ಅಪೊಸ್ತಲ 16
16
ಪೌಲ ಪಿಂಞ ಸೀಲಂಡ ಕೂಟ್‍ಕ್ ತಿಮೊಥೆಯ ಕೂಡ್‍ನದ್
1ಅಲ್ಲಿಂಜ ಪೌಲ ದೆರ್ಬೆ ಪಿಂಞ ಲುಸ್ತ್ರ ಎಣ್ಣ್‌ವ ಜಾಗಕ್ ಬಾತ್. ಅಲ್ಲಿ ತಿಮೊಥೆಯ ಎಣ್ಣುವ ಯೇಸುನ ನಂಬ್‍ನ ಒಬ್ಬ ಇಂಜತ್; ಅಂವೊಂಡ ಅವ್ವ ಕ್ರಿಸ್ತಂಡ ಮೇಲೆ ನಂಬಿಕೆ ಉಳ್ಳ ಒರ್ ಯೆಹೂದ್ಯ ಪೊಣ್ಣಾಳಾಯಿತ್ಂಜತ್, ಆಚೇಂಗಿ ಅಂವೊಂಡ ಅಪ್ಪ ಗ್ರೀಕ್ ಜನಕ್ ಕೂಡ್‍ನಂವೊನಾಯಿತ್ಂಜತ್. 2ಲುಸ್ತ್ರ ಪಿಂಞ ಇಕೋನ್ಯ ಪಟ್ಟಣತ್‍ರ ಯೇಸುನ ನಂಬ್‍ನ ಅಣ್ಣತಮ್ಮಣಂಗ ತಿಮೊಥೆಯಂಗ್ ನಲ್ಲ ಸಾಕ್ಷಿ ಕೊಡ್‌ತಿತ್ಂಜತ್. 3ತಿಮೊಥೆಯನ ತಾಂಡಕೂಡೆ ಕಾಕಿಯಂಡ್ ಪೋಪಕ್ ಪೌಲ ಕುಶೀಲ್ ಇಂಜತ್. ಆಚೇಂಗಿ, ಅಂವೊಂಡ ಅಪ್ಪ ಗ್ರೀಕ್ ಜನಕ್ ಕೂಡ್‍ನಂವೋಂದ್ ಅಲ್ಲಿಯತ್‍ರ ಯೆಹೂದ್ಯ ಅಲ್ಲತಯಿಂಗಕ್ ಗೊತ್ತ್ಂಜಗುಂಡ್, ಅಯಿಂಗಕಾಯಿತ್ ತಿಮೊಥೆಯಂಗ್ ಅಂವೊ ಸುನ್ನತಿ ಮಾಡ್‍ಚಿ. 4ಅಲ್ಲಿಂಜ ಅಯಿಂಗ ಊರೂರ್‌ಕ್ ಪೋಯಂಡ್ ಇಪ್ಪಕ, ಅಲ್ಲಿಯತ್‍ರ ದೇವಡ ಮಕ್ಕಕೆಲ್ಲ, ಯೆರೂಸಲೇಮ್‍ಲ್ ಉಳ್ಳ ಅಪೊಸ್ತಲಂಗ ಪಿಂಞ ಪೆರಿಯಯಿಂಗ ತೀರ್ಮಾನ ಮಾಡ್‍ನ ಆಜ್ಞೆಕ್ ಒಳಪಟ್ಟಿತಿರಂಡೂಂದ್ ಅಯಿಂಗಕ್ ಬುದ್ದಿ ಎಣ್ಣಿ ಕೊಡ್‌ತಂಡ್ ಪೋಚಿ. 5ಆನಗುಂಡ್, ಅಲ್ಲಿಯತ್‍ರ ಸಬೇಯೆಲ್ಲ ಕ್ರಿಸ್ತಂಡ ನಂಬಿಕೇಲ್ ದೃಡವಾಯಿತ್ ಜನಡ ಸಂಖ್ಯೆ ದಿನದಿನಕ್ ಬಲ್ಯದಾಯಂಡ್ ಬಾತ್.
