Mark 7
7
Nakuaa Keakua ehananiu iluna nakipukipu nakama
(Mat 15.1-9)
1NaFarasi ia ma nakama epolopolo nakuaa la eo aꞌe ikaha ma Jerusalem noꞌuku lakou ma Jesus. 2Nakama la eꞌike pela nakama kaukali Jesus la sekaukali nakipukipu lakou imua. Eme pela nakama kaukali la sesolo nalima lakou imakahua imua lakou eꞌai.
3NaFarasi ia ma na{Jiu} la ekaukali nakipukipu nakipuna lakou imua. Ia kena poi nakama la sesolo nalima lakou, kena nakama la selavaa keꞌai. 4Keualoko nakama la esui naꞌai lakou i ke{makete}, nakama la esolo naꞌai la*f6* imua lakou eꞌai. Ia nakama la ekaukali komaꞌi namakeala lakou imua la hoi. Nakama la esolo na{kapu} ia ma na{ketolo} ia ma na{suspeni} nomakahua.
5Kena naFarasi ia ma nakama epolopolo nakuaa la eme aꞌe Jesus, “Okea nakama kaukali aꞌoe la sekaukali namakeala nakipuna kakou imua laea? Okea nakama la eꞌai naꞌai, ia nalima lakou la eꞌele.”
6Kena iko Jesus ime aꞌe “Okou ekakala uhiuhi. Hea Isaiah nikakaa mai imua nohuli aꞌe nakipukipu okou la ame konu oia.
‘Nakama na emea ma lakou ehamaha i anau,
Ia nahakaꞌoko lakou emao haeꞌo ikaha manau.
7Nakama na ehamalumalu i anau
Ia lakou hamalumalu vale oia,
Maikinimea nakama na epolopolo nakuaa nakama oia.’
8Ia okou ekiaꞌi nakuaa Keakua, kena ihalono namakeala nakama oia.”
9Kena Jesus eme aꞌe nakama la, “Okou sehalono nakuaa Keakua. Emeia okou ekaukali namakeala okou soꞌokou la oia. 10Moses eme mai, ‘Hamaha kamana ia ma kina aꞌoe.’ Kama la eme mai hoi, ‘Pena hekama kakala saꞌino kamana ia ma kina aia la, okou ukaa kama la imake.’ 11Ia okou eaoaꞌo aꞌe alakama ikakala aꞌe namakua lakou la ma, ‘Anau eisi namea iau aku olua. Ia ala nimea anau amehoꞌi aꞌe Keakua.’ 12Saika okou ekakala penei, okou epui kama la isekonaꞌi kamana ma kina aia la. 13Ia kena okou eaoaꞌo nakama hakoa nokiaꞌi nakakala Keakua. Okou eaoaꞌo nakama la nokaukali namakeala nakipuna okou la oia. Ia okou epena komaꞌi haeꞌo namea pela hoi.”
Namea kela emea kekama ihaisala
(Mat 15.10-20)
14Jesus eanaa aꞌe keonohenua la ivaꞌai halaoi, kena ime aꞌe, “Okou hakoa ihalono mai anau, ia ailoa laoi nakakala anau nei. 15-16Namea kela eo iloko kekama semea kama na ihaisala. Emeia namea kela esopo mai ikaha ma kekama, namena emea kekama ihaisala.”
17Jesus uhaele ikaha ma keonohenua la nonoho iloko hale. Kena nakama kaukali aia la evasili aꞌe aia kehakaꞌoko kakala hulihuli la. 18Kena iko Jesus ime aꞌe, “Okou seailoa? Naꞌai kekama eꞌai semea kama la ihaisala. 19Maikinimea naꞌai okou eꞌai la seo iloko nahakumanava okou. Naꞌai la ekaꞌa iloko keopuu avale. Kena uoki, upesia.” (Kulana Jesus ekakala penei, kama la emea ma naꞌai hakoa ekaualeꞌa keꞌai, sehimesala.)
