ປັຣນາຍ ປາລີ່ ພາຍາ 18
18
1ກວາຍ ຕາ ເບີນ ຣາຕອຍ ກະ ເຢົ່າ ໄບ, ລາ ອັນ ຣາບູລ ແອີງ ແຕ ຈະ ອັນ ເບີມ;
ອັນ ຕາ ເບີນ ປຣ່ອມ ກະ ຣານະ ປຍາຍ໌.
2ກວາຍ ຊາກູລ ຕາ ເບີນ ຣາບູລ ອີ ດັງ ມວຍ ຣາມຶ່ຮ ອຶນເຕົ່າ;
ມາ ອັນ ຣາເມົ່າ ອີ ອາປັຮ ແອີງ ຣາງຶ່ຮ ອັນ ຄຶ່ດ ເບີມ.
3ອາກັນ ໂລ່ຍຮ ກະ ອາກັນ ກູມາລ ລາ ເປາະ ມັນຕຸ.
ຄັນ ອາກັນ ກູມາລ ແຕີ່ອ໌, ເຈີ່ ເບີນ ແຕິ່ ປັຣນາຍ ພາມາດ.
4ມັຮ ປັຣນາຍ ກວາຍ ຣາໄງ່ອ໌ ຣາລັ່ງ ແກີດ ນ່ະ ປັຣໂລ່ຍ໌ ອາກັນ ຣາໄງ່ອ໌ ຣາລັ່ງ,
ອຶນຕຣູ່ ນ່ະ ທາເລ, ກະ ຣາລັ່ງ ນ່ະ ແດີອ໌ ຕູມ ກາ ປຼົຮ.
5ຕາ ເບີນ ປຍາຍ໌ ຮັກບັງ ຊັງບຍາງ ໂອນ ກວາຍ ໂລ່ຍຮ
ແຕີລາ ຕູນ ອາແປັດ ກວາຍ ຕາ ເບີນ ຕະ ໂລ່ຍຮ ອຶນເຕົ່າ.
6ຄັນ ກວາຍ ຊາກູລ ຈໍ່ອ໌ ເລືອຍໆ ອີ ຣາໂລຍຮ,
ກັອຍ ລາ ນ່ະ ອັນ ມັນຕຣັ່ນ ໂອນ ເນົ່າ ປຍາຍຮ ອັນ.
7ປັຣນາຍ ກວາຍ ຊາກູລ ປາຍ ລາ ອາປິ່ດ ຈະ ອັນ ເບີມ;
ອັນ ຕານ ຊາງ ກູວາງ ໂຈະ ຈະ ອັນ ເບີມ.
8ຣານະ ຕາແມີຍຮ ເຢົ່າ ແກີດ ບະ ປາຈົກ ນ່ະ ຣາແວັ່ຮ;
ກະ ກວາຍ ອາແລ່ະ ຊາງັດ ປັຣນາຍ ກັອຍ, ອັນ ລື່ນ ໄຈ ລາລື່ ຣາມຶ່ຮ ກັອຍ.
9ກວາຍ ອາລັ່ຮ ກະ ກວາຍ ມັ່ກ ຕາລຸຮ ລາ ລີ ຣາລີ.
10ຣາມຶ່ຮ ເຢືາງ ເຈົາຣາຊີ ແກີດ ນ່ະ ດຸງ ຍາມ ຄຳ ລາລື່,
ລາ ອຶນຕຸ ກວາຍ ຕານັ່ອງ ອໍ ເຕ່ອ໌ ປັ່ອງ ໂອນ ແກີດ ກຼີດ ກຼອດ ຈອດ ອໍ.
11ມັຮ ກວາຍ ຊຸ ດຸ ຄຶ່ດ ປາຍ ມູ່ນມັ່ງ ໄລ່ ເຕ່ອ໌ ກຸ່ມກຍາອ໌ ໄລ່,
ແກີດ ນ່ະ ວຍາງ ດໍອ໌ ກູຣຍາອ໌ ເມືອງ.
12ກວາຍ ປັຣໂອດ ຈະ ເບີມ ແກີດ ແດັດ ປິ່ດ ຊາລີຣ,
ມາ ກວາຍ ອາແຊງ ຈະ ເບີນ ຊະເຢືາງ ປັຣເລືາງ ປາເນົາ.
13ຊາງັດ ອຶນໂຍ່ງ ເວືາຍ ແຕ ຕາແອີຍ;
ຄັນ ຕາແອີຍ ອຶນໂຍ່ງ ຊາງັດ, ລາ ຊາກູລ ກະ ກູມາລ ຕະ ລາລື່.
14ຣາງຶ່ຮ ບັນ ເຣ່ງ ເຕ່ອ໌ ຈີວ໌ ເລືອຍໆ ອາອີ່ ຕາກົຮ;
ມາ ກວາຍ ກາ ແອິ ຣາງຶ່ຮ ອຶງກ່ອງ ອັນ ຕາ ເຣືາບ ຈີວ໌ ອຶນເຕົ່າ ນັ່ອງ.
