Mata 13

Bazlam minew meslìgè daw

Markus 4:1-9; Luka 8:4-8

1A pat ata Yesuw a dara i ga ya, a da aà gùva duluv. A daha, a ndza a bəɗ. 2Gà mburma ta ŋgatar, a da a fata ka, ti yahabaha gər a təv ŋgar hinne. Aɗaba taŋa, a daha, a tsəl a slə̀làh yam duwa a riŋ à gùva duluv ata ika gər yam, a ndza aɗəm a fata. Gà mburma ata tə daha a təv ŋgar tserdze ya ka, ti sìrìkaha a təv ŋgar. Tə daha ka, ta hitse aà gìgìze ŋana. 3Dite a ɗe a tarra iɗəm à guma ŋgar a hinne ndaka bazlam minew a. I huɗ guma ŋgar ata ya ka, a gwaɗa a tar: «Wele duwa a riŋ, a ndzək hwife daw, a da dər a dala aà meslige. 4I təv ana a riŋ a slige a ya ka, wur daw ata a dza aka vatwa, gà ɗiyeŋ tə daha, ta pala. 5Asiŋ ŋa a dza aà sik kuvəl, a təv ana ahəɗ ikəka hinne tsiye. A ɗeba bise, a sləl tsara, aɗaba ana biye iɗəm tsiye. 6Aləka pat a zlara ahər a mbulum a ka, a wànà daw ata, a kula tsara, aɗaba ahəɗ ata ka, ɗùɗùrwàkùŋŋa biye iɗəm tsa. 7Wur ŋa i ŋgiɗ pam asa, a dza aà huɗ adak. Adak ata a zlala aakahər zlàlaw zlàlaw, a dza aaka mezite. Daw ata a mətsaha siter. 8Ama wur ŋa i ŋgiɗ asa, a dza aka ahəɗ ana ŋgwal ŋa ya. Ŋgat ka, a sləl, a geba hinne, a da a bəra, dite a nah. Biy ŋgiɗ ilik ka, dzìsl gèher a kəzləm. Biy ŋgiɗ asa, fàhha. Biy ŋgiɗ ibam, tìs aɗəm.» 9I dəba ŋa ya, Yesuw a gwaɗa a tar asa: «Dzùmar zləm lele na gər kurum aka ge aà metsereke ya.»

Aɗaba la na Yesuw a fàfəl ndaka bazlam minew a?

Markus 4:10-12,25; Luka 8:9-10,18; 10:23-24

10I dəba ŋa ya, gà ɓəzla mazazama Yesuw tə dara a təv ŋgar a, à gər tar. Tə dara ka, ta gwaɗar: «Aàla na kà ɗifewa à duwa a mburma ka, ndaka bazlam minew a?» 11A gwaɗa a tar aaka: «Aɗaba kurum ka, Mbulum aka ɗif a kurum à dukw ana makàhà ŋa i mekwere ŋgar a, kàa mbər mesirwim. Ama gà mìsle ŋgiɗ ka, tə sər tsa. 12Aɗaba wur ana a sər, aka ŋgat gà dukw ata ya ka, Mbulum à sikehe a dər aaka asa, a ndze a ka, ndzəɗakkà. Ama wur ana aka ŋgat hinne tsiye ka, Mbulum a zle a ihər kwizikw ŋa ata ya mbaŋa asa. 13Aɗaba taŋa na i tsikewa a tar ndaka bazlam minew a. Aɗaba tar ka, ku mege ta fir ahər a tekeɗe ka, ta ŋgeter a tsa. Ku mege tàa dzar zləm tekeɗe ka, ndəkəmma ti tsereke a ɓav tsa asa. 14Aɗaba taŋa, dukw ana Ezaya, mala məma à guma a tsik ahər, a ta ge a ya ka, kaɗəŋ ndzer. A gwa:

<Ki tserekwim a heŋ heŋ nda zləm,

ama ki sirwim a tsa.

Ki fìrwim ahər a ndzìzlzle nda are,

ama ki ŋgetwimer a ɓav tsa.

15Aɗaba gəzləŋ gà mburma aaha ka,

manəsa ŋa. Ti ndze a ka, dəgàwwa,

ti ne ka, kamala gà mandakazləm a,

nda gà kamala gà ɓəzla guluf a.

