Dzɔ̌n 10
10
Kwə̀ən kə ushwaʼ kùu ndùw bàʼàtə̀ndzì
1Tsuʼ fə̀ lio fo, Yɛso n tsʉ̀a àghì, ù ŋ kwə̀əŋ n dzɛ̀ â ghee enyəa, “Kùmkùm, M̀ fɛ kùu dzàa wò nù â ghɛ̀, ghùw wəla ù tsɔŋ baam nyə an ghɔŋ u təndzì, mô ù ka nyə a fǔu u ughɔ̄ŋ, ù lô ghùwtsɔ̀ŋɔ. 2Ghùw wəla ù kuūwn tsəghà nyə a fǔu u ughɔ̄ŋ, à lǒ wə̄n bàʼàtə̀ndzì. 3À lo â wə̄n ghùw ù chìnlo tsʉā fuū u ughɔ̄ŋ wo; ù tɔɔŋ tsughu ndzì tə wə̄n alo zən, tə n zuwkɛlɛ wò dzə̀ è wə̄n, ù n daŋso bâ sə̀ wò ghee. 4A m bùghò ù nì sə wo ghee êzə̀, ù n tee ndzə̀a â sə ko an dzì è sòʼo; ndzì tə m bɔɔm sə̀ tə̀ŋò ndùw sùghò a bàâ wə̄n, bòʼ ghe zuūwkɛlɛ dzə̀ è wə̄n. 5Ndzì tə te tə yo dzə̂ to tə e səā təŋò ndûw a bàâ ghùw nughùnùghù, tə n tiin nùghù è tsughu, bòʼ tə sô zuūwkɛlɛ yo dzə̀ è ghùw nughùnùghù ù te.” 6Yɛso fə̀ ghəa ghən kəa nduw â ghee an shwaʼ u kwə̀n kə̀ kwən wo, ghe ŋ kè sô kuūwn zuūwkɛlɛ̂ fəgha kə̀là ù mòʼò ghè kò.
Yɛso lǒ bàʼàtə̀ndzì ù dzùŋ
7Yɛso fi kôom tèso ndùw nù tuŋlō u ghee wo enyəa, “M̀ fɛ kuu dzàa wò nù â ghɛ̀, à lò mugho fuū u ughɔ̄ŋ u təndzì wò. 8Ghî ghəla ghe fə̀ bughò sə ko a zəŋò, ghî ghəla ghe fə̀ foʼsò twən wo enyəa ghe lɛnlo â dzì tò, kùm lò ghîtsɔŋ gho ghe yia bvʉ̂a sughò dziī to, ndzì tə̀ ŋ kè kuūwn zuūw dzə̂ â ghee. 9Ǹ lo fuū u ughɔ̄ŋ, abugho à lò ko ndughoo ù tsə̀ghà nyə dzə a zəŋò mùghò, lo zəa nù tuw ko; ù e ke doō tsəghāa nyəa, tsə̀ghà sə̌a, kele sùghò fʉ̀ghà zəa u wə̄n. 10Ghùwtsɔ̀ŋɔ bughò ko alebùghò tsɔŋ àsùghò alewī ŋkāa aledzùuw maʼà. M̀ fɛ bùghò enyəa ghî à kele èmùghù, ghe e laʼā yo fəgha ko. 11Ǹ lo bàʼàtə̀ndzì ù dzùŋ; Bàʼàtə̀ndzì ù dzùŋ lo wəla ù lo alekpuūw fughu vʉ e ndzì tə wə̄n. 12Abugho ghe tsə̄ tsughu ghùw enyəa ù è lɛnlo â ndzì tò, mò à ndzì tə te tə ki yo wə̄n, ù tǐi naaŋ tàʼn tsùghu nù ndzì te to abugho ù kòʼ ndûw bəgha ko kə bughoo; bə̀gha kə̀ te kə m bùghò kwǔun pfʉ kɔʼ ndzì tə̀ li to, dzùm sàaŋ tsughu tə̀ loʼ to. 13Ghùw wəla ghe tsə̄ tsughu wə̄n enyəa ù è lɛnlo â dzì tò nùghùun tǐi tàʼn tsùghù təndzì bòʼ ù sò tsô lô ko ghùw ù kə̀fwàʼ; ù ki dzə yo nəgha zo a zəŋò ndzì tə te to. 14#Mat 11:27; Lûk 10:22Ǹ lo bàʼàtə̀ndzì ù dzùŋ, Ŋ̀ kwo nû ndzì taŋa to, ndzì taŋa tia tə kwo sughò mugho. 