Lûk 20
20
Dzughu è pfʉa zo kùu ndùw daʼa kə Yɛso
(Mat 21:23-27; Mâk 11:27-33)
1Tsuʼ ù li wo Yɛso n tsʉ̂a àghì an be kə̀ ne ko, fughuu sùghò ghee â Làbəlà è Kəzə̀, Tuw u təfɔ̀e wə̀ n ndùw sə̀ kɔ̀ʼ è wo ghèe ghê ghì à deē a kəlàŋ ghò àsùghò noo n lǐ mò, 2bvʉ â wə̄n enyəa, “Ghù kì daʼa kə̀ ghɛ ko aleghəəŋ ghəa ghə̀n à, à ghù â daʼa kə te kə fughu ndughoo?” 3Ù m bɛ̀lɛ̀ tsùghu ghee enyəa, “Na M̀ bɔŋɔ̄ bvʉā wô sughò ghɛ̀ â ghəa zo; dzǎa wò nlò â mùghò, 4Dzɔ̌n fə̀ ghî a fɛ fughuu â mùghù ŋ Kə̀zə̀ mò ù daʼa kə nî ghɛ̀, à fə̌ wə̄n â daʼa kə te kə fughu aghî ŋkāa Kə̀zə̀ a?” 5Ghe n daŋso tsɔ̀ŋ tsə̀əm kǎaŋ wò aŋ ghùe e ghee enyəa, “Abugho a dzɛ̂ tsughu enyəa, ‘À fə̀ fughu Kəzə̀, ù è so e so enyəa, ghɛ̀ ŋ kè sô boo mò à lǒ kwò à.’ 6Abugho a dzɛ̂ tsughu sughò enyəa, ‘À fə̀ fughu aghî.’ Ghî ghən fɛ a dzə̀m sò təəm sɛ̀ alo atīa; nu ghe boo fughu tən nû enyəa Dzɔ̌n fə̀ kûum lo ghùwshʉ̀ghà ù Kə̀zə̀.” 7Ghe fi bɛlɛ̀ ndùw sùghò nǔ wə̄n enyəa, “Ghàʼ kwo yo luʼū wəla daʼa kə wə̄n kə fə̀ nughù wo a te.” 8Yɛso n dzɛ̀ ndùw sùghò â ghee enyəa, “À fi lo enyəa Ǹ yo sughò aledzɛ̀ luʼū wəla kaŋā ko kədaʼa kə nughù wô a te, â mùghò aleghəəŋ ghəa ghən gho.”
Kwə̀ən kə ushwaʼ aŋ ghî a kəfwàʼ an sum u tə̀lama
(Mat 21:33-46; Mâk 12:1-12)
9 #
Èzy 5:1
Yɛso ŋ kə̀a ndùw ghee â kwə̀ən kə ushwāʼ kən enyəa, “Ghùw ù lì fə̀ tam tsughu tələma an sum u wə̄n, tsòʼò fùghù sə̀ ndùw sum u te wo â ghì à li gho, nùghù sə̀ bwìnlò è nduw. 10A m bùghò ləma tə bùghò bâŋ tsughu, mughùsum n tùm ndùw tum a vʉ̀a ghì yia ghe mò tsoʼò nî ndûw sum wo enyəa ghe kûɛɛ tuū wô wə̄n â ləma tə̀ li to, ghî yì m bu tum zə̀, dzùm nùghù wə̄n kwêekwe. 11Mughùsum vʉ̄ n tum kpeʼe ndùw tùm è lì, ghî yi mo è bu, ghəəŋ wə̄n â ghəa dənso â kətuw gho, dzùm nùghù wən kwêekwe. 12Ù n naam tum kpeʼe ndùw ko tum è lòʼ alo tənə̀gha tə təghā; ghî yì m bu wə̄n, nomso wə̄n, bòʼò màʼà sə̀ wò à beē. 13Mughùsum vʉ m bvʉ tsughu enyəa, ‘Mùghò è dzə̂ èndūghō? Ǹ tuu ndùw nǔ wɛ waŋā ù tsùʼu ù nùu wə̄n; zêekwò ghe sô nə̌əŋ tsəŋo nù sə a wə̄n gho.’ 14Ghəa ghî yi tso fəghaān kôʼ kɔʼ wɛ ù wə̄n vʉ̀, ghe mo enyəa, ‘Wə̄n nyɔ̀ʼ lǒ zə̀a kə̀bè ù wə̄n; bùghò a wi, a lô kpaʼā nîi kele sum wə̄n.’ 15Ghe n sè nùghù sə̀ ndùw wə̄n fughu an usum, ndùw bù wì è tsughu.”
