Nya ura mai.
13Weye AMISY, Nyo kove raude irati vatano ubeta Nya ananyao rai mai,
Winyi ndarino maora irati Nya muinye rai,
maisyare naite apa vakano no aora wemaisy.
Àwon tá yàn lọ́wọ́lọ́wọ́ báyìí:
Masmur 5: yva
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)