ಮತ್ತಾಯ 9
9
ಪಾರ್ಶ್ವವಾಯುಲ್ ನರಳಿಯಂಡಿಂಜ ಮನುಷ್ಯನ ವಾಸಿ ಮಾಡ್‍ನದ್
(ಮಾರ್ಕ 2.1–12; ಲೂಕ 5.17–26)
1ಅಕ್ಕ ಯೇಸು ಹಡಗ್‍ಲ್ ಅಳ್‌ತಂಡ್ ಕೆರೆರ ಆಬರಿಕ್ ಅಂವೊಂಡ ಪಟ್ಟಣಕ್ ಪೋಚಿ. 2ಚೆನ್ನ ಜನ ಅಲ್ಲಿಕ್, ಪಾರ್ಶ್ವವಾಯುಲ್ ನರಳಿಯಂಡಿಂಜ ಒರ್ ಮನುಷ್ಯನ, ಕಡ್‌ಕೆರ ಮೇಲೆ ಬುದ್ದಾಕ್‌ಚಿಟ್ಟಿತ್ ಕಾಕಿಯಂಡ್ ಬಾತ್. ಯೇಸು ಅಯಿಂಗಡ ನಂಬಿಕೇನ ಕಂಡಿತ್: ನಾಡ ಮೋಂವೊನೇ, ದೈರ್ಯ ಎಡ್‌ತ, ನೀಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ಚೀಂದ್ ಎಣ್ಣ್‌ಚಿ.
3ಅಕ್ಕ, ನ್ಯಾಯಪ್ರಮಾಣತ್‍ರ ಚೆನ್ನ ಉಪಾದ್ಯಂಗ: ಇಂವೊ ದೇವ ದೂಷಣೆ ಮಾಡಿಯಂಡುಂಡ್‍ೕಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್.
4ಅಯಿಂಗೆಲ್ಲಾ ಎಂತ ಗೇನ ಮಾಡಿಯಂಡುಂಡ್‍ೕಂದ್ ಯೇಸುಕ್ ಗೊತ್ತಾಚಿ. ಆನಗುಂಡ್ ಯೇಸು: ಎನ್ನಂಗ್ ನಿಂಗ ಇನ್ನನೆ ಕೆಟ್ಟದ್ ಗೇನ ಮಾಡ್‌ವಿರಾಂದ್ ಕ್‍ೕಟತ್. 5ನೀಡ ಪಾಪಕ್ ಮನ್ನಿಪ್ಪ್ ಕ್‍ಟ್ಟ್‌ಚೀಂದ್ ಎಣ್ಣ್‌ವದ್ ಸುಲಬವ ಅಥವ ನೀಕ್ ವಾಸಿ ಆಚಿ, ಎದ್ದಿತ್ ನಡೇಂದ್ ಎಣ್ಣುವದ್ ಸುಲಬವ? 6ಮನುಷ್ಯಂಗಡ ಪಾಪತ್‍ನ ಮನ್ನಿಚಿಡ್‌ವಕ್ ಮನುಷ್ಯಕುಮಾರಂಗ್ ಈ ಬೂಮಿಲ್ ಅದಿಕಾರ ಉಂಡ್‍ೕಂದ್ ನಾನ್ ನಿಂಗಕ್ ಕಾಟಿತಪ್ಪೀಂದ್ ಎಣ್ಣಿತ್, ಯೇಸು ಕಾಯಿಲೆಲ್ ಇಂಜ ಮನುಷ್ಯನ ನೋಟಿತ್: ಏಳ್, ನೀಡ ಕಡ್‌ಕೆನ ಎಡ್‍ತಂಡ್, ನೀಡ ಮನೆಕ್ ಪೋಂದ್ ಎಣ್ಣ್‌ಚಿ. 7ಅಕ್ಕಣೆಕ್ ಆ ಮನುಷ್ಯ ಎದ್ದಿತ್ ಮನೆಕ್ ಪೋಚಿ. 8ಇದ್‍ನ ನೋಟಿತ್ ಜನಕ್ ಪೋಡಿ ಆಚಿ. ಮನುಷ್ಯಂಗ್ ಇನ್ನನೆ ಮಾಡ್‌ವಕ್ ಅದಿಕಾರ ಕೊಡ್‍ತ ದೇವನ ತುದಿಚತ್.
