ಅಪೊಸ್ತಲ 19
19
ಪೌಲ ಎಫೆಸ ಪಟ್ಟಣತ್‍ಲ್ ಮಾಡ್‍ನ ದೇವಡ ಸೇವೆ
1ಅಪೊಲ್ಲೋಸ ಕೊರಿಂಥ ಪಟ್ಟಣತ್‍ಲ್ ಇಪ್ಪಕ, ಪೌಲ ಅಲ್ಲಿಂಜ ಮುಕ್ಯ ಬಟ್ಟೇಲ್ ಪ್ರಯಾಣ ಮಾಡತೆ, ಊರ್‌ರ ಬಟ್ಟೇಲ್ ಪ್ರಯಾಣ ಮಾಡಿತ್ ಎಫೆಸ ಪಟ್ಟಣಕ್ ಎತ್ತ್‌ಚಿ. ಅಲ್ಲಿ, ಯೇಸುನ ನಂಬ್‍ನ ಚೆನ್ನ ಜನಳ ಕಂಡತ್.
2ಪೌಲ ಅಯಿಂಗಳ ನೋಟಿತ್: ನಿಂಗ ಯೇಸುನ ನಂಬ್‌ವಕ ಪವಿತ್ರಾತ್ಮನ ಪಡ್ಂದಿರಾಂದ್ ಕ್‍ೕಟತ್.
ಅದ್ಂಗ್ ಅಯಿಂಗ: ಇಲ್ಲೆ, ನಂಗ ಪಡ್ಂದಿತ್‌ಲ್ಲೆ. ಅನ್ನನೆ ಪವಿತ್ರಾತ್ಮ ಉಂಡ್‍ೕಂದ್ ಸಹ ನಂಗ ಕ್‍ೕಟಿತ್‌ಲ್ಲೇಂದ್ ಎಣ್ಣ್‌ಚಿ.
3ಅಕ್ಕ ಪೌಲ: ನಿಂಗ ಏದ್ ದೀಕ್ಷಾಸ್ನಾನ ಪಡ್ಂದಿರಾಂದ್ ಕ್‍ೕಟತ್.
ಅದ್ಂಗ್ ಅಯಿಂಗ: ಯೋಹಾನಂಡ ಬೋದನೆನ ನಂಬಿತ್ ದೀಕ್ಷಾಸ್ನಾನ ಎಡ್‍ತಂಡತ್‍ೕಂದ್ ಎಣ್ಣ್‌ಚಿ.
4ಅದ್ಂಗ್ ಪೌಲ: ಪಶ್ಚಾತಾಪ ಪಟ್ಟಿತ್, ಬಪ್ಪಕುಳ್ಳ ಯೇಸುರ ಮೇಲೆ ಜನ ನಂಬಿಕೆ ಇಡ್‌ವಕಾಯಿತ್ ಮಾತ್ರ ಯೋಹಾನ ದೀಕ್ಷಾಸ್ನಾನ ಮಾಡ್‍ಚಲ್ಲಾಂದ್ ಎಣ್ಣ್‌ಚಿ. 5ಅಯಿಂಗ ಈ ತಕ್ಕ್‌ನ ಕ್‍ೕಟಿತ್ ಪಿಂಞ ಒಡೆಯನಾನ ಯೇಸುರ ಪೆದತ್‍ಲ್ ದೀಕ್ಷಾಸ್ನಾನ ಎಡ್‍ತಂಡತ್. 6ಪಿಂಞ, ಪೌಲ ಅಯಿಂಗಡ ಮೇಲೆ ಕೈ ಬೆಪ್ಪಕ ಪವಿತ್ರಾತ್ಮ ಅಯಿಂಗಡ ಮೇಲೆ ಬಾತ್; ಅಕ್ಕ, ಅಯಿಂಗ ನಾನಾತರ ಬಾಷೆಲ್ ತಕ್ಕ್ ಪರ್ಂದಿತ್ ಪ್ರವಾದನೆ ಎಣ್ಣ್‌ಚಿ. 7ಅಯಿಂಗ ಎಲ್ಲಾರು ಸುಮಾರ್ ಪನ್ನೆರಂಡ್ ಆಣಾಳುವ ಇಂಜತ್.