Yɛso n nùghù bvʉ̀ ndùw â ghì yi enyəa, “Ghɛ̀ moʼò enyəa to mughùsum vʉ bughò dzə̂ ênzə̂n â ghì ghə̀n à? 16Ù bùghò mìasò nǔ ghee a, ù daŋso nìi fughuu səā ndûw sum u te wo â ghì à nughù ghò.” Ghəa ghî yi zuw tsughu ghəa ghən, ghe mo enyəa, “Kà boo!” 17#Sms 118:22 Yɛso n nə̀m lɛ̌ɛn ko ghee enyə, dzɛ̀ â ghee enyəa, “Ghe laʼa kuūwn tɔ̄m naŋâ kwò am mwàʼsò kə Kəzə̀ enyəa,
‘Tia zəla ghê bɔ̀ɔtə̀ndughu mò shîaa maʼa,
zə ŋ kòom bùghò dòʼò tia zə e būw zo a?’
18Ghùw wəla ù tsughu tsəghà bvʉ̂ an tia e te zo ù mò è sanlo; mò abugho tia e te e kuūwn bvʉ̂ tsughu a zəŋò ghùw, ghùw ù te mò è ndzaʼso.”
Ghəa à bvʉʉn gho kùu ndùw mwàʼsò kə̀ chuuw ko
(Mat 22:15-22; Mâk 12:13-17)
19Ghê dèekə̀làŋ ghə̀ ŋ kəŋo dzì ghèe ghê tuw u təfɔ̀e wò alekwuū təla kɔʼ wə̄n an nə̀gha e te zo, ghe n sô kǔuwn tsəŋo ghaʼa àghì; ghî a màʼa fə̀ zuwkɛlɛ̄ tsughu enyəa ù mò kwə̀ən kə ushwāʼ kən kə̀a â ghee.
20Ghe n tsêe ko Yɛso, tum tsughu aghî enyəa ghe bughò doʼò tsughu tǒ làŋà tə aghì, ghee e nəəŋ ghəəŋ ko enyəa ghe ki yo moʼnlò è li zo. E ghì yia ghe mò tseē Yɛso fə̀ lo ko aletɔ̀ʼɔ̀ zyənlo enyəa ù lò kpaʼā kə̂aa boon tsughuu ghəa zo to ghe kwuū fughu wə̄n â gɔvə̀nò ù Lumà. 21Ghe m bvʉ̄ fì â wə̄n enyəa, “Wàdè, ghàʼ ŋ kùum kòʼ enyəa ghù kə̀aa èsəŋò, ghù vʉ̀a ghù tsʉ̀a dzɔ̂ɔ sughò ghî ghò, bàa yò kpiī wo, ghù lǎam bɔɔm zoʼnlo àghì an dzə̂ è Kə̀zə̀. 22Lâŋ kə̀ sô yia dêe nù enyəa a e chuuw mwàʼsò kò â Kaesà ŋkāa kə dêe yò a?” 23Ghəa Yɛso kòʼkɛlɛ̄ tsughu enyəa ghî yi sʉ̂a tɔ è li zo, ù n dzɛ̀ â ghee enyəa, 24“Děe wò nlò mugho â kua u fəŋgɔ̀ʼ wò fɛ.” Ghe m fùghù è nduw.
Ù m bvʉ â ghee enyəa, “Tuw kən a te à lò kə ndugho ko a, àsùghò zən à?”
Ghe mo enyəa, “À lò kə Kaesà kò.” 25Ù n dzɛ̀ â ghee enyəa, “E fi dêe enyəa ghɛ̀ è fughuu nduw fʉgha u Kaesà wò â Kaesà, fughuu ndùw u Kəzə̀ wò â Zə̀ kò.” 26Ghe ŋ kəŋ kè dzì alekwu wə̄n an shwaʼ wən, ghî a màʼa fə̀ lô kaŋlō; dzughu zə n zum ghee an dzì zəla ù bɛ̀lɛ̀ ghəa gho a te. Ghe m bɔɔm dòʼò ko mɔŋ.
Sāʼ è kɔ̀ʼɔ sə̄a alo evʉ̄
27 #
Kfw 23:8
Sadùwsîi tə̀ li to, tɔ̂ɔŋ ghì ghəla ghe dzɛ̂ enyəa a kpuuw kɔʼɔ sə̄a yo alo evʉ, ghe m bùghò kòʼ wò Yɛso tsuʼ ù li wo, 28#Lwa 25:5 ghe m bvʉ â wə̄n enyəa, “Wàdè, Musî fə̀ tɔm naŋa â ghàʼ enyəa abugho ghùw ki wi, vʉ̀a ù kpuw naŋa taʼà tsughu mò ù kà wɛ̀ a te dzə, wàazə̀ n nyə̀ŋsò tsùghu yìzən ù tè, dzə fughu kɔʼ wàazə̀ â wɛ gho a te. 29Êzə̄ŋ, ghùw ù lì fə̀ ki waazə̂ a wə̄n à nûu ghò tǔu, ù n nì tsùghu wī, kpuw naŋatàʼà è tsughu mò ù kà wɛ̀ a te dzə; 30wəla ù mə̀ghàa wo m bùghò nyə̀ŋsò tsùghù nughò vʉ̀, kè dzəā sughò wɛ̀ a te. 31Ù lì wən ŋ kòom bùghò è nyəŋso, è zum zo. Ghee ghən tǔu n nyə̀ŋsò tsə̀ghà wò nùghò vʉ̀, kpùw mɛ̀ʼɛ̀ è tsughu mò ghùw ù ghee u mɔ̀ʼ kà wɛ̀ a te dzə. 32Yìzən vʉ m bùghò kpùw ndùw è sugho. 33Êzə̄ŋ, bugho ghî ghə̀n à dzə̀m kè kɔʼ sə kɔʼ alo evʉ̄, nughò wə̄n kê lǒ wì ù ndùghò a tè à? Nu ghî ghə̀n sə̀ghàmbəgha maā wə̄n nî tsə̀ghà ŋgə̀a wò.”
