Matìo 7
7
Kǎ ghùw sāʼ
(Lûk 6:37-38, 41-42)
1“Kà nlò ghî ghə̀ èsaʼa, ghe lô saʼā sughò ghɛ. 2#Mâk 4:24Tɔŋlo enyəa ghe lô ghɛ̀ bɔɔm saʼa ko an dziī è mɔ̀ʼɔ zəla ghɛ̀ saʼa sughò ghî ghò a te. Ghəa ghəla ghɛ̀ ghəŋlo â ghì gho, Zə̀ kə lo â ghɛ̀ bɔɔm ghəəŋ sùghò êzə̂. 3À lǒ kwò ghù sò koʼò ko sugho e fəkàʼ zəa e lo an sə e wàazùghù, kuuwn kòʼò yò tɔ̂ŋ chia kə lo alô è zəghà zò esə à? 4Ghù lò ênzə̂n aledzàa ndûw â wàazùghù enyəa bùghò tò Ǹ nîi nughù səā wô sugho e fəkàʼ e zəa e lo an sə zəghà a, mò ghù kà bùʼ nì nùghù sə̀ wò dzə̀ tɔ̂ŋ kə fəkàʼ chia kə lo alô è zəghà zò esə à? 5Ghùw ù kə̀bàŋàdzə̀m wən! Bùʼu nǐi nùghu sə wò dzə̀ tɔ̂ŋ fə fəkàʼ chia kə lo an sə zəghà, sěe ghù sò lô alekòʼ sugho e zəa e lo an sə e wàazùghù.
6Kà nî fʉghazəa ù baa wo ghù fughu â bvʉ to, abugho ghù bùʼ fughu ko nû, tə n nāam nùghù ŋaŋè wò ko ghù. Ŋkāa, kà nî kɔ tə ufʉgha wʉ̀a ù dzəəŋ wo ghù fughu nduw â kwə̀lebʉ̄ghā wo, abugho ghù bùʼ fughu ko nû, ghê n nì dzùghòon màʼà tsùghù alo aghùw.”
Bvʉ tsughu fʉgha wəla ghù ləghaa alo egɔ̀ŋlò
(Lûk 11:9-13)
7“E bvʉa tsughuu nlò fəgha ko, Zə̀ kə m fùghù wò â ghɛ̀, e kəŋo tsughuu nlò fəgha ko, Zə̀ kə n dè wò â ghɛ̀, e tsʉʉn tsughuu nlò bâʼ kò, Zə̀ kə n tsʉ̀ è tsughu. 8Nu ghùw wəla ù nɔe tsughu fəhga ko, ù sò kèle fəgha kə te ko; wəlà ù kəŋ, ù sò kòʼò nù; wəla ù tsʉʉn tsughu sugho, ghe n tsʉ tsughu kəbâʼ â wə̄n. 9À lò ghû ndùghò abugho wɛ wʉ̂a wô ghû â bɛ ko a, ghù m fwə̀n fùghù ndùw wə̄n â tia zo a? 10Ŋkāa abugho ù bvʉ wô tsəgha zo, ghù m fwə̀n fùghù ndùw zughu à? 11Ghɛ̀ ghəla ghɛ̀ lô ghî à biigh gho, abugho ghɛ̀ lo alekwo alefughuu wɛ ghɛʼɛ gho â fʉgha ù dzûŋ wò, Tsele wɛʼɛ wəla ù lò alo kəwālā lo alebòʼò fughu ênzə̂n fʉgha ù dzûŋ wò â ghì ghəla ghe bvʉ nduw â wə̄n à! 12#Lûk 6:31 À fi lo enyəa, ghəa ghə̀là ghù ləghaa enyəa ghî ghə̀ è ghəəŋ wo â ghù, e bɔɔm ghəəŋ nduw sugho ŋgòʼ è ghəa a te gho â ghì ghò. Kən lò fəgha kəla kə lo an laŋ kə Musî àsùghò fəgha kəla mwàʼsò kə Kəzə̀ kəla ghiīshʉ̀ghà a fə̀ tɔ naŋa tsughu.”
Tsə̀gha nyə am fù u mbɛ̀ ù tughoon wo alenyə am fɔ̀ u kəwālā
(Lûk 13:24)
13“Tsəgha nyə am fù u mbɛ̀ ù tughoon wo. Ndə̀mà tə aghì tə̀ tùghuu tsə̀ghàa nyə̌a ko am fù u mbɛ̀ u ne wo, mò à lǒ dzì è bùghùun zəla ghe lo dzûuw maʼà ndə̀mà tə ghì ghəla ghe tsəghàa nyəā a te. 14Fu u mbɛ̀ wəla u nîi nduw ghùw am mùghùu zəla e doʼò tən kuuwn too nù, dziī fə te fia fə bə̂əŋ lô sugho; à fughu tsəghà nyə̌a kô sə fə aghì.”