A sàs a tar na ta fir ahər a ya tsa,

ta waya na ti tsereke a ya tsa asa.

Aɗaba taŋa Mbulum a gwa,

mege tə tsaraka zləmana ka, ana ka,

ta mbiɗere a à ba a təv ga ya,

dite i mbele a tar.>*fa*

16Ama kurum kinehe ka, maŋgayaba i təv kurum, aɗaba kàa ŋgatum a dukuməŋa nda are kurum, kàa tsarakum nda zləm kurum lele mbaŋa. 17Iye ihər i gweɗe a kurum a nda ndzer kaɗəŋ: Akahər ata ka, gà ɓəzla məma à guma Mbulum hinne nda gà asiŋ gà mburma ŋgar ŋgiɗ tàa yaha vatwa aà maŋgata a dukw ana kurum ihər ki ŋgetwimer a ya, ama ka, tàa ŋgatar tsa. A sàs a tar matsaraka dukw ana kurum ihər ki tserekwim a kinehe ya, ama tar ka, tàa tsaraka ɓav tsa asa.»

Yesuw a ɗif à bazlam minew meslìgè daw

Markus 4:13-20; Luka 8:11-15

18«Ama kinehe ka, tsarakum, i ɗif a kurum a à bazlam minew meslìgè daw ata kuɗa. 19Ama gà mìsle ŋgiɗ ka, tə tsaraka bazlam Əbay Mbulum ana a ta kwere a ya. Tàa dzar zləm, ama tàa tsaraka tsa. Əbay sitene a dehe a, ndzìkeɗ ndzìkeɗ a ndzehe a bazlam ata tə dzar zləm a. Tar ti ndzikiɗ ba ka, wur daw ata a dza aka vatwa ya. 20Gà mìsle ŋgiɗ pam asa, ti ndzikiɗ ba wur daw ana a dza aà sik kuvəl a. Gà taŋa tə tsaraka bazlam Mbulum ka, ta gəs a gəzləŋ tar nda maŋgayaba tsara. 21Ama bazlam ata a ŋge a zlile aà mendze i gəzləŋ tar tsa. Mendze tar a riŋ ika vatwa Mbulum hinne tsa. Ti ndze a ka, wàkit wàkit. Na bəla mawùràba bazlam, kige tsa mesewere are aka le aà tar agəra bazlam Mbulum ka, ŋgwìɗik ta misek a à magəsa bazlam ata tsara. 22Gà mìsle ŋgiɗ pam asa ka, ti ndzikiɗ ba wur daw ata a dza aà huɗ adak a. Ti tsereke a bazlam Mbulum, ama madzala gà gər mesewere are a be a tar i gəzləŋ a hinne. Tar ihər ti dzele a gà gər aka limana, a bene a tar. Aɗaba taŋa gà dukw ata tserdze ya ka, ta bets a bazlam Mbulum i gəzləŋ tar a. Ta gis a ka, gà dukw ata ɗekɗek. Bazlam Mbulum a ge a ter a ŋgulum asa tsa. 23Ama gà mìsle ŋgiɗ ka, ti ndzikiɗ ba wur daw ata a dza aka ahəɗ ana ŋgwal ŋa ya. Aɗaba tar ka, ti tsereke a bazlam Mbulum, tì dzer a zləm lele. Tar ti ne ka, kamala wur daw ata a sləl ika ahəɗ ata ŋgwal ŋa, dite a ge ba hinne ya. Biy ŋgiɗ ilik ka, dzìsl gèher a kəzləm, biy ŋgiɗ asa ka, fàhha, dite biy ŋgiɗ ka, tìs aɗəm.»