ಯೇಸು ಮತ್ತಾಯನ ಕಾಕ್‍ನದ್
(ಮಾರ್ಕ 2.13–17; ಲೂಕ 5.27–32)
9ಅಲ್ಲಿಂಜ ಯೇಸು ಪೋಯಂಡಿಪ್ಪಕ, ಮತ್ತಾಯಾಂದ್ ಪೆದ ಉಳ್ಳ ಒಬ್ಬ ಕಂದಾಯ ಎಡ್‌ಪ ಅಲ್ಲಿಯತ್‍ರ ಕಛೇರಿಲ್ ಅಳ್‌ತಂಡಿಪ್ಪದ್‍ನ ಕಂಡತ್. ಅಂವೊಂಗ್ ಯೇಸು: ನಾಡ ಬಯ್ಯ ಬಾಂದ್ ಎಣ್ಣ್‌ಚಿ. ಅಕ್ಕ ಅಂವೊ ಎದ್ದಿತ್ ಅಂವೊಂಡ ಬಯ್ಯಕ್ ಪೋಚಿ. 10ಬಯಿಟ್ ಯೇಸುಕ್ ಮತ್ತಾಯಂಡ ಮನೆಲ್ ಗದ್ದಾಳ ಇಂಜತ್. ದುಂಬ ಕಂದಾಯ ಎಡ್‌ಪ ಜನ ಪಿಂಞ ಸಮಾಜ ಪಾಪಿಯಂಗಾಂದ್ ಎಣ್ಣ್‌ವಂತ ಜನ ಅಂವೊಂಡ ಕೂಡೆ ಬಂದಿತ್ಂಜಗುಂಡ್, ಅಲ್ಲಿಕ್ ಬಂದಿತ್ ಅಂವೊಂಡ ಕೂಡೆ ಪಿಂಞ ಶಿಷ್ಯಂಗಡ ಕೂಡೆ ಉಂಬಕಿಂಜತ್.
11ಚೆನ್ನ ಫರಿಸಾಯಂಗ ಯೇಸುರ ಶಿಷ್ಯಂಗಳ ನೋಟಿತ್: ಎನ್ನಂಗ್ ನಿಂಗಡ ಉಪಾದ್ಯ ಕಂದಾಯ ಎಡ್‍ಪಯಿಂಗ ಪಿಂಞ ಸಮಾಜ ಪಾಪಿಯಿಂಗಾಂದ್ ಎಣ್ಣುವ ಜನಡ ಕೂಡೆ ಉಂಬಾಂದ್ ಕ್‍ೕಟತ್.
12ಇದ್‍ನ ಕ್‍ೕಟ ಯೇಸು: ದಾರ್ ಸೌಕ್ಯತ್‌ಲ್ ಉಂಡೋ ಅಯಿಂಗಕ್ ವೈದ್ಯ ಬೋಂಡ, ದಾರ್‌ಕ್ ಸೌಕ್ಯ ಇಲ್ಲತೆ ಉಂಡೋ ಅಯಿಂಗಕ್ ಮಾತ್ರ ವೈದ್ಯಂಗ ಬೊಂಡಿಯೇಂದ್ ಎಣ್ಣ್‌ಚಿ. 13ನಿಂಗ ದೇವಕ್ ಕೊಡ್‍ಪ ಬಲೀಲ್ ನಾಕ್ ಕುಶಿ ಇಲ್ಲೆ. ಆಚೇಂಗಿ ನಿಂಗ ಜನಡಮೇಲೆ ಕಾಟುವ ಕರುಣೇಲ್ ನಾಕ್ ದುಂಬ ಕುಶಿ ಉಂಡ್‍ೕಂದ್#9.13 ಹೋಶೇಯ 6.6 ಎಣ್ಣುವ ದೇವಡ ವಾಕ್ಯಕ್‍ತ್‍ರ ಅರ್ಥ ಎಂತ್‍ೕಂದ್ ಪೋಯಿತ್ ಪಡಿರೀಂದ್ ಎಣ್ಣ್‌ಚಿ. ನೀತಿವಂತಯಿಂಗಳ ಅಲ್ಲ, ಆಚೇಂಗಿ ಪಾಪಿಯಳ ಕಾಕಿಯಂಡ್ ಪೋಪಕಾಯಿತೇ ನಾನ್ ಬಂದಿಯೇಂದ್ ಎಣ್ಣ್‌ಚಿ.
