Kutoma 16
16
Hagara na Ishimaele
1Sarai mkazi Abramu hakhadambalira mwana tayu. Mbwenye mkaziyu akhali na bitchu wachikazi wa ku Iguputo, dzinache Hagara. 2Natenepo iye adalonga kuna Abramu mbati, “MBUYA andikhondesa kukhala na ana. Ndoko kapite m'bonde na bitchu wangayi; mwinango anakwanisa kundibalira ana.” Abramu adatawirizana napyo pidalonga mkazache pile. 3Natenepo mkazi ule adapereka Hagara kuna Abramu kuti akhale mkazache wachibitchu. Penepi pidachitika m'dziko ya Kanani, pidakhala Abramu pyaka khumi mbali mwenemo. 4Abramu adapita m'bonde na Hagara, tenepo iye adakwata mimba. Pidadzindikira Hagara kuti ana mimba adatoma kugaya na kululupisa Sarai mbuyache.
5Tenepo Sarai adalonga kuna Abramu mbati, “Wachitisa ndiwe kuti ine ndibonere tenepa.#16.5 Wachitisa…ndibonere tenepa: penu Ubonere ndiwe thangwi ya kundidawira kwachita iweku. Ine ndidakupasa bitchu wanga kukhala mkazako wamng'ono, mbwenye pidadziwa iye kuti ana mimba, adatoma kundilulupisa. Natenepo MBUYA mbapitonge kuti wadidi mbani pakati pa iwe na ine.”
6Abramu adatawira mbati, “Hagarayu ndi bitchu wako, pontho ali pansi pa utongi wako. Chita pinafuna iwe kuna iye.” Natenepo Sarai adaphatisa basa Hagara mwavinga mwakuti iye adathawa.
7Mngelo wa MBUYA adagumanikana na Hagara pamphuno ya madzi m'thando yatchetcha panjira yakwendera ku Shuri, 8mbalonga mbati, “Iwe Hagara, bitchu wa Sarai, ukubulukira kupi? Apo ukwenda kupi?” Iye adatawira mbati, “Ndikuthawa mbuyanga wamkazi.”
9Mngelo wa MBUYA ule adalonga mbati, “Bwerera kuna mbuyako mbukamvere.” 10Mngelo wa MBUYA adathimiza kulonga mbati, “Ine ndinati ndikupase pidzukulu pizinji mwakuti anthu hanakwanisa kupilengesa tayu. 11Iwe una mimba, tenepo unabala mwana wamamuna, mbumthula Ishimaele,#16.11 Ishimaele: Dzina yeneyi m'Chiheberi nkhulonga kuti “Mulungu ambava.” thangwi MBUYA ava kulira kwako. 12Mbwenye mwanako anakhala ninga bulu wam'tsanga; iye anakhala wakupokanyisana na munthu onsene, pontho munthu onsene anapokanyisana nayembo. Iye nkhabe khala pakati pa abale ache onsene tayu.”
13Hagara adapivunza yekha ene mbati, “Ayi ine ndaonadi Mulungu mbandikhala na moyo kuti ndilonge pya penepi?” Natenepo iye adamthula MBUYA kuti, “Mulungu ambaona.” 14Ndi thangwi yache anthu ambachemera mchera uli pakati pa Kadeshi na Beredi ule kuti Mchera wa Nyamoyo Ambandiona ule.
15Hagara adambalira Abramu mwana wamamuna mbamthula Ishimaele. #Agal. 4.22. 16Pandzidzi wenewu Abramu akhali pyaka makumasere na pitanthatu pyakubalwa.
Àwon tá yàn lọ́wọ́lọ́wọ́ báyìí:
Kutoma 16: SenaMw
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Bible Society of Malawi