ಮಕೆದೋನ್ಯ ದರ್ಶನ
6ಆಸ್ಯ ಸೀಮೆಲ್ ದೇವಡ ವಾಕ್ಯತ್‍ನ ಎಣ್ಣ್‌ವಕ್ಕಾಗಾಂದ್ ಪವಿತ್ರಾತ್ಮ ಅಯಿಂಗಳ ತಡೆ ಮಾಡ್‍ನಗುಂಡ್, ಅಯಿಂಗ ಫ್ರುಗ್ಯ ಪಿಂಞ ಗಲಾತ್ಯ ಪ್ರಾಂತ್ಯತ್‍ಲ್ ಪ್ರಯಾಣ ಮಾಡಿಯಂಡಿಂಜತ್. 7ಅಯಿಂಗ ಮೂಸ್ಯ ಸೀಮೆರ ಪಕ್ಕ ಬಂದಿತ್ ಅಲ್ಲಿಂಜ ಬಿಥೂನ್ಯ ಎಣ್ಣುವ ಪಟ್ಟಣಕ್ ಪೋಪಕ್ ಪ್ರಯತ್ನಪಟ್ಟತ್. ಅಲ್ಲಿಯು ಸಹ ಯೇಸುರ ಆತ್ಮ ಅಯಿಂಗಳ ಪೋಪಕ್ ಬುಟ್ಟಿತ್‌ಲ್ಲೆ. 8ಆನಗುಂಡ್ ಅಯಿಂಗ ಮೂಸ್ಯತ್‍ನ ದಾಟಿತ್ ತ್ರೋವಕ್ ಬಾತ್. 9ಅಲ್ಲಿ ಅಂದ್ ಬಯಿಟ್, ಪೌಲ ಒರ್ ದರ್ಶನ ಕಂಡತ್. ಅದ್ ಎಂತ ಎಣ್ಣ್‌ಚೇಂಗಿ, ಮಕೆದೋನ್ಯ ದೇಶತ್‍ರ ಒರ್ ಮನುಷ್ಯ ನಿಂದಂಡ್: ನೀನ್ ಸಮುದ್ರತ್‍ನ ದಾಟಿತ್ ಮಕೆದೋನ್ಯಕ್ ಬಂದಿತ್ ನಂಗಕ್ ಸಹಾಯ ಮಾಡ್‍ೕಂದ್ ಅಂವೊನ ಕ್‍ೕಟಂಡತ್. 10ಅಂವೊಂಗ್ ಆ ದರ್ಶನ ಕ್‍ಟ್ಟ್‌ನ ಪಿಂಞ, ದೇವ ಆ ಸೀಮೆಲ್ ಉಳ್ಳಯಿಂಗಕ್ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವಕ್ ನಂಗಳ ಕಾಕ್‍ಚೀಂದ್ ನಂಗಕ್ ಕಂಡಿತವಾಯಿತ್ ಗೊತ್ತಾನಗುಂಡ್, ನಂಗ ಮಕೆದೋನ್ಯಕ್ ಪೋಪಕ್ ಪ್ರಯತ್ನಪಟ್ಟತ್.