15Tò aŋghəa Tsele waŋā kwō mugho a te, yìa Ŋ̀ kwo sugho wə̄n. Yìa M̀ fughu mughù zaŋa zo â ndzì taŋa to. 16Ŋ̀ ki nû ndzì tə̀ li to mo tə yo dzə aŋ saʼ kən. Ŋ̀ ki alenìi təmā dzəə̄ŋ wo ghee, ghe e zuuw â mùghò. Ndzì tə te tə e lo alo kəsāʼ kə mɔ̀ʼ, ki sugho bàʼàtə̀ndzì u mɔ̀ʼ. 17Tsele waŋa mugho fɛ ləghaa bòʼ M̀ boō alefughu ghue waŋā enyəa mùghò e ke kôom lo alenì ebàm. 18Ghùw yò tò ù è wiī maʼà mùghò. À kǔuwn ləgha tsughu mugho alefughuu ndûw ghue waŋa; nu Ŋ̀ ki kədaʼa alefughu, tò aŋghəa M̀ bɔɔ̄m ki sughô daʼa ko alenì ebàm. À daʼa kən â mùghò fughu Tsele waŋā.”
19Ghəa Dzuū tə̀ zuw ghəa ghəla Yɛso kə̀a tsughu, ghe ŋ kele kpeʼe tsughu ndzùghùn tə emòʼnlò kùu ndùw wə̄n. 20Ndə̀m è ghee n dzâa enyəa, “Ù ki zə̀a fə̀ biigh fo, ù zə̀ghaa ùzʉ̀, à lò kə kwò a bûʼ ki alezə̂ən shwaʼ u wə̄n a?” 21Kə̂m kə aghî kə̀ li kə ŋ kuuwn dzɛ̀ enyəa, “Shwaʼ u wə̄n u fween dzə̀ yò u ghùw wəla ù zəghāa zʉ̀ wò. To ghùw ù zə̀a fə̀ biigh fə ŋ ghəŋlo enyəa ghî à foō ghə e koʼō luʼū to a?”
Dzûu tə̀ tue màʼà Yɛso
22Ghuw ghəla ghe zəā tsəgha zə kəla ghe fə̀ zə̂əŋ tsəgha aŋghəa ghe fə̀ nî fughu kɔʼ Ndùghù è Kə̀zə̀ è nē a te an Yɛ̀lusalɛ̀m m kpè è tsughu. 23À n lo an nə̀gha zə eghuūw, Yɛso m bwîi kaŋlo an Ndùghù è Kə̀zə̀ è nē an Yɛ̀lusalɛ̀m am bà kəla ghe tɔŋlo enyəa à lò fuū u mbɛ̀ u Solomòn. 24Dzuū tə̀ m bùghò tàʼ zùuŋ kɔʼ wə̄n, bvʉ â wə̄n enyəa “Ghù ghàʼ alo kəŋgômso so bòʼò naŋa ndûw tɛ̂ ghɛ̀? Abugho à lò ghû Kə̀lestò ̀u te, dzǎa sə wò â ghàʼ an ndzughu e tughō zo.” 25Yɛso m bɛ̀lɛ̀ ndùw ghee enyəa, “M̀ mâa dzɛ̀ â ghɛ̀, ghùw wɛʼɛ vʉ̀a ù yò alebōo. Fwà kə̀là M̀ fwaʼa an zən e Tsele waŋa, fwàʼ kə teso dzàa nù ghùw wəla Ǹ lo ghè wò. 26Ghɛ̀ yo alebōo bòʼ ghɛ̀ yo dzə ndzì taŋa to. 27Ndzì taŋa tə zuūwkɛlɛ dzə̀ zaŋa, yìa M̀ kwo ghee, ghee yia bwîi a bàâ mùghò. 28M̀ fughuu ghee a mùghù zəla e doʼò tən, ghee kê yò sùghò alekpuūw ləŋe; fəgha kə̀ li kə yo alenìi nughù ghee aŋ ghùu mùghò. 29Tsele waŋā wəla ù fughu wo ghee â mùghò, tùghù tsə̀ghà taʼà aghì a dzə̀m. À fi lo enyəa ghùw ù lì kòom yò tò ù è chuūw nughù sə ghùw ù ghee u mɔ̀ʼ an ghu kə Tsele ù te. 30Ghàʼ à bə̀ghà lò alo kəfəgha kə̀ mɔ̀ʼ.”
