Banɔkpɛkpɛ Axɔ̃ɛ 20

Paulo Axɔ̃ɛ Wɔawɔa Nɛ̀ Makedonia Nɛ̀ Hela Bɔdɔ̃

1Gɛ ozĩ kpɛkpɛ ebuiɛ abafala, Paulo akpɛ banɔ nɛ badɔkpasɛanɛ ɔkɔ, kɛlɛ gɛ akpɛ balɛ kemì ebekeɛ, ebisi kidzo pɛ ashɛ avɛ Makedonia. 2Anyɔ afala nɛ kɛma ɛlɛ mɛ, pɛ alɔkɔ kaɖɔ ɖɔɖɔ gelee akpɛ banɔ kemi nɔ, gɔgɔɛ nɔ, ediyì nɛ Hela bɔdɔ̃ mɛ, 3ɛkɛlɛ yɛazã bewoele tatá. Ɔmɔsɛ Yudanɛ atɔɖɔ kibui kpa nɛishu kibeɛ gɛ apɛ asɛ tɛ̀ eku kelĩabhaohu avɛ Siria, klisoɔ atɔɖɔ asɛ etsodzi adɛgã Makedonia. 4Soparte, Piro gɛede Beroa yɛeyianyɛ azã yiede, nɛ̀ Aristaxo nɛ̀ Sekundo gɛede Tesalonika, Gayo gɛede Derbe nɛ̀ Timoteo, nɛ̀ Tixiko nɛ̀ Trofimo gɛede Asia bɔdɔ̃ mɛ. 5Banyɛ alɛ eputɔ edeepo bɔlɔ nɛ Troa. 6Pɔ buku kelĩabhaohuɔ odenɔ Filipi nɛ kibeɛ gɛ baŋã kifufulũ gɛ Kɛgɛ Nyanyã Iwuiɛ ebeke, kɛlɛ nɛ ewui tetì edeɛ bɔdɛ taplɛnɔ banɔ gɔgɔ nɛ Troa kɛlɛ bɔzã ɛkɛlɛ ewui tegegene.

Banyɛmɛ Eutixo Denɔ Butsimɛ Nɛ Troa

7Nɛ ɔgɔnɛ ɔlɛ kiwuiɛ gɛiputɔ nabhaa, bɔba shogò ɔkɔ bɔlɔ ɔhakpɛkpɛ ɔdɔ̃ ŋaŋã. Paulo azaɖɔaɖɔ ɔkɔ banunɔ ɔmɔsɛ atɔɖɔ ɛlɛ asɛ abashɛ nɛ kelizaza mɛ, kliso azaɖɔaɖɔ idiyinɔ elishi tetì. 8Badɛkɛ efù gelee elu kabha buvũɔ mɛ, nɛ ɛkɛlɛ gɛ bɔzã kɛtakpu tɔtɔ̃ mɛ. 9Taɖa zibuku anyɛ ayisɔ̃ teli gɛ bekulu yɛasɛ Eutixoɔ, kibeɛ gɛ Paulo azã yɛaɖɔ ɖɔɖɔ nabha. Kibeɛ gɛ abavɛnɔ taɖa mɛɛ, abawɔlɛ edenɔ kabha buvũɔ gɛ babhɔ atɔɖɔ bɔtaɖamɛ nabha abadɔ kesiakpa kɛlɛ gɛ befeke yɛ etitsí. 10Paulo ezhi avɛ kesiɛ, alɔkɔ yɛishu atɔɖɔ ayisɔ̃ nabha kɛlɛ alɔkɔ yɛ ɛhɔɛ akpɛ akana yɛishuɔ, pɛ aɖɔ asɛ, “Nɔotosì kifù, alɛ nɛkpã!” 11Kɛlɛ ezewu avɛ kabha buvũɔ mɛ, pɛ adɛya kifufulũ nɔ atã. Gɛ aɖɔaɖɔ pɛ keliɛ azaa, abashɛ. 12Banunɔ agbana anyɛ ayisɔ̃ avɛnɔ bɔpã mɛ enunù pɛ balɛ kitúɔ mɛ dɔ alɛ fɔ̃ɔ.