ಫಿಲಿಪ್ಪಿ ಪಟ್ಟಣತ್‍ಲ್ ದೇವಡ ಸೇವೆ
11ನಂಗ ತ್ರೋವತ್ಂಜ ಸಮುದ್ರತ್‍ರ ಮಾರ್ಗವಾಯಿತ್ ಪ್ರಯಾಣ ಮಾಡಿತ್ ನೇರೆ ಸಮೊಥ್ರಾ ದ್ವೀಪಕ್ ಬಂತ್ ಪಿತ್ಯಾಂದ್ ನೆಯಾಪೊಲಿಕ್ ಕೂಡಿತ್ ಅಲ್ಲಿಂಜ ಫಿಲಿಪ್ಪಿ ಪಟ್ಟಣಕ್ ಎತ್ತ್‌ಚಿ. 12ಫಿಲಿಪ್ಪಿ ಎಣ್ಣುವ ಪಟ್ಟಣ ಮಕೆದೋನ್ಯತ್‍ರ ಮುಕ್ಯಪಟ್ಟ ಪಟ್ಟಣವಾಯಿತ್ಂಜತ್, ರೋಮ್ ರಾಜ್ಯತ್‍ರ ಜನ ಅಲ್ಲಿ ಬಂದಿತ್ ವಾಸ ಮಾಡಿಯಂಡಿಂಜತ್. ಈ ಪಟ್ಟಣತ್‍ಲ್ ನಂಗ ಚೆನ್ನ ದಿವಸ ಇಂಜತ್. 13ಸಬ್ಬತ್ ದಿವಸತ್‍ಲ್, ಪಟ್ಟಣತ್‍ರ ಪೊರಮೆ ಪೋಯಿತ್, ಪೊಳೆರ ಕರೆಲ್, ಜನ ಎಕ್ಕಾಲು ಅಲ್ಲಿ ಪ್ರಾರ್ಥನೆ ಮಾಡ್‌ವಾಂದ್ ಗೇನ ಮಾಡಿತ್ ನಂಗ ಅಲ್ಲಿ ಅಳ್‌ತತ್. ಅಲ್ಲಿ ಕೂಡಿ ಬಂದಿತ್ಂಜ ಪೊಣ್ಣಾಳುವಕ್ ನಂಗ ಉಪದೇಶ ಮಾಡ್‍ಚಿ. 14ನಂಗ ಎಣ್ಣುವಾನ ಕ್‍ೕಟಯಿಂಗಡಡೆಲ್ ಲುದ್ಯ ಎಣ್ಣುವ ದೇವನ ಆರಾದನೆ ಮಾಡ್‌ವ ಒರ್ ಪೊಣ್ಣಾಳ್ ಇಂಜತ್. ಅವ ಧೂಮ್ರ ರಂಗ್‍ರ ಬಟ್ಟೆ ಮಾರ್‌ವಳು, ಥುವತೈ ಎಣ್ಣ್‌ವ ಊರ್‍ಂಜ ಬಂದವಳು ಆಯಿತ್ಂಜತ್. ಪೌಲಂಡ ತಕ್ಕ್‌ನ ಕ್‍ೕಪಕ್ ಒಡೆಯ ಅವಡ ಹೃದಯತ್‍ನ ತೊರ್ಂದತ್. 15ಅವ ಪಿಂಞ ಅವಡ ಮನೆಕಾರಂಗೆಲ್ಲ ದೀಕ್ಷಾಸ್ನಾನ ಎಡ್‌ತ ಪಿಂಞ, ಅವ ನಂಗಳ ನೋಟಿತ್: ನಾನ್ ಕ್ರಿಸ್ತನ ನಂಬಿತುಳ್ಳ್‌ಂದ್ ನಿಂಗ ನಂಬ್‍ಚೇಂಗಿ, ನಾಡ ಮನೆಕ್ ಬಂದಿತ್ ಒಳಿಯಂಡೂಂದ್ ಒತ್ತಾಯ ಮಾಡ್‍ಚಿ.