ಪಟ್ಟಣಿ ನಿಪ್ಪ ವಿಷಯತ್ ಚರ್ಚೆ
(ಮಾರ್ಕ 2.18–22; ಲೂಕ 5.33–39)
14ಒರ್ ದಿನ ಯೋಹಾನಂಡ ಶಿಷ್ಯಂಗ ಯೇಸುರ ಪಕ್ಕ ಬಪ್ಪಂಜಿ, ನಂಗಳು, ಫರಿಸಾಯಂಗಳು ಅಕ್ಕಕ್ಕ ಪಟ್ಟಣಿ ನಿಂದಂಡಿಪ್ಪಕ, ನೀಡ ಶಿಷ್ಯಂಗ ಎನ್ನಂಗ್ ಪಟ್ಟಣಿ ನಿಂದಂಡಿಲ್ಲೇಂದ್ ಕ್‍ೕಟತ್.
15ಅದ್ಂಗ್ ಯೇಸು: ಮಂಗಲತ್‍ರ ಮನೆಲ್, ಮಂಗಲಕಾರ ಕೂಡೆ ಇಪ್ಪಕ, ಎನ್ನನೆ ಅಂವೊಂಡ ಚಂಙಾದಿಯ ಬೇಜಾರತ್‍ಲ್ ಇಪ್ಪ. ಮಂಗಲಕಾರನ ಅಯಿಂಗಡ ಕೂಟ್‌ಂಜ ಕಾಕಿಯಂಡ್ ಪೋಪ ಸಮಯ ಬಪ್ಪ, ಅಕ್ಕ ಅಯಿಂಗ ಪಟ್ಟಣಿ ನಿಪ್ಪಾಂದ್ ಎಣ್ಣ್‌ಚಿ.
16ದಾರೂ ಪಳೆಯ ಬಟ್ಟೇಕ್, ಚುರ್ಂಗಿ ಪೋಕತೆ ಪುದಿಯ ತುಣಿನ ಅಡ್ಡಬೆಚ್ಚಿತ್ ಪೊಲ್ಲ್‌ಚಿಡುಲೆ. ಎನ್ನಂಗೆಣ್ಣ್‌ಚೇಂಗಿ ಪುದಿಯ ಬಟ್ಟೆ ಚುರುಂಗಿತ್ ಇಂಞು ಬಲ್ಯ ತೂತತ್‍ನ ಮಾಡ್‌ವ. 17ಅನ್ನನೆ ದಾರೂ ಪುದಿಯದಾಯಿತ್ ಮಾಡ್‍ನ ದ್ರಾಕ್ಷಿರಸತ್‍ನ ಪಳೆಯ ಚರ್ಮತ್‌ರ ಚೀಲಕ್ ಬೂಕ್‌ಲೆ, ಅನ್ನನೆ ಮಾಡ್‍ಚೇಂಗಿ ಚರ್ಮತ್‌ರ ಚೀಲ ಒಡಂದ್ ಪೋಪ. ಚೀಲ ಒಡಂದ್ ಪೋಯಿತ್, ದ್ರಾಕ್ಷಿರಸವು ಚೆಲ್ಲಿಪೋಪ. ಪುದಿಯ ದ್ರಾಕ್ಷಿರಸತ್‍ನ ಪುದಿಯ ಚರ್ಮತ್‌ರ ಚೀಲತ್‍ಲ್ ಬೂಕಂಡು, ಅಕ್ಕ ದಂಡು ಬದ್ರತೆಲ್ ಇಪ್ಪ.
