ಅಪೊಸ್ತಲ 12
12
ಯಾಕೋಬನ ಕೊಂದದ್ ಪಿಂಞ ಪೇತ್ರನ ಜೈಲ್‌ಕ್ ಇಟ್ಟದ್
1ಆ ಸಮಯತ್‍ಲ್ ರಾಜನಾನ ಹೆರೋದ ಸಬೇಲ್ ಉಳ್ಳ ಚೆನ್ನ ಜನಳ ಪುಡ್‌ಚಿತ್ ಹಿಂಸೆ ಮಾಡ್‌ವಕ್ ಸುರು ಮಾಡ್‍ಚಿ. 2ಅಂವೊ ಯೋಹಾನಂಡ ಅಣ್ಣನಾನ ಯಾಕೋಬನ ಕತ್ತಿಯಿಂಜ ಕೊಲೆ ಮಾಡ್‍ಚಿ. 3ಈ ವಿಷಯ ಯೆಹೂದ್ಯಂಗಳ ಎಚ್ಚಕ್ ಕುಶಿಪಡ್‍ತ್‍ಚೀಂದ್ ಗೊತ್ತಾನ ಪಿಂಞ ಪೇತ್ರನ ಕೂಡೆ ಪುಡಿಪಕ್ ಮಿಂಞಕ್ ಪೋಚಿ. ಅಕ್ಕ ಪಸ್ಕ#12.3 ಪಸ್ಕ ಎಣ್ಣುವದ್, ಇಸ್ರಾಯೇಲ್ ದೇಶತ್‍ರ ಒರ್ ಮುಕ್ಯ ನಮ್ಮೆ. ಇದ್ ಇಸ್ರಾಯೇಲ್ ಜನ ಐಗುಪ್ತ ದೇಶತ್‍ರ ಅಡಿಯಾಳತನತ್ಂಜ ವಿಮೋಚನ ಕ್‍ಟ್ಟ್‌ನ ನೆನಪ್‍ಲ್ ಮಾಡ್‌ವ ನಮ್ಮೆ. ಪಸ್ಕ ಎಣ್ಣ್‌ಚೇಂಗಿ ಮರಣ ದೂತ ಯೆಹೂದ್ಯಂಗಡ ಮನೆನ ದಾಟಿತ್ ಪೋನದ್‍ೕಂದ್ ಅರ್ಥ. ಪ್ರಯಾಣ ಪುಸ್ತಕ 12.1–14. ನಮ್ಮೆರ ಕಾಲವಾಯಿತ್ಂಜತ್. 4ಅಂವೊನ ಪುಡ್‌ಚಿತ್ ಜೈಲ್‍ಲ್ ಇಟ್ಟಿತ್, ಪಸ್ಕ ನಮ್ಮೆ ಕಯಿಂಜ ಪಿಂಞ ಅಂವೊ ಜನಡ ಮಿಂಞತ್‍ಲ್ ನ್ಯಾಯತೀರ್ಪ್ ಕೊಡ್‍ಪಕ್ ಕೊಂಡ್ ಬಪ್ಪಕ್ ಗೇನ ಮಾಡಿತ್, ಅಯಿಂಗಳ ಕಾಪಕಾಯಿತ್ ನಾಲ್ ನಾಲ್ ಸಿಪಾಯಿಯಳ ನಾಲ್ ಗುಂಪಾಯಿತ್ ಏರ್ಪಾಡ್ ಮಾಡ್‍ಚಿ. 5ಪೇತ್ರ ಜೈಲ್‍ಲ್ ಇಪ್ಪಕ, ಸಬೆರ ಜನ ಅಂವೊಂಗಾಯಿತ್ ದೇವಡ ಪಕ್ಕ ಎಡೆಬುಡತೆ ಪ್ರಾರ್ಥನೆ ಮಾಡಿಯಂಡಿಂಜತ್.
ಪೇತ್ರ ಅದ್ಬುತವಾಯಿತ್ ಜೈಲ್‍ಯಿಂಜ ತಪ್ಪಿಚಿಟ್ಟದ್
6ಹೆರೋದ, ಪೇತ್ರನ ಜನಡ ಮಿಂಞತ್‍ಲ್ ನ್ಯಾಯತೀರ್ಪ್ ಮಾಡ್‌ವಕಾಯಿತ್ ಕೊಂಡ್ ಬಪ್ಪಕ್ ಒರ್ ದಿವಸಕ್ ಮಿಂಞ ಬಯಿಟ್, ಪೇತ್ರನ ದಂಡ್ ಸರಪಣಿ‌ಯಿಂಜ ಕೆಟ್ಟಿತ್ಂಜತ್. ಅಂವೊ ದಂಡ್ ಸಿಪಾಯಿಂಗಡ ಮದ್ಯತ್ ವರಿಯಂಡಿಂಜತ್. ಜೈಲ್‍ನ ಕಾಪಯಿಂಗಳು ಪಡಿರ ಮಿಂಞತ್ ನಿಂದಿತ್ ಪಡಿನ ಕಾತಂಡಿಂಜತ್. 7ಒಮ್ಮಕೆ, ಒಡೆಯಂಡ ದೂತ ಪೇತ್ರಂಡ ಪಕ್ಕ ನಿಂದತ್. ಅಂವೊ ಇಂಜ ಕೋಂಬರೆಲ್ ಬೊಳಿ ಮಿನ್ನ್‌ಚಿ.
ದೂತ, ಪೇತ್ರಂಡ ನಿಪ್ಪ್‌ನ ತಟ್ಟಿತ್ ಎಪ್ಪಿತ್: ಬೆರಿಯ ಏಳ್‍ೕಂದ್ ಎಣ್ಣ್‌ಚಿ. ಒಡನೆ ಅಂವೊಂಡ ಕೈಕ್ ಕೆಟ್ಟಿತ್ಂಜ ಸರ್ಪಣಿ ಅಡಿಕ್‌ ಬುದ್ದತ್.
8ಬಯ್ಯಂಜಿ, ಆ ದೂತ ಅಂವೊಂಗ್: ನೀಡ ಬಟ್ಟೇನ ಇಟ್ಟಿತ್, ನೀಡ ಕಾಲ್‌ಕ್ ಎಕ್ಕಡತ್‌ನ ಇಟ್ಟಾಂದ್ ಎಣ್ಣ್‌ಚಿ. ಪೇತ್ರ ಅಂವೊ ಎಣ್ಣ್‌ನನೆಕೆ ಮಾಡ್‍ಚಿ. ಆ ದೂತ ಅಂವೊಂಗ್ ನೀಡ ಕೋಟ್‍ನ ಇಟ್ಟಂಡ್ ನಾಡ ಬಯ್ಯ ಬಾಂದ್ ಎಣ್ಣ್‌ಚಿ