Dzɔ̌n 7
7
Yɛso ghèe ghê waazə̂ ghò
1A m bùghò ghəa ghən tsəghà tsughu, Yɛso n nùghùu ndùw aleŋgəā kaŋlo aŋ Galèlîi; ù mò yo aleŋgəā an Dzùdîa, bòʼ Dzûu tə̀ mò kəŋo dzì alewī wə̄n. 2#Lɛv 23:34; Lwa 16:13 À n lo mo Dzûu tə̀ so e bùghò zə zə kə Ntùghu. 3Waazə̂ a Yɛso ghə n dzɛ̀ â wə̄n enyəa, “Nùghu tsughu ndùw an Dzùdîa tò tsə̀təndə̄ghā tə̀ghà tə̀ kôʼ fwàʼ wəla ghù fwàʼa ghè wò. 4Tɔŋlo enyəa abugho ghùw ləghaa enyəa ghî à kelê fəgha kə̀là ù fwàʼa ghè kò, ù ki dzə yo alenalā fwaʼā. Abugho ghù ghəə̄ŋ ghəa gho tò ghən, e dee səa nduw ghue wʉ̀a wò.” 5Waazə̂ à ka fə bûʼ bǒo fùghù sùghò â wə̄n. 6Yɛso n dzɛ̀ â ghee enyəa, “Nəghā zaŋa e kāam kpe dzə̀, yia a bughò ghɛ, abugho à lò ko zən, to ghɛ̀ nduw an Yɛ̀lusalɛ̀m. 7Ghî a mbī yo alebɛ̀ ghɛ̀, ghe bâa nù mugho bòʼ Ǹ dzâa fùghuu wò ghəa a ghee à biigh ghəla ghe ghəŋlo. 8Ndǔuw ko nlò ghɛ fughu an zə kə te ko; Ŋ̀ kaam kɔʼɔ yo fughu an lùʼù kə kəzə̄ kən, nu nəgha zaŋā e kaam tɔ̀ʼ kpè mɛ̀ʼɛ̀.” 9Ghəa ù dzɛ̀ tsughu êzə̀, ù n dòʼòdòʼò tsùghù aŋ Galèlîi.
Yɛso zoʼnlo àghì an zə kə ntùghu
10Ghəa waazə̂ Yɛso à nughù kɔʼ nduw fughu an lùʼù kə kəzə̄ chì, ù n daŋso nùghù kɔ̀ʼ ndùw è sugho, à fə̀ kuuwn yo an ndɛ, ù fə̀ nan kɔʼ nû. 11Ghî à ne a Tə̀dzǔu tə̀ ŋ kəŋo wə̄n fughu an lùʼù kə kəzə, bvʉa kaŋlo enyəa, “Ù lò ghɛ?” 12Ghî ghə̀ n tsoo waʼn kə̀a kǎaŋ tsə̀ghà ghəa a wə̄n fughu am bvʉa zə aghì. Ghî à li ghə n dzâa enyəa, “Ù lo ghùw ù dzùŋ.” À lì ghə kuuwn n dzɛ̀ enyəa, “Ù tsʉ̀a bǒon kaaŋ tsə̀ghà àghì.” 13Ghùw ù lì ŋ kuuwn yò alekə̀aa səā kɔʼ ghəa e wə̄n an ndɛ, ghe màʼa fə̀ tsəŋo ghî à ne a Tə̀dzûu ghò.