ಚತ್ತ ಮೂಡಿಕ್ ಜೀವ ಕ್‍ಟ್ಟ್‌ವದ್ ಪಿಂಞ ಕಾಯಿಲಸ್ತ ಪೊಣ್ಣಾಳ್ ವಾಸಿಯಾಪದ್
(ಮಾರ್ಕ 5.21–43; ಲೂಕ 8.40–56)
18ಇನ್ನನೆ ಯೇಸು ತಕ್ಕ್ ಪರ್‌ದಂಡ್ ಇಪ್ಪಕಾಪಕ, ಒರ್ ಅದಿಕಾರಿ ಬಂದಿತ್ ಯೇಸುರ ಪಕ್ಕ ಮೊಣಕಾಲ್ ಇಟ್ಟಿತ್, ನಾಡ ಮೋವ ಇಕ್ಕಲೆ ಚತ್ತ್ ಪೋಚಿ. ಆಚೇಂಗಿ ನೀನ್ ಬಂದಿತ್ ನೀಡ ಕೈಯಿನ ಅವಡ ಮೇಲೆ ಬೆಚ್ಚತೇಂಗಿ ಅವ ಬದ್‌ಕ್‌ವಾಂದ್ ಎಣ್ಣ್‌ಚಿ. 19ಯೇಸು ಎದ್ದಿತ್, ಅಂವೊ ಪಿಂಞ ಅಂವೊಂಡ ಶಿಷ್ಯಂಗ ಅದಿಕಾರಿರ ಕೂಡೆ ಪೋಚಿ.
20ಪೋಯಂಡಿಪ್ಪಕಲೆ, ಪನ್ನೆರಂಡ್ ಕಾಲತ್ಂಜ ಚೋರೆ ಪೋಪ ರೋಗತ್‌ಂಜ ಕಷ್ಟಪಟ್ಟಂಡಿಂಜ ಒರ್ ಪೊಣ್ಣಾಳ್: 21ನಾನ್ ಇಂವೊಂಡ ಬಟ್ಟೇನ ಮುಟ್ಟ್‌ಚೇಂಗಿ ಮದಿ ನಾನ್ ವಾಸಿ ಆಪೀಂದ್ ಗೇನ ಮಾಡಿತ್, ಯೇಸುರ ಬಯ್ಯ ಬಂತ್ ಅಂವೊಂಡ ಬಟ್ಟೇರ ತುದಿನ ಮುಟ್ಟ್‌ಚಿ.
22ಯೇಸು ತಿರಿತ್ ಅವಳ ನೋಟಿತ್: ನಾಡ ಮೋಳೆ, ದೈರ್ಯ ಎಡ್‌ತ, ನೀಡ ನಂಬಿಕೆ ನಿನ್ನ ವಾಸಿ ಮಾಡ್‍ಚೀಂದ್ ಎಣ್ಣ್‌ಚಿ. ಆ ಕ್ಷಣತ್‍ಲ್ ಅವಡ ರೋಗ ವಾಸಿ ಆಚಿ. 23ಯೇಸು ಆ ಅದಿಕಾರಿಯಂಡ ಮನೆಕ್ ಬಪ್ಪಕ ಎಲ್ಲಾರು ಚಾವ್ ಪಾಟ್ ಪಾಡಿಯಂಡ್, ಸದ್ದ್ ಮಾಡಿಯಂಡುಳ್ಳದ್‍ನ ಕಂಡಿತ್: 24ನಿಂಗ ಎಲ್ಲಾರು ಪೋಯಿ, ಈ ಮೂಡಿ ಕುಂಞಿ ಚತ್ತಿತ್ ಇಲ್ಲೆ, ಅವ ಬರಿ ವರಿಯಂಡುಂಡ್‍ೕಂದ್ ಎಣ್ಣ್‌ಚಿ. ಅದ್ಂಗ್ ಎಲ್ಲಾರು ಅಂವೊನ ನೋಟಿತ್ ತೆಳ್‍ಚತ್. 25ಜನಳೆಲ್ಲ ಪೊರಮೆ ಅಯಿಚ ಪಿಂಞ ಯೇಸು ಒಳ್‍ಕ್ ಪೋಯಿತ್ ಆ ಕುಂಞಿರ ಕೈ ಪುಡ್‍ಚತ್. ಅಕ್ಕ ಅವ ಎದ್ದತ್. 26ಈ ಸುದ್ದಿ ಎಲ್ಲೆಲಿಯು ಪಬ್ಬ್‌ಚಿ.