8ಪಿಂಞ, ಪೌಲ ಎಫೆಸ ಪಟ್ಟಣತ್‍ಲ್ ಇಂಜ ಸಬಾಮಂದಿರಕ್ ಪೋಯಿತ್ ಮೂಂದ್ ತಿಂಗ ದೇವಡ ರಾಜ್ಯತ್‍ರ ವಿಷಯತ್‍ನ ದೈರ್ಯತ್‍ಲ್, ನಂಬುವನೆಕೆ ಚರ್ಚೆ ಮಾಡಿಯಂಡ್ ಬೋದನೆ ಮಾಡಿಯಂಡೇ ಇಂಜತ್. 9ಆಚೇಂಗಿ, ಚೆನ್ನ ಜನ ತಂಗಡ ಮನಸ್ಸ್‌ನ ಕಠಿಣ ಮಾಡಿಯಂಡ್ ನಂಬುಲೇಂದ್ ಎಣ್ಣ್‌ಚಿ. ಅಯಿಂಗ, ಎಲ್ಲಾಡ ಮಿಂಞತ್ ಈ ಬಟ್ಟೇರ ಬೋದನೆಕ್ ವಿರೋದವಾಯಿತ್ ಕೆಟ್ಟ ತಕ್ಕ್ ಪರ್ಂದಂಡ್ ಇಂಜತ್. ಅಕ್ಕ ಪೌಲ ಸಬಾಮಂದಿರತ್ಂಜ ಪೋಯಿತ್, ಯೇಸುನ ನಂಬ್‍ನಯಿಂಗಳ ಅಂವೊಂಡ ಕೂಡೆ ಕಾಕಿಯಂಡ್ ಪೋಚಿ. ಬಯ್ಯ ತುರನ್ನ ಎಣ್ಣುವ ಒಬ್ಬಂಡ ಪಾಠಶಾಲೆಲ್ ಪ್ರತಿ ದಿನ ಚರ್ಚೆ ಮಾಡಿಯಂಡ್ ಬೋದನೆ ಮಾಡ್‍ಚಿ. 10ಇನ್ನನೆ ದಂಡ್ ಕಾಲಕ್ ನಡ್ಂದಗುಂಡ್ ಆಸ್ಯ ಸೀಮೆಲ್ ವಾಸ ಮಾಡಿಯಂಡಿಂಜ ಯೆಹೂದ್ಯಂಗ ಪಿಂಞ ಯೆಹೂದ್ಯಂಗ ಅಲ್ಲತ ಜನ ಎಲ್ಲಾರು ಒಡೆಯಂಡ ಬೋದನೆನ ಕ್‍ೕಟತ್.
