लूका 23
23
पीळातुस की ईसुऊँ पुछाताछी
(मत्ती 27:1,2,11–14; मरकुस 15:1–5; यहून्ना 18:28–38)
(मत्ती 27:57–61; मरकुस 15:42–47; यहून्ना 19:38–42)
1इकै पाछै सगळी पंचायत खड़ी होगी अर बिनै पीळातुस क कनै लेगी। 2बे बिपै बलेम लगाया, “म्हें इनै यहूदि मिनखानै भंगराता पकड़्या हां क समराटनै लगान नइ देणो चाए अर ओ खुदनै मसी राजा बतावै ह।” 3जणा पीळातुस बिऊँ बुज्यो, “तू यहूदिआ को राजा ह के?” ईसु बोल्यो, “जंय्यां तू खुदई खेर्यो ह।” 4जणा पीळातुस मिनखा अर परधान याजकऊँ बोल्यो, “मनै तो इ आदमी म क्युंई गळत कोनी दिखर्यो।” 5पण बे आपकी बात प अड़्या रिह्या, “नइ ओ गलिल दिसावरऊँ लेर सगळा यहूदिआ दिसावर अर अठै का मिनखानै आपकी सीखऊँ भड़कायो ह।” 6आ सुणर पीळातुस बोल्यो, “के ओ गलिल को रेह्बाळो ह?” 7अर आ जा'णर क बो हेरोद का इलाका को ह जणा बो बिनै हेरोद क कनै भेज दिओ जखो बा दिना म यरूसलेम मई हो।
ईसु हेरोद क दरबार म
8ईसुनै देखर हेरोद राजी होयो क्युं क बो बोळी पेलीऊँ बिकै बारां म सुण राख्यो हो बो बिऊँ मिलबो चातो हो अर बिऊँ क्युं चमत्कार देखबो चातो हो। 9जणा बो ईसुऊँ बोळी बाता बुजी पण बो एक कोई जुबाब कोनी दिओ। 10परधान याजक अर सास्तरनै सीखाबाळा बठै खड़्या-खड़्या एक की दो लगाता रिह्या। 11जणा हेरोद अर बिका सिपाईड़ा बिको मजाक उडायो। अर बिको निरादर कर बिनै एक मेंगो चोळो पिरा'र ओटो पीळातुस क कनै भेज दिओ। 12बि दिनई हेरोद अर पीळातुस एक दुसरा का भाईला बणगा इऊँ पेली बाकी कदैई कोनी बणी।
ईसुनै मोत की सजा
(मत्ती 27:15–26; मरकुस 15:6–15; यहून्ना 18:39—19:16)
13पीळातुस परधान याजका, यहूदि नेता अर मिनखानै भेळा कर 14बाऊँ बोल्यो, “थे इ आदमीनै, मिनखानै भंगराबा का जुरम म मेरै कनै ल्याया। अर म थारै सामैई, इ बात की जाच पड़ताळ करी पण म बिमै अंय्यां की कोई बातई कोनी पकड़ी। 15अर नइ हेरोदनै इमै क्युं मिल्यो जणाई तो बो इनै पाछो आपणै कनै भेज दिओ। ओ अंय्यां को क्युंई कोनी कर्यो जिकै चलतै ओ मोत की सजा भोगै। 16जणा म इकै तड़ा मरवार छोड द्युँ?” 17पीळातुस आई बरस फसै का त्युंहार प यहूदि मिनखा ताँई एक केदिनै छोडतो हो।#23:17 पीळातुस आई बरस फसै का त्युंहार प यहूदि मिनखा ताँई एक केदिनै छोडतो हो। मरकुस 15:6 को देखो 18जणा सगळा जोरऊँ एक सागै कह्या, “तू म्हारै ताँई बरअबानै छोड दे पण इको काम जचा।” 19बरअबानै नगरी म सरकार क खिलाप बगावत अर हत्या का जुरम म जेळ म गेर राख्यो हो। 