14A m bùghò ghe sô zə nyə kəŋo ndûw zə ko alo fətsə̀tèʼè, Yɛso n nùghù kɔ̀ʼ ndùw am ndùghù è Kə̀zə̀ è nē an Yɛ̀lusalɛ̀m, daŋso kɔ̀ʼ kàʼ ndùw ghî à tsʉā gho fughu. 15Dzughu zə n zuu Tə̀dzûu aŋ ghəa a te gho, ghe bvʉ enyəa, “Tûw wə̄n ghəa ghən kele ênzə̂n mò ù kaam tso nyə̀ kôʼ mwàʼsò kò a?” 16Yɛso m bɛ̀lɛ̀ tsùghù ghee enyəa, “Tsʉ̂ zəla M̀ fughuu fɛ â ghɛ̀, à yò dzə̂ ghəa a nʉ̀ghà ghaŋa, à lò tsʉ̂ e ghûw wəla ù tum wô mugho. 17Abugho ghùw tsə̀m tsughu alefwàʼ fəgha kə̀là Zə̀ kə̀ ləghaa ghè kò, to ù kele enyəa tsʉ̂ e te e nughù wò aŋ ghùu Zə̀ kò, ŋkāa Ŋ̀ kə̂aa wò ghəa a kəghu ghaŋā. 18Ghùw wəla ù kə̀aa ghəa a wə̄n a kəghū gho, ù kə̀ŋo ŋkɔʼso aŋ ghùe u wə̄n, wəla ù kuūwn kəŋo kɔʼso mò â ghùw wəla ù tum wo wə̄n lo ghùw wəla ù kə̀aa səŋò zò, nyàaŋ fə dzʉ fə̀ li fə yo aŋ ghəa a wə̄n à ghəəŋ gho. 19Musî ka fə ghɛ̀ â làŋ kə̀ mgbaŋ fughu a? Ghùw wɛʼɛ u mɔ̀ʼ vʉ̀a tsoō naāŋ yo lâŋ kə te ko. Ghɛ̀ mugho kəŋo kaŋlo alewī bòʼ kwò a?” 20Ghî a te ghə n dzɛ̀ enyəa, “Ghù ki zə̀a fə̀ biigh fo. À kə̀ŋo ndugho dzì alewī ghu a?” 21Yɛso m bɛ̀lɛ̀ ndùw ghee enyəa, “Mugho mò ghəəŋ tsughu eghəa e mɔ̀ʼ, dzughu ghə n zùm ndùw ghɛ̀ a dzə̀m ènyə a te. 22#Lɛv 12:3; Dzs 17:10 Musî fə̀ de tsughu â ghɛ̀ enyəa a sughoo tsə̀ghà tiigh kə ghûw (à yò dzə̂ enyəa à fə̀ lo ghəa e Musî, e fə nughūu nduūŋ wo aŋ ghùu ghê tsele), ghɛ̀ yia sughōo tiigh kə ghûw kò Tsuʼntsə̄. 23#Dzn 5:9 Abugho ghe lo alesugho tigh kə ghûw Tsuʼntsə̄, enyəa ghe lô bvuʼū lâŋ kə Musî kò, à sò lò kə kwò ghɛ̀ sô pfʉsō nə̀ghà mò enyəa zəŋò mùghò mò M̀ baaŋ kɔʼ ghùw an Tsuʼntsə̄ a? 24E kwo ghɛ̀ lô saʼā ghî ghò aŋghəa ghɛ̀ kòʼò nduw ghee a te, e kuū saʼa tsughuu nlǒ saʼ zəla è lò tsəghatsəgha.”
Ghe bvʉa enyəa à kùum lò to Yɛso Mɛ̀zayà ù te a
25Ghî a Yɛ̀lusalɛ̀m à li ghə n daŋso bvʉ enyəa, “Wən gbàŋ yǒ ghùw wəla ghe kəŋo dzì alewī a? 26Wəlà, ù kə̀a ghəa gho an ndɛ, ghee yia buw alebvʉ̄ wə̄n â ghəa zo! À lò enyəa ghî à ne a sô yia kwo to nû enyəa wə̄n kùum lǒ Kə̀lestò à? 27Lò êzə̀, yia a kuūwn mgbaŋ kwo luʼū wəla ghùw wən sə a te, abugho Kə̀lestò ù te kê bugho, ghùw ù mɔʼɔ kê kele yo luʼū kəla ù nùghù wo a te.”