11ದೇವ ಪೌಲಂಡ ಮೂಲಕ ವಿಶೇಷವಾನ ಅದ್ಬುತ ಕಾರ್ಯತ್‍ನ ಮಾಡ್‍ಚಿ. 12ಅಂವೊಂಡ ತಡೀನ ಮುಟ್ಟ್‌ನ ಕೈಚೌಕ ಪಿಂಞ ಪೊರಮೆ ಇಡ್‌ವ ಬಟ್ಟೇನ ಎಡ್‍ತಂಡ್, ಕಾಯಿಲೆ ಉಳ್ಳಯಿಂಗಡ ಮೇಲೆ ಬೆಪ್ಪಕ, ಅಯಿಂಗಡ ಕಾಯಿಲೆ ವಾಸಿ ಆಚಿ, ಕೂಳಿ ಪುಡ್‍ಚಯಿಂಗಡಯಿಂಜ ಕೂಳಿಯೆಲ್ಲ ಓಡಿ ಪೋಚಿ. 13ಊರ್ ಊರ್‌ಕ್ ಪೋಯಿತ್ ಕೂಳಿಯಳ ಬುಡ್‌ತ್‌ವ ಯೆಹೂದ್ಯಂಗಳಾನ ಚೆನ್ನ ಜನ ಇದ್‍ನ ನೋಟಿತ್, ಒಡೆಯನಾನ ಯೇಸುರ ಪೆದತ್‍ನ ಅಯಿಂಗಳು ಎಣ್ಣ್‌ವಕ್‌ ದೈರ್ಯ ಎಡ್‍ತಂಡ್: ಅಯಿಂಗ ಕೂಳಿ ಪುಡ್‍ಚಯಿಂಗಡ ಪಕ್ಕ ಪೋಯಿತ್: ಪೌಲ ಬೋದನೆ ಮಾಡ್‌ವ ಯೇಸುರ ಪೆದತ್‍ಲ್ ನಿಂಗಕ್ ಆಜ್ಞೆ ಮಾಡ್‌ವೀಂದ್ ಎಣ್ಣ್‌ಚಿ. 14ಮಹಾ ಯಾಜಕನಾನ ಸ್ಕೇವ ಎಣ್ಣ್‌ವ ಒರ್ ಯೆಹೂದ್ಯಂಡ ಏಳ್ ಕ್‍ಣ್ಣ ಮಕ್ಕ ಇನ್ನನೆ ಮಾಡ್‍ಚಿ. 15ಒರ್ ಕುರಿ, ಅಯಿಂಗ ಅನ್ನನೆ ಯೇಸುರ ಪೆದತ್‍ಲ್ ಕೂಳಿಕ್ ಆಜ್ಞೆ ಕೊಡ್‌ಪಕ, ಆ ಕೂಳಿ ಅಯಿಂಗಳ ನೋಟಿತ್: ನಾಕ್ ಯೇಸುನ ಗೊತ್ತುಂಡ್, ಪೌಲನು ಗೊತ್ತುಂಡ್ ಆಚೇಂಗಿ ನಿಂಗ ದಾರ್‍ೕಂದ್ ಕ್‍ೕಟತ್. 16ಆ ಕೂಳಿ ಪುಡ್‌ಚ ಮನುಷ್ಯ ಅಯಿಂಗಡ ಎಲ್ಲಾಡ ಮೇಲೆ ಪಾರಿತ್, ಅಯಿಂಗಳ ಅಡಿಕ್ ಇಟ್ಟತ್. ಅಂವೊ ಅಯಿಂಗಳ ಪೊಜ್ಜಿತ್, ಅಯಿಂಗಡ ಬಟ್ಟೇನೆಲ್ಲ ಕೀತ್‌ವಕ, ಅಯಿಂಗ ಬೆತ್ತಲೆಯಾಯಿತ್ ಗಾಯಪಟ್ಟಿತ್ ಓಡಿ ಪೋಚಿ. 