यहून्ना 7
7
ईसु अर बिका भाई
1आ बाता क पाछै ईसु गलिल म सफर करतो रिह्यो। बो यहूदिआ इलाका म कोनी जाबो चातो हो। क्युं क यहूदि अधिकारी बिनै मारबा की तक म हा। 2यहूदि मिनखा को मंडपा को त्युंहार#7:2 झूपड़्या को त्युंहार एक अंय्यां को त्युंहार हो जिनै यहूदि फसल भेळी कर सात दिना ताँई मनाता हा। आबाळो हो। 3जणा बिका भाईड़ा बिऊँ बोल्या, “अठैऊँ यहूदिआ चल्योजा। जिऊँ तेरा चेला बी बा कामानै देख सकै, जिनै तू करै ह। 4क्युं क अंय्यां को कोई कोनी जखो आपको नाम करबो चावै, अर ओलैछानै क्युं करतो हो। अर ज तू आ कामानै करै ह, जणा इ दुनिया का मिनखा प खुदनै परगट कर।” 5क्युं क बिकाळा भाई बी बिपै बिस्वास कोनी करता हा।
6जणा ईसु बाऊँ बोल्यो, “हाल त्युंहार म जाबा ताँई मेरो टेम कोनी आयो। पण थारै ताँई सगळो टेम सिद ह। 7जगत थारूँ नफरत कोनी करै, पण मेरूँ करै ह, क्युं क म खेऊँ हूँ क, ‘तेरा करम बुरा हीं।’ 8त्युंहार मनाबा थेई जाओ। म हाल कोनी आऊँ, क्युं क हाल मेर ताँई सई टेम कोनी आयो।” 9अ बाता बोलबा क पाछै बो गलिल म रेहग्यो।
10पण बिका भायां क त्युंहार म जाबा क पाछै, छानैसीक बो बी त्युंहार म गयो। 11अर यहूदि अधिकारी बिनै त्युंहार म ढुंढै हा। अर बोलर्या हा क, “बो कठै ह?”
12अर भीड़ बी बिकै बारां म कानाफुसी करबा लागरी ही। क्युंक बोलर्या हा क, “बो चोखो मिनख ह।”
क्युंक बोलर्या हा, “नइ, बो तो मिनखानै भंगरावै ह।” 13पण कोईबी बिकै बारां म चोड़ै-धाड़ै कोनी बतळावै हा, क्युं क बे यहूदि अधिकारीयाऊँ डरता हा।
ईसु की सीख
14पण जद त्युंहार का आदाक दिन बितगा। जणा बो मनदर म गयो अर सीख देबा लाग्यो। 15जणा यहूदि अधिकारी ताजूब कर खेबा लाग्या, “ओ मिनख बिना सीख्याई ज्ञानी कंय्यां बणगो?”
16जणा ईसु जुबाब देतोई बोल्यो, “आ सीख मेरी कोनी पण बिकी ह, जखो मनै भेज्यो ह। 17ज कोई मिनख बिकी इंछ्या पूरी करबा ताँई राजी ह। जणा बो जाण ज्यासी क आ सीख मेरै कानिऊँ ह क परमेसर कानिऊँ। 18जखो बी खुदकी मरजीऊँ बोलै ह, बो खुदकी बडाई चावै ह। पण जखो आपका भेजबाळा को मान चावै ह बो सचो ह। अर बिमै बुराई कोनी। 19मूसा थानै नेम-कायदा कोनी दिओ हो के? इकै बावजुद बी थारै मऊँ कोई बी नेम-कायदानै कोनी मानै। थे क्याले मनै मारबा क चकरां म हो?”
20भीड़ मऊँ उवाज आई, “तेरै म तो भूत-पलीत रळर्यो ह! तनै मारबा की फिराक म कूण ह?”
21ईसु बानै बोल्यो, “म एक चमत्कार कर्यो, अर थे सगळा बिपै ताजूब कर्यो। 22अरामहाळा दिन मूसा का हुकम गेल, आदमी की सुन्नत कर थे बी तो काम करो हो। पण आ रीत तो मूसा का नियमऊँ पेली आपणा बडका का टेमऊँ चालती आरी ह। 23#यह 5:9ज अरामहाळा दिन एक आदमी की सुन्नत करबा की बजेऊँ नेम-कायदा कोनी टूटै, जणा अराम हाळै दिन एक मिनखनै सागेड़ो निरोगो करबाऊँ, थे मेरै प झाळ्या क्याले काडर्या हो? 24मुंडा देखर टीका मना काडो, पण धरम गेल न्याय करो।”
के ईसु, मसी ह?
25जणा यरूसलेम का क्युंक मिनख बोलबा लाग्या, “के ओ बोई मिनख ह जिनै बे मारबा की तक म हीं? 26पण देखो बो तो चोड़ै-धाड़ै बतळार्यो ह अर बे इनै नामई कोनी लेर्या। कदै यहूदि नेतानै बी तो कोनी बेरो पड़गो, क ओई मसी ह? 27आपा जाणा हा क ओ मिनख कठै को ह। पण जद मसी आसी, जणा कोई कोनी जाणसी क बो कठैऊँ आयो ह।”
28जणा ईसु जोरकी उवाज म मनदर म सीख देता टेम बोल्यो, “के थे सचमई जाणो हो क म कूण हूँ अर कठैको हूँ? म मेरी मरजीऊँ कोनी आयो, पण जखो मनै भेज्यो ह बो सचो ह, जिनै थे कोनी जाणो। 29म बिनै जाणू हूँ। क्युं क म बिकनऊँ आयो हूँ, अर मनै भेजबाळो बी बोई ह।”
30जणा बे बिनै पकड़बा की कोसिस करबा लाग्या, पण कोई बिकै हात कोनी घाल सक्यो, क्युं क हाल बा घड़ी कोनी आई। 31भीड़ मऊँ बोळाजणा बिपै बिस्वास कर्या अर बोल्या, “ओ मसी ह , जणाई तो बडा-बडा चमत्कार दिखाया हीं। कोई दुसरो अंय्यां का चमत्कार दिखा सकै ह के?”