Bazlam minew tìzèmiŋ ana i liwiŋ gà daw a

24I dəba ŋa ya, Yesuw a zla tarra bazlam minew ŋgiɗ a pam asa. A gwaɗa a tar: «*Mekwere Mbulum a ndzikiɗ ba ka, nda wele duwa a ndzək hwife daw ŋgar, a da dər a dala a gùvàh ŋgar. A daha ka, a slige daw ata. 25Aləka hawa a ge ka, a da a ma. I dəba ŋa ya ka, həvəɗ a ge, aləka, gà mburma tserdze ika mendze are ka, mala swalwa ŋgar a daha, a sliger aɗəm tìzèmiŋ. Ama a slige aba ya ka, a daba. 26Aləka i təv ana daw ata a sləl, a ge ba, a da a bəra, dite a ge wur a ka, tìzèmiŋ tekeɗe, a pàt aba kuɗa. 27Gà ɓəzla meslire wele ata tə da a dala, tə daha, ta fara ikaba i gùvàh a ka, tìzèmiŋ ata hinne i liwiŋ gà daw ata. Aləka tə dara a ma ya ka, tə da a təv mala gùvàh ata. Tə daha, ta gwaɗar: <Mala ga mər, kà slige a gùvàh ana, ŋgwal daw ibam a? Aɗaba tìzèmiŋ a riŋ iɗəm dze ana, a dara aɗəm ana, i ŋga ya?> 28Mala gùvàh a gwaɗa a tar: <A ge a ka, mala swalwa gà na a giŋ kataya ya.> Gà ɓəzla meslire ŋgar ata ta gwaɗar: <Wànà kà waya ana, mi da, mi tə ndzaha iɗəm a bəɗ a ya?> 29A gwaɗa a tar aaka: <Awaŋ, na bəla ki ndzehwim a iɗəm a ka, ki ndzehwim a nda daw ŋa dze. 30Ŋgulum mandza tə̀ma, tə̀ nah akaba dzekwiŋ. A təv ana masàsà daw ide ya ka, i gweɗe a a gà ɓəzla masàsà ŋa: Haɓumara iɗəm tìzèmiŋ a dzekwiŋ, dite ka yahumar gər, ka tikwim ahər akwa. I dəba ŋa ya, ki seswimiŋ a daw gà, dite ki gìzlwimiŋ a, ki ndzekwimere a a awura gà ya kuɗa.> «

Bazlam minew wur dukw ana hinne tsiye

Markus 4:30-32; Luka 13:18-19

31I dəba ŋa ya, Yesuw a tsik a tar bazlam minew ŋgiɗ pam asa. A gwaɗa a tar: «*Mekwere Mbulum a ndzikiɗ ba ka, wur dukw ana hinne tsa, kamala wur meserek a. Ama ka, wele duwa a ndzək, a slige a gùvàh ŋgar. 32Ar ka, hinne tsa, kwizikw na ika magər gà dukw medile ana ti slige a dze ya. Aləka, tàa slige ka, a sliliŋa, a gil a ba, a ne a dizl ɗaf batsah ŋa, a zè a gà dukw medile tserdze. A zlele a ahər hinne asa mbaŋa, dite gà ɗiyeŋ ti ndze aɗəmiŋa, ta ŋgereye ahər a ga tar.»

Bazlam minew giɗe ana a kwasawa à duwa ya

Luka 13:20-21

33I dəba ŋa ya, Yesuw a tsik a tar bazlam minew asa mbaŋa. A gwaɗa a tar: «*Mekwere Mbulum ka, à mbìɗ a à mendze mburma. A ndzikiɗ ba ka, giɗe ana a kwasawa à duwa ya. Taŋa məkəs duwa a ndzək gùfa a batsah kəzləm makər, dite a nda aaka giɗe, a həlaɓ dər akaba. I dəba ŋa ya ka, dzìdzèrègìffe a kwasa dər fit kuɗa.»

Yesuw a gaw akaba gà mifefile ŋgar nda bazlam minew

Markus 4:33-34

34Gà dukw ata tserdze ya, Yesuw a tsikewa a gà mburma ka, ndaka bazlam minew. Aɗaba a tsikewa bazlam ŋgar a mburma ka, ze bazlam minew tsa pəra. 35Aɗaba taŋa, dukw ana Ezaya, mala məma à guma Mbulum ana akahər ata a tsik a ka, kaɗəŋ ndzer. Taŋa Mbulum a gwa:

«I fèfil a ka, ndaka bazlam minew.