17ಆ ಸುದ್ದಿ ಎಫೆಸತ್‍ಲ್ ವಾಸ ಮಾಡಿಯಂಡಿಂಜ ಯೆಹೂದ್ಯಂಗಕೂ ಯೆಹೂದ್ಯ ಅಲ್ಲತಯಿಂಗಕೂ ಗೊತ್ತಾಯಿತ್ ಅಯಿಂಗಕೆಲ್ಲ ಪೋಡಿ ಆಚಿ. ಒಡೆಯನಾನ ಯೇಸುರ ಪೆದ ಗನಪಟ್ಟತ್. 18ಇಕ್ಕ ಯೇಸುನ ನಂಬ್‍ನ ದುಂಬ ಜನ, ಅಯಿಂಗ ಮಾಡ್‍ನ ಕೆಟ್ಟ ಕೆಲಸತ್‍ನ ಎಲ್ಲಾಡ ಮಿಂಞತ್ ಒತ್ತಂಡ್ ಅರಿಕೆ ಮಾಡ್‍ಚಿ. 19ಇದ್‍ಲ್ಲತೆ ಮಾಟಮಂತ್ರ ಮಾಡಿಯಂಡಿಂಜ ದುಂಬ ಜನ ತಂಗಡ ಪುಸ್ತಕತ್‍ನ ಕೊಂಡ್‌ಬಂತ್, ಗುಡ್ಡೆ ಕೂಟಿತ್ ಎಲ್ಲಾಡ ಮಿಂಞತ್ ತಿತ್ತ್‌ಕ್ ಇಟ್ಟತ್; ಅದ್ಂಡ ಕ್ರಯತ್‍ನ ಲೆಕ್ಕಮಾಡ್‍ವಕ ಸುಮಾರ್ ಐಂಬದಾಯಿರ ಬೊಳ್ಳಿ ನ್ಯಾಣ ಆಯಿತಿಕ್ಕೂಂದ್ ಗೊತ್ತಾಚಿ. 20ಇನ್ನನೆ ಒಡೆಯನಾನ ಯೇಸುರ ಸುದ್ದಿ ಎಲ್ಲೆಲ್ಲಿಕೋ ಪಬ್ಬಿತ್, ಆ ಸುದ್ದಿ ದುಂಬ ಜನತ್‍ನ ದೇವಡ ಪಕ್ಕ ಕೊಂಡ್ ಬಪ್ಪನೆಕೆ ಶಕ್ತಿ ಉಳ್ಳದಾಯಿತ್ಂಜತ್.
ಎಫೆಸ ಪಟ್ಟಣತ್‍ಲ್ ಆನ ಜಗಳ
21ಇನ್ನನೆಲ್ಲ ಆನ ಪಿಂಞ ಪೌಲ, ತಾನ್ ಮಕೆದೋನ್ಯಕ್ ಪೋಪಕ್ ಮಿಂಞ ಅಖಾಯ ಪಟ್ಟಣಕ್ ಪೋಯಿತ್, ಬಯ್ಯ ಯೆರೂಸಲೇಮ್‌ಕ್ ಪೋಪೀಂದ್ ಅಂವೊಂಡ ಆತ್ಮತ್‍ಲ್ ಗೇನ ಮಾಡಿತ್: ನಾನ್ ಅಲ್ಲಿಕ್ ಪೋನ ಪಿಂಞ ರೋಮ್ ಪಟ್ಟಣಕ್ ಪೋಂಡೂಂದ್ ಎಣ್ಣ್‌ಚಿ. 22ಅಂವೊ ತಾಂಡಕೂಡೆ ಸೇವೆ ಮಾಡಿಯಂಡಿಂಜ ತಿಮೊಥೆಯ ಪಿಂಞ ಎರಸ್ತನ ಮಕೆದೋನ್ಯಕ್ ಅಯಿಚತ್; ಆಚೇಂಗಿ ಅಂವೊ ಆಸ್ಯ ಸೀಮೆಲ್ ಇಂಞು ಚೆನ್ನ ಸಮಯ ಒಳಿಂಜತ್.