A kâʼ fə̀ koʼò kɛ̀lɛ an tam kə wə̄n
(Lûk 6:43-44)
15“Nǐ nlò ghôom zò, ghiīshʉ̀ghà ghə agha a lo nû; ghe bughòo a vʉ̀a ghɛ̀ tò təndzì, mo ghe biso lo ubʉgha. 16Ghɛ̀ lô ghee kele ko am mwam e ghee. Nu ghùw yo alekʉ̀ɛɛ səā tsughuu wô tə̀lama kwùu tə tənyɔ̌ɔŋmgbê ŋkāa ghùw yo sughò alekʉ̀ɛɛ səā tsughu wô àŋgəm aŋ kàʼ fə echwàn. 17Kâʼ fə̀ dzûŋ fə telè mʉ̌a tsughu kô twam u dzûŋ wò sughò. Kâʼ fə̀ biigh fia fə telè mʉā tsughu sughò twam ù biigh wo. 18Kâʼ fə̀ dzûŋ fə mʉa yo tam kə̀ biigh ko, kâʼ fə̀ biigh fia fə yô sugho alemʉ tam kə̀ dzûŋ kò. 19#Mat 3:10; Lûk 3:9Kâʼ fəla fə mʉa yô twam ù dzûŋ wò, a m gbò è kpaa. 20#Mat 12:33E fi lo enyəa ghɛ̀ kê ghiīshʉ̀ghà ghə agha a kele am mwam e ghee. 21Ghî ghəla ghe tsôo ŋgɔɔ̄ zee ko mugho enyəa, ‘Mughùbè, Mughùbè.’ À yò dzə ghee a dzə̀m ghe lo tsəghàa nyəā am fɔ̀e u kəwālā, à kè kǔuwn lò ghî ghəla ghe bwiī an làŋ kə Tsele waŋā wəla ù lò alo kəwālā. 22Abugho tsuʼ ù saʼa u aghì ù kê kpe tsughu, ghî ghə̀ e ke dzaā wo â mùghò enyəa, ‘Mughùbè, Mughùbè, ghǎʼ mò mgbaŋ yo ghiīshʉ̀ghà ghə̀a ghò à, a n dzûum sə zʉ̀ ù biigh wo zən zəghà, fwàʼ sùghò kɔ tə aghəa ndə̀m an zən zəghà à?’ 23#Sms 6:8Ŋ̀ kê daŋso dzâa mgbaāŋ səā ndûw â ghee enyəa, ‘Ŋ̀ kwo tsəgha yo ghɛ; nùghu nlò a vʉ̀a mùghò, ghî à biigh ghən.’ ”
Bɔ̀ɔtə̀ndughu ù tɔ̌ɔ àsùghò ù làʼso
24“Ghùw wəla ù zuw shwaʼ waŋa wən wo vʉ̀a ù bwìi nduw a te, ù lo dòʼn ko tǒ ghùw ù tɔ̀ɔ wəla ù fə̀ so e bəgha ndughu, kùʼ dzɔ̀ tsughu kəbəghànlò alo atīa. 25Ghuuw zə mo è tsughu, fʉ̀ghàdzughù tə̀ mô è sə, zəŋ n tsəghàa è sugho, bùghò tsɔ̀ɔ ko èghue a fughu an ndughu e te, ndughu è te ŋ kè tsughuu bvʉ̂, ghe mo sô kuʼ dzɔ̂ tsughu bəghàan kò alo atīa. 26Yia abugho ghùw wəla u zuw shwaʼ waŋa wən wo, vʉ̀a ù tàʼkè naŋa kə̀tuŋlo a te, ù lo dòʼn ko tǒ làʼsò kə ghûw kəla kə fə̀ so e bəghaa ndughu, ù m bəgha tiso kɔʼ ndùghù è wə̄n alo kəshīashīa. 27A m bùghò ghuuw e tsughu tsughu, fʉ̀ghàdzughù tə̀ mo è sə, zəŋ mô è tsəgha bughò zaʼa wò ughue an ndughu e te, zə m bɛ̀lɛ̀ bvʉ̀ è tsughu, dəm kə mo è səŋ.” 28#Mâk 1:22; Lûk 4:32 A m bùghò Yɛso kə̀a mɛʼɛ̄ tsughu ghəa ghən gho, tuw kə m kpuw saʼ kə aghì chì an dziī zəla ù zoʼn ghəa gho a te. 29Nu ù fə̌ ghee zoʼn yo tò ghê dèekə̀làŋ, ù fə̌ ghe zoʼnlo tǒ ghùw wəla ù ki dwaʼa u te wo.
Àwon tá yàn lọ́wọ́lọ́wọ́ báyìí:
Matìo 7: agq
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