34Yɛso n daŋso dzɛ̀ â ghee enyəa, “Ghəa à niī ghə eghùe à lo ko â ghì a mbī gho. 35Ghî ghəla ghe kuūwn kɔʼ kpē alekɔʼɔ̄sə̄ alo evʉ an tì kə te ko, ghe kê kòom nìi yò ghue zo fughu; 36tɔŋlo enyəa ghe kê kòom kpùw yo, ghe sô lô eghəla ghèe ghê tsə̀təndə̄ghā tə Kəzə̀ tò àsùghò wɛ a Kəzə̀ ghò, bòʼ ghe ŋ kɔʼ sə alo evʉ. 37#Ksm 3:6 Ghuūghùe u Musî ù mafə̄ dê an də̀ŋò kəla zʉ e fə̀ bəghanlō a te am mwàʼsò kə wə̄n, ù fə̀ dê tsughu enyəa ghî a kpuuwn gho, ghe kɔʼɔ səa nù alo evʉ, aŋghəa u tɔŋɔ̄ tsughu Mughu ù te enyəa à lǒ Zə̀ kə Abə̀làhâm, Zə̀ kə Aezìk, Zə̀ kə Yàkɔ̂b. 38Zə̀ kə̀ yo â ghì ghəla ghe kpuw dzə, Kə lo â ghì ghəla ghe naam lô â tuw ko, tɔŋlo enyəa â wə̄n, aghî à dzə̀m nǎam lò â tuw ko.” 39Ghê dèekə̀làŋ à li ghə n daŋso bɛ̀lɛ̀ ndùw wə̄n enyəa, “Wàdè, ghù n nyɔ̀ʼ kə̀a.” 40Nu ghe fə̀ koōm yo alelūʼ alebvʉ̄ wə̄n â ghəa zo.
Sàʼ è wɛ ù Dɛvìd
(Mat 22:41-46; Mâk 12:35-37)
41Yɛso n daŋso bvʉ â ghee enyəa, “Ghɛ̀ lo ênzə̂n alekəaa kaŋlo enyəa Kə̀lestò lǒ wɛ ù Dɛvìd lo? 42#Sms 110:1Mò Dɛvìd, ghuūghùe u wə̄n u dzɛ̂ am Mwàʼsò kə Sâams enyəa,
‘Mughu ù te fə̀ dzɛ â Mughùbè waŋā enyəa,
“Dòʼo tsughu ko fɛ̄ aŋ kwe waŋā ù təma wo,
43tò Ŋ̀ kê ghəə̄ŋ tsughuu dzə̂ ghì à kətūw ghə̂a ghe è zuuw â ghù.”
44Abugho Dɛvìd lò aletɔ̄ɔŋ Wə̄n enyəa à lò Mughu; Ù kòom lò ênzə̂n aledòʼò wɛ ù Dɛvìd à?
Yɛso kwɛ̀ɛn Tsə̀təndə̄ghā tə wə̄n bòʼ zoʼnlo e ghê Dèekə̀làŋ
(Mat 23:1-36; Mâk 12:38-40)
45Yɛso n dzɛ̀ â tsə̀təndə̄ghā tə wə̄n to an sə kə ghì ghəla ghe fə̀ ti fughu a dzə̀m enyəa, 46“E ghomlō nlò a zəŋo ghê dèekə̀làŋ, ghe tughūu ləghaa dàla tə̀ ne tən aledzə̀là, ləghaa sughò enyəa ghî ghə̀ è ŋgɔɔ zee wo ghee bugho ghe tsəghāa dzì; ghe tughuu ləghaa sùghò ndàŋ tə̀ ne to an ndùghènē, à gbəla ù ne wo an lùʼu tə̀ zɔʼɔ̄ tə aghì tò. 47Ghe nɔɔm zə̂a fʉgha u yiikpūw, gɔ̀ɔŋ də̀ghàdə̀ghà tə egɔ̀ŋlò, ghe fwəlà sə a ghee gho. Ghe kê kòʼò kùu ndùw mùlùŋ.”
Àwon tá yàn lọ́wọ́lọ́wọ́ báyìí:
Lûk 20: agq
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
