ಅಪೊಸ್ತಲ 14
14
ಪೌಲ ಪಿಂಞ ಬಾರ್ನಬ ಇಕೋನ್ಯ ಪಟ್ಟಣತ್‍ಲ್ ಮಾಡ್‍ನ ಸೇವೆ
1ಅನ್ನನೆ, ಇಕೋನ್ಯ ಪಟ್ಟಣತ್‍ಲ್ ಪೌಲ ಪಿಂಞ ಬಾರ್ನಬ, ಯೆಹೂದ್ಯಂಗಡ ಸಬಾಮಂದಿರಕ್ ಪೋಯಿತ್, ಅಲ್ಲಿಂಜ ದುಂಬ ಯೆಹೂದ್ಯ ಜನಳು, ಯೆಹೂದ್ಯ ಅಲ್ಲತಯಿಂಗಳು ಯೇಸುನ ನಂಬುವನೆಕೆ ಚಾಯಿತೆ ತಕ್ಕ್ ಪರ್ಂದತ್. 2ಆಚೇಂಗಿ, ಎಣ್ಣ್‌ನ ವಿಷಯತ್‍ನ ನಂಬತೆ ಪೋನ ಯೆಹೂದ್ಯಂಗ, ಯೆಹೂದ್ಯರಲ್ಲತ ಜನಡ ಮನಸ್ಸ್‌ನ ಈ ದಂಡಾಳ್‌ಕ್ ವಿರೋದವಾಯಿತ್, ಚೆಡಿ ಬಪ್ಪನೆಕೆ ಪಾಳ್ ಮಾಡ್‍ಚಿ. 3ಆಚೇಂಗಿಯು ಪೌಲ ಪಿಂಞ ಬಾರ್ನಬ ದುಂಬ ದಿವಸ ಅಲ್ಲಿ ಒಳಿಂಜಿತ್ ಒಡೆಯಂಡ ವಿಷಯತ್‍ನ ದೈರ್ಯವಾಯಿತ್ ತಕ್ಕ್ ಪರ್ಂದತ್. ಒಡೆಯ, ಅಯಿಂಗ ತಕ್ಕ್ ಪರ್ಂದ ಕೃಪೇರ ವಿಷಯ ನೇರಾನದ್‍ೕಂದ್ ಎಣ್ಣ್‌ವಕ್ ಸಾಕ್ಷಿಯಾಯಿತ್, ಅಯಿಂಗ ಗುರ್‌ತ್ ಪಿಂಞ ಆಶ್ಚರ್ಯ ಕಾರ್ಯನೆಲ್ಲ ಮಾಡ್‌ವಕ್ ಶಕ್ತಿ ಕೊಡ್‍ತತ್. 4ಅಕ್ಕ ಆ ಪಟ್ಟಣತ್‍ಲ್ ಇಂಜ ಜನ ಈಂಗಡ ವಿಷಯತ್‍ಲ್ ದಂಡಾಯಿತ್ ನಿಂದತ್. ಚೆನ್ನ ಜನ ಅಪೊಸ್ತಲಂಗಡ ಬರಿಯು, ಇಂಞು ಚೆನ್ನ ಜನ ಯೆಹೂದ್ಯಂಗಡ ಬರಿಯು ನಿಂದತ್. 5ಯೆಹೂದ್ಯರಲ್ಲತ ಬೋರೆ ಜನಳು, ಯೆಹೂದ್ಯಂಗಳು ತಂಗಡ ಅದಿಕಾರಿಯಂಗಡ ಕೂಡೆ ಕೂಡಿತ್ ಅಪೊಸ್ತಲಂಗಳ ಅವಮಾನಪಡುತಿತ್, ಕೊಲ್ಲಂಡೂಂದ್ ಕಲ್ಲ್ ಕನಿಪಕ್ ತೀರ್ಮಾನ ಮಾಡ್‍ಚಿ. 6ಅಪೊಸ್ತಲಂಗ ಇದ್‍ನ ಅರಿಂಜಂಡ್ ಲುಕವೋನ್ಯ ಸೀಮೆರ ಲುಸ್ತ್ರ ಪಿಂಞ ದೆರ್ಬೆ ಪಟ್ಟಣತ್‍ರ ಪಕ್ಕ ಓಡಿ ಪೋಯಿತ್, 7ಅಲ್ಲಿಯತ್‍ರ ಜನಕ್ ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡ್‍ಚಿ.