ईसुनै पकड़बा ताँई मनदर का रूखाळानै भेजबो
32फरिसी जद ईसु क बारां म मिनखानै अ सगळी बाता ओलै-छानै करता सुण्या। जणा बे अर परधान याजक ईसुनै पकड़बा ताँई क्युंक मनदर का रूखाळानै भेज्या।
33ईसु बोल्यो, “म थोड़ी-घणी टेम ताँई ओर थारै सागै हूँ। इकै पाछै म मेरै भेजबाळा क कनै चल्यो ज्यास्युं। 34थे मनै ढुंढस्यो पण म थानै कोनी लाधूं। क्युं क जठै म रेहस्युं, बठै थे कोनी जा सको।”
35जणा यहूदि अधिकारी आपसरी म बोलबा लाग्या, “ओ कठै जाबा की करै ह जिऊँ आपा इनै ढुंढ कोनी सकां? के ओ यूनानी नगर्या म जासी जठै आपणा मिनख रेह्वै ह, अर यूनानीयानै सीखासी? 36आ काँई बात ह जखी बो बोली ह, ‘थे मनै ढुंढस्यो पण म लाधूं कोनी,’ अर ‘जठै म हूँ बठै थे कोनी जा सको?’”
जीवन देबाळो पाणी को झरनो
37त्युंहार का आखरी दिन, जखो त्युंहार को बडो दिन हो। बि दिन ईसु खड़्यो होर जोरकी उवाज म बोल्यो, “जखो तिसायो ह बो मेरै कनै आवै अर पिवै। 38जखो बी मेर प बिस्वास करै ह, बिमैऊँ जीवन देबाळो पाणी को झरनो उजळबा लागज्यासी, जंय्यां क सास्तर म मंडेड़ो ह।” 39ईसु आ बात पबितर आत्मा क बारां म कही, जखी बिपै बिस्वास करबाळानै मिलबाळी ही। इ टेम ताँई पबितर आत्मा कोईनैई कोनी मिली ही, क्युं क ईसु हाल ताँई आपकी मेमा म कोनी उठायो गयो हो।
मिनखा म फूट
40ईसुनै सुणर भीड़ मऊँ क्युंक मिनख बोल्या, “ओ सचमई बोई परमेसर की खेबाळो ह।”
41क्युंक बोलर्या हा, “ओ मसी ह!”
पण क्युंक बोलर्या हा, “मसी गलिलऊँ थोड़ी आसी! 42सास्तर म मंडेड़ो ह, क मसी राजा दाऊद का कूणबाऊँ होसी। अर बेतलम म जलमसी जठै दाऊद रिह्या करतो हो।” 43जणा ईसु की बजेऊँ मिनखा म फूट पड़गी। 44क्युंक बिनै पकड़बो चावै हा, पण कोईबी बिकै हात कोनी घाल सक्यो।
यहूदि नेता ईसु प बिस्वास कोनी कर्यो
45अर जद मनदर का पेरेदार पाछा आगा जणा परधान याजक अर फरिसी बाऊँ बुज्या, “खाली हातई कंय्यां आगा?”
46मनदर का पेरेदार बोल्या, “बि जंय्यां की बाता आज ताँई कोई कोनी करी!”
47फरिसी बानै बोल्या, “थे बी बावळा बणगा के? 48के थे एक बी फरिसी नहिस यहूदि नेतानै जाणो हो जखो बिपै बिस्वास कर्यो होवै? 49आ भीड़ मूसा का नेम-कायदानै कोनी जाणै। जणाई तो बे परमेसर का सराप तळै आगा हीं!”
50 #
यह 3:1,2 बठै फरिसीया मऊँ निकेदेमुस नाम को एक मिनख हो। जखो पेली ईसु क कनै गयो हो, बो ओराऊँ बोल्यो, 51“के ओ आपणा नेम-कायदा गेल सई ह क, आपा कोईकी सुणाई कर्या पेली, अर आ जाण्या पेली क बो काँई कर्यो ह, बिपै दोस लगा सकां?”
52जणा बे बिनै जुबाब म बोल्या, “के तू बी तो गलिल को कोनी ह? सास्तरनै बाचर बेरो पाड़, परमेसर की खेबाळो गलिल म तो पैदा होबाऊँ रिह्यो।”
53जणा बे सगळा आप-आपकै घरा चलेगा#7:53 क्युं क पुराणी यूनानी हातऊँ मांडेड़ी पोथ्या म आ आयत कोनी ह। ।
Àwon tá yàn lọ́wọ́lọ́wọ́ báyìí:
यहून्ना 7: एस डब्लु वी
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
(c) 2010-2017, New Life Computer Institute. All rights reserved
