ಯೋಹಾನೆ 8
8
ವ್ಯಭಿಚಾರೊಡು ತಿಕ್ಕಿನ ಪೊಂಜೊವು
1ಆಂಡ ಯೇಸು ಇಪ್ಪೆಗುಡ್ಡೆಗ್ ಪೋಯೆ. 2ಮನದಾನಿ ಪುಲ್ಯಕಾಂಡೆ ಆಯೆ ದೇವಾಲಯೊಗು ಬನ್ನಗ ಮಾತ ಜನೊಕುಲು ಆಯ ಕೈತಲ್ ಬತ್ತೆರ್, ಆಯೆ ಅಲ್ಪ ಕುಲ್ಲೊಂದು ಅಕ್ಲೆಗ್ ಬೋಧನೆ ಮಲ್ತೊಂದುಪ್ಪುನಗ, 3ಶಾಸ್ತ್ರಿಲುಲಾ ಪರಿಸಾಯೆರ್‌ಲಾ ವ್ಯಭಿಚಾರೊಡು ತಿಕ್ಕಿನ ಒಂಜಿ ಪೊಂಜೊವುನು ಆಯನ ಕೈತಲ್ ಕನತ್‌ದ್ ಅಕ್ಲೆನ ನಡುಟು ಉಂತಾದ್ 4“ಬೋಧಕ, ಈ ಪೊಂಜೊವು ವ್ಯಭಿಚಾರ ಮಲ್ಪುನಗನೇ ಕೈಕ್ ತಿಕ್ಕಿಯಲ್. 5ಇಂಚಿತ್ತಿನಾಕುಲೆನ್ ಕಲ್ಲ್ ದಕ್ಕ್‌ದ್ ಕೆರೊಡು ಅಂದ್‌ದ್ ಮೋಶೆನ ನ್ಯಾಯಕಟ್ಟ್‌ಡ್ ಎಂಕ್ಲೆಗ್ ಅಪ್ಪಣೆ ಕೊರ್ತೆ, ಮೊಲೆನ ಸಂಗತಿಡ್ ಈ ದಾದ ಪನ್ಪ?” ಅಂದ್‌ದ್ ಆಯಡ ಕೇಂಡೆರ್. 6ಆಯ ಮಿತ್ತ್ ತಪ್ಪು ನಾಡ್ದ್ ಎಂಚಾಂಡಲಾ ಶೋಧನೆಡ್ ತಿಕ್ಕಾದ್ ಪಾಡೊಡು ಅಂದ್‌ದ್ ಎನ್ನ್‌ದ್ ಇಂಚ ಪಂಡೆರ್. ಆಂಡ ಯೇಸು ಬಗ್ಗ್‌ದ್ ಬಿರೆಲ್‌ಡ್ ನೆಲೊಟ್ಟು ಬರೆಯೊಂದಿತ್ತೆ. 7ಅಕುಲು ಆಯಡ ಬುಡಂದೆ ಕೇನೊಂದಿತ್ತಿನೆಡ್ದ್, ಆಯೆ ಸರ್ತ ಆದ್ ಅಕ್ಲೆಡ, “ನಿಕ್ಲೆಡ್ ಪಾಪ ಮಲ್ಪಂದಿನಾಯೆ ಏರಾಂಡಲಾ ಇತ್ತೆರ್ಡ, ಆಯೆನೇ ದುಂಬತ್ತ ಆಲೆ ಮಿತ್ತ್ ಕಲ್ಲ್ ದಕ್ಕ್‌ಡ್.” 8ಕುಡ ಬಗ್ಗ್‌ದ್ ನೆಲೊಟ್ಟು ಬರೆಯೊಂದಿತ್ತೆ. 9ಆ ಪಾತೆರೊನು ಕೇಂಡ್ದ್ ತನ್ಕುಲೇ ಪಾಪಿಲಂದ್ ಉಡಲ್‌ಡೇ ಎನ್ನ್‌ದ್, ಹಿರಿಯಾಕುಲೆಡ್ದ್ ಪತ್ತ್‌ದ್ ಕಿನ್ಯಾಕುಲೆ ಮುಟ್ಟ ಒರಿಯ ಬೆರಿ ಒರಿ ಪಿದಯಿ ಪೋಯೆರ್. ಕಡೆಕ್ಕ್ ಯೇಸು ಬೊಕ್ಕ ನಡುಟು ಉಂತುದಿತ್ತಿ ಪೊಂಜೊವು ಮಾತ್ರ ಅವುಲು ಇತ್ತಲ್. 10ಅಪಗ ಯೇಸು ಪೊಂಜೊವುನು ತೂದು ಆಲೆಡ, “ಅಮ್ಮಾ ನಿನ ಮಿತ್ತ್ ಅಪವಾದ ಪಾಡ್ದಿನಾಕುಲು ಓಲುಲ್ಲೆರ್? ನಿಕ್ಕ್ ಏರ್ಲಾ ತೀರ್ಪು ಕೊರ್ಜೆರಾ?” ಪಂಡೆ.
