मती 15

इंदरी सुद होयाः लगा ईसू चेडतेडकुःआ

(मरकूस 7:1-13)

1हनते एरुसलेम सहर अते अदोम फरीसी होड़कू अरू नियम चेडदार होड़कू ईसू एचेरे सेनेकियानखन हाँयकू होंबरेया, 2“आमरिकुःआ चेलाकू अबूरिकुःआ खुटिपरिया होड़कूराः रिती-बिधी चिला लगाकू टड़ावगेता अरू तिःई बेगर अचंगतेकू जोमता?”

3दो ईसू कता कुदातेड, “दो अपे अपेराः रिती-बिधी मनाः अते भगवानराः हुकुम चिला लगापे टड़ाव एंडागोडता? 4भगवान कताकेरा, अपे अँननपेरिकुःआ एंगा-अपापे मान मरजइत#एचे उडुंग 20:12; दो. नि. 5:16 अरू तोनोंगीग आँयगरीग एंगत सहे अपाते सती-सरापता, हाँयग होड़ ञेड एंडागेय लगा इदा, माःआन।#एचे उडुंग 21:17; लेवी 20:9 5मनदो अपे कतायता, तोनोंगीग होड़ अनँयग एंगात सहे अपात एचेरेय कताय, ईंग अते आम लगा नफा होयाकुःआ हना जिनिसकून भगवान लगायिंग एमे एंडागोतेडा। 6दो हाँय अनँयगरीग एंगात सहे अपात मान मरजइत लगा कोवानेःआ, माःआन। नाःआ इया अपे अपेराः रिती-बिधी मनाः अते भगवानराः सरवनपे टड़ाव एंडागोडता। 7ने पचघुचिया होड़कू, भगवानराः बड़रा कतायीग होड़ एसयाह अपे बदीरे सताये कतातेरा। हाँय नाःआ इयाय ओजाःतेरा,

8नँकुःआ होड़कू अँननकूराः आहते ईंगकू मान-मरजइतता,

मनदो नँकूराः ओंगोल ईंग अते एनेटाः अगी दोहोनता।

9नँकू होड़कूराः तुलात नियमकूनकू चेडकूता

अरूकू कतायता, नाःआ भगवान अगीते हवे, माःआन।

हनालगा नँकू बेगर लूर ईंगकू जागतना।”#एस 29:13

10हनते ईसू हंडाकू दोहोना हँकुःआ होड़कू अनँयग एचेरे राःतेडकूखने कताया, “अपे ईंगपे अयूम अरू नाःआ बड़रापे बुझाः। 11आहते दोंगेरे बोलता हना जिनिसते होड़ मेरेय मइलाःता, मनदो आहराः बड़राते होड़ मइलाव जुवाःता।”

12हनते चेलाकूतेन ईसू एचेरे वेगनेनखनकू होंबोरतिरिया, “आम सुसुदीतना जा फरीसी होड़कू नाःआ कता अयूमकेडखनकू रीसयना?”

13दो ईसू चेलाकूतेने कतावातेरा, “सेरमो देसरीग ईंग अपांग भगवान मेरेय रोपागडा, हना सींगकून जमा रवीग एंडा जुवाःता। 14अपे फरीसी होड़कू अते तोनोरे तोरेपे दोहोन। हँकू अंधा मूक होड़कू इदानकुःआ। तोनोंगीग अंधा होड़ अनंधा होड़ दूरे उदुःवाय दो बना होड़ डोडहारेकिन रेम बोलो जुवाःता।”

15दो पतरस ईसू एचेरेय कतातेड, “नाःआ अउल-तउल कहड़ीराः मतलोबमे उदुःवाले।”

16दो ईसू कतातेड, “नुँहूमिन अपे मेरपे सुदी अवेगना जा? 17अपे मेरपे बुझाःतना जा आहरे बोलोकियानखन दोंगेरे सुदुरुःता हना जोम जिनिस तयोमरे देहराः बहरी उडुंग जुवाःता? 18मनदो आहते उडुंगगुःता हना बेलूर बड़रा इंदरीते उडुंगगुःता अरू हनानाःते होड़ मइलाव जुवाःता। 19मी होड़ होड़राः इनिंदरीते बेलूर ओंगोल, ञेड गोजेय, सनहा-सनही, जपाल होड़ेंग, इनिग, लबरा हिदइत अरू ओपता बड़रा इयाःआ बेलूर कताकून उडुंगगुःता। 20ननानाः ओंगोल अरू कताकूनते तोनोंगीग होड़राः जीव मइलावगुःता। मनदो बेगर अचंगतो तिःईते जोम जिनिस जोम अते तोनोंगीग होड़ मेरेय मइलावगुःता।”

मी होड़ कनानी अइमीराः बिसवास

(मरकूस 7:24-30)

21हनते ईसू गलील छतर अते उडुंगनेनखन सूर अरू सइदा सहर अगी तोराय। 22दो हना छतररीग मी होड़ कनानी जइत अइमी, ईसू एचेरेय वेजेडा अरू मुरुक सटीते खिररी घड़ीने कताया, “ने परबू, दाऊद राजारीग नइड़-बाँस होड़, ईंगमे मयावा। भूत ईंग बिटी मुरुके संतावगेयतना।”