ಯೇಸು ಕುರ್‌ಡನ ಪಿಂಞ ಮೂಗನ ವಾಸಿ ಮಾಡ್‍ನದ್
27ಯೇಸು ಆ ಜಾಗತ್ಂಜ ಪೋಯಂಡ್ ಇಪ್ಪಕ, ದಂಡ್ ಕುರ್‌ಡಂಗ ಯೇಸುರ ಬಯ್ಯಕ್ ಪೋಚಿ. ದಾವೀದಂಡ ಮೋಂವೊನೇ,#9.27 ದಾವೀದ ಎಣ್ಣ್‌ವಂವೊ ಇಸ್ರಾಯೇಲ್ ರಾಜ್ಯತ್‍ರ ಬಲ್ಯ ರಾಜನಾಯಿತ್ಂಜತ್. ಮೆಸ್ಸಿಯ ಇಂವೊಂಡ ವಂಶತ್‌ಲ್ ಪುಟ್ಟ್‌ವಾಂದ್ ಪ್ರವಾದನೆ ಮಾಡಿತ್ಂಜಗುಂಡ್, ಆ ಕುರ್‌ಡ ಯೇಸುವೇ ವಾಗ್ದಾನ ಮಾಡ್‍ನ ಮೆಸ್ಸಿಯಾಂದ್ ಸ್ವೀಕಾರ ಮಾಡ್‍ಚಿ. ನಂಗಕ್ ಕನಿಕರ ಕಾಟ್‍ೕಂದ್ ಅಯಿಂಗ ಕೂತ್ ಕೊಡ್‍ತತ್.
28ಯೇಸು ಒಳ್‍ಕ್ ಪೋನ ಪಿಂಞ ದಂಡ್ ಕುರ್‌ಡಂಗ ಯೇಸುರ ಪಕ್ಕ ಪೋಚಿ. ಅಕ್ಕ ಯೇಸು ಅಯಿಂಗಳ, ನಾಕ್ ನಿಂಗಳ ವಾಸಿ ಮಾಡ್‌ವಕ್ ಕಯ್ಯೂಂದ್ ನಿಂಗ ನಂಬುವಿರಾಂದ್ ಕ್‍ೕಟತ್.
ಅಕ್ಕು ಸ್ವಾಮೀಂದ್ ಅಯಿಂಗ ಎಣ್ಣ್‌ಚಿ.
29ಯೇಸು ಅಯಿಂಗಡ ಕಣ್ಣ್‌ನ ಮುಟ್ಟುವಂಜಿ, ನಿಂಗ ನನ್ನ ನಂಬ್‍ನನೆಕೆ ನಿಂಗಕ್ ಆಪಾಂದ್ ಎಣ್ಣ್‌ಚಿ. 30ಒಡನೆ ಅಯಿಂಗಕ್ ಕಣ್ಣ್ ಕಾಂಬಕಾಚಿ. ಪಿಂಞ ಯೇಸು ಅಯಿಂಗಕ್, ನಿಂಗ ದಾರ್‌ಕು ಎಣ್ಣ್‌ವಕ್ಕಾಗಾಂದ್ ಕಠಿಣವಾಯಿತ್ ಎಚ್ಚರ ಮಾಡ್‍ಚಿ. 31ಆಚೇಂಗಿ, ಅಯಿಂಗ ಪೋಯಿತ್ ಆ ಪ್ರಾಂತ್ಯತ್‍ಲ್ ಎಲ್ಲಾ ಜಾಗತ್‍ಲ್ ಇಂವೊಂಡ ಕೀರ್ತಿನ ಪಬ್ಬ್‌ಚಿ.
32ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಅಲ್ಲಿಂಜ ಪೊರಡ್‍ವಕ, ಚೆನ್ನ ಜನ, ಕೂಳಿ ಪುಡ್‌ಚಿತ್ ಬಾಯಿ ಬಕ್ಕತೆ ಉಳ್ಳ ಒರ್ ಮನುಷ್ಯನ ಯೇಸುರ ಪಕ್ಕ ಕಾಕಿಯಂಡ್ ಬಾತ್. 33ಅಂವೊಂಡ ಮೇಲ್‌ಲ್ ಇಂಜ ಕೂಳಿನ ಬುಡ್‍ತ್‍ನ ಪಿಂಞ ಮೂಗನಾಯಿತ್ಂಜ ಅಂವೊ ತಕ್ಕ್ ಪರ್ಂದತ್. ಜನ ಆಶ್ಚರ್ಯತ್‍ಲ್: ಇಸ್ರಾಯೇಲ್‌ಲ್ ಇನ್ನನೆ ಎಕ್ಕಾಲು ನಡ್ಂದ್‍ತ್‌ಲ್ಲೆಲ್ಲಾಂದ್ ಎಣ್ಣ್‌ಚಿ.
34ಆಚೇಂಗಿ ಫರಿಸಾಯಂಗ: ಇಂವೊ ಕೂಳಿಯಡ ಮುಕ್ಯಸ್ತ ಕೊಡ್‍ಪ ಶಕ್ತಿಯಿಂಜ ಕೂಳಿನ ಬುಡ್‌ತಿಯಂಡುಂಡ್‍ೕಂದ್ ಎಣ್ಣ್‌ಚಿ.
ದೇವಡ ಸೇವೇಕ್ ಜನ ಕಮ್ಮಿ ಉಂಡ್
35ಯೇಸು ಅಲ್ಲಿ ಉಳ್ಳ ಎಲ್ಲಾ ಪಟ್ಟಣಕ್ ಪಿಂಞ ನಾಡ್‍ಕೆಲ್ಲಾ ಪೋಯಿತ್, ಅಯಿಂಗಡ ಸಬಾಮಂದಿರತ್‍ಲ್ ಬೋದನೆ ಮಾಡಿಯಂಡ್, ದೇವಡ ರಾಜ್ಯತ್‍ರ ನಲ್ಲ ಸುದ್ದಿನ ಪ್ರಚಾರ ಮಾಡಿಯಂಡ್, ಜನಡ ಎಲ್ಲಾ ಕಾಯಿಲೆನ ಪಿಂಞ ರೋಗತ್‍ನ ವಾಸಿ ಮಾಡ್‍ಚಿ. 36ಬಲ್ಯ ಜನಡ ಗುಂಪ್‍ನ ಕಾಂಬಂಜಿ ಯೇಸುಕ್ ದುಂಬ ಕನಿಕರ ಆಚಿ. ಎನ್ನಂಗೆಣ್ಣ್‌ಚೇಂಗಿ ಅಯಿಂಗ ಕೊರಿ ಕಾಪಂವೊ ಇಲ್ಲತ ಕೊರಿರನೆಕೆ ಗೊಂದಲತ್‍ಲ್, ದಾರೂ ಗತಿ ಇಲ್ಲತಯಿಂಡನೆಕೆ ಇಂಜತ್. 37ಅಕ್ಕ ಯೇಸು ಅಂವೊಂಡ ಶಿಷ್ಯಂಗಳ ಕಾಕ್‍ವಂಜಿ, ಬೇಲ್‌ಲ್ ಬೊಳೆ ದುಂಬ ಉಂಡ್, ಆಚೇಂಗಿ ಕೊಯಿಪಣಿಕ್ ಆಳ್‍ಕಾರ ದುಂಬ ಕಮ್ಮಿ ಉಂಡ್‍ೕಂದ್ ಎಣ್ಣ್‌ಚಿ. 38ಆನಗುಂಡ್, ಬೊಳೆಕ್ ಕಾರಣವಾಯಿತುಳ್ಳ ಎಜಮಾನಂಡ ಪಕ್ಕ, ಆಳ್‍ವಳ ಅಯಿಪಕ್ ಅಂವೊನ ಬೋಡ್‌ವಿರಾಂದ್ ಎಣ್ಣ್‌ಚಿ.
Àwon tá yàn lọ́wọ́lọ́wọ́ báyìí:
ಮತ್ತಾಯ 9: ಕೊಡವ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017, New Life Literature (NLL)