11ಐಕ್ ಆಲ್, “ಏರ್ಲಾ ಇಜ್ಜಿ ಕರ್ತವಾ,” ಅಂದಲ್. ಯೇಸು ಆಲೆಗ್, “ಯಾನ್ಲಾ ನಿಕ್ಕ್ ತೀರ್ಪು ಕೊರ್ಪುಜಿ, ಪೋ, ನನ ಮಿತ್ತ್ ಪಾಪ ಮಲ್ಪಡ,” ಅಂದ್‌ದ್ ಪಂಡೆ.
ಯೇಸು ಈ ಲೋಕದ ಬೊಲ್ಪು
12ಯೇಸು ಕುಡ ಪರಿಸಾಯೆರೆಡ ಪಾತೆರಿಯೆರೆ ಸುರು ಮಲ್ತ್‌ದ್, “ಯಾನೇ ಲೋಕೊಗು ಬೊಲ್ಪು, ಎನ ಬೆರಿಯೆ ಬರ್ಪಿನಾಯೆ ಕತ್ತಲೆಡ್ ನಡಪಂದೆ ಜೀವ ಕೊರ್ಪಿ ಬೊಲ್ಪುನು ಪಡೆಯಿನಾಯೆ ಆದುಪ್ಪುವೆ,” ಅಂದ್‌ದ್ ಪಂಡೆ.
13ಉಂದೆನ್ ಕೇಂಡ್ದ್ ಪರಿಸಾಯೆರ್ ಆಯಡ, “ನಿನ ಸಂಗತಿಡ್ ಈಯೇ ಸಾಕ್ಷಿ ಪನೊಂದುಲ್ಲ; ಅಂಚಾದ್ ನಿನ ಸಾಕ್ಷಿ ನಿಜ ಆವಂದ್,” ಪಂಡೆರ್. 14ಕುಡ ಯೇಸು ಅಕ್ಲೆಡ, “ಯಾನ್ ಒಲ್ಪಡ್ದ್ ಬೈದಿನಾಯೆ, ಒಡೆಗ್ ಪೋಪಿನಾಯೆ ಅಂದ್‌ದ್ ಎಂಕ್ ತೆರಿದುಪ್ಪುನೆಡ್ದ್ ಎನ ಸಂಗತಿಡ್ ಯಾನೇ ಸಾಕ್ಷಿ ಪಂಡೊಂಡಲಾ ಎನ ಸಾಕ್ಷಿ ನಿಜ ಆದುಪ್ಪುಂಡು. ಆಂಡ ಯಾನ್ ಒಲ್ಪಡ್ದ್ ಬೈದಿನಾಯೆ ಒಡೆಗ್ ಪೋಪೆ ಅಂದ್‌ದ್ ನಿಕುಲು ತೆರಿದಿಜರ್. 15ನಿಕುಲು ಲೋಕದಾಕುಲೆ ಲೆಕ್ಕ ತೀರ್ಪು ಮಲ್ಪುನಾಕುಲಾದುಲ್ಲರ್, ಆಂಡ ಯಾನ್ ಏರೆಗ್ಲಾ ನ್ಯಾಯತೀರ್ಪು ಮಲ್ಪುಜಿ, 16ತೀರ್ಪು ಮಲ್ತ್ಂಡಲಾ ಎನ ನ್ಯಾಯತೀರ್ಪು ನಿಜವಾಯಿನವು ಆದುಪ್ಪುಂಡು. ದಾಯೆ ಪಂಡ ಯಾನ್ ಒಂಟಿ ಅತ್ತ್, ಎನನ್ ಕಡಪುಡಿ ಅಮ್ಮೆ ಎನ ಒಟ್ಟುಗು ಉಲ್ಲೆ. 