Mat 3
3
Joon Nfoo Moo fekte kenəə ə Feyin
(Mak 1.1-8; Luk 3.1-18; Jn 1.19-28)
1Naa se lu əbchii fo, Joon Nfoo Moo ndu əbkwak ɛ Judea, è se fekte se ghele ge: 2Ghɛn kubsen tetem ə tɛn è fiile se ɛybame mbee bek ge əbliy ɛysak nə Feyine shi ɛ keghoo. 3Lu Joon wɛ wele ntum nə Feyine wɛ Ezaya nè suŋnen kum wen ge:
“Yio ka giɛ wele jaŋen ɛ əbkwak ge:
Siyse jii se Báàba
nɛyte kevəə jii se wen é ke yɛ nduu ɛ titiy!”
4Ndəy sɛ Joon nè maken nè lu nɛ ɛ́ baa nɛ̀ ɛyghuye nyam kesɛsɛye, gese teme kekuye guo se wen əmkeŋkeŋ. Ɛyyiɛ ə wene nè lu nguumese ghene fedioŋe. 5Ghele se lóò ɛ Jolesalem nɛ̀ se Judea, naa nɛ̀ se ntɛk sejim sɛ se nè báksen se jio Joldan, gwiye se yɛne Joon. 6Ghene nè lô se taŋle ɛychio ə ghen ge ghene lu nɛ ɛ́ nɛɛy mbee, nɛ Joon foo moo se ghene ɛ jio Joldan.
7Əb nɛ̂y yɛn ka ghele kenone Falisee nɛ̀ ghɛ́ kenone Saddusee gwiyen se ɛydio ge ɛ́ fó moo se ghene è me suuy se ghene ge: Ghone yiose, suuy ndɛ se ghɛn ge lòó ghɛn nyiŋ è boy se ngɛk sɛ Feyine shiin se mak se ghele? 8Ghɛn yɛ nɛɛy əbnəə əbjuŋe se din ge ghɛn kubsenmen tetem ə tɛn. 9Ghàà ghɛn yɛ kwaate ge lòó ghɛn yɛ suuy se ngeŋ ə sɛne ge: Ghɛs lu kɛse ghel ɛykfəə nə Ablaham. Mɛ suuy se ghɛn ge lòó Feyine bense ɛtiy ghin fɛn se ghon nə Ablaham. 10Njam se shi ɛyshaa fekak kebaaten ka ɛ́ sɛɛ fekak so kɛn ɛ ɛghaŋ. Naa fekak fekɛ fɛ fe koom wiy əmtam əmjuŋ lu nɛ ɛ́ gwɛl è kwaay. 11Mɛ foo nɛ lu moo se ghɛn se din ge ghɛn kubsenmen tetem ə tɛn, dî nɛ wel əblee nɛ̂y gwiy è yɛ foo nɛ lu Keyioy Kelanene gese nɛ̀ əbvəse se ghele. Wel nɛ̂ vine chia mɛ, nɛ chèmè lu kɛn guose ɛvəə nə wen fene mɛ báà se lu kekwɛnten ka lòó mɛ bɛɛy. 12Əb ki ɛyshɛn ə wen ɛ keghoo se fɛfte ɛsaŋ ə wen so ɛjim. Əb kuuy ɛsaŋ ə wen è vii se wen ə əbnwak, è me yɛs məyse ten è nyok se əbvəs wɛ əb baalen əbliy əbjim.
Joon fó moo se Jesus
(Mak 1.9-11; Luk 3.21-22)
13Se lu əbchii nɛ̂ fo Jesus me lòò ɛ Galilee è gwiy ɛ jio Joldan è yɛn Joon ge əb fó moo se yi. 14Joon me se tune, suuye ge: Kè lu se fo wɛ̀ moo san, wɛ̀ se suuye ge mɛ fó moo se wɛ̀ lɛɛy?
15Jesus fise nɛ lu ge: Nɛɛy ka mɛ kɛŋen se leenen bek ge lu ɛ jii nɛ̂ ghan yɛ ghɛsoo nɛɛy əbnəə wɛ Feyine kɛŋen. Joon me beeme. 16Jesus fii moo ɛ leghɛ è loo fəy se jio, ɛyyio dise, əb yɛn Keyioy ə Feyin nɛ ke səəke ka kenlal è guo ɛ wen əbghun. 17Giɛ səəke è gwiy ɛ ɛyyio ge: Vin lu wán ə wom wɛ mɛ koŋen, nɛ mɛ gese saŋle naa se ŋaŋ kum wen.
Àwon tá yàn lọ́wọ́lọ́wọ́ báyìí:
Mat 3: oku
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©CABTAL, 2012