I ɗif a ter a ka, à dukw ana

makàhà ŋa daga piŋŋe,

Yàa ge gər ahəɗ zukw tsiye.»*fb*

Yesuw a màra iɗəm à bazlam minew tìzèmiŋ a mburma ya

parakkà lele

36Aləka i dəba ŋa ya, Yesuw a dara i təv gà mburma ata ya, a da a ma. A daha ka, a da a ga. Gà ɓəzla mazazama ŋgat ata tə zazamaha ŋgat a fata. Tə daha, ta gwaɗar: «Bazlam minew tìzèmiŋ ata ndeɗiŋa ya ka, mì sər tsəna, pàt a mər dərra iɗəm a lele kuɗa kwaŋ.» 37A gwaɗa a tar: «Mala meslìgè daw ka, iye, *wur ana a dara i təv Mbulum a ya. 38Na a ne gùvàh ka, gər ahəɗ. Dite na a ne hwife daw ata ka, gà mburma ana ta gəs bazlam Mbulum, ti de a a mekwere ŋgar a. Tìzèmiŋ ka, gà na ta gəs bazlam sitene ya. 39Mala swalwa ana a slige tìzèmiŋ ata ya ka, Əbay sitene. Masàsà daw ka, pat ana Mbulum à ndìv a à gər ahəɗ a. Dite na a ne gà ɓəzla masàsà daw ata asa ka, gà gawla Mbulum. 40Kamala taŋa ya, a ne a ka, kamala mala gùvàh ana a haɓa tìzèmiŋ i daw ŋgar a ka, dite a wànà iɗəm a nda akwa ya. A pat ana Mbulum à ndìv a à gər ahəɗ a ka, a ge a dər kataya mbaŋa. 41Iye, wur ana a dara i təv Mbulum a, i slirre a gà gawla gà ya. Ta pele a iɗəm gà mburma ana ta vile a mendìfè sik a mburma, nda gà na ta ge a dukw ana ŋgwala tsiye tserdze, i liwiŋ gà mburma ana ti de a a *mekwere Mbulum a. 42Tì ndzikere a iɗəm gà na gà ŋgwal ŋa tsiye, dùf tì ndè à ter a a akwa ana a mbete a tsa aà biybiy a. I fata ka, ti tiwe a hinne, ndàtsə̀tsə̀tsà ti dzedzer a nda məpapəɗa dər zlir. 43Ama akahər ata ka, gà mburma ana ta ge dukw ana a da a gər a Mbulum a ka, tar ti ndze a ka, i mekwere ŋgar. I fata ti ndze a ka, dzaydzay kamala pat ana à div a ya. Aɗaba taŋa, dzùmar zləm lele na gər kurum aka ge aà metsereke ya.»

Bazlam minew gà dukw ana à sìkim a ba tsiye

44I dəba ŋa ya, a gwaɗa a tar asa: «*Mekwere Mbulum ana ŋgat ŋa a zal a kurum dər a, a ndzikiɗ ba ka, kamala dukw ana ŋgwal ŋa hinne, à sìkim a ba tsa, wura a ŋgat i biye i gùvàh mburma ya. Wele ata à kèher a are lele, a ŋgeye a ba hinne. A mbìs aaka a ahəɗ, à sìkèh a dər aaka. Dite a de a a ma, a dehe a, a dzewe a à gà dukw ŋgar fit. A de a dərraha a mala gùvàh ata. A sìkim a gùvàh ŋa dze a ba ŋgar fit.

45Asa ka, wele ana Mbulum a zeler a à mekwere ŋgar a ka, ŋgat a ndzikiɗ ba ka, mala metsèkèle ana a yehe a ŋgwal kur dukw ana ta vìɗ a ka, tsakala ŋa hinne, à sìkim a ba tsiye. 46I təv ana aka ŋgat ŋgwal ŋa ata ka, a de a a ma, a dehe a, a dzewe a à gà dukw ŋgar fit, dite à sìkim a dər ŋgwal kur dukw ata kuɗa.»

