LUKA 17
17
1Iye wambile kuli tumbaji twenyi ngwenyi, Kuchahashile kupwa shina yitalingiso muyiza; alioze lamba kuli yoze mayineha! 2Hapwa ajichike liwe lia kutwa nalio ha kota yenyi, amumbile mu kalunga-lwiji, kuchina matalingisa umwe wa kuli wano akepe. 3Keyelenu kuli yenwene; kachi ndumbwe makuvulumuna, mukanjise; nyi kachi malikonyeka, umukonekene. 4Nyi kachi makuvulumuna yisuho shimbiali ha tangwa, ni yisuho shimbiali matewulukila cheka nawa kuli yena, ngwenyi, Ngunalikonyeka; ukamukonekene.
5Apostolo ambile kuli Mwene ngwo, Weza kama ku Ufulielo wetu. 6Mwene wambile ngwenyi, Kachi munupwa ni Ufulielo ngwe lunona wa mosetate; kachi munwamba ku musuwa uno ngwenu, Tangumuka, ulitumbe mu kalunga-lwiji; kumuunwononokena.
7Alioze iya hakachi kenu, mapwa ni ndungo yenyi kanachipi ni sharua, hanji kanafungu mapanga, muze meza ku zuwo ha kukatuka ku munda, mamba ngwenyi, Tweya kamunomuno, Utwame ku mesa; 8alioze Shinaho kechi kamba kuli iye ngwenyi, Lulika chize mungulia, lijichike muya, unguvumbike, hanga ngulie, ngunwe; mba kulutwe lia chize yena mukalia, mukanwa? 9Masakwila ndungo, mumu walingile yuma yize amwambile, nyi? 10Chizechene yenu nawa, muze hinwalinga yuma yize yeswe ananwambe, nukambe ngwenu, Tuli ndungo amokomoko; hitwalinga wika chize yapwa milimo yetu.
11Shimbu machikanduka ku Yerusaleme, wapalikile ndusu mu manjiza ja Samaria ni Ngalileya. 12Shimbu machinjila mu chimwe chihunda, kumi lia malunga akwa mbumba atakanyine nenyi, eno amanyine kusuku; 13o akololokele ngwo, Yesu, Mwata, tuvwile kama keke. 14Muze aamwene, wambile kuli ayo ngwenyi, Yénu, nukalilweze kuli asasendote. Shimbu machiya apemene ku musongo wo. 15Mba umwe wa kuli ayo, muze amwene ngwe wahindukile, wahilukile ni liji linene nikuchichimieka Zambi; 16iye wafulamanyine ku yiliato yenyi nikumusakwila, neye Ka-Samaria. 17Yesu, yamukumbulula, ngwenyi, Kuma, kahindwishile kumi, nyi? Mba livwa alihio? 18Kaawanyine niamwe akuhiluka nikuchichimieka Zambi, shina yono chilambala wika. 19Wambile kuli iye ngwenyi, Katuka, uye kwe, Ufulielo we hiwakupwisa mungunu.
20Muze A-Fwariseu amuhulile mwaka uze wanangana wa Zambi muwiza. Waakumbulwile ngwenyi, Wanangana wa Zambi kuushi kwiza ha kulayila. 21Chipwe kechi kamba ngwo, Talenu kuno! hanji, Talenu kuze! mumu wanangana wa Zambi mukachi kenu uli.
22Iye wambile kuli tumbaji twenyi ngwenyi, Matangwa kumakeza muze munukevwa usona wa kumona limwe lia ku matangwa ja mwe Mwana Mutu, alioze kunuchi kalimona. 23O makamba kuli yenu ngwo, Talenu kuno! hanji, Talenu kuze! kanda nukaya, chipwe kanda nukaakaula. 24Mumu chizechene ngwe muhenyo muze muuhenya, muupanguka sali ni sali ya malilu; chocho mwe Mwana Mutu makapwa ha tangwa lienyi. 25Alioze hatangu chamutamba kwivwa lamba linji, akalituneye ku chisemuko chino. 26Chizechene ngwe kwapwile ha matangwa ja Noe, chocho nawa muchikapwa ha matangwa ja mwe Mwana Mutu. 27Alile, anwine, ambachile, ahangishile ku malo, ndo tangwa lize Noe wanjilile mu ulungu, ni sanga lia meya liejile, likonwone eswe. 28Chizechene ngwe kwapwile ha matangwa ja Lote; alile, anwine, alanjile, alanjishile, atumbile, atungile; 29alioze ah tangwa lize Lote watuhukile mu Sondome kwanokene kahia ni fundanga mwilu, chonwene eswe; 30chizechene muchikapwa ha tangwa lize masolola mwe Mwana Mutu. 31Ha tangwa lize, yoze makapwa ha fulumba ya zuwo, ni yikwata yenyi mu zuwo, kanda akasunuka akayichize; ni yoze mapwa ku munda chizechene kanda akahiluka. 32Iwulukenu pwo lia Lote. 33Mweswe mafupa kulamwina mwono wenyi, kumakautokesa; ni mweswe mautokesa, kumakaulamwina. 34Ngwami, Ha ufuku uze kumukukapwa malunga aali ha muhela umuwika; makachiza umwe, makahichika mukwo. 35Kumukukapwa mapwo aali kanatu hamuwika, makachiza umwe, makahichika mukwo. 36Kumukukapwa aali ku munda, makachiza umwe, makahichika mukwo. 37O nikukumbulula, yamba kuli iye ngwo, Kulihi, Mwene? Iye wambile kuli ayo ngwenyi, Kuze mujimba uli kuze kwene pupa makakunguluka nawa.
Àwon tá yàn lọ́wọ́lọ́wọ́ báyìí:
LUKA 17: Csa
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Chokwe Bible © Bible Society in Angola, 1975.