23ಆ ಕಾಲತ್‍ಲ್ ಈ ಮಾರ್ಗತ್‍ರ ವಿಷಯತ್ ದುಂಬ ಗಲಿಬಿಲಿ ಆಚಿ. 24ಎನ್ನನೆ ಎಣ್ಣ್‌ಚೇಂಗಿ ದೇಮೇತ್ರಿಯ ಎಣ್ಣ್‌ವ ಒರ್ ತಟ್ಟ, ಬೊಳ್ಳಿಯಿಂಜ ಅರ್ತೆಮಿ ಎಣ್ಣುವ ಗ್ರೀಕ್ ದೇವತೆರ ದೇವಸ್ತಾನತ್‍ರನೆಕೆ ಚೆರಿಯ ಚೆರಿಯ ದೇವಸ್ತಾನತ್‍ನ ಮಾಡಿತ್ ಮಾರ್‌ವಕಿಂಜತ್. ಇದ್‍ನಗುಂಡ್ ಅಲ್ಲಿಯತ್‍ರ ತಟ್ಟಂಗಕ್ ದುಂಬ ಲಾಬ ಕ್‍ಟ್ಟಿಯಂಡಿಂಜತ್. 25ದೇಮೇತ್ರಿಯ ಈ ಕೆಲಸ ಮಾಡ್‌ವಯಿಂಗಳೆಲ್ಲ ಒಕ್ಕಚೆ ಕಾಕಿತ್: ಜನಳೇ, ಈ ವ್ಯಪಾರತ್‍ರಗುಂಡ್ ನಂಗಕ್ ಐಶ್ವರ್ಯ ಕ್‍ಟ್ಟಿಯಂಡುಂಡ್‍ೕಂದ್ ನಿಂಗಕ್ ಗೊತ್ತುಂಡ್. 26ಆಚೇಂಗಿ, ಕೈಯಿಂಜ ಮಾಡ್‍ನ ಮೂರ್ತಿಯೆಲ್ಲಾ ದೇವ ಅಲ್ಲಾಂದ್ ಆ ಪೌಲ ಎಣ್ಣಿತ್ ಇಲ್ಲಿ ಎಫೆಸತ್‍ಲ್ ಮಾತ್ರ ಅಲ್ಲತೆ ಆಸ್ಯ ಸೀಮೆರ ಎಲ್ಲಾ ಜಾಗತ್‍ಲು ದುಂಬ ಜನಳ ಅಂವೊಂಡ ಕಡೇಕ್ ಕೂಟಿಯಂಡತ್. ಇದ್‍ನೆಲ್ಲ ನಿಂಗ ನೋಟಿತು ಕ್‍ೕಟಿತು ಉಳ್ಳಿರ. 27ಇದ್‍ನಗುಂಡ್, ನಂಗಡ ವ್ಯಾಪಾರತ್‍ರ ಪೆದ ಒಂದು ಇಲ್ಲತನೆಕೆ ಆಯಂಡುಂಡ್. ಇದ್‍ಲ್ಲತೆ, ಮಹಾ ದೇವಿ ಅರ್ತೆಮಿರ ದೇವಸ್ತಾನಕ್ ಮರ್ಯಾದೆ ಇಲ್ಲತೆ ಪೋಪ, ಆಸ್ಯ ಸೀಮೆ ಪಿಂಞ ಇಡೀ ಲೋಕ ಪೂಜೆ ಮಾಡ್‌ವ ಈ ದೇವಿರ ವೈಬವ ಇಲ್ಲತನೆಕೆ ಆಪಾಂದ್ ಎಣ್ಣ್‌ಚಿ.
