Эвел 2
2
1Гьамци завна жил ва завариъна жилариъ айиб вари арайиз хуру. 2Ургудпи йигъаз Заанури Чан апӀурайи ляхнар ккудуркӀуру. Ургудпи йигъан Дугъу Чан гъапӀу вари ляхнарихъан рягьятвал гъадабгъуру. 3Заанури ургудпи йигъ ужувлакк ккапӀру ва гирами апӀуру, фицики думу йигъан Дугъу Чав арайиз гъахи вари ляхнарихъан рягьятвал гъадабгъурайи.
Эдем багъдиъ Адамдинна Гьавайин уьмур
4Магьа, завна жил фици Заанури арайиз гъахидар вуш: РАББИ#2:4 Заанури Муса пайгъамбриз Чан ччвур ачмиш гъапӀну. Заанурихьна вуйи гьюрматнаан жугьдари думу ччвур кӀури гъахьундар. Дидин ерина дурари «рабби», яни «йиз аьхюр» кӀури гъахьну. Думу ччвур фици кӀуйиш дюзди аьгъдар, гьаддиз дидин ерина РАББИ бикӀура. Заанури завна жил апӀурайи вахтна, 5жилиин я саб рук, я саб укӀ алдайи, фицики РАББИ Заанури жилиинна мархь гьапӀнадайи, ва думу тартиб апӀуз инсан адайи. 6Жилилан за шулайи бугъну жил кьяши апӀурайи. 7РАББИ Заанури жилин биширугдикан адми ктауру, дугъан хъюхънин ппулариъ уьмрин нефес ибтру, адмийиин жан илибшуру.
8РАББИ Заанури ригъ гьудубчӀвру терефнаъ айи Эдемдиъ багъ ибтру ва душваъ Чав ктау адми тӀаъру. 9РАББИ Заанури душваъ кӀваз мани ва ицци бегьер хру гьубкьу жюрейин гьарар кивру. Багъдин кьялаъ уьмрин гьар ва ужубна харжиб улупру гьар айи.
10Эдемдиан, багъдиз шид тувуз, нир удубчӀвура. Хъасин думу, юкьуб цирклиз пай шула. 11Сабдин ччвур Пишон ву. Думу, гъизил айи Хавила уьлкейилан илтӀибкӀура. 12Думу ругарин гъизил ужуб ву. Душваъ ицци ниъ хъайи гьарарин шириш ва оникс кӀуру багьа гъванар а. 13Кьюбпи нирин ччвур Гихон ву. Думу Куш уьлке вуйибси илтӀибкӀура. 14Шубубпи нирин ччвур Тигрис ву. Думу Ассирияйин ригь гьудубчӀвру терефнахьантина гъябгъюра. Юкьубпи нир – Ефрат.
15РАББИ Заанури Эдем багъдиъ адми итру, багъ уьбхюз ва гъайгъу зигуз гъитру. 16Дугъу адмийиз гъапи: «Увхьан багъдиъ гьарсаб гьарин йимишдикан ипӀуз шулвухьан, 17аммаки ужубна харжиб улупру гьаркан мипӀан, гъипӀиш, якьин йикӀидиву».
18РАББИ Заанури гъапи: «Сарди хьуб адмийиз ужу дар. Узу дугъаз чаз гъилигу юлдаш апӀидиза». 19РАББИ Заанури жилин ругдикан гьар жюрейин гьяйванатарна ничхрар ктау. Дугъу дурар адмийихьна хуру ва фицдар ччвурар тувруш лигуру. Адмийи гьарсаб чӀивишназ фицдар ччвурар тувнуш, гьаци кӀури гъахьи. 20Адмийи вари мал-къарайиин, вари ничхрариин, вари гьяйванатариин ччвурар иливу – амма дугъаз чаз гъилигу юлдаш гъидихъундайи. 21РАББИ Заанури адми ижми нивкӀуз гьаъру. Хъа дугъан гъвалʼан мурглин тӀул адабгъуру ва адабгъушв гьибкру. 22РАББИ Заанури дугъан мурглин тӀуликан дишагьли яратмиш апӀуру ва думу жилижвувахьна хъади гъюру. 23Хъа жилижвуву кӀуру: «Магьа думу: кӀураб – йиз кӀурбарикан вуйир, йикк – йиз йиккарикан вуйир. Мугъаз дишагьли пиди, фицики жилижвувкан яратмиш дапӀнайир ву#2:23 Жугьуд чӀалнаъ жилижви – «иш» ва дишагьли – «ишша».».
24Магьа гьаддиз жилижви, чан адашна дада гъитну, чан хпирихъди сатӀи хьиди, ва дурар саб беденси хьиди.
25Дурар кьюридра – адмира, дугъан хпирра – гъяцӀалди вуйи, амма дурариз начди дайи.
Àwon tá yàn lọ́wọ́lọ́wọ́ báyìí:
Эвел 2: ТабГК
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Институт перевода Библии, 2010, 2013, 2016, 2018, 2023