ಪೌಲ ಪಿಂಞ ಸೀಲನ ಜೈಲ್‌ಕ್ ಇಟ್ಟದ್
16ಒರ್ ಕುರಿ, ನಂಗ ಪ್ರಾರ್ಥನೆ ಮಾಡ್‌ವ ಆ ಜಾಗಕ್ ಪೋಯಂಡಿಪ್ಪಕ, ಕೂಳಿ ಪುಡ್‍ಚಿತ್ಂಜ ಒರ್ ಆಳ್ ಮೂಡಿ ನಂಗಡ ಮಿಂಞತ್ ಬಾತ್. ಅವ ಮಿಂಞಕ್ ಆಪಕುಳ್ಳ ವಿಷಯತ್‍ನ ಎಣ್ಣ್‌ವಗುಂಡ್, ಅದ್ಂಡ ಮೂಲಕ, ಅವಡ ಎಜಮಾನಂಗ್ ದುಂಬ ಆದಾಯ ಮಾಡಿ ಕೊಡ್‍ತಂಡಿಂಜತ್. 17ಆ ಕಣಿಯತಿ, ಪೌಲ ಪಿಂಞ ನಂಗಡ ಬೆಂಬರತ್ ಬಂದಿತ್: ಈ ಮನುಷ್ಯಂಗ ದೇವಾದಿ ದೇವಡ ಸೇವಕಂಗ; ರಕ್ಷಣೆರ ಬಟ್ಟೇನ ನಂಗಕ್ ಎಣ್ಣಿ ಕೊಡ್‍ಪಯಿಂಗಾಂದ್ ಕೂತ್ ಕೊಡ್‌ತಂಡ್ ಇಂಜತ್. 18ಇನ್ನನೆ ದುಂಬ ದಿವಸ ಮಾಡ್‍ನಗುಂಡ್ ಪೌಲಂಗ್ ದುಂಬ ಚೆಡಿ ಬಂತ್, ಅವಡ ಪಕ್ಕ ತಿರಿತ್ ಆ ಕೂಳಿಕ್: ನೀನ್ ಇವಳ ಬುಟ್ಟಿತ್ ಪೋಂಡೂಂದ್ ಯೇಸು ಕ್ರಿಸ್ತಂಡ ಪೆದತ್‍ಲ್ ನೀಕ್ ಆಜ್ಞೆ ಮಾಡ್‌ವೀಂದ್ ಎಣ್ಣ್‌ಚಿ. ಅದೇ ಗಳಿಗೆಲ್ ಅದ್ ಅವಳ ಬುಟ್ಟಿತ್ ಪೋಚಿ.
19ಅವಡ ಎಜಮಾನಂಗ್ ಅವಡಗುಂಡ್ ಇಂಞು ಮಿಂಞಕ್ ಆದಾಯ ಒಂದು ಕ್‍ಟ್ಟ್‌ಲೇಂದ್ ಗೊತ್ತಾನ ಪಿಂಞ, ಅಂವೊ ಪೌಲ ಪಿಂಞ ಸೀಲನ ಪುಡ್‌ಚಿತ್, ಚತ್ತೆಲ್ ಎಲ್ಲಾಡ ಮಿಂಞತ್ ಅದಿಕಾರಿಯಂಗಡ ಪಕ್ಕ ಬಲ್‍ಚಂಡ್ ಪೋಚಿ. 20ಅಯಿಂಗಳ ಅದಿಕಾರಿಯಂಗಡ ಮಿಂಞಕ್ ಕೊಂಡ್ ಪೋಯಿತ್, ಅದಿಕಾರಿಯಳ ನೋಟಿತ್: ಯೆಹೂದ್ಯಂಗಳಾನ ಈ ಮನುಷ್ಯಂಗ ನಂಗಡ ಪಟ್ಟಣತ್‍ನ ದುಂಬ ಗಲಿಬಿಲಿ ಮಾಡಿಯಂಡ್ ಉಂಡ್, 21ರೋಮ್ ರಾಜ್ಯತ್‍ರ ಜನಳಾನ ನಂಗ ಸ್ವೀಕಾರ ಮಾಡ್‌ವಕ್ ಕಯ್ಯತ ಪಿಂಞ ನ್ಯಾಯಪ್ರಮಾಣತ್‍ರನೆಕೆ ಮಾಡ್‌ವಕ್ ಕಯ್ಯತ ಪದ್ದತಿನ ಬೋದನೆ ಮಾಡಿಯಂಡುಂಡ್‍ೕಂದ್ ಎಣ್ಣ್‌ಚಿ.