Bazlam minew ndzàràwà magàsà kilif

47«Iye ihər i gweɗe a kurum a asa: *Mekwere Mbulum a ndzikiɗ ba ka, ndzàràwà gà ɓəzla magàsà kilif ana ti tikewa a duluv a yam a. Na tàa tike aɗəm ka, làw làw làw, gà kilif ŋgiɗ pampam hinne ti de aɗəmiŋa. 48Na tàa fə̀r, aka rah aɗəm ka, ti zlere a aka gìgìze ya. Dite ti ndze a dər a bəɗ, ta pelere a iɗəm gà ŋgwal gà kilif a, tì dze a a tàkwasa. Ama na bəla na ŋgwal ŋa tsəka, gwits tì dze a dər aba i dala i fataya. 49Kamala taŋa ya, a pat ana Mbulum à ndìv a à gər ahəɗ a tekeɗe, a ge a dər kataya mbaŋa. Gà gawla Mbulum ti deriŋa, aà mandzàkà i ba gà mburma ana gà ŋgwal ŋa ika miɗ Mbulum nda gà na gà ŋgwal ŋa tsiye. 50Tì ndzikere a iɗəm gà na gà ŋgwal ŋa tsiye, dùf tì ndè à ter a a akwa ana a mbete a tsa aà biybiy a. I fata ka, ti tiwe a hinne, ndàtsə̀tsə̀tsà ti dzedzer a nda məpapəɗa dər zlir.»

Bazlam minew gà dukw ana gà awiya ŋa ŋgwal ŋa,

ndəna miviya ŋa ya

51I dəba ŋa ya, Yesuw a wiz à gà ɓəzla mazazama ŋgat a, a gwaɗa a tar: «Kàa tsarakum gà bazlam ata i tsik a kurum a tserdze ya ya?» Ta gwaɗar aaka: «Haya, maa tsaraka.» 52A gwaɗa a tar asa: «Aɗaba ku weke na a sər məpala ahəm Mbulum, aka gəs mekwere ŋgar lele ka, a ndzikiɗ ba ka, mala ga ana limana ŋgar a riŋ hinne, à mère a ka, à miviya ŋa, kige tsa, awiya ŋa asa ya.»

Gà mburma ana i Nazaret a, ta gəs Yesuw nda gəzləŋ tsa

Markus 6:1-6; Luka 4:16-30

53I dəba ŋa ya, Yesuw a tsik a tar aba gà bazlam minew ata ya fit ka, a hitsera i fataya. 54A da a kwite ana a gəl iɗəm ba ya. A daha ka, a da a ga mahàmà a Mbulum tar. I fata ka, a dza ba aà medzeŋge bazlam Mbulum a mburma. Bazlam ŋgar ata gà mburma tə tsaraka ka, a ge aà tar kamala dukw mene aà mburma ya. Ta gwaɗaba ika magər tar: «Yweh yweh, a ŋgatara metsehe ata dze ana, i ŋga ya? Meme na a sle aà mege gà dukw mene aà mburma ata pampam kamala taŋa ya? 55Aɗaba ŋgat ka, kà sərakwa kəla mala məpàpàzà dizl a? Mama ŋgar ibam, Mariya, gà damər ŋgar tekeɗe, gà Zakup nda Yasufa nda gà Simum nda gà Yudas a. 56Gà damər ŋgar gà dəm ŋana tekeɗe, tar ɗa mandza ŋa ika magər kwa i faha ana, a ŋgatara ndzəɗa ata dze ana, i ŋga ya na kataya ya?» 57Aɗaba taŋa na gà mburma ata ta gəs ahəm aà Yesuw tsiye. I fataya ka, Yesuw a gwaɗa a tar: «Ku weke na tə sər ŋgat a gəl ba i kwite ata, nda gà mburma ana i ga i ma ŋgar a tserdze, dite à me a ter a à bazlam Mbulum i fata asa ka, ta gis a bazlam ŋgar, ta ger a magəɗa tsa. Say na i liwiŋ gà mburma ŋgar asa tsiye dzekwiŋ, taŋa ka, ta gis a bazlam ŋgar kuɗa.» 58I dəba taŋa ya ka, Yesuw aka ge dukw mene aà mburma i fata hinne tsa, agəra ana gà mburma ŋgar ata ta gəs ŋgat nda gəzləŋ tsiye.

Àwon tá yàn lọ́wọ́lọ́wọ́ báyìí:

Mata 13: gnd

Ìsàmì-sí

Pín

Daako