28Ghəa Yɛso sò zoʼn ghî ghò an Ndùghù è Kə̀zə̀ è nē an Yɛ̀lusalɛ̀m, ù n dzɛ̀ sə̀ wò an dzə̀ è tughu enyəa, “Ghɛ̀ mbaŋ kwo nû mugho, ghɛ̀ yia kwo sugho ghùw wəla ù tum wô mugho. E sô fɛ kuuwn lò enyəa, Ŋ̀ kâ fɛ bughò dzə̀ aŋ ŋgəŋ zaŋā, ghùw wəla ù tum wô mugho kəaa êsəŋo, ghɛ kuūwn kwo yo wə̄n. 29Ŋ̀ kwo nû wə̄n, bòʼ Ǹ nughù wò a vʉ̀a wə̄n, tɔŋlo enyəa à tǔm wò wə̄n mugho.” 30A m bùghò ù dzɛ̀ tsughu êzə̀, ghe ŋ kəŋo dzì alekwu wə̄n, ghuw u mɔ̀ʼ m buw alemɔ̀m wə̄n, bòʼ nəgha e wə̄n e fə̀ lo mo e kaām kpe. 31Lò êzə̀, ndə̀mà tə aghì tə n naam boo fughu ndùw ko â wə̄n. Ghe m bvʉ enyəa, “Abugho Kə̀lestò kè bugho, ù lo yia dêe nǔ sə̀ghà mò, mò mə̀ n tsə̀gha sə məla ghùw wə̄n lo mò ù m dè à?”
Ghe tum təgbè enyəa tə ndûw kwu Yɛso
32Ghî a Falàsîi ghə̀ n zuw aŋghəa ghî a shwəən kə̂aa kaāŋ ghəa gho a te kùu nduw Yɛso, ghee, ghèe ghê tuw u təfɔ̀e wə̀ n tum tsughu təgbè enyəa tə ndûw kwuū wô wə̄n. 33Yɛso n dzɛ̀ â ghì ghò enyəa, “Ǹ naam lò nu sɛ̀ aŋ kə̀mà fə kəgha, sěe Ǹ lo nughùun nduw ebàm a vʉ̀a ghùw wəla ù tum wô mugho; 34Ghɛ̀ e ke kəŋo mugho kòʼò yò. Luʼū kəla Ŋ̀ kê lo a te, ghùw wɛʼɛ u mɔ̀ʼ kè yo alebùghò fughu.” 35Ghî ne a Tə̀dzûu à mo aŋ ghùe e ghee enyəa, “Ghùw wən yia so e boʼò ndûw ghɛ̀ an lùʼu kəla a buw alekəŋo kôʼ wə̄n a te à? Ù sò yia moʼò alendùw saŋe doʼo ndùw ghèe ghê Tòʼò zò à, ù e zoʼn nduw ghee a? 36Ù sò yia moʼnlò èndugho aledzàa tsughu enyəa, Ghɛ lo e kəŋ mugho, ghɛ̀ è koʼo yo. Àsùghò enyəa, Luʼū kəla Ǹ nduūw a te, ghuw wɛʼɛ u mɔ̀ʼ yò alebùghò fughu?”
Yɛso dzɛ̀ enyəa e lo sə e dzughù fə etsɛ̀lɛ̀
37 #
Lɛv 23:36
Tsuʼ fəla zə kə mîanlo a te n lo tsuʼ fə̀ ne fo, Yɛso n nùghù těe è kɔʼ, dzɛ̀ sə wò an dzə̂ è tughu enyəa, “Ghùw wəla fə̀ŋ zuʼso wə̄n ù bùghò nyəma tsughu aŋ ghùu mùghò. 38#Ɛ̀zi 47:1; Zâk 14:8 Ghuw wəla ù boō fughu â mùghò aŋghəa mwàʼsò kə Kəzə̀ kə̀ dzaā enyəa, ‘Mùghù mə̀là m fughuu mughù zò lo kuŋu səa wò a zəŋò wə̄n tò fədzughù.’ ” 39Ù fə̀ enyə kəaa kùʼu ndùw Zuʼ tə̀ Zɔlɔ to, təla ghî ghəla ghe fə̀ boō fughu tsughu â wə̄n fə̀ ki alekele. A n lo êzə̀ mo Zuʼ tə̀ Zɔlɔ tə te tə kaām bughò, bòʼ à màʼâ fə̀ naām lo mò Zə̀ kə kaām kwe u Yɛso ù təma wə n nî dè sə̀ kɔʼ aŋ kɔʼso məla Yɛso ki ghè mò.