31Dzuū tə̀ n tsughu kuum kpeʼe kɔʼ atia tə̄əm wə̄n a te. 32Yɛso ŋ kuuwn dzɛ̀ ndùw â ghee enyəa, “Mùghò ŋ ghəəŋ ghɛ â də̀mà tə aghəa tə̀ dzûŋ təla bəghà mò de â mùghò. Ghɛ̀ mugho êzə̄ŋ biso təmlō alo atīa aŋ ghəa è ghɛ zò a tè à?” 33#Lɛv 24:16 Dzuū tə̀ m bɛ̀lɛ̀ tsughu wə̄n enyəa, “Ghàʼ ghû tə̌əm dzə̀ yò bòʼ fwàʼ kə̀a kə̀ dzùŋ kò; Ghà ghǔ fɛ so e təə̄m wi enyəa ghù kòʼò lʉ̀ghaa Kə̀zə̀. Ghù mgbàŋ lǒ ghùw nsɔ̌ɔŋnchùw, ghù vʉ̀a ghù naāŋ kɔʼɔ nduw ghue wʉ̀a wò enyəa ghù lò Kəzə̀.” 34#Sms 82:6 Yɛso m bɛ̀lɛ̀ ndùw ghee enyəa, “Ghe kâ mgbaŋ tɔm naŋa aŋ làŋ kɛʼɛ enyəa, ‘Ǹ dzɛ̄ enyəa ghɛ lo ùzʉ̀.’ 35Abugho Kə lo aletɔŋɔ̄ ghì ghəla kə fə̀ fughu wô shwaʼ u wə̄n wo â ghee enyəa à lò uzʉ̀ (a yo alesàʼà kuūwn kôʼ shwaʼ u Kəzə̀), 36yia a bughò mugho, bəghà mò ndzəə̄m tsɔʼ kɔʼ nû, tùm nyə̀ wò am mbī; ghɛ̀ sô lǒ ênzə̂n alekoōm dzaā wo enyəa, ‘Ghù sùuwn Kə̀zə̀ a, bòʼ Ǹ dzɛ̀ enyəa, Ǹ lo Wɛ ù Kə̀zə̀ a?’ 37A bùghò à lo mô M̀ fwaʼà yò fəgha kəla bəghà mò de â mùghò, kâ nlò boo fughu dzə̀ â mùghò. 38Mò à lò dzə enyəa M̀ fwāʼa nù, ghɛ yia buw aleboō fughu â mùghò bòʼ shwaʼ waŋa, kuuwn bòo tsughu ko nlô fwàʼ kə te ko, tò ghɛ̀ lo e kwo, ghɛ̀ zuwkɛlɛ sugho enyəa Bəgha lo a zəŋò mùghò, tò ghəa Ǹ lôo a zəŋò wə̄n.” 39Ghe ŋ kòom nughu kpeʼe kɔʼ enyəa to a mô kwu wə̄n, wàzəletūm n nùghùu nɔ̀ti sə tsughu aŋ ghu kə ghee.
40 #
Dzn 1:28
Ù ŋ kôom nughu dàŋ ndùw ebàm am bà kə dzughù Dzodàn kə̀la Dzɔ̌n fə̀ buʼù fughu ghî ghò a te â mùghù ŋ Kə̀zə̀ mò, ndùw mùghù dòʼò ndùw a fughu. 41Ndə̀mà tə aghì tə m bùghò a vʉ̀a wə̄n, dzàa tsughu enyəa, “Dzɔ̌n ka fə dê dzə̂ tsə̌a tə̀ li to, ghəa ghə̀n a zə̀m Dzɔ̌n fə̀ kuūwn kəaa kùu ndùw ghùw wən fə̀ lo èsəŋò.” 42Ndə̀m è àghì fughu èzə n daŋso boo fùghù nduw â Yɛso.
Àwon tá yàn lọ́wọ́lọ́wọ́ báyìí:
Dzɔ̌n 10: agq
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