17ಇರ್ವೆರೆ ಸಾಕ್ಷಿ ನಿಜ ಅಂದ್‌ದ್ ನಿಕ್ಲೆನ ನ್ಯಾಯಕಟ್ಟ್‌ಡೇ ಬರೆತ್ಂಡ್. 18ಎನ ಸಂಗತಿಡ್ ಯಾನೇ ಸಾಕ್ಷಿ ಪನ್ಪಿನಾಯೆ ಆದುಲ್ಲೆ, ಅತ್ತಂದೆ ಎನನ್ ಕಡಪುಡ್ದಿನ ಅಮ್ಮೆ ಎನ ಸಂಗತಿಡ್ ಸಾಕ್ಷಿ ಪನ್ಪೆ,” ಪಂಡೆ.
19ಅಪಗ ಅಕುಲು, “ನಿನ ಅಮ್ಮೆ ಓಲುಲ್ಲೆ?” ಅಂದ್‌ದ್ ಕೇನ್ನಗ ಯೇಸು ಅಕ್ಲೆಡ ಪಂಡಿನಿ, “ನಿಕುಲು ಎನನ್ಲಾ ತೆರಿದಿಜರ್, ಎನ ಅಮ್ಮೆರೆನ್ಲಾ ತೆರಿದಿಜರ್. ಎನನ್ ತೆರಿದಿತ್ತ್‌ರ್ಡ, ಎನ ಅಮ್ಮೆರೆನ್ಲಾ ತೆರಿದಿತ್ತ್‌ವರ್.”
20ಯೇಸು ದೇವಾಲಯದ ಉಲಯಿ ಕಾಣಿಕೆ ದೀಪಿನ ಜಾಗ್‌ದ ಅಂಗಣೊಡು ಬೋಧನೆ ಮಲ್ತೊಂದುಪ್ಪುನಗ ಈ ಪಾತೆರೊಲೆನ್ ಪಂಡೆ. ಆಯನ ಕಾಲ ನನಲಾ ಬರಂದೆ ಇತ್ತಿನೆಡ್ದ್, ಆಯನ್ ಏರ್ಲಾ ಪತ್ತಿಜೆರ್.
ಯಾನ್ ಪೋಪಿನಡೆ ನಿಕುಲು ಬರಯರ್
21ಯೇಸು ಕುಡ ಅಕ್ಲೆಡ, “ಯಾನ್ ಮುಲ್ತುಡ್ದು ಪೋಪೆ, ನಿಕುಲು ಎನನ್ ನಾಡುವರ್, ಬೊಕ್ಕ ನಿಕ್ಲೆನ ಪಾಪೊಡೇ ನಿಕುಲು ಸೈಪರ್; ಬೊಕ್ಕ ಯಾನ್ ಪೋಪಿನಡೆ ನಿಕ್ಲೆಗ್ ಬರಿಯೆರೆ ಆವಂದ್,” ಪಂಡೆ.
22ಆ ಪಾತೆರೊಗು ಯೆಹೂದ್ಯೆರ್, “ಯಾನ್ ಪೋಪಿನಡೆ ನಿಕುಲು ಬರಯರ್? ಅಂದ್‌ದ್ ಪನ್ಪೆ ಅತ್ತಾ? ಉಂಬೆ ತನನ್ ತಾನೇ ಕೆರಿಯೆರೆ ತೂಪೆನಾ ದಾನ್ನ?” ಅಂದ್‌ದ್ ಪಾತೆರೊಂಡೆರ್.