Paulo Tɛshɛshɛ Nɛ Efeso

13Bɔvɛ kɛlɛ abha ditsoku kelĩabhaohuɔ mɛ, pɛ bɔvɛ Aso tɛ̀ bɔdɛ tɔnɔ Paulo tɛ ekù kelĩabhaohuɔ aplɛnɔ ɔlɔ. Abhɛtɛ tɛtɔtɔɖɔ ɛlɛ ɔmɔsɛ azã bɔtsɛɖɛkpɔ kidzo abha avɛ ɛkɛlɛ. 14Gɛ abatɔnɔ bɔlɔ nɛ Asoɔ, eku kelĩabhaohuɔ ɔplɛnɔ bɔlɔ, pɛ bɔvɛ Mitilene. 15Gɛ keliɛ azaa, buku kelĩabhaohuɔ nɛ ɛkɛlɛ pɛ budiyì nɛ Xio. Gɛ keliɛ azazaa, bɔtsakɛ ɔvɛ Samo, kɛlɛ gɛ keliɛ azaa, budiyì nɛ Mileto. 16Paulo atɔɖɔ ɛlɛ asɛ tɛ afala nɛ Efeso ɔbhà, tɛ̀ etibèzĩ kibè nɛ Asia bɔdɔ̃ mɛ, ɔmɔsɛ apɛ zia tɛ̀ ediku Yerusalem, onupɛ abapɛ tɛ̀ azã ɛkɛlɛ nɛ Pentekoste kiwui nabha.

17Denɔ Miletoɔ, Paulo akpɛ banɔ nɛ Efeso ɔhamɛ besheshèɛ ɔkɔ. 18Gɛ bebekuɔ, etseɖe alɛ asɛ, “Noɔnyì kana gɛ ɛzanà mɛkpã, kibeɛ gɛ ɛzã wɔnɔ ɔbha, odenɔ kiwuiɛ gɛiputɔ gɛ ɛbaku Asia bɔdɔ̃ mɛ. 19Ɛlɛkɔ ishu esi zhizhinɔ hohoe nɛ̀ ɛwɔmɛ kpɛ kɛtakpu esi ɔkɔ Apaleteɛ nɔ, gɛ Yudanɛ alɔkɔ kɛtakpu mɛ kpa tɔtɔɖɔ efeke mɛɖi nɔ nyagaa flogo. 20Nɔonyi ɔsɛ igi yide nɛ ebui ɖɔɖɔ nɔnɔ gɛ laba aplɛnɔ wɔnɔ shu, pɔ ɛkasɛ wɔnɔ bɔdɔ̃ nɛ kɛtsalɛ mɛ, nɛ̀ denɔ bɔpã mɛ ɔvɛnɔ bɔpã mɛ. 21Ɛdalɛ kɛlɛ mɛ ɔkɔ Yudanɛ nɛ̀ Helanɛ ɔsɛ tɛ betsyina atɔnɔ Owusoso Akaa nɛ̀ balɛ etúɔ tɛ̀ bayɛkɛ Apalete Yesu abha aŋã.

22“Kɛlɛ otsiɛ nɔ, gɛ Ɔfɔfuĩa nɔ ɔlɔɔ gbana mɛɛ, ɛɛtɔnɔ kidzo ɔvɛ Yerusalem kɛlɛ itinyi kɛgɛ babà mɛabha nɛ ɛkɛlɛ. 23Inyi sɛ nɛ ɔmahohoe ka nyia ka mɛɛ, Ɔfɔfuĩa Gbangbã ɔkpɛ ɔsha kɔmɛ ɔsɛ ɔɖavũmɛ tɛzazã nɛ̀ ebui gagalĩ mɛbà dɛ mɔ. 24Klisoɔ, ɛtɛka lɔkɔ mɛkpã asɛ lɛinu kɛdɔ nanà ɔkɔ mɛ, pɛ ɛtalà kɛxɔ̃ɛ gɛ Apalete Yesu akpɛ mɛahɔɛ wɔa bekeɛ, kɛxɔ̃ɛ gɛ kɛlɛinu ɔsɛ tɛ ɛdalɛ Owusoso Akaa ibuiɛ gɛ kibhui bɔlɔ buɔ shu.