20पण पीळातुस ईसुनै छोडबो चावै हो। जणाई बो लोगानै ओज्यु बोल्यो। 21पण बे एकई रट लगा राखी, “इनै सुळी प चढा द्यो।” 22पीळातुस तीसरका बोल्यो, “क्युं बो अंय्यां को कूणसो पाप कर्यो ह? जखो म इनै मोत की सजा द्युँ! क्युं क मनै तो इमै अंय्यां की कोई बुराई कोनी दिखी जणा फेर म इकै तड़ा लगवार छोड द्युँ।” 23पण बे ओर बी जोरऊँ चिलाबा लागगा, “नइ इनै तो सुळी प चढाओ” अर बाकी जीत होई। 24पीळातुस आदेस काड दिआ क आकी माँग पूरी होवै। 25अर बो एक आदेस ओर काड्यो क बरअबानै छोड दिओ जावै जिनै मिनख छोडबा की माँग करर्या हा जखो सरकार क खिलाप बगावत अर हत्या का जुरम म जेळ म पड़्यो हो अर ईसुनै बाका हाता म सूप दिओ जिऊँ बे बिकै सागै बा कर सकै जखो बे चावै हा।
ईसुनै सुळी चढाबो
(मत्ती 27:32–44; मरकुस 15:21–32; यहून्ना 19:17–27)
26सिपाईड़ा जद ईसुनै ले जार्या हा। जणा बे समोन नाम का एक कुरेनीनै देख्यो जखो ढाणीऊँ आर्यो हो अर बे बिनै पकड़र बिपै सुळी धर दिआ अर बिनै ईसु क गेल-गेल कर लिओ। 27अर मिनखा की भीड़ की भीड़ बिकै गेल-गेल होरी, जिमै बोळी लूगाया अंय्यां की ही जखी ईसु ताँई रोरी अर बिलखरी ही। 28इपै ईसु पाछै मुड़र बाऊँ बोल्यो, “यरूसलेम म रेह्बाळी लूगायो थे मेरै ताँई मना रोओ पण थे खुद ताँई अर थारा टाबरा ताँई रोओ। 29क्युं क बा घड़ी बी आबाळी ह जद मिनख खेसी भागहाळी हीं बे लूगाया जखी बांझड़ी ह। अर बा कोख जखी टाबर कोनी जणी अर बा छाती जखी कदैई कोनी चुंघाई। 30#दरसा 6:16बि घड़ी मिनख डूँगरऊँ बोलसी म्हारै प पड़ मरो अर डूँगर्याऊँ बोलसी म्हानै लुखाले। 31क्युं क जद मिनख हर्या दरख्तनै कोनी बकसै जणा फेर सूका को तो खेबोई के?” 32बे बिकै सागै दो अपराद्यानै बी मारबानै जार्या हा। 33अर जद बे बि झघा पुग्या जिनै भोडी खेता हा, बे ईसु अर बा दो कुकरमीयानै सुळी चढा दिआ बा दोन्या मऊँ एकनै बिकै दायणा अर दुसरानै बाया हात कानि सुळी प चढा दिआ। 34इपै ईसु बोल्यो, “परम-पिता आनै माफ कर द्यो क्युं क आनै कोनी बेरो क अ काँई कर्या हीं।” अर बे सिपाईड़ा पासो फेकर बिका गाबानै आपसरी म बाट लिआ। 35बठै खड़्या मिनख देखर्या हा, अर बठै खड़्या यहूदि नेता आ बोलर बिको मजाक उडार्या हा क, “ओ ओरानै बचायो ज ओ सचमई परमेसर को टाळेड़ो मसी ह जणा खुदनै बचार दिखावै।” 36सिपाईड़ा बी बिको मजाक उडायो अर बिनै सस्ती अँगूरी पीबा ताँई दि। 37अर कह्या, “तू सचमई यहूदिआ को राजा ह जणा खुदनै बचाले।” 38अर बिकै सीर क उपरनै एक बात मांड दि ही की ओ यहूदि मिनखा को राजा ह।