40A m bugho ghe zuw tsughuu ghəa ghən gho, ghî à li ghə n dzɛ̀ enyəa, “Kùmkùm, wə̄n kùum lǒ Ghùwshʉ̀ghà ù Kə̀zə̀.” 41À li ghə n dzɛ̀ enyəa, “Wən lǒ Kə̀lestò.” À li ghə ŋ kuuwn bvʉ enyəa, “À lò enyəa Kə̀lestò ù te lo səa wò aŋ Galèlîi ŋkāa? 42#2Sa 7:12; Mik 5:2 À lǒ mo mwàʼsò kə Kəzə̀ kə̀ ka fə dzɛ̀ enyəa Kə̀lestò ù te kê sə̌a wò an tiigh kə Dɛvìd#7:42 Dɛvìd fə̀ lo də̀ŋ kə Ezə̀lɛ̂ kəla Zə̀ kə fə̀ to to ko â wə̄n. à, mò ù nùghù wò am Bɛtə̀lɛ̀hɛ̂m, naʼà fəla Dɛvìd fə̀ sə a te a?” 43Ghe fi nùghù ndzughuun dòʼò tsùghù nû bòʼ Yɛso. 44Ghee à li ghə n ləghaa alekwū Yɛso, ghùw ù lì yo alemɔ̀m wə̄n.
45Gbè ti tə n nùghù ndùw èbàm kwe è kwe a vʉ̀a ghì a Falàsîi ghò mo ghe lo ghèe ghê à tuw u təfɔ̀e wò. Ghe mbvʉ â gbè ti to enyəa, “À lǒ kwo ghɛ̀ sô doʼŋkè nîi wô wə̄n a?”
46Gbè ti tə m bɛ̀lɛ̀ tsùghu enyəa, “Ghùw ù lì kaām ghəa gho enyə kə̂a kòʼ tǒ ghùw wən.” 47Ghî a Falàsîi yi ghə m bvʉ̀ ndùw â ghee enyəa, “À lò enyəa ù ŋ ghɛ̀ sê mə̀ŋso sughò à? 48À lǒ mò ghɛ̀ kôʼ nǔ ghî à ne à li gho ŋkāa ghî a Falasîi à li gho, ghe boō fughu â wə̄n a? 49À sò fɛ kuuwn lò enyəa saʼ kə aghì kəla kə kwo yo lâŋ kə Musî kò, ghe ŋ ghee ləŋ naŋā.” 50#Dzn 3:1, 2 Nìkòdɛmùs, ghùw kaāŋsì ù ghee u mɔ̀ʼ wəla ù fə̀ bûʼ ndûw dzə a vʉ̀a Yɛso â tsuʼ wo n bvʉ̀ â ghee enyəa, 51“A lo enyəa lâŋ kə sɛ̀ kə kɔlɔ̀ nu ghùw mo a kaām dzughu e wə̄n zə zuūw an tia e saʼa? Mo a kaām kəŋ kele kɔ̀ʼ sùghò ghəa zəla ù mò ghəə̄ŋ bonlō a?” 52Ghe m bɛ̀lɛ̀ tsùghù wə̄n enyəa, “Ghù sə̀ sùghò aŋ Galèlîi ŋkāa? Kəŋ sə kɔ̀ʼɔ, ghù so e kele tsughu enyəa ghùwshʉ̀ghà ù Kə̀zə̀ ù lì kê yò alesəa koʼò wô aŋ Galèlîi.”
53Ghe a dzə̀m n sɛ̀ɛ nùghùu ndùw an ndughu tə ghee.
Àwon tá yàn lọ́wọ́lọ́wọ́ báyìí:
Dzɔ̌n 7: agq
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
