Matiye 3
3
Tɔ́ʼɔɓay a Zâŋ Batís
(Mrk 1:1-8; Luk 3:1-18; Zâŋ 1:19-28)
1A ɓil nâmké, Zâŋ Batís tɛ̧́ a ɓil kaw a Judé, a kaw tɔ́ʼɔɓay. 2«Ké sa: I fere káwa a wǎyri ɓayhí̧lé, káwa Mbây a Pû a Gáŋvbôn gí ɗɛ́ŋ dá!» 3Zâŋ ɓá njuku, ka porofɛ́t Ezayí tí saɓay a mɛ̌ ɓá:
«Ŋgboro kɔ́ŋ a njuku a há̧na gbé ka lawkɔ́r ɓá:
“I mɔny ŋgboro a Gáŋmbây
I mɔny ŋgboro hí̧ nɛ́ ɓá ndáráké!” »
4Zâŋ ri gári a kú mɔny ka pí̧ra̧ mûn a Bandikóré, a ŋgá̧ táʼa sâ̧ny nɛ́ ka hɔ́ʼɔ. Ké sɔ̧́ ɓá tûy, a lâʼa ɓá tee. 5Njuku Zerúzalɛ̂mri̧ rá̧ Judéri too rá̧ njukuri a ɓil kaw a gbaŋ mbii a Jurdɛ́ŋri̧ too, mára̧ sé gé lé. 6Kú gé sa ɓékéhɛ̧ a kuriri kɔ̧ kála, a mbɛl a njukuri, dáy Zâŋ Batís ɓá kuriri nyá batêm a ɓil mbii a Jurdɛ́ŋ. 7Zâŋ kó ɓá Fariziyɛ̧́ri̧ rá̧ Sadusiyɛ̧ri̧, kaw gí ɓá ŋgɛ̧́náké, ɓay gí nyá batêm, dáy a sa hí̧ kuriri ɓá: «Mɛ̧rɛ̧ mbéruri! A gé tɔ́ʼɔ wǎyri ŋgboro ŋgú hɛ́rɛ a Gáŋvbôn a gí ɗɛ́ŋ dáy lé? 8Dáy, í tɔ́ʼɔ ka ŋgboro a péna a béláké, ɓá i fere káwa wǎyri dá, 9a í zi ná kɛrɛ a law a wǎyri, a sa ɓá: “Abaraham ɓá zîi a manárí̧!” Ɓayhí̧lé, mi sa hí̧ wǎyri katína, ɓá Gáŋvbôn erú ka kpɔ́ŋa, ɓay a fere saw nɛ́rí̧ tɛ̧́ gun zîiri hí̧ Abaraham! 10Téna ná ɗɛ́ŋ ɓay a kúŋ dii a sɛ̧wkéri dá, dii too, ka zi hí̧ léna a béláké yáy, kú e kuŋáké, a ɓá vbú hɔrɛ. 11Mǐ, mi ɓá wǎyri nyá batêm a ŋgboro a mbii, ɓay tɔ́ʼɔ ɓá, i fere káwa a wǎyri dá. Dáy njuku ka e gí a falní, ké ndé mí ka kpɔ́ŋa, mi zi ma ɓay a sɛ́l, sɛl sabɔʼɔ a mɛ̌ nyá. Mɛ̌, ké e ɓá wǎyri nyá batêm a ŋgboro a Têm Pukí rá̧ hɔrɛ. 12Ké erú ka yoŋ gɔ́ naŋ ka ndɔ̂ʼɛ, ɓay gɔ́ naŋ, a wal mbû̧nyké kuu mɛ́rɛ̧́ké. Ké e fá̧ mɛ́rɛ̧́ naŋ a mɛ̌, kɔ̧ pûl, a njúŋ mbû̧nyké ka hɔrɛ ka tí húna bɔʼɔ mbêw yáy.»
Batêm a Zezú
(Mrk 1:9-11; Luk 3:21-22)
13Nǎŋnɔ́, Zezú uru a Galilê gí mbii Jurdɛ́ŋ, a gel a Zâŋ, ɓay a ké ɓá nɛ́ nyá batêm. 14Dáy, Zâŋ zi yá, a sa: «Ɓá mǐ, pé e sé goló, ɓay a mɔ́ ɓá mí nyá batêm, ná a̧ní rá̧, mɔ̌, mɔ e gí gel ní lé!» 15Dáy Zezú sa hí̧ nɛ́: «Mɔ́ pɔŋ, a ké niŋ ɓá báŋké nɔ́ a ŋgɛŋnɛ́, ɓayhí̧lé, nǎŋnɔ́ pé ná e niŋ hɛ̧ too ka Gáŋvbôn vbíy.» Dáy, Zâŋ gí zibɔʼɔké. 16Gelka Zâŋ ɓá Zezú nyá batêm, Zezú tɛ̧́ a ɓil mbii, núnmbɛ̧́nɛ́ nɔ́, nûnalê ŋgburu, dáy ké kó Têm a Gáŋvbôn ɗere gí tûlé ɓá báŋa bûm. 17Nǎŋnɔ́, kɔ́ŋ a há̧na gbé gí a nûnalê a sa: «Njuku nɛ́, ɓá Gun zína a mǐ, ka tûlé, pé mi ziŋ mûnrína a mǐ too.»
Àwon tá yàn lọ́wọ́lọ́wọ́ báyìí:
Matiye 3: pnz
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2023 CABTAL