39बिकै सागै लटकायड़ा दो अपराद्या मऊँ एक जणो बिकी बुराई करतोई बोल्यो, “तू मसी कोनी के? जणा पाछै खुदबी बच अर म्हानै बी बचा।” 40जणा दुसरो हो जखो बिनै दकालर बोल्यो, “तनै जमाई परमेसर को डर कोनी? तू बी तो बाई सजा भोगर्यो ह जखी ओ भोगर्यो ह। 41क्युं क आपानै आपणी करनी गेल फळ मिलर्यो ह, पण ओ लाय तो क्युं कर्योई कोनी।” 42पाछै बो बोल्यो, “ईसु जद तू तेरा राज म आसी जणा मनै याद राखजे।” 43जणा ईसु बिऊँ बोल्यो, “म तनै बचन देऊँ हूँ क आज तू मेरै सागै परलोक#23:43 परलोक जिमै धरमी मिनख मरबा पाछै अर ईस्बर नगरी जाबाऊँ पेली आखरी न्यायहाळा दिन ताँई बठै राजी-खुसी रेह्वै। म होसी।”
ईसु की मोत
(मत्ती 27:45–56; मरकुस 15:33–41; यहून्ना 19:28–30)
44बि दिन दोपारा बारा बजेऊँ लेर तीन बजै ताँई सगळा इलाका प अँधेरो घट घूमर होगो। 45सूरज काळो होगो। अर मनदर को परदो पा'टर दो टुकड़ा होगा। 46ईसु जोरकी उवाज म बोल्यो, “परम-पिता म मेरी आत्मा थारा हाता म देऊँ हूँ आ खेताई, बो पिराण तज दिआ।” 47अठै जोक्यु होयो बिनै देखर सुबेदार परमेसर की बडाई कर बोल्यो, “ओ पक्कोई धरमी मिनख हो।” 48अर बठै भेळा होयड़ा मिनख बठै जोक्यु होयो बिनै देखर बि दुख म छाती कुटताई आपकै घरा बावड़्याया। 49#लूक 8:2,3पण बिका जाण-पिछाण का मिनख अर बे लूगाया जखी गलिलऊँ बिकै सागै आई बे दूर खड़ी होर सक्यु देखरी ही।
ईसुनै गाडबो
50-51यहूदिआ दिसावर म अरमतिया नगरी को रेह्बाळो युसूफ नाम को एक मिनख हो। जखो यहूदि पंचायत को सदस्य हो। पण बो सभा का दुसरा मिनखा की बाता म सामिल कोनी हो जिमै ईसुनै मारबा प हामी होई ही ओ धरमी अर लोगा म मान्यो-थान्यो हो। अर ओ परमेसर का राजनै उडिकर्यो हो। 52बो ईसु की लास माँगबा पीळातुस क कनै गयो। 53अर ईसु की लास सुळी पऊँ उतार बिपै मखमल को चादरो पळेटर बिनै ढाड म खोदेड़ी कबर म धर दिनी। जिमै इऊँ पेली कोईकिई लास कोनी धरी गई ही। 54बि दिन सकरवार हो अर अरामहाळो दिन लागबाळो हो। 55बे लूगाया जखी गलिलऊँ चालर आई ही बे युसूफ क गेल जार बि कबरनै देखी अर आ बी देखी की बिकी लास कंय्यां धरी गई ह। 56जणा पाछै बे ओटी आर लास प लगाबा ताँई सुगंद देबाळो लेव बणाई। अर हुकमानै मानबा गेल बे अरामहाळा दिन अराम करी।
Àwon tá yàn lọ́wọ́lọ́wọ́ báyìí:
लूका 23: एस डब्लु वी
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
(c) 2010-2017, New Life Computer Institute. All rights reserved