22ಅಕ್ಕ ದುಂಬ ಜನ ಒಕ್ಕಚೆ ಕೂಡಿತ್ ಅಯಿಂಗಕ್ ವಿರೋದವಾಯಿತ್ ಎದ್ದತ್. ಅಕ್ಕ ಬಲ್ಯ ಅದಿಕಾರಿಯ ಈಂಗಡ ಬಟ್ಟೇನ ಕೀತ್‍ವಂಜಿ, ಕೋಲ್‍ಲ್ ಪೊಯ್ಯಂಡೂಂದ್ ಆಜ್ಞೆ ಕೊಡ್‍ತತ್. 23ಅಯಿಂಗಳ ದುಂಬ ಪೊಜ್ಜಿತಾನ ಪಿಂಞ ಜೈಲ್‌ಕ್ ಇಟ್ಟಿತ್, ಅಯಿಂಗಳ ಬದ್ರವಾಯಿತ್ ಕಾತಂಡಿರಂಡೂಂದ್ ಜೈಲ್‍ರ ಅದಿಕಾರಿಕ್ ಹುಕುಮ್ ಕೊಡ್‍ತತ್. 24ಜೈಲ್‍ರ ಅದಿಕಾರಿ ಇಂತ ಹುಕುಮ್‍ನ ಪಡ್ಂದಿತ್, ಅಯಿಂಗಳ ಜೈಲ್‍ರ ಒಳ್‍ಲ್ ಇಪ್ಪ ಕೋಂಬರೇಕ್ ಇಟ್ಟಿತ್, ಅಯಿಂಗಡ ಕಾಲ್‌ನ ಬಲ್ಯ ಮರಪಾರ್‌ಲ್ ಕೆಟ್ಟಿಚಿಟ್ಟತ್.
25ನಡ್‍ಪಾದ್ರೆಲ್, ಪೌಲ ಪಿಂಞ ಸೀಲ, ಪ್ರಾರ್ಥನೆ ಮಾಡಿಯಂಡ್, ಪಾಟ್ ಪಾಡಿತ್ ದೇವನ ತುದಿಚಂಡಿಂಜತ್; ಜೈಲ್‍ಯಿಂಜ ಬೋರೆ ಕೈದಿಯಳು ಅದ್‍ನ ಕ್‍ೕಟಂಡ್ ಇಂಜತ್. 26ಅಕ್ಕಣೆಕ್, ಬಲ್ಯದಾಯಿತ್ ನೆಲಗ್‌ಡ್‍ಗಿತ್, ಜೈಲ್‍ರ ಅಡಿಪಾಯ ಅಲ್ಲಾಡಿ ಪೋಚಿ. ಒಡನೆ ಎಲ್ಲಾ ಪಡಿಯು ತಾನಾಯಿತೇ ತೊರ್ಂದತ್. ಅಲ್ಲಿಂಜ ಎಲ್ಲಾ ಕೈದಿಯಡ ಕೆಟ್ಟ್ ಉತ್ತಿತ್ ಬುದ್ದತ್. 27ಜೈಲ್‍ನ ಕಾತಂಡಿಂಜ ಸಿಪಾಯಿ ಎದ್ದಿತ್, ಜೈಲ್‍ರ ಪಡಿಯೆಲ್ಲ ತೊರ್‌ಂದಿತುಳ್ಳಾನ ಕಂಡಿತ್, ಕೈದಿಯ ತಪ್ಪಿಚಿಟ್ಟಂಡ್ ಪೋಯಿರ್‌ತ್‍ೕಂದ್ ಗೇನ ಮಾಡಿತ್, ಅಂವೊ ಕತ್ತಿನ ಎಡ್‍ತಿತ್ ತನ್ನ ತಾನೆ ಕೊಲ್ಲ್‌ವಕ್ ಇಂಜತ್.