ಪೌಲ ಪಿಂಞ ಬಾರ್ನಬ ಲುಸ್ತ್ರ ಪಟ್ಟಣತ್‍ಲ್ ಮಾಡ್‍ನ ಸೇವೆ
8ಲುಸ್ತ್ರತ್‍ಲ್ ಒರ್ ಮನುಷ್ಯ ಇಂಜತ್. ಅಂವೊ ಪುಟ್ಟ್‌ವಯಿಂಜಲೆ ಕುಂಟನಾಯಿತ್, ಅಂವೊಂಡ ಕಾಲ್‍ರ ಅಡಿಲ್ ಊಣನಾಯಿತ್, ಇಲ್ಲಿಕತ್ತನೆ ನಡ್‍ಕತಂವೊನಾಯಿತ್ ಅಲ್ಲಿ ಅಳ್‍ತಂಡಿಂಜತ್. 9ಪೌಲ ಪರಿಯುವ ತಕ್ಕ್‌ನ ಅಂವೊ ಅನ್ನನೆ ಕ್‍ೕಟಂಡ್ ಇಂಜತ್. ಪೌಲ ಅಂವೊಂಡ ಮೂಡ್‍ನ ನೋಟಿತ್, ವಾಸಿಯಾಪಕ್ ಬೋಂಡಿಯಾನ ನಂಬಿಕೆ ಅಂವೊಂಗ್ ಉಂಡ್‍ೕಂದ್ ಗೊತ್ತಾಯಿತ್: 10ನೀಡ ಕಾಲ್‌ನ ನೇರೆ ನ್‍ೕಟಿತ್ ನಿಂದಾಂದ್ ಬಲ್ಯ ಸ್ವರತ್ ಎಣ್ಣ್‌ಚಿ. ಅಕ್ಕನ್ನೆ, ಆ ಮನುಷ್ಯ ಪಾರಿಯಂಡ್ ಎದ್ದಿತ್ ನಡ್‍ಪಕ್ ಸುರು ಮಾಡ್‍ಚಿ. 11ಪೌಲ ಮಾಡ್‍ನದ್‍ನ ಅಲ್ಲಿ ಕೂಡಿತ್ಂಜ ಜನಡ ಗುಂಪ್ ಕಾಂಬಕ, ದೇವ ಮನುಷ್ಯಂಗಡ ರೂಪತ್‌ಲ್ ನಂಗಡ ಮದ್ಯತ್‍ಲ್ ಇಳ್ಂಜಿ ಬಂದಿತ್ತುಂಡ್‍ೕಂದ್ ಲುಕವೋನ್ಯ ಬಾಷೆಲ್ ಜೋರಾಯಿತ್ ಕೂತ್ ಕೊಡ್‍ಪಕ್ ಸುರು ಮಾಡ್‍ಚಿ. 12ಬಾರ್ನಬನ ಅಯಿಂಗಡ ಮುಕ್ಯ ದೇವ ಯೂಪಿತರ್‍ೕಂದು, ಪೌಲ ಬೋದನೆ ಮಾಡ್‍ನಗುಂಡ್, ಅಂವೊನ, ದೇವಡ ವಿಷಯತ್ ತಕ್ಕ್ ಪರಿಯುವ ದೇವ ಮೆರ್ಕುರೀಂದು ಕಾಕ್‍ಚಿ. 13ಅದಲ್ಲತೆ, ಆ ಪಟ್ಟಣತ್‍ರ ಪೊರಮೆ ಇಂಜ ಯೂಪ್ಪಿತರ್‌ರ ಪೂಜಾರಿ, ಜನಡ ಕೂಡೆ ಈಂಗಕ್ ಬಲಿ ಕೊಡ್‍ಪಕ್ ಎತ್ತ್ ಪಿಂಞ ಪೂಮಾಲೆನ ಪಟ್ಟಣತ್‍ರ ಪೊರಮೆಯಿಂಜ ದೇವಸ್ತಾನಕ್ ಕೊಂಡ್ ಬಾತ್.