15ມັຮ ກວາຍ ຣາໄງ່ອ໌ ຣາລັ່ງ ອູອຍາຣ ອູໄອອ໌ ອີ ຣຍານ ໂອນ ດັງ;
ໄລ່ ກູຕົງ ອຶນແຍ່ະ ຣາງຶ່ຮ ຣາແຮີ ຈໍ່ອ໌ ອີ ແກີດ ຣາໄງ່ອ໌ ຣາລັ່ງ.
16ຄັນ ຢໍອ໌ ອີ ຣາມົຮ ກວາຍ ເບີນ ອຳນາດ ປື່ດ,
ຣາມຶ່ຮ ກັອຍ ອຽນ ລາລື່ ຄັນ ໄມ່ ອາແຕີ່ອ໌ ຣັງອອຍ ປໍ ອັນ.
17ກວາຍ ກາ ຕາແບິ ລາລື່ ລັ່ອຮ ຕະ ອຶນຕີ ຕຶ່ງ ອຶນຕຸ ປັຣຈີນ, ປັຣນາຍ ອັນ ປາຍ ອາຣັ່ງ ປຍາຍ໌,
ພໍກາ ແຕີ່ອ໌ ມານະ ແອັນ ຕະ ອຶນຕີ ຣາລັ່ດ ລັ່ຮ ກວາຍ ກັອຍ, ກັອຍ ແຕ ເນົ່າ ດັງ ແຈງ.
18ຄັນ ບາຣ ນະ ກວາຍ ຊົດ ຣາຈຽນ ຕຶ່ງ ອຶນຕຸ ປັຣຈີນ ປັຣນາຍ,
ອຶງເຄາະ ໄລ່ ປັຣຈີນ ໂອນ ແມິ່ມ ຣານາ ມັນຕັດ ອາຍຸ່ ແອັນ.
19ຣາຈ່ອຍ ມັຮ ແຊມອາຍ, ລາ ມູເຈິງ ກະ ຕະ ວຍາງ ເມືອງ ໂອນ ຄຳ ລາລື່;#18:19 ຣານາ 19 ໄນ່ ຕາ ເບີນ ແຈງ ຕຶ່ງ ປັຣນາຍ ເຮັບເຣີ. ເບີນ ເນົ່າ ອາຕີ ປາຍ: ‘ຄັນ ຕະ ໂອນ ແຊມອາຍ ຊັອງ ອວານ, ກັ່ດ ລາລື່ ໂອນ ແກີດ ຣາຕອຍ ລັ່ຮ, ກັ່ດ ກາເລີຍ ແຕ ອີ ປູຣ ອີດ ເມືອງ ເບີນ ວຍາງ ຄຳ ແອັນ.’
ມາ ແຊມອາຍ ກາ ຣາໂລຍຮ ຣາແລັຮ, ລາ ມູເຈິງ ອີດ ຕາອ໌ ກຼັງ ດໍອ໌ ງັ່ຮ ຕົ່ງ ຕາ ໂອນ ມູ່ດ ນັ່ອງ.
20ປັຣໄລຮ ປັຣນາຍ ກວາຍ ແຄວ໌ ຕະ ອຶນຕີ, ລາ ນ່ະ ຣາແວັ່ຮ ແອມ ອໍ;
ອັນ ຕະ ໂອນ ກວາຍ ຊັອງ ຣໍ່ອ໌ ນ່ະ ປຸ່ງ ກາ ຈາ ປາໄຊ.
21ມັຮ ປັຣນາຍ ລັ່ອຮ ແຕ ແບອ໌, ເຕ່ອ໌ ຈ່ອຍ ໂອນ ອັນ ເບີນ ອາມົ່ງ ແຕີລາ ໂອນ ກູຈີດ;
ກວາຍ ກາ ອຶນຊອຍ໌ ແບອ໌, ລາ ອຶງເຄາະ ຣັ່ບ ເກືາ ແຕ ປັຣນາຍ ອັນ ປາຍ.
22ຣາເລົາ ກາ ຣາມົຮ ລາກວຍ ລາ ນ່ະ ອັນ ຣາມົຮ ຣັງອອຍ ເບີນ ເກືາ ລາລື່;
ອັນ ຣັ່ບ ບຸ່ນ ເກີ່ຍ ຣາແອີຍ ປັ່ນ ແຕ ເຢືາງ ເຈົາຣາຊີ.
23ກວາຍ ຕຸ່ຮ ກາດີດ ກູໂກຼຍ໌ ກູເກຼ່ງ ໂອນ ເນົ່າ ຊັອງ ອາໂຢ່ະ ຕະ;
ມາ ກວາຍ ຊຸ ຕາແອີຍ ຊັງໄກຮ ຊັງແກີລ.
24ເບີນ ເຢົ່າ ຣາຕອຍ ຊາອຶ່ຍ ນະ, ມາ ຕາ ເບີນ ຣາຕອຍ ດູ່ນ;
ມາ ເບີນ ເຕ່ ເຢົ່າ ຣາຕອຍ ລາລື່ ກາ ແຈ່ະ ຊຍາດ ກາເລີຍ ແຕ ແຊມອາຍ ເບີມ.
Àwon tá yàn lọ́wọ́lọ́wọ́ báyìí:
ປັຣນາຍ ປາລີ່ ພາຍາ 18: ກາຕາງ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2023 (Active) Wycliffe Bible Translators, Inc. All rights reserved.