28ಜನ ಈ ತಕ್ಕ್‌ನ ಕ್‍ೕಟಿತ್, ಅಯಿಂಗೆಲ್ಲ ಆವೇಶ ಪಟ್ಟಿತ್ ಚೆಡಿ ಬಂದಿತ್, ಎಫೆಸ ಪಟ್ಟಣತ್‍ರ ಅರ್ತೆಮಿ ದೇವಿಯೇ ಮಾಹಾದೇವೀಂದ್ ಕೂತ್ ಕೊಡ್‍ಪಕ್ ಸುರು ಮಾಡ್‍ಚಿ. 29ಅಚ್ಚಕ್ ಬೆರಿಯ ಇಡೀ ಪಟ್ಟಣತ್‍ಲ್ ಗಲಿಬಿಲಿ ಆಚಿ. ಪ್ರಯಾಣತ್‍ಲ್ ಪೌಲಂಡ ಕೂಡೆ ಪ್ರಯಾಣ ಮಾಡಿಯಂಜಯಿಂಗ ಮಕೆದೋನ್ಯತ್‍ರ ಗಾಯನ ಪಿಂಞ ಅರಿಸ್ತಾರ್ಕ ಎಣ್ಣುವಯಿಂಗಳ ಬಲ್‍ಚಂಡ್ ಒರೇ ಮನಸ್ಸ್‌ಲ್ ಜನ ಕೂಡಿತ್ ನಾಟಕ ಶಾಲೆರ ಒಳ್‍ಕ್ ನುಗ್ಗಿತ್ ಪೋಚಿ. 30ಪೌಲ ಜನಡ ಗುಂಪ್‍ರ ಒಳ್‍ಕ್ ಪೋಂಡೂಂದ್ ಎಣ್ಣ್‌ವಕ, ಯೇಸುನ ನಂಬ್‍ನಯಿಂಗ ಅಂವೊನ ಪೋಪಕ್ ಬುಟ್ಟಿತ್‌ಲ್ಲೆ. 31ಇದ್‍ಲ್ಲತೆ ಪೌಲಂಡ ಕೂಟ್‍ಕಾರಳಾನ, ಆಸ್ಯ ಸೀಮೆರ ಚೆನ್ನ ಅದಿಕಾರಿಯಂಗ ಅಂವೊಂಡ ಪಕ್ಕ ಜನಳ ಅಯಿಚಿತ್: ನೀನ್ ಜನ ಕೂಡ್‍ನ ನಾಟಕ ಶಾಲೆರ ಒಳ್‍ಕ್ ಪೋಪದ್ ಬೋಂಡಾಂದ್ ಬೋಡಿಯಂಡತ್.
32ಅಲ್ಲಿ ಬಲ್ಯ ಕಲಹ ಆಚಿ. ಚೆನ್ನ ಜನ ಇನ್ನನೇಂದ್ ಇಂಞು ಚೆನ್ನ ಜನ ಅನ್ನನೇಂದ್ ಕೂತ್ ಕೊಡ್‍ತಂಡಿಂಜತ್. ದುಂಬ ಜನಕ್ ಅಯಿಂಗ ಕೂಡಿ ಬಂದ ಕಾರಣ ಗೊತ್ತಿಲ್ಲತೆ ಇಂಜತ್. 33ಚೆನ್ನ ಯೆಹೂದ್ಯಂಗ ಅಲೆಕ್ಸಾಂದ್ರ ಎಣ್ಣುವ ಒಬ್ಬನ ವೇದಿಕೆಕ್ ತಳ್ಳ್‌ಚಿ. ಅಕ್ಕ ಅಲೆಕ್ಸಾಂದ್ರ ಜನಳ ಮುಂಡತೆ ಇಪ್ಪಕ್ ಕೈ ಸನ್ನೆ ಮಾಡಿತ್, ಜನಕ್ ಉತ್ತರ ಕೊಡ್‍ಪಕ್ ಸುರು ಮಾಡ್‍ಚಿ. 34ಆಚೇಂಗಿ ಅಂವೊ ಒರ್ ಯೆಹೂದ್ಯಾಂದ್ ಗೊತ್ತಾನ ಪಿಂಞ, ಎಲ್ಲಾರು ಒರೇ ಸದ್ದ್‌ಲ್ ಎಫೆಸತ್‍ರ ಅರ್ತೆಮಿ ದೇವಿಯೇ ಮಾಹಾದೇವೀಂದ್, ಸುಮಾರ್ ದಂಡ್ ಗಂಟೆಯಚ್ಚಕ್ ಕೂತ್ ಕೊಡ್‍ತಂಡಿಂಜತ್.