14 ಅಪೊಸ್ತಲಂಗಳಾನ ಬಾರ್ನಬ ಪಿಂಞ ಪೌಲ ಇದ್‍ನ ಕ್‍ೕಟಿತ್, ತಂಗಡ ಬಟ್ಟೇನ ಕೀತಿಯಂಡ್#14.14 ಯೆಹೂದ್ಯ ಜನ ಅಯಿಂಗಡ ದೇವನ ದಾರಾಚೇಂಗಿ ದೂಷಣೆ ಮಾಡ್‌ವದ್‍ನ ಕ್‍ೕಪಕ ಅಯಿಂಗ ತಂಗಡ ಬಟ್ಟೇನ ಎಲ್ಲಾಡ ಮಿಂಞ ಕೀತಿತ್, ಅಯಿಂಗಡ ನೊಂಬಲತ್‍ನ ಕಾಟ್‍ವ ಗುರ್‌ತ್., ಜನಡ ಗುಂಪ್‍ರ ಮದ್ಯತ್ ಕೂತ್ ಕೊಡ್‌ತಂಡ್ ನುಗ್ಗಿತ್: 15ಜನಳೇ, ನಿಂಗ ಎನ್ನಂಗ್ ಇನ್ನನೆ ಮಾಡ್‌ವಿರ? ನಂಗಳು ನಿಂಗಡನೆಕೆ ಮನುಷ್ಯಂಗ, ದೇವ ಅಲ್ಲ; ನಿಂಗ ಈ ಬೋಂಡತದ್‍ನೆಲ್ಲ ಬುಟ್ಟಿತ್, ಬಾನ ಬೂಮಿ, ಕಡಲ್ ಪಿಂಞ ಅದ್‍ಲ್ ಉಳ್ಳ ಎಲ್ಲಾನ ಸೃಷ್ಟಿ ಮಾಡ್‍ನ ಜೀವವುಳ್ಳ ದೇವಡ ಬರಿಕ್ ತಿರ್‌ಗಿತ್ ಬರಂಡೂಂದ್ ನಿಂಗಕ್ ಈ ನಲ್ಲ ಸುದ್ದಿನ ಪ್ರಚಾರ ಮಾಡಿಯಂಡುಂಡ್‍ೕಂದ್ ಬಲ್ಯ ಸ್ವರತ್‍ಲ್ ಎಣ್ಣ್‌ಚಿ. 16ಕಯಿಂಜ ಕಾಲತ್‍ಲ್, ಅಂವೊ ಎಲ್ಲಾ ಜನತ್‍ನ ಅಯಿಂಗಯಿಂಗಡ ಮನಸ್ಸ್‌ಕ್ ಕುಶಿಯಾನ ಬಟ್ಟೇಲ್ ನಡ್‍ಪಕ್ ಬುಟ್ಟತೇಂಗಿಯು, 17ಅಂವೊ ತಾಂಡ ವಿಷಯತ್‍ಲ್ ಸಾಕ್ಷಿ ಕೊಡ್‍ಕತೆ ಇಂಜಿತ್‌ಲ್ಲೆ. ಅಂವೊ ನಲ್ಲದ್‍ನ ಮಾಡಿತ್, ಬಾನತ್ಂಜ ಮಳೇನ ತಪ್ಪಂಜಿ, ನಂಗಕ್ ಚಾಯಿ ಬೊಳೆನ ತಂದಿತ್, ತಿಂಬಕ್ ತಂದಿತ್, ಮನಸ್ಸ್‌ನ ಕುಶೀಲ್ ದುಂಬ್‍ಚಿಟ್ಟತ್‍ೕಂದ್ ಅಯಿಂಗ ಎಣ್ಣ್‌ಚಿ. 18ಅಯಿಂಗ ಇದ್‍ನೆಲ್ಲ ಎಣ್ಣ್‌ಚೇಂಗಿಯು, ಜನ ಅಯಿಂಗಕ್ ಬಲಿ ಕೊಡ್‍ಕತನೆಕೆ ತಡ್‍ಪಕ್ ಕಷ್ಟವಾಯಿತ್ಂಜತ್.
19ಇನ್ನನೆ ಆಯಂಡಿಪ್ಪಕ, ಅಂತಿಯೋಕ್ಯತ್ಂಜಲು ಇಕೋನ್ಯತ್ಂಜಲು ಯೆಹೂದ್ಯಂಗ ಬಂತ್ ಜನಳ ಅಯಿಂಗಡ ಪಕ್ಕ ಬಲ್‍ಚಿರ್‌ತ್. ಅಯಿಂಗ ಪೌಲಂಗ್ ಕಲ್ಲ್ ಕನ್‍ಚಿತ್, ಅಂವೊ ಚತ್ತ್ ಪೋಚೀಂದ್ ಗೇನ ಮಾಡಿತ್, ಊರ್‌ರ ಪೊರಮೆ ಬಲ್‍ಚಂಡ್ ಪೋಚಿ. 20ಪಿಂಞ, ಯೇಸುನ ನಂಬ್‍ನಯಿಂಗ ಅಂವೊಂಡ ಸುತ್ತ್‌ಲ್ ನಿಂದಂಡಿಪ್ಪಕ ಅಂವೊ, ಎದ್ದಿತ್ ಊರ್‌ರ ಒಳ್‍ಕ್ ಪೋಚಿ. ಪಿತ್ಯಾಂದ್ ಬಾರ್ನಬಂಡ ಕೂಡೆ ದೆರ್ಬೆಕ್ ಪೊರಟತ್.
