Matta 3
3
Hiwata Yohana nzə-ɗa batisɨmatə
(Markus 1.1-8; Luka 3.1-18; Yohana 1.19-28)
1A vor bətɨrə, Yohana nzə-ɗa batisɨmatə a dɨma ta hiwa ɓwaare le da Həmɨnpwa a vor kaakə Yawudiya 2ndi ta sarən atɨ, “Porom-njiya, gəkɨlə həmnə pwa sɨka.” 3Sɨnə ma kpale Ishaya a bwe le a nəngɨn atɨ,
“Kormə mangɨn nə
dɨ wagaha a vor kaake atɨ,
‘Ɗamdə tɨfe da Həmɨnpwa,
sɨnə ɗadə nzaasəwnə,
naa tɨfe a tɨɗə shant.’ ”#3.3 Naasə: Ishaya 40.3.
4Sɨɓwete Yohana a dɨ kala mya ɗatɨrən ka showo lukwaptə, nda ɓwe kada-mgbangɨn ka hinwa mya ɗa ka sɨlare, awyi ka njumwati nda dɨ zɨmə. 5Ɓwaare dɨ vor Urshelima ka vor njiya Yawudiya kat ka myee nza vɨree takadə gbɨnuwo Urdun, a dama a zə hakan. 6Tən ta bwegə səhase darən, ndi Yohana mgban ta ɗarən batisɨmatə a gbɨnuwo Urdun.
7Yohana ɓe naa Farise ka Saduke hananang dɨ shi hakan, a haa nda dɨ ɗa ɓwaare batisɨmatə də, nda sarən atɨ, “Hwun rokonyi hashe a je da səfwakshike! Ɓə wonə she gɨrarəwnə atɨ gyeɓəm gə hwuna mbəgə ɓashita Həmɨnpwa ite dɨ shi nəngəwna? 8Bɨləmdə sate atɨ hwun por-njiya ka səhase dəwnə. 9Ɓe hwunaa sa atɨ hwunə je da Ibɨraim gə-angɨn hwun ɓa ɗɨm mbətə. Diyalə na dɨ boyownə Həmɨnpwa nee ka gətə nda mɨndə faree təna gəə je da Ibɨraim. 10Di mye nggur shere ɓa ɗawgə kada kat ka kworyingɨn. Kadaa kat mbwosən aa wula, mye ɓa ɗawo a ɗongə ɗiye.
11“Hɨnggi hɨn na dɨ ɗa batisɨmatə ka haɓye ɓəmbə, gə nda bɨldə sate atɨ hwun por-njiya. Ndi ma dɨ kwaɗa beeshi, ɓə pɨrgi ka gətə, nagi hwanye dan nə, hɨn taa kəni na poro. Hɨnggən ndi ɓa ɗəwnə batisɨmatə ka Pitɨ Ɗəmɗəmtə ka ɗiye. 12Kpee sharashe dan nee a tɨfəngɨn ndi ɓa fiyagə kpərətə, nda shara shee, shifətə a dɨmə a ɗaka daase. Ndi ɓa ɗɨkdə daase a bongge, nda hina shifətə ka ɗiya aawa mbɨrə.”
Mye ɗa Yesu batisɨmatə
(Markus 1.9-11; Luka 3.21-22)
13Də Yesu a dɨma dɨ vor Galili a shi gbɨnuwo Urdun gə Yohana a ɗan batisɨmatə. 14Shezə Yohana a mwo atɨ nda kwo le, nda sa Yesu atɨ, “Hyenə kana hye ɗe batisɨmatə, ya hye ɓa mɨnashi hake yə?”
15Yesu a luwa a san atɨ, “Maa a nzasə ɓəgəng, gə sɨnə sa kana mya ɗa, gə mya naadə sa kat Həmɨnpwa a dɨ mwo.” Də Yohana aɓə mwa. 16Tee gbyel ite mya ɗa Yesu batisɨmatə, nda nggɨragə vor haɓye, də a hangɨn pwa a wunə bwang, nda naa Pita Həmɨnpwa dɨ janga a nəngɨn ɓətɨ nji-gulati. 17Korme dɨ vor pwa a sa atɨ, “Nze de nə anə, a na dɨ mwo, haa a dɨ nɨnyi kan kɨr-kɨr.”
Àwon tá yàn lọ́wọ́lọ́wọ́ báyìí:
Matta 3: bcy
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