35ಕಡೇಕ್, ಪಟ್ಟಣತ್‍ರ ಗುಮಾಸ್ತ ಜನಡ ಗುಂಪ್‍ನ ಸಮಾದಾನ ಮಾಡಿತ್; ಎಫೆಸ ಪಟ್ಟಣತ್‍ಲ್ ಉಳ್ಳ ಜನಳೇ, ಅರ್ತೆಮಿ ಮಹಾದೇವಿರ ದೇವಸ್ತಾನಕ್ ಪಿಂಞ ಬಾನತ್ಂಜ ಬುದ್ದ ಅವಡ ಮೂರ್ತಿನ ಕಾಪಾಡ್‌ವ ಜಾಗವಾಯಿತ್ ಎಫೆಸ ಪಟ್ಟಣ ಇರಂಡೂಂದ್ ಅರಿಯತ ಮನುಷ್ಯ ಉಂಡಾ? 36ಆನಗುಂಡ್, ಈ ಸಂಗತಿ ಅಲ್ಲಾಂದ್ ಎಣ್ಣುವಕ್ ದಾರ್‌ಕು ಆಕತಗುಂಡ್ ನಿಂಗ ಶಾಂತಿಯಾಯಿತಿರಂಡು, ಮುಂಡತೆ ಬೆರಿಯ ದುಡ್‍ಕಿತ್ ಒಂದು ಮಾಡ್‌ವಕ್ಕಾಗ. 37ನಿಂಗ ಕಾಕಿಯಂಡ್ ಬಂದ ಈ ಮನುಷ್ಯಂಗ ದೇವಸ್ತಾನತ್‍ರ ಕಳ್ಳಂಗಳು ಅಲ್ಲ, ನಂಗಡ ದೇವಿನ ದೂಷಣೆ ಮಾಡ್‌ವಯಿಂಗಳು ಅಲ್ಲ.
38ಇನ್ನನೆ ಇಪ್ಪಕ, ದೇಮೇತ್ರಿಯಂಗು ಅಂವೊಂಡ ಪಕ್ಷತ್‍ರ ಪಣಿಕಾರಂಗಕು, ದಾಡ ಮೇಲಾಚೇಗಿಯೂ ವ್ಯವಹಾರ ಇಂಜತೇಂಗಿ, ನ್ಯಾಯಾಸ್ತಾನ ಉಂಡ್, ಅದಿಪತಿಯ ಉಂಡ್; ಅಲ್ಲಿ ಒಬ್ಬಂಡ ಮೇಲೋಬ್ಬನ ಕುತ್ತ ಪರಿಯಡ್. 39ನಿಂಗಕ್ ಇಂಞು ದುಂಬ ವಿಚಾರಣೆ ಬೋಂಡ್‌ಚೇಂಗಿ ಅದ್‍ನ ನ್ಯಾಯವಾಯಿತ್ ಕೂಡ್‍ನ ಸಬೇಲ್ ತೀರ್ಮಾನ ಮಾಡಡ್. 40ಇಂದ್ ಉಂಟಾನ ಕಲಹತ್‍ರ ವಿಷಯಕ್ ನ್ಯಾಯವಾನ ಕಾರಣವಿಲ್ಲತಗುಂಡ್, ನ್ಯಾಯ ವಿಚಾರಣೆ ಬಪ್ಪಕ, ನಂಗಡ ಮೇಲೆ ಬಪ್ಪಕುಳ್ಳ ಕುತ್ತಕ್ ಉತ್ತರ ಕೊಡ್‍ಪಕ್ ಆಪುಲೇಂದ್ ಎಣ್ಣ್‌ಚಿ. 41ಇನ್ನನೆ ಅಂವೊ ಎಣ್ಣಿತಾನ ಪಿಂಞ ಅಯಿಂಗಳ ಪೋಪಕ್ ಬುಟ್ಟತ್.
Àwon tá yàn lọ́wọ́lọ́wọ́ báyìí:
ಅಪೊಸ್ತಲ 19: ಕೊಡವ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017, New Life Literature (NLL)