23ಆಯೆ ಅಕ್ಲೆಡ, “ನಿಕುಲು ತಿರ್ತ್‌ದಾಕುಲು, ಯಾನ್ ಮಿತ್ತ್‌ದಾಯೆ, ನಿಕುಲು ಈ ಲೋಕದಾಕುಲು, ಯಾನ್ ಈ ಲೋಕದಾಯೆ ಅತ್ತ್. 24ಅವೆಡ್ದಾವರ ನಿಕುಲು ನಿಕ್ಲೆನ ಪಾಪೊಡ್ದೇ ಸೈಪರಂದ್‌ದ್ ನಿಕ್ಲೆಗ್ ಪನ್ಪೆ. ‘ಯಾನ್ ಆಯೆನೇ,’ ಅಂದ್‌ದ್ ನಿಕುಲು ನಂಬುಜರ್ಡ, ನಿಕುಲು ನಿಕ್ಲೆನ ಪಾಪೊಡ್ದೇ ಸೈತ್ ಪೋವರ್.”
25ಅಪಗ ಅಕುಲು ಆಯಡ, “ಈ ಏರ್?” ಅಂದ್‌ದ್ ಪನ್ನಗ ಯೇಸು ಅಕ್ಲೆಡ, “ನಿಕ್ಲೆಗ್ ಸುರುಡ್ದಿಂಚಿ ತೆರಿಪಾವೊಂದು ಇತ್ತಿನಾಯೆನೆ ಯಾನ್. 26ನಿಕ್ಲೆನ ಸಂಗತಿಡ್ ಪನಿಯೆರೆಗ್ ನಿಕ್ಲೆನ ಮಿತ್ತ್ ತೀರ್ಪು ಮಲ್ಪೆರೆಗ್ಲಾ ಮಸ್ತ್ ವಿಷಯೊಲು ಎಂಕುಂಡು, ಆಂಡ ಎನನ್ ಕಡಪುಡ್ದಿನಾಯೆ ಸತ್ಯವಂತೆ, ಆಯಡ್ದ್ ಕೇಂಡಿನೆನೇ ಯಾನ್ ಲೋಕೊಗು ಪನ್ಪೆ,” ಅಂದ್‌ದ್ ಪಂಡೆ.
27ಯೇಸು ಅಮ್ಮೆರೆನ ಸಂಗತಿಡ್ ಪಂಡಿನಿಂದ್ ಅಕ್ಲೆಗ್ ಗೊತ್ತಾಯಿಜಿ. 28ಇಂಚ ಉಪ್ಪುನಗ ಯೇಸು, “ನಿಕುಲು ನರಮಾನಿ ಮಗನ್ ಮಿತ್ತ್ ಏರಾನಗ, ಉಂಬೆ ಆಯೆನೇ ಪಂಡ್ದ್‌ಲಾ ಎನ್ನಾತೆಗ್ ಎನ ಅಧಿಕಾರೊಡು ಒವೆನ್ಲಾ ಮಲ್ಪಂದೆ, ಅಮ್ಮೆ ತನ್ಕ್ ಕಲ್ಪಾಯಿ ಪಾತೆರ ಮಾತ್ರ ಪನೊಂದುಲ್ಲೆ ಅಂದ್‌ದ್ ಎನ ಸಂಗತಿಡ್ ನಿಕ್ಲೆಗ್ ಗೊತ್ತಾವು. 29ಎನನ್ ಕಡಪುಡ್ದಿನಾಯೆ ಎನಡೊಪ್ಪ ಉಲ್ಲೆ, ಯಾನ್ ಆಯಗ್ ಮೆಚ್ಚಿಗೆ ಆಪಿನೆನೇ ಏಪಲಾ ಮಲ್ಪುನೆಡ್ದ್, ಆಯೆ ಎನನ್ ಒಂಟಿಯಾದ್ ಬುಡ್ದು ಬುಡ್ತುಜೆ,” ಪಂಡೆ.