28ಆಚೇಂಗಿ ಪೌಲ: ನೀಡ ಪ್ರಾಣಕ್ ಒಂದು ಮಾಡಿಯತೆ, ನಂಗೆಲ್ಲಾರು ಇಲ್ಲೇ ಉಂಡ್‍ೕಂದ್ ಎಣ್ಣ್‌ಚಿ.
29ಅಕ್ಕ ಅಂವೊ ಬೊಳ್‌ಚತ್‍ನ ಎಡ್‌ತ ಬಪ್ಪಕ್ ಎಣ್ಣಿತ್, ಒಳ್‍ಕ್ ಓಡಿ ಬಂದಿತ್ ನಡ್‍ಗಿಯಂಡ್ ಪೌಲ ಪಿಂಞ ಸೀಲಂಡ ಮಿಂಞತ್ ಅಡ್ಡ ಬುದ್ದತ್. 30ಅಲ್ಲಿಂಜ ಅಯಿಂಗಳ ಅಂವೊ ಪೊರಮೆ ಕಾಕಿಯಂಡ್ ಬಂದಿತ್: ಸ್ವಾಮಿಯಳೇ, ನಂಗಕ್ ರಕ್ಷಣೆ ಕ್‍ಟ್ಟ್‌ವಕ್ ನಂಗ ಎಂತ ಮಾಡಂಡೂಂದ್ ಕ್‍ೕಟತ್.
31ಅದ್ಂಗ್ ಅಯಿಂಗ: ಒಡೆಯನಾನ ಯೇಸು ಕ್ರಿಸ್ತಂಡ ಮೇಲೆ ನಂಬಿಕೆ ಇಡಿ, ಅಕ್ಕ ನೀಕು ನೀಡ ಮನೆಕಾರಂಗಕು ರಕ್ಷಣೆ ಕ್‍ಟ್ಟ್‌ವಾಂದ್ ಎಣ್ಣ್‌ಚಿ. 32ಪಿಂಞ ಅಯಿಂಗ ಅಂವೊಂಗು ಅಂವೊಂಡ ಮನೆಲ್ ಇಂಜಯಿಂಗಕು ಒಡೆಯಂಡ ವಾಕ್ಯತ್‍ನ ಬೋದನೆ ಮಾಡ್‍ಚಿ. 33ಅದಲ್ಲತೆ, ಆ ಬಯಿಟ್ ನೇರತ್‍ಲೇ, ಅಂವೊ ಅಯಿಂಗಳ ಕಾಕಿಯಂಡ್ ಪೋಯಿತ್ ಅಯಿಂಗಡ ಗಾಯತ್‍ನ ಕತ್ತ್‌ಚಿ. ಪಿಂಞ ಅಂವೊನು ಅಂವೊಂಡ ಮನೆಲ್ ಇಂಜಯಿಂಗಳು ಅಕ್ಕಣೆ ದೀಕ್ಷಾಸ್ನಾನ ಎಡ್‍ತಂಡತ್ 34ಅದ್ ಆನ ಪಿಂಞ ಅಯಿಂಗಳ ತಾಂಡ ಮನೆಕ್ ಕಾಕಿಯಂಡ್ ಪೋಯಿತ್ ಉಂಬ್‌ಚಿಟ್ಟತ್. ಅನ್ನನೆ ಅಂವೊ ತಾಂಡ ಮನೆಲ್ ಉಳ್ಳಯಿಂಗಡ ಕೂಡೆ ದೇವಡ ಮೇಲೆ ನಂಬಿಕೆ ಇಟ್ಟಗುಂಡ್ ಕುಶೀಲ್ ಇಂಜತ್.