23मनदो ईसू हाँय एचेरे तोनोंगाः मेरेय कता कुदागड। हनालगा आँयगरिकुःआ चेलाकूतेन ईसू एचेरे असे घड़ीनकू कताया, “ने परबू, नाँयग अइमी वारगोडेयमे। अबू तयोम तयोम खिररी घड़ीन दरवाया।”

24दो ईसू कता कुदातेरा, “ईंग इसराएल होड़कू अते केड़ेत भेड़ाकू इया इदानकुःआ हँकुःआ होड़कू ञामकू लगा नाःआ चउंदीसरे भगवान वारकिडिंगा।”

25मनदो हाँयग अइमी ईसू मड़ंगरे उकुड़ोमनेनखने कताया, “परबू, ईंगमे संघरावा।”

26दो ईसू हाँयग अइमीय कतावाड, “लइंकूराः रुटी गोःकेडखन कुतुकू एचेरे तेकेगे दो नपाय कोवानेःआ।”

27दो हाँयग अइमी कतातेड, “सतायमे कतायतना, परबू। मनदो अँननकूरिकुःआ मालिककू टिबूल सेरमोकू जोमतान मेला, अलार गदार जोम एरांगतो लुजरुःता हनानाः अते कुतुकू अँनकूराः दोंगेकू पेरेगता।”

28हनते ईसू कतातेड, “ने दिदी, आमराः बिसवास मुरुक मरंग इदा। होयाः लगाम ओंगलेतना हनन इया होया जुवाः।” दो हननमेला हाँयगरीग बिटीत नपाययाने।

ईसू मुरुक बेमरियाकूय नपायतेरा

29हनते ईसू हना ततेर अते गलीलराः हुडिंग समुंदर कुटी सेनेकियानखन मीटोंग पहाड़ चोटरेय देगनेन अरूय दुड़ुःयान। 30दो मुरुक बगरा होड़कू हाँय एचेरेकू सेने जुमावयान अरू हँकू अँनकू सुदा लंगड़ा होड़कू, अंधा होड़कू, कोंदा होड़कू, ठुठा होड़कू अरू एटाः एटाः इयाकुःआ बेमरियाकू हों हाँय एचेरे अगूतेडकूखन काट कुटीरेकू गेतेगगोतेडकू। दो ईसू हँकुःआ जमा होड़कूय नपायगोतेडकू। 31कोंदा होड़कू बड़राःआ अरू लेचवा होड़कू नपाययान, अरू लंगड़ा होड़कू सेना अरू अंधा-अंधी होड़कूराः मेड ञेञेला दो, हँकुःआ होड़कू हना ञेलतेडखनकू बयावयान अरू इसराएल होड़कूरीग भगवानकू जागतिरिया।

चइर हजार होड़कू जोम लगा ईसू एमेवातेडकुःआ

(मरकूस 8:1-10)

32हनते ईसू अनँयगरिकुःआ चेलाकूतेन अनँयग एचेरे राःतेडकूखने कतातेरा, “नँकुःआ होड़कू ईंग ञेल सोगायना। नँकू पेय दिन वरीते इनिंग सुदा इदानकुःआ अरू नुँहू नँकू एचेरे कहिसाः जोम लगा कोवानेःआ। हनालगा नँकुःआ होड़कू रंगेगतो पइड़घावकू लगा मेरिंग चहाःतना। हँकू अते तोनोंगीग सेनेन सेन दूररे पड़ूकियानखन अलोकू असिड जुवाः।”

33दो चेलाकूतेन ईसूकू कतावाड, “ने गुरुजी, नाःआ टयंगाब ततेररे नाःआमिन बगरा होड़कू लगा रुटी तोनोंगीग करा अगीतेय अगूय अरू नँकूकू जोम बीन?”

34हनते ईसू हँकूय होंबोरतेड, “अपे एचेरे तुमिन गोटोंग रुटी इदा?”

दो हँकू कतातेड, “सातगोटोंग रुटी इदा अरू गुनमिन हकूकू हों इदा।” 35दो जमा होड़कू ओतरे दुड़ुः लगाय कतावाडकूखन, 36ईसू सातगोटोंग रुटी अरू गुनमिनकू दोहोना हँकुःआ हकूकू साबतेडखने अरजीतेरा अरू डुंडीग घड़ीन चेलाकूतेन एचेरेय एमे इदीया अरू हँकू होड़कूकू हटिंगवातेरा। 37नाःआ इया जमाकू जोम बीयानकू अरू चेलाकूतेन डुंडीग बनसावनेना हना रुटी पेरेग पेरेग सात दउड़ारेकू रेमतेरा। 38अरू जोजोमकुःआ होड़कू अइमीकू अरू लइंकू अड़ाःकेडखन चइर हजार मनरद मरदकू एकला दोहोना। 39ईसू जमा होड़कू पइड़घावतेडकूखन डोंगारेय देगयान अरू मगादान सहर अगी तोराय।

Àwon tá yàn lọ́wọ́lọ́wọ́ báyìí:

मती 15: kfp

Ìsàmì-sí

Pín

Daako