30ಆಯೆ ಈ ಸಂಗತಿಲೆನ್ ಪನೊಂದುಪ್ಪುನಗ ಮಸ್ತ್ ಜನ ಆಯನ್ ನಂಬಿಯೆರ್.
ಸತ್ಯ ನಿಕ್ಲೆನ್ ಬುಡುಗಡೆ ಮಲ್ಪುಂಡು
31ಅಪಗ ಯೇಸು ತನನ್ ನಂಬುದಿನ ಯೆಹೂದ್ಯೆರೆಡ, “ನಿಕುಲು ಎನ ಪಾತೆರೊಲೆಡ್ ನಿಲೆ ಆದಿತ್ತರ್ಡ, ನಿಜಾದ್ ಎನ ಶಿಷ್ಯೆರಾದ್ ಸತ್ಯೊನು ತೆರಿಯೊನ್ವರ್. 32ಬೊಕ್ಕ ಸತ್ಯ ನಿಕ್ಲೆನ್ ಬುಡುಗಡೆ ಮಲ್ಪುಂಡು,” ಪಂಡೆ.
33ಐಕ್ ಯೆಹೂದ್ಯೆರ್, “ಎಂಕುಲು ಅಬ್ರಹಾಮುನ ಸಂತಾನದಾಕುಲು, ಎಂಕುಲು ಏರೆಗ್ಲಾ ಏಪಲಾ ಗುಲಾಮೆರ್ ಆದಿತಿಜ, ಅಂಚಾದ್ ನಿಕ್ಲೆಗ್ ಬುಡುಗಡೆ ಆಪುಂಡು ಅಂದ್‌ದ್ ಈ ಪನ್ಪಿನಿ ಎಂಚ?” ಪಂಡೆರ್.
34ಐಕ್ ಯೇಸು, “ನಿಕ್ಲೆಗ್ ನಿಜಾದ್ ಪನ್ಪೆ, ಪಾಪ ಮಲ್ಪುನಾಕುಲು ಮಾತೆರ್ಲಾ ಪಾಪೊಗು ಗುಲಾಮೆರ್ ಆದುಲ್ಲೆರ್. 35ಗುಲಾಮೆ ಶಾಶ್ವತ ಆದ್ ಇಲ್ಲದಾಯೆ ಆದುಪ್ಪುಜೆ. ಆಂಡ ಮಗೆ ಏಪೊಗ್ಲಾ ಇಲ್ಲದಾಯೆ ಆದುಪ್ಪುವೆ. 36ಅಂಚಾಯಿನೆಡ್ದ್ ಮಗೆ ನಿಕ್ಲೆನ್ ಬುಡುಗಡೆ ಮಲ್ತೆಡ, ನಿಜಾದ್‌ಲಾ ನಿಕ್ಲೆಗ್ ಬುಡುಗಡೆ ಆಪುಂಡು. 37ನಿಕುಲು ಅಬ್ರಹಾಮು ಸಂತಾನದಾಕುಲು ನಿಜ; ಆಂಡಲಾ ಎನ ಪಾತೆರೊಲು ನಿಕ್ಲೆಗ್ ತಾಗಂದೆ ಸ್ವೀಕಾರ ಮಲ್ಪಂದಿನೆಡ್ದ್, ಎನನ್ ಕೆರಿಯೆರೆ ತೂಪರ್, 38ಯಾನ್ ಎನ ಅಮ್ಮೆ ಒಟ್ಟುಡು ಇತ್ತ್‌ದ್ ತೂತಿನೆನ್ ಪನ್ಪೆ, ಆಂಡ ನಿಕುಲುಲಾ ನಿಕ್ಲೆನ ಅಮ್ಮೆರೆಡ್ದ್ ಕೇಂಡಿನೆನ್ ಮಲ್ಪುಲೆ,” ಅಂದ್‌ದ್ ಪಂಡೆ.
