LUKA 13
13
1Achi, kwapwileko amwe ha mwaka uze, waze amwambulwilile ha kutwala kuli A-Ngalileya, waze manyinga jo Pilatu wachingile ni yitapo yo. 2Yesu waakumbulwile ngwenyi, Nunashinginyeka ngwe wano A-Ngalileya apwile yivulumunyi ahiana A-Ngalileya eswe, mumu evwile lamba lino, nyi? 3Ngwami, Ka, alioze yenu eswe kumunukatoka chizechene nyi kunwalikonyekene. 4Hanji waze kumi ni nake, hali ayo kaposhi ka Selome wapuzukile nikwashiha, nunashinginyeka ngwe o apwile yitanguke ahiana atu eswe akutwama mu Yerusaleme, nyi? 5Ngwami, Ka; alioze yenu eswe kumunukatoka chizechene nyi kunwalikonyekene.
6Watele chishima chino ngwenyi, Umwe mutu wapwile ni mukuyu autumbile mu munda wenyi; wejile nikufupako mihuko, alioze kayiwanyine. 7Iye wambile kuli njimi ngwenyi, Tala, miaka yitatu nguneza nikufupa mihuko ha mukuyu uno ni chishi kuyiwana niyimwe: upakule hashi, kuchi te unasekesa mavu? 8Iye wamukumbulwile ngwenyi, Mwene, weche kama mwakono nawa ndo mungukauchipula, ngukase pinga: 9nyi kachi muukema mihuko, chipema; nyi kachi ka, kulutwe lia chize ukaupakule hashi.
10Iye te hanalongesa mu sunangonga yimwe ha tangwa lia Sambata. 11Kumanyi, pwo umwe wapwile ni Spiritu ya kukokoloka kumi lia miaka ni miaka nake, iye wafumbamine, kahashile kuhetuka nichimwe. 12Muze Yesu amumwene, wamutambikile ngwenyi, Pwo, unatusuka ku kukokoloka che. 13Iye wasayikile moko jenyi hali iye: haze hene wolokele, wachichimiekene Zambi. 14Alioze mukwa kuyula sunangonga te kanevu kupiha, mumu Yesu wawukile ha tangwa lia Sambata, wakumbulwile ku mbunga ngwenyi, Kwali matangwa asambano a milimo, kashika nwize ha matangwa aze anuwuke, hi ha Sambata ko. 15Alioze Mwene wamukumbulwile ngwenyi, Yenu yilembese, mweswe hakachi kenu kakujitula ngombe yenyi, hanji chimbulu chenyi, ku chililo ha tangwa lia Sambata, akamutwale ku meya. 16Mba yono pwo, se iye mwana wa Apalahama, yoze Satana hanamukase kumi lia miaka ni miaka nake! kuchatambile kumutusula ku kana lino ha tangwa lia Sambata, nyi? 17Shimbu ahanjikile yino yuma, akwa kulimika nenyi eswe evwile sonyi; ni mbunga awahililile ha yuma ya uhenya yize yeswe alingile iye.
18Iye wambile ngwenyi, Neka wanangana wa Zambi muulifwa? Ngwe chika munguupwisa? 19Unapu ngwe lunona wa mosetate, yoze anjile mutu amutumbe mu munda wenyi, iye watatukile, wapwile mutondo; ni tujila a mwilu atwamine ha mitango yawo.
20Cheka nawa wambile ngwenyi, Ngwe chika mungupwisa wanangana wa Zambi? 21Unapu ngwe futunwiso, yize anjile pwo, akayise mu njongo jitatu ja wunga ndo weswe wafutunukine.
22Iye wapalikile ndusu limbo ni limbo ni chihunda ni chihunda, nikulongesa, nikuya mu wenyi ku Yerusaleme. 23Mba umwe wambile kuli iye ngwenyi, Mwene, waze maalamwina akehe, nyi? Wambile kuli ayo ngwenyi, 24Litachikenu kunjila ku chikolo chikehe; mumu anji, ngwami, Makafupa kunjilamo, alioze kechi kahasa. 25Muze te mwenya zuwo hakatuka, hajila pito, munuputuka kumana haze nikungongwela ha pito, nikwamba ngwenu, Mwene, Mwene, twazulwile kama; iye makakundulula akambe kuli yenu ngwenyi, Chanunyingikine kuze nunakatuka. 26Hohene munukaputuka kwamba ngwenu, Hitunali, hitunanu kumeso je, hiunalongesa mu matapalo jetu; 27iye kumakamba ngwenyi, Ngunanwambulwila ngwami, Chanunyingikine kuze nunakatuka; katukenu kuli yami, yenu eswe akwa kulinga uhenge. 28Kumukukapwa malilo ni kulikopola ku mazo, muze munumona Apalahama ni Izake ni Yakomba ni aprofeta eswe mu wanangana wa Zambi, ni yenwene manumbila haze. 29Kumakakatuka ku Chivumbuko ni ku Chitokelo ni ku Norte ni ku Sule, makatwama ku mesa mu wanangana wa Zambi. 30Alioze kwali akwa kusula waze makapwa atangu, ni kwali atangu waze makapwa akwa kusula.
31Ha ola yenayo amwe A-Fwariseu ejile nikwamba kuli iye ngwo, Katuka kuno, yako, Heronde kanazange kukushiha. 32Iye wambile kuli ayo ngwenyi, Yénu, nukambe kuli yoze mukuza ngwenu, Tala, nakutuhwisa andemoniu, nakuhindwisa musono ni hamene, ni ha tangwa liamuchitatu mungukamanununa wenyi wami. 33Alioze changutamba kuya mu jila yami musono ni hamene ni hamene-a-lize, mumu kuchatambile profeta kufwa shina mu Yerusaleme. 34Yerusaleme, Yerusaleme, yena wakushiha aprofeta, wakwasa mawe waze aatumine kuli yena! Yisuho yipwa haha nazangile kukungulula i ana je ngwe chali makungulula ana jenyi mushi lia mapulwa jenyi, alioze kunwatayile. 35Talenu, zuwo lienu kalihichika kuli yenu hahululu. Ngunambe kuli yenu ngwami, Kunuchi kangumona ndo munwamba ngwenu, Kawaha yoze uneza mu jina lia Mwene.
Àwon tá yàn lọ́wọ́lọ́wọ́ báyìí:
LUKA 13: Csa
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Chokwe Bible © Bible Society in Angola, 1975.
