LUKA 15
15
1Achi, akwa kufwetesa lijimu eswe ni yivulumunyi apwile nikukundama kuli iye mukumwivwa. 2Mba A-Fwariseu ni akwa kusonyeka alinyenyetene ngwo, Yono kakutambula yivulumunyi, kakulia hamwe no.
3Iye wahanjikile kuli ayo chishima chino, ngwenyi, 4Mutu muka wa kuli yenu, se ali ni kulakaji lia mapanga, nyi kachi umuwika mamutoka wa kuli ayo, keshi kuhichika makumi livwa ni livwa mu puya, keshi kuya nikufupa yoze hatoka, ndo mamuwana? 5Mba muze hamuwana, mamusa ha yipaya yenyi nikuwahilila. 6Muze meza ku zuwo, matambika tusendo twenyi ni enyembo jenyi, alikungulule, ngwenyi, Wahililenu hamwe ni yami, mumu hinawana panga yami yoze wangutokanga. 7Ngwami, Chizechene uwahililo unene kumuukapwa mwilu hali chivulumunyi umuwika yoze malikonyeka kuhiana uze ha makumi livwa a akwa ululi ni akwa ululi livwa, waze kuchaatambile kulikonyeka.
8Hanji pwo muka mapwa ni kumi lia mbongo, kachi umuwika mamutoka, keshi kuwika ndeya, nikukomba mu zuwo, nikuhengula kanawa ndo mamuwana? 9Mba muze mamuwana, matambika tusendo twenyi, ni enyembo jenyi, alikungulule, ngwenyi, Wahililenu hamwe ni yami, mumu hinawana lumbongo yoze wangutokanga. 10Chizechene ngwami, Uwahililo kuuli kumeso ja angelo ja Zambi ha chivulumunyi umuwika yoze malikonyeka.
11Iye wambile ngwenyi, Umwe mutu wapwile ni anenyi aali a malunga: 12mwe kanuke wambile kuli tato ngwenyi, Tata, ngwehe chihanda chami cha chihinga. Iye wapulile kuli ayo yikumba yenyi. 13Mba kulutwe lia matangwa akepe, mwe kanuke wakungile yeswe, wakatukile akaye mu wenyi ku chifuchi kusuku, ni kuze wamwangine yikumba yenyi nikuhungumuka ni yipi. 14Muze te hahwisa yeswe, kwejile kapunga wa ngolo mu chifuchi chize; iye waputukile kuhona. 15Wayile, walinungine ni umwe wa kuli enya chifuchi chize, iye wamutumine ku minda yenyi mukulisa ngulu. 16Iye wevwile usona wa kukuchisa jimo lienyi ni yizungu yize apwile nikulialia ngulu; alioze kamuhele niumwe. 17Muze akwachile mana, wambile ngwenyi, Ngamba apwa haha a tata, ali ni mbolo ja kulumbama, ni yami ngunafu kuno ni zala. 18Mungukatuka, munguya kuli tata, mungukamba kuli iye ngwami, Tata, hingunavulumuna mwilu ni kumeso je; 19kuchatele kunguvuluka nawa mwané; ngupwise kama umwe wa kuli ngamba je. 20Iye wakatukile, wayile kuli tato. Alioze shimbu achili kusuku chikolo, tato yamumona, yamuvwila keke, yazomboka, yamukangayika mu kondo, yamumbeja chikolo. 21Mba mwanenyi wambile kuli iye ngwenyi, Tata, hingunavulumuna mwilu, ni kumeso je; kuchatele nawa kunguvuluka mwané. 22Alioze tato wambile kuli ndungo jenyi ngwenyi, Nehenu nikawashi mazalo apema ahiana, numujike; senu kazeya ku kwoko lienyi, jikenu haku ku molu jenyi. 23Nehenu mwana-ngombe yoze unatoho, numushihe; tulienu, tusehejelenu. 24Mumu yono mwanami wapwile mufu, kali ni mwono cheka nawa; watokele, mba hamuwana. O aputukile kusehejela.
25Achi, mwanenyi wa mukulwana wapwile ku munda; shimbu machiza akundame ku zuwo, wevwile liji lia kwimba, ni liji lia kuhangana. 26Watambikile kuli iye umwe wa kuli akweze, wamuhulile chize yino yuma muyipwa. 27Iye wambile kuli iye ngwenyi, Mwanakwenu heza, ni tatenu hashiha mwana-ngombe yoze unatoho, mumu hamutambula kawape nikuhinduka. 28Alioze iye watenukine, katayile kunjila; tato watuhukile, waliumbile kuli iye. 29Alioze wakumbulwile tato ngwenyi, Tala, miaka yipwa haha nakukulingila, mba nilimwe tangwa chatangwile shimbi ya yena; hindu kwanguhele mwana-pembe nilimwe tangwa, hanga ngusehejele ni tusendo twami: 30alioze muze yono mwané heza, yoze hanapuku yikumba ye ni yikoi, hiwamushihila mwana-ngombe yoze unatoho. 31Alioze wambile kuli iye ngwenyi, Mwanami, yena uli hamwe ni yami matangwa eswe, ni yuma yami yeswe niye. 32Alioze chatamba kusehejela nikuwahilila; mumu yono mwanakwenu wapwile mufu, mba kali ni mwono cheka nawa; watokele, mba hamuwana.
Àwon tá yàn lọ́wọ́lọ́wọ́ báyìí:
LUKA 15: Csa
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Chokwe Bible © Bible Society in Angola, 1975.