ಪೌಲ ಪಿಂಞ ಬಾರ್ನಬ ಸಿರಿಯ ದೇಶತ್‍ರ ಅಂತಿಯೋಕ್ಯಕ್ ವಾಪಸ್ ಬಪ್ಪದ್
21ಆ ಪಟ್ಟಣತ್‍ಲ್ ಅಯಿಂಗ ನಲ್ಲ ಸುದ್ದಿನ ಪ್ರಚಾರ ಮಾಡಿತ್, ದುಂಬ ಜನಳ ಶಿಷ್ಯಂಗಳಾಯಿತ್ ಮಾಡ್‍ನ ಪಿಂಞ, ಅಲ್ಲಿಂಜ ಪುನಃ ಲುಸ್ತ್ರಕ್, ಇಕೋನ್ಯಕ್, ಅಂತಿಯೋಕ್ಯಕ್ ಬಂದಿತ್: 22ಯೇಸುನ ನಂಬ್‍ನಯಿಂಗಡ ಮನಸ್ಸ್‌ನ ಗಟ್ಟಿ ಮಾಡಿತ್, ನೇರಾನ ನಂಬಿಕೇಲ್ ಸ್ತಿರವಾಯಿತ್ ನಿಕ್ಕಂಡೂಂದ್ ಬುದ್ದಿ ತಕ್ಕ್ ಎಣ್ಣಿತ್, ನಂಗ ದುಂಬ ಕಷ್ಟತ್‍ನ ಅನುಬವಿಚಿಟ್ಟಿತ್ ದೇವಡ ರಾಜ್ಯತ್‍ರ ಒಳ್‍ಕ್ ಕೂಡಂಡೂಂದ್ ಎಚ್ಚರ ಮಾಡಿತ್ ಅಯಿಂಗಳ ದೈರ್ಯಪಡ್‍ತ್‍ಚಿ. 23ಇದ್‍ಲ್ಲತೆ ಓರೋರ್ ಸಬೇಲು ಪೆರಿಯಯಿಂಗಳ ನೇಮಿಚಿಟ್ಟಿತ್, ಪಟ್ಟಣಿ ನಿಂದಿತ್ ಪ್ರಾರ್ಥನೆ ಮಾಡಿತ್, ಅಯಿಂಗ ನಂಬ್‍ನ ದೇವಡ ಕೈಕ್ ಅಯಿಂಗಳ ಒಪ್ಪ್‌ಚಿಟ್ಟತ್.
24ಅಲ್ಲಿಂಜ ಪಿಸಿದ್ಯ ಸೀಮೆನ ದಾಟಿತ್ ಪಂಫುಲ್ಯ ಸೀಮೆಕ್ ಬಂತ್, 25ಅದ್ಂಗ್ ಕೂಡ್‍ನ ಪೆರ್ಗೆ ಊರ್‌ಲ್ ದೇವಡ ವಾಕ್ಯತ್‍ನ ಪ್ರಸಂಗ ಮಾಡಿತ್, ಪಿಂಞ ಅತಾಲ್ಯ ಪಟ್ಟಣಕ್ ಪೋಚಿ. 26ಅಲ್ಲಿಂಜ ಅಯಿಂಗ ಸಮುದ್ರ ಮಾರ್ಗವಾಯಿತ್ ಪ್ರಯಾಣ ಮಾಡಿತ್ ಕಡೇಕ್ ಅಂತಿಯೋಕ್ಯಕ್ ಎತ್ತ್‌ಚಿ. ಅಯಿಂಗ ಇಕ್ಕ ನೆರವೇರಿಚಿಟ್ಟಿತುಳ್ಳ ದೇವಡ ಸೇವೆಕಾಯಿತ್ ಜನ ಈ ಜಾಗತ್ಂಜಲೇ ಅಯಿಂಗಳ ದೇವಡ ಕೃಪೆಕ್ ಒಪ್ಪ್‌ಚಿಟ್ಟ್ ಅಯಿ‍ಚಿತ್ಂಜತ್. 27ಅಯಿಂಗ ಅಲ್ಲಿ ಎತ್ತ್‌ನ ಪಿಂಞ, ಅಲ್ಲಿಯತ್‍ರ ಸಬೇನ ಕೂಟಿತ್, ದೇವ ಅಯಿಂಗಡ ಮೂಲಕ ಮಾಡ್‍ನ ಎಲ್ಲಾನ ಪಿಂಞ ಯೆಹೂದ್ಯಂಗ ಅಲ್ಲತ ಬೋರೆ ಜನಡ ನಂಬಿಕೇರ ಪಡಿನ ಅಂವೊ ಎನ್ನನೆ ತೊರಂದತ್‍ೕಂದ್ ವಿವರವಾಯಿತ್ ಅಯಿಂಗಕ್ ಎಣ್ಣ್‌ಚಿ. 28ಪಿಂಞ ಅಯಿಂಗ ಯೇಸುನ ನಂಬ್‍ನಯಿಂಗಡ ಕೂಡೆ ಅಲ್ಲಿಯೇ ದುಂಬ ಕಾಲ ಇಂಜತ್.
Àwon tá yàn lọ́wọ́lọ́wọ́ báyìí:
ಅಪೊಸ್ತಲ 14: ಕೊಡವ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017, New Life Literature (NLL)