20Kena Jesus ekakala hoi ma, “Namea kela esopo iho ikaha ma nakama, namea la emea nakama la ihaisala. 21Nakipukipu saꞌino esopo iho ikaha ma nahakumanava nakama. Kela hea nakama la ehakekele saꞌino, ia epaa huli. Nakama la eailalao, ekaa kama, ia sekino naꞌavana lakou. 22Nakama la aimake, kena enonoho haeꞌo ma nakama lakou. Nakama la ehailavaꞌa, kena ihai huli. Nakama la emanava sano, kena eveuveꞌu alakama. Nakama la eahu, kena evale haeꞌo. 23Nakipukipu saꞌino la hakoa esopo iho ikaha ma kekama, ia ala nimea kela emea kama na ihaisala.”
Jesus ekonaꞌi kehine enoho pouli
(Mat 15.21-28)
24Jesus ehaele ikaha ma kemakaꞌina la, nokae keꞌina kapili aꞌe Tyre laua ma Sidon. Kena kama la ehaele iloko kehale, ia sehihai ma nikama imakino keꞌina hee aia enoho. Ia niaina Jesus ehasili nohaele iloko hale la, nakama la esee nolave oia. 25Saika la hehine elono pela Jesus enoho ilaa. Kamaliꞌi hine aia la eisi kipua saꞌino iloko aia. Kena kina kamaliꞌi la uhaele nohamalu imua Jesus. 26Kehine la hekama enoho pouli, hehine Greek, ehanau mai i Phoenicia iloko Syria. Kehine la eainoa aꞌe Jesus ihaise kipua saꞌino la ikaha ma kamaliꞌi hine aia la. 27Ia kena Jesus ume aꞌe kehine la, “Anau ame hanai nakamaliꞌi la ipohu imua, maikinimea sekonu pela anau eko naꞌai nakamaliꞌi la iau aꞌe napoi.”*f7*
28Ia kehine la ume aꞌe, “Ekonu Kealiꞌi. Ia napoi emoe kaꞌele la elavaa keꞌai namanunu kela nakamaliꞌi la seꞌai.”
29Kena Jesus ume aꞌe, “Hakaꞌoko na ekonu. Haele i hale, kipua saꞌino na ukele ikaha ma kamaliꞌi aꞌoe la.”
30Ia kena kehine la uvaꞌai i hale, noꞌike kamaliꞌi la ukaualeꞌa, emoe iluna kelomoena aia la. Kipua la ukele ikaha.
Jesus ekalaꞌi naakalina kekama ekuli nolono
31Kena Jesus uhaele ikaha ma kemakaꞌina kapili Tyre, kena ihaele valoko Sidon, nokae kemoana i Galilee, kena ihaele i keꞌina Decapolis.*f8* 32Nakama kemakaꞌina la ehakaꞌi aꞌe kekama naakalina ekuli ia Jesus, ia kama la ulavaa kekakala hamalie ia. Kena nakama la eainoa aꞌe Jesus ihapili kelima aia iluna kama la ikaualeꞌa. 33Ia kena Jesus eko kama la, io ikaha ma keonohenua la, kena ikalo samakalima aia iloko naakalina kama la. Jesus esavale namakalima aia hoi, kena ikaohi kealelo kama la. 34Jesus uꞌila iluna, iko kemanava aia, kena ime aꞌe kama la i nakakala kemakaꞌina la, “Efatha” (Eme ma, Kalaꞌi.)
35Saika la, kama la ulono, kealelo aia ukaualeꞌa, kena kama la ukakala konu.
36Ia Jesus ehamakaꞌu aꞌe nakama la isekakala hea aia epena. Ia niaina Jesus ekauhano aꞌe pela lakou isekakala, nakama la eo nokakala oia. 37Nakama la hakoa umasalo haeꞌo, kena ikakala solakou, “Namea hakoa kama nei epena nei, ekaualeꞌa. Nakama nakalina lakou ekuli la ulono, ia nakama seailoa kekakala la ukakala.”
Àwon tá yàn lọ́wọ́lọ́wọ́ báyìí:
Mark 7: ojv
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 1999, Wycliffe Bible Translators, Inc. All rights reserved.