35ಪಿತ್ಯಾಂದ್ ಪೊಲಾಕ ರೋಮ್ ರಾಜ್ಯತ್‍ರ ಅದಿಕಾರಿಯಂಗ, ಈ ಮನುಷ್ಯಂಗಳ ಬುಡ್‍ಗಡೆ ಮಾಡೀಂದ್ ಜೈಲ್‍ರ ಅದಿಕಾರಿಕ್ ಎಣ್ಣಿತ್ ಅಯಿಂಗಡ ಅದಿಕಾರಿಯಂಗಳ ಅಯಿಚತ್. 36ಜೈಲ್‍ರ ಅದಿಕಾರಿ ಪೌಲಂಗ್ ಇನ್ನನೆ ಅರಿಚಿಟ್ಟತ್. ಅದಿಕಾರಿಯಂಗ ನಿಂಗಳ ಜೈಲಿಂಜ ಬುಡುಗಡೆ ಮಾಡಂಡೂಂದ್ ಆಜ್ಞೆ ಮಾಡಿತ್ ಸಿಪಾಯಿಯಳ ಅಯಿಚಿತುಂಡ್. ಆನಗುಂಡ್ ಇಕ್ಕ ನಿಂಗ ಸಮಾದಾನತ್‍ಲ್ ಪೊರಟ್ ಪೋಯೀಂದ್ ಎಣ್ಣ್‌ಚಿ.
37ಅದ್ಂಗ್ ಪೌಲ: ರೋಮ್ ರಾಜ್ಯತ್‍ರ ಪ್ರಜೆಯಳಾನ ನಂಗಳ, ಏದ್ ವಿಚಾರಣೆಯು ಮಾಡತೆ, ಎಲ್ಲಾಡ ಮಿಂಞತ್‍ಲ್ ಪೊಜ್ಜಿತ್, ಜೈಲ್‌ಕ್ ಇಟ್ಟತ್. ಇಕ್ಕ ಗುಟ್ಟಾಯಿತ್ ನಂಗಳ ಪೊರಮೆ ಅಯಿಪದಾ? ಅನ್ನನೆ ಆಪಕ್ಕಾಗ; ಅಯಿಂಗಳೇ ಬಂತ್ ನಂಗಳ ಪೊರಮೆ ಕಾಕಿಯಂಡ್ ಪೋಯಿತ್ ಅಯಿಕಂಡೂಂದ್ ಎಣ್ಣ್‌ಚಿ. 38ಅದಿಕಾರಿಯಂಗ, ಅಯಿಂಗಡ ಅದಿಕಾರಿಯಂಗಕ್ ಈಂಗ ರೋಮ್ ರಾಜ್ಯತ್‍ರ ಪ್ರಜೆಯಿಂಗಾಂದ್ ಅರಿಚಿಡ್‌ವಕ ಅಯಿಂಗಕ್ ಪೋಡಿ ಆಚಿ; 39ಅಕ್ಕ ಅದಿಕಾರಿಯಂಗ ಅಯಿಂಗಡ ಪಕ್ಕ ಪೋಯಿತ್ ಸಮಾದಾನತ್‍ಲ್ ತಕ್ಕ್ ಪರ್ಂದಿತ್ ಪೊರಮೆ ಕಾಕಿಯಂಡ್ ಬಾತ್. ನಿಂಗ ಈ ಊರ್‌ನ ಬುಟ್ಟಿತ್ ಪೊರಡಂಡೂಂದ್ ಬೋಡಿಯಂಡತ್. 40ಅಕ್ಕ ಅಯಿಂಗ ಜೈಲ್‍ರ ಒಳ್‌ಳಿಂಜ ಪೊರಟಿತ್ ಲುದ್ಯ ಎಣ್ಣುವಡ ಮನೆಕ್ ಬಂತ್ ಯೇಸುನ ನಂಬ್‍ನ ಅಣ್ಣತಮ್ಮಣಂಗಳ ನೋಟಿತ್ ಅಯಿಂಗಳ ದೈರ್ಯಪಡ್‍ತಿತ್ ಅಲ್ಲಿಂಜ ಪೊರಟ್ ಪೋಚಿ.
Àwon tá yàn lọ́wọ́lọ́wọ́ báyìí:
ಅಪೊಸ್ತಲ 16: ಕೊಡವ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017, New Life Literature (NLL)