25“Otsi alɛ inyi sɛ wɔnɔ mayɛmɛ nanà ma gɛ mɛnɛ yɛ zɛgã kidzo, alo pɛ bɔzɛɖɔ bukusiŋaŋã shu ebuiɛ azabamɔ mamɛ eɖi. 26Klisoɔ, ɛdalɛ kɛlɛ mɛ kɔ wɔnɔ obuɔ ɔsɛ, onupɛ wɔnɔ mayɛmɛ teli ɛkpã bayalaa, ɛma ɛlɛ mɛ. 27Ɔmɔsɛ ɛgɛ yɔlɔ ebuiɛ petee gɛ Owusoso Akaa atɔɖɔ tɛɖɔɖɔ tseɖe wɔnɔ. 28Nɔzanà awɔ̃ ɔkɔ wɔnɔ ishu tɛ nozoɖi ibhoshiɛ gɛ Ɔfɔfuĩa Gbangbã ɔkpɛ wɔnɔ ahɔɛ ɔsɛ nɔoɖi ɛlɛ abha. Nodzi ibhoshi agbagbana elete ɔkɔ Owusoso Akaa ɔhaa, gɛ edzi nɛ yɛ dzyosu nɔ. 29Inyi sɛ onupɛ ɛbashɛɛ kidegbaa, igulu babà wɔnɔɛshi, kɛlɛ lɛti bàbi ibhoshiɛ ashagabui. 30Nɛ wɔnɔ mɛ tsyɛɛ, banɔ abalɔ́ pɛ babàsɛ asɛnɛ tɛ̀ badɔkpasɛanɛ etsyina tɔnɔ alɛ. 31Kliso nɔzã nɛ̀ awɔ̃! Nɔbakà ɔsɛ̀ nɛ agɔ tatá mɛɛ, ɛgɛ yɔlɔ ɔsha kpɛkpɛ kɔ wɔnɔ nɛ̀ ɛwɔmɛ bibi mɛ elishi nɛ̀ kemuze.

32“Otsiɛ nɔ, ɛɛlɔkɔ̀ wɔnɔ ɔkpɛ ahɔɛ akɔ Owusoso Akaa nɛ̀ yɛibuiɛ gɛ alɔkɔ ebhui bɔlɔ ebuɔ nɔ̀. Kɛlɛ bàbhɔ wɔnɔ wunu kabha pɛ kɛbàkɔ wɔnɔ bagɛ badalɛ wɔnɔ shuɔ petee kaŋãsiɛ. 33Ɛgɛ dzã kiwuhũ nɛ ananà sikãfufù, alo sikãɛkpã alo bɔdɔ̃ kpɛkpɛ shu. 34Nɔonyi ɔsɛ mɛahɔɛ alɛ shu axɔ̃ɛ mɛwɔa lɔkɔ pɛ bɔdɔ̃ ɔkɔ mɛishu nɛ̀ mɛɔhagbo alɛ. 35Nɛ kɛka nyia ka gɛ ɛbhɛtɛ mɛɛ, ɛkasɛ wɔnɔ ɔsɛ̀ kɛxɔ̃ɛ gagalĩ ɛlɛ nɛidi wɔawɔa mɛ kɛlɛ ɔsɛ bɔplɛnɔ bagɛ ohumi ɔma balɛ ahɔɛ, ɛɛbakà ebui alɛ gɛ Apalete Yesu aɖɔ asɛ, ‘Tiyuyulà kpasɛ kɛdɔ̃ kɔkɔ mɛ ɔdɛ kɛdɔ̃ yɛyɛkɛ mɛ.’ ”

36Gɛ aɖɔ kibui ɛlɛ ebekeɛ, yɛnɛ̀ balɛ petee edzu ekluisi esi pɛ bekulu Owusoso Akaa. 37Balɛ petee ebi yoyò nɛ kibeɛ gɛ banyana yɛakpɛ balɛ eteɛ mɛ pɛ bakpɛ ahɔɛ nɛ yɛoliɛ. 38Kɛgɛ kɔ bamɔ ɔwɔ̃nyɔnɔ ɔdɛ kɛlɛinu kibuiɛ gɛ aɖɔ asɛ bazakamɔ yiamɛ eɖiɛ. Kɛlɛ bagbana yɛ avɛnɔ kelĩabhaohuɔ shu.

Àwon tá yàn lọ́wọ́lọ́wọ́ báyìí:

Banɔkpɛkpɛ Axɔ̃ɛ 20: nyb

Ìsàmì-sí

Pín

Daako

Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀

Mọ̀ Sí Nípa Nyangbo New Testament

Banɔkpɛkpɛ Axɔ̃ɛ 20

Àwọn Ẹsẹ Bíbélì Tí Ọ̀pọ̀ Èèyàn Mọ
Banɔkpɛkpɛ Axɔ̃ɛ 20

Bíbélì:

Tutrugbu

Èyà: Nyangbo New Testament - nyb