39ಐಕ್ ಅಕುಲು, “ಎಂಕ್ಲೆನ ಅಮ್ಮೆ ಅಬ್ರಹಾಮು,” ಪನ್ನಗ ಯೇಸು ಅಕ್ಲೆಡ, “ನಿಕುಲು ಅಬ್ರಹಾಮುನ ಜೋಕುಲು ಆದಿತ್ತ್ಂಡ ಅಬ್ರಹಾಮು ಮಲ್ತಿ ಕಾರ್ಯೊಲೆನ್ ಮಲ್ತುದ್ವರ್. 40ನಿಕುಲು ಅಂಚ ಮಲ್ಪಂದೆ ದೇವೆರೆಡ್ದ್ ಕೇಂಡಿನ ಸತ್ಯೊನು ನಿಕ್ಲೆಗ್ ಪಂಡಿನಾಯೆ, ಎನನೇ ಕೆರಿಯೆರೆ ತೂವೊಂದುಲ್ಲರ್, ಅಬ್ರಹಾಮು ಇಂಚ ಮಲ್ತ್‌ಜೆ 41ನಿಕುಲು ನಿಕ್ಲೆ ಅಮ್ಮೆರೆನ ಕೆಲಸೊಲೆನ್ ಮಲ್ಪುವರ್,” ಅಂದ್‌ದ್ ಪಂಡೆ. ಐಕ್ ಅಕುಲು ಆಯಡ, “ಎಂಕುಲು ಹಾದ್ರೊಗು ಪುಟ್ಟುದಿನಾಕುಲು ಅತ್ತ್; ಎಂಕ್ಲೆಗ್ ಒರಿಯೇ ಅಮ್ಮೆ, ಆಯೆ ದೇವೆರೇ,” ಪಂಡೆರ್.
42ಯೇಸು ಅಕ್ಲೆಡ, “ದೇವೆರ್ ನಿಕ್ಲೆನ ಅಮ್ಮೆ ಆದಿತ್ತ್ಂಡ, ಎನನ್ ಪ್ರೀತಿ ಮಲ್ತುದ್ವರ್. ದಾಯೆಗಂದ್ಂಡ ಯಾನ್ ದೇವೆರೆಡ್ದೇ ಪಿದಾಡ್ದ್ ಲೋಕೊಗು ಬೈದಿನಾಯೆ ಆದುಲ್ಲೆ. ಎನ್ನಾತೆಗ್ ಯಾನೇ ಬೈದಿಜಿ, ಆಯೆನೇ ಎನನ್ ಕಡಪುಡುದೆ. 43ಎನ ಬೋಧನೆಗ್ ಕೆಬಿ ಕೊರಂದೆ ಉಪ್ಪುನವೇ ನೆಕ್ಕ್ ಕಾರಣ ನಿಕುಲು ಎನ ಪಾತೆರೊನು ಅರ್ಥ ಮಲ್ತೊನುಜರ್. 44ನಿಕ್ಲೆನ ಅಮ್ಮೆ ಸೈತಾನೆ ನಿಕುಲು ಆ ಅಮ್ಮೆರೆಡ್ದ್ ಪುಟ್ಟಿದಿನಾಕುಲಾದ್ ನಿಕ್ಲೆ ಅಮ್ಮೆರೆನ ದುರ್ಬುಧಿನೇ ನಡಪಾವೊಡು ಪಂಡ್ದ್ ಉಲ್ಲರ್. ಆಯೆ ಸುರುಡ್ದೇ ಮಾನ ಕೆರ್ಪಿನಾಯೆ ಆದಿತ್ತ್‌ದ್, ಸತ್ಯೊಗು ಉಂತುದುಜೆ. ಆಯಡ ಸತ್ಯ ಪನ್ಪಿನ ಇಜ್ಜೇ ಇಜ್ಜಿ. ಆಯನ ಸ್ವಭಾವದಲೆಕ್ಕನೇ ಸುಳ್ಳು ಪಾತೆರ್‌ವೆ. ದಾಯೆಗ್ ಪಂಡ ಆಯೆ ಸುಳ್ಳುಗಾರೆಲಾ ಸುಳ್ಳುದ ಅಮ್ಮೆಲಾ ಆದುಲ್ಲೆ. 