Matío 7
7
Yɛɛ́so a á ega nzíʼnɛ epuɔ ŋ́gɛ, ndɛ́ʼ ŋiŋ á thú alɔ́ʼ ŋiŋ
(Lúk 6.37-42)
1Yɛɛ́so á zéŋ ndé ŋ́gɛ: «Ndɛ́ʼ ŋiŋ á thú alɔ́ʼ ŋiŋ tɛ mbā á yí, tɛ́ Ndém a eláʼ le azí thú, 2melaʼ mīi, Ndém a fhoó ánɛ ntií zīi, o ó lɔk nthú alɔ́ʼ ŋiŋ, tɛ́ nthú ajú. Efʉʼ zīi pɛ lɔkɔ efʉ̄ʼɛ azō, tɛ́ ŋgyáa á mbū ŋiŋ, Ndém a a shʉʼ elɔk efʉʼ mɛ́t, tɛ́ efʉʼ azɛ́. 3O gɔ egaá, akem awɛ á fɔ́ne á lezēk wu, o ó le jʉ́ɔ, ḿbiŋ nnɔ̄ŋ njʉ́ɔ lenɔŋ ntsɔʼ tsīi, é kó á lezēk méŋ mɔ́ wu ū? 4Ŋ́ké te épúp ɔ́, mbɔ akem awɛ á fɔ́nɛ á lezēk wu, o epīiŋ ŋgā ndé á mbū méŋ mɔ́ wu ŋ́gɛ, a ecʉ́ʼ, o efók lenɔŋ ntsɔʼ tsīi, é lezēk yí í? 5Ŋgaŋ ŋkɔŋ menēk, zi mvhɔ efók akem awɛ zīi, á lezēk wu lā, tɛ nnɔ̄ŋ njʉ́ɔ ejʉʼ á mbɔŋɔ́, tɛ́ mbiŋ efók lenɔŋ ntsɔʼ tsīi, é lezēk méŋ mɔ́ wu. 6Ndɛ́ʼ pɛ eyá ajū mīi, á ajūɔ Ndém á mbū membhʉ̄, tɛ nzī ŋgyá, mbɔ e e náŋ tɛ esɛnne, éló á wɛ́ ló. Ndɛ́ʼ pɛ emāaʼ atók tshī zɛ́ á mbū mekúna, tɛ mmāʼ, mbɔ pɔ́ e lɔk mekhu mɔ́p eneŋte.
Yɛɛ́so a á ega nzíʼnɛ epuɔ á lelɔ̄ azō á mbū Ndém
(Lúk 11.9-13)
7«Pɛ enáŋa ndɔ́ɔ, Ndém a eyá á mbū pɛ. Pɛ enáŋa efāʼa, Ndém a eghʉ̄, pɛ ejʉ́ɔ. Pɛ enáŋa ŋkwáʼtɛ nchu ŋgyā, Ndém a etsɔ́ʼ á mbū pɛ. 8Awíɛ a lɔ́ɔ azō á mbū Ndém, mbɔ a a yá á mbū yí. Awíɛ á faʼa azō, mbɔ Ndém a a ghʉ a ejʉ́ɔ azō mɛ́t. Awíɛ a kwáʼtɛ nchu ŋgyā, mbɔ Ndém a a tsɔ́ʼ ŋgyā, a ekó éwú. 9Ńzi te épúp ɔ́, mbɔ awɔ́ a á nnɔ pɛ egā, ŋ́gɔ́ éyi, méŋ yi a lɔ́ɔ á yí mblɛ, á pɛ́ á tɔ́ ŋgyá á mbū yí í? 10Ŋ́gɔ́ éyi, méŋ yi a lɔ́ɔ á yí esōh, á gɔ nnū ŋgyá á mbū yí í? 11Pɛ pīi pɛ é epuɔ tepɔŋ ejʉɔ ntií, pɛ ké nzhɛ́ ajūɔ mbɔŋ, tɛ́ ŋgyá á mbū ewɔŋkhʉ̄ pɛ́, tɛ ŋgʉɔ shɔ́ʼɔ́, ánɛ Mɔʼɔ́ wɛ Ndém yīi, a á lephū ú? A gɔ le néŋ té yá etsō mbɔŋ, á mbū ŋiŋ yīi, a á lɔ́ á yí í.
12«Ajūɔ tsem zīi, pɛ é si ŋkɔ̄ŋɔ ŋ́gɛ, epuɔ menɔŋ e eghʉ̄ á mbū pɛ, pɛ méŋwɛ̄t azɛ́, e eghʉ̄ azō mɛ́t á mbū pɔ́p. Á páʼa ŋgɔ́ anu zīi, lepé Mɔɔ́sɛ, mbɔɔ anu zīi metswi‑ŋke Ndém é le tíī, á ziʼneé.
13«Pɛ etɔ́k ánɛ nchu ajʉʼ yīi, é swɛ́nne swɛnné, tɛ́ ntswɛ́t. Nchu ajʉʼ yīi é faáŋ tɛʼ, é gʉɔ̄ mé alāʼ mmók. Mía mɛnzhɛ yīi a tsoʼneé éwú, á zeéŋ ŋgʉɔ azí mé éwú. Lelʉɛ epuɔ é piŋ nnɔ̄ŋ nzápa éwú. 14Táʼ, nchu ajʉʼ yīi mɛ́ piŋɛ nzápa éwú tɛ́ ntswɛ́tɛ, é swɛ́ne tɛʼ. Nzhɛ zīi mɛ́ zápa éwú tɛ́ ntswɛ́tɛ, é kʉɔ́k tɛʼ. Epuɔ pīi pɔ́ zi nzápa éwú, é piŋ te zá.
Yɛɛ́so á ega ŋ́gɛ, mɛ́ epá wɔ táŋ‑mela ŋ́gɛ, pɔ́ é metswi‑ŋke Ndém
(Lúk 6.43-44)
15«Pɛ epá epuɔ pīi pɔ́ é si ŋ́gɛ, pɔ́ é metswi‑ŋke Ndém, ńdɔkɔ ntáŋa mela. Pɔ́ gē eshʉʼ á mbū pɛ, ńzwík ŋgup njʉnjhʉ, ḿbiŋ ŋgɔ́ á ntē éwú, ŋ́gɔ́ áa kwaʼ metsho. 16Pɛ e shʉʼ efhó ánɛ mefʉʉ́ʼ menu mɔ́p, tɛ́ ezhɛ́ á wɔ́p. Mɛ́ gɛ te ŋkápa shʉ́shhʉ́ ánɛ athʉ́ menzɔ̄ŋ ɔ́, ḿbiŋɛ te ŋkápa levho ánɛ athʉ́ mɛfúʼ ɔ́. 17Púp, athʉ́ ntsem zīi mɛ́ gɛ njhʉ́ɛ, á zeém áa ntá zīi mɛ́ gɔ ejhʉ́. Athʉ́ zīi mɛ́ gɛ te njhʉ́ɛ ɛ́, á piŋ nzém áa ntá zīi mɛ́ gɔ le jhʉ́. 18Athʉ́ zīi mɛ́ gɛ njhʉ́ɛ, á gɔ le zém ntá zīi, mɛ́ gɔ le jhʉ́ ɛ́. Athʉ́ zīi mɛ́ gɛ te njhʉ́ɛ ɛ́, á pīŋ le zém ntá zīi mɛ́ gɔ jhʉ́ ɛ́. 19Athʉ́ ntsem zīi á ka ntá mbɔŋ zém ɛ́, mɛ́ pɔŋteé á lekʉɔ̄ʼ ntɔ̄ á mmók. 20Á épúp tɛ́, pɛ e shʉʼ efhó ánɛ mefʉʉ́ʼ-menu wɔ táŋ-mela ŋ́gɛ, pɔ́ é metswi‑ŋke Ndém, tɛ́ ezhɛ́ á wɔ́p.
Yɛɛ́so a á ega eshúŋɔ á ŋiŋ yīi, a á si ŋgɔ́ á kwaʼ ŋiŋ nnɔ yi
(Lúk 13.25-27)
21«Epuɔ metsem pīi, é tɔɔ́ŋ á gá lɛ: “Ndi Ndi” efʉʼ metsem, mé té láʼ ekó á ntē Lefɔ Ndém ɛ́. Ŋiŋ a nɔŋ ŋkɔ̄ŋɔ á yí, á lekō á ntē Lefɔ Ndém, á ghʉ ajū mīi, Mɔʼɔ́ ga yīi a á athʉ́ lephū, a á si ŋkɔ̄ŋɔ. 22A láʼ aleʼé zīi Ndém a záʼa ntsaŋ, epuɔ tɛ nzáne e elé mé meŋ ŋ́gɛ: “Ndi Ndi, pek mé kɛ té si ndɔ̄kɔ lezēŋ cú, ńtswī ŋke Ndém ɛ́ kɛ? Pek mé kɛ té si ndɔ̄kɔ lezēŋ cú, ńjūŋɔ mesī ánɛ epuɔ kɛ? Pek mé kɛ té si ndɔ̄kɔ lezēŋ cú, ŋ́ghʉ̄ɛ memía menda jʉ́ɔ anu kɛ?” 23Meŋ ndɛ ndé á mbū pɔ́p ŋ́gɛ: “Meŋ ndaá nzi ŋgɔ́ aleʼé, ńjʉ́ɔ á wɛ́ ɛ́. Pɛ efhó á lezēŋ meŋ ŋgʉ̄ɔte, pɛ wɔ fʉʼ‑mele anu.”
Yɛɛ́so a á ega eshúŋɔ anu ánɛ lepɔ̄ ŋgyā ánɛ ejʉʼ epīa
(Lúk 6.47-49)
24«Ŋiŋ ntsem yīi, a á júʼ ashuŋne zīi meŋ á shúŋ, ŋ́kúʼte á mbɔŋɔ́, a á páʼ ŋgaŋ azhɛ̄‑anu yīi, a ke gē ekwɛ́t ŋgyā zi, ńnɔ̄ŋ atseŋ ánɛ tɔ́ ntʉʉ́. 25Mbeŋ é lú ánɛ ŋgyā mɛ́t, atsyɛt á shʉʼ mmʉ́ʼ éwú, afēm á shʉʼ nnʉ̄ʼ, é piŋ mbú te táka, melaʼ mīi mɛ́ le nɔ̄ŋ atseŋ ánɛ tɔ́. 26Ŋiŋ ntsem yīi, a á piŋ njúʼ ashuŋne zīi meŋ á shúŋ, a te kúʼte, a á páʼ atsetseŋ zīi, a ke gē ekwɛ́t ŋgyā zi, ńnɔ̄ŋ atseŋ ánɛ asaŋasáŋá. 27Mbeŋ é lú ánɛ ŋgyā mɛ́t, atsyɛt á shʉʼ mmʉ́ʼ éwú, afēm á shʉʼ nnʉ̄ʼ, é lɛ mbú ŋkemɛ ḿbwɛ̄t á esī. »
Ntií zīi Yɛɛ́so a lɔkɔ nzíʼnɛ epuɔ
(Mlk 1.22; Lúk 4.32)
28Yɛɛ́so á shúŋ meshuŋne muɔ mɛ́t tɛ é mi, ezi ntií lezīʼne epuɔ, é pú ŋkʉ̄ʼne alāʼ zīi, á nnɔŋ nzwíʼtɛ á yí á leshūŋne, 29melaʼ mīi, a á si nzíʼnɛ epuɔ páʼ ŋiŋ yīi, Ndém mé tó á yí, a te si nzíʼnɛ epuɔ, páʼ wɔ kɛ́ʼte‑mbé Ndém ɛ́.
Àwon tá yàn lọ́wọ́lọ́wọ́ báyìí:
Matío 7: ybb
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© CABTAL