45ಯಾನ್ ಸತ್ಯೊನು ಪನ್ಪಿನಾಯೆ ಆದಿತ್ತಿನೆಡ್ದ್ ನಿಕುಲು ಎನನ್ ನಂಬುಜರ್ 46ಎನಡ ಪಾಪೊನು ತೋಜಾದ್ ಕೊರ್ಪಿನಾಕುಲು ನಿಕ್ಲೆಡ್ ಏರುಲ್ಲೆರ್? ಯಾನ್ ಸತ್ಯನೇ ಪನ್ಪಿನಾಂಡ ಎನನ್ ದಾಯೆಗ್ ನಂಬುಜರ್? 47ದೇವೆರೆಡ್ದ್ ಪುಟ್ಟಿದಿನಾಯೆ, ದೇವೆರೆ ಪಾತೆರೊಲೆನ್ ಕೇನ್ವೆ. ನಿಕುಲು ದೇವೆರೆಡ್ದ್ ಪುಟ್ಟಂದಿನೆಡ್ದ್, ನಿಕುಲು ದೇವೆರೆ ಪಾತೆರೊಲೆನ್ ಕೇನುಜರ್,” ಪಂಡೆ.
ಯೇಸು ಬೊಕ್ಕ ಅಬ್ರಹಾಮು
48ಐಕ್ ಯೆಹೂದ್ಯೆರ್, “ಈ ಸಮಾರ್ಯದಾಯೆಲಾ ದೆವ್ವ ಪತ್ತ್‌ದಿನಾಯೆಲಾ ಆದುಲ್ಲ ಅಂದ್‌ದ್ ಎಂಕುಲು ಪನ್ಪಿನವು ಸರಿಯತ್ತಾ?” ಅಂದ್‌ದ್ ಕೇನ್ನಗ, 49ಯೇಸು, “ಯಾನ್ ದೆವ್ವ ಪತ್ತ್‌ದಿನಾಯೆ ಅತ್ತ್, ಎನ ಅಮ್ಮೆರೆನ್ ಸನ್ಮಾನ ಮಲ್ಪುನಾಯೆ ಆದುಲ್ಲೆ, ಆಂಡಲಾ ನಿಕುಲು ಎನನ್ ಅವಮಾನ ಮಲ್ಪುವರ್. 50ಎಂಕ್ ಮಾನಾದಿಗೆ ತಿಕ್ಕೊಡಂದ್ ಯಾನ್ ಬಯಕುಜಿ, ಎಂಕ್ ಮಾನಾದಿಗೆ ಬರೊಡಂದ್‌ದ್ ಬಯಕುನಾಯೆ ಒರಿ ಉಲ್ಲೆ. ಆಯೆನೇ ನ್ಯಾಯತೀರ್ಪುನಾಯೆ. 51ನಿಕ್ಲೆಗ್ ನಿಜಾದ್ ಪನ್ಪೆ, ಏರಾಂಡಲಾ ಎನ ಪಾತೆರೊನು ಕೈಕೊಂದು ನಡತೆಡ, ಆಯೆ ಮರಣೊನು ಏಪೊಗ್ಲಾ ತೂವಯೆ,” ಅಂದ್‌ದ್ ಪಂಡೆ.
52ಐಕ್ ಯೆಹೂದ್ಯೆರ್, “ಈ ದೆವ್ವ ಪತ್ತ್‌ದಿನಾಯೆ ಅಂದ್‌ದ್ ಇತ್ತೆ ಎಂಕ್ಲೆಗ್ ತೆರಿಂಡ್, ಅಬ್ರಹಾಮು ಸೈತೆ, ಪ್ರವಾದಿಲು ಸೈತೆರ್, ಆಂಡ ಎನ ಪಾತೆರೊನು ಕೈಕೊಂದು ನಡಪುನಾಕುಲು ಏಪೊಗ್ಲಾ ಮರಣೊನು ತೂವಯೆರ್‌ ಪನ್ಪ. 53ಎಂಕ್ಲೆನ ಮೂಲದಾಯೆ ಆದುಪ್ಪು ಅಬ್ರಹಾಮುಡ್ದ್ ಈ ಮಲ್ಲಾಯೆನಾ? ಆಯೆಲಾ ಸೈತ್ ಪೋಯೆ, ಪ್ರವಾದಿಲುಲಾ ಸೈತ್ ಪೋಯೆರ್, ನಿನನ್ ಈ ಏರ್ ಅಂದ್‌ದ್ ತೆರಿಯೊನ್ವ?” ಕೇಂಡಿನೆಕ್ಕ್
54ಯೇಸು, “ಎನನ್ ಯಾನ್ ಮೆಚ್ಚಾವೊಂಡೆಡ ಎನ ಮೈಮೆ ಅರ್ಥದಾಂತಿನವು. ಎನ ಮೈಮೆನ್ ತೋಜಾವುನಾಯೆ ಎನ ಅಮ್ಮೆ ನಿಕುಲು ಆಯನ್ ಎಂಕ್ಲೆನ ದೇವೆರ್ ಪನ್ಪರ್. 55ಆಂಡಲಾ ನಿಕುಲು ಆಯನ್ ತೆರಿಯಂದೆ ಉಲ್ಲರ್, ಯಾನಾಂಡಲಾ ಆಯನ್ ತೆರಿದೆ. ಆಯನ್ ತೆರಿದಿಜೆ ಪಂಡ್ಂಡ ನಿಕ್ಲೆನ ಲೆಕ್ಕನೇ ಸುಳ್ಳುದಾಯೆ ಆಪೆ; ಆಂಡ ಆಯನ್ ಯಾನ್ ತೆರಿದೆ ಬೊಕ್ಕ ಆಯನ ಪಾತೆರೊಲೆನ್ ಕೈಕೊಂದು ನಡಪುವೆ. 56ನಿಕ್ಲೆನ ಮೂಲಪಿತೃ ಆದುಪ್ಪು ಅಬ್ರಹಾಮು, ಎನ ದಿನೊನು ತಾನ್‌ಲಾ ತೂವೆ ಅಂದ್‌ದ್ ಕುಸಿಟಿತ್ತೆ. ಆಯೆ ಅವೆನ್ ತೂದು ಸಂತೋಷ ಪಡೆಯೆ,” ಪಂಡೆ.
57ಐಕ್ ಯೆಹೂದ್ಯೆರ್, “ನಿಕ್ಕ್ ನನಲಾ ಐವ ವರ್ಸ ಆತಿಜಿ, ಅಬ್ರಹಾಮುನು ತೂತನಾ?” ಪನ್ನಗ, 58ಯೇಸು, “ನಿಕ್ಲೆಗ್ ನಿಜಾದ್ ಪನ್ಪೆ, ಅಬ್ರಹಾಮು ಪುಟ್ಟುನೆಕ್ಕ್ ದುಂಬುಡ್ದಿಂಚಿ ಯಾನ್ ಉಲ್ಲೆ,” ಪಂಡೆ.
59ಅಕುಲು ಈ ಪಾತೆರೊನು ಕೇಂಡ್ದ್, ಆಯನ್ ಕೆರಿಯೆರೆಗಾದ್ ಕಲ್ಲ್ ದೆತ್ತೊನಿಯೆರೆ ಪೋನಗ, ಯೇಸು ದೆಂಗೊಂದು ದೇವಾಲಯೊಡ್ದು ಪಿದಯಿ ಪೋಯೆ.
Àwon tá yàn lọ́wọ́lọ́wọ́ báyìí:
ಯೋಹಾನೆ 8: ತುಳು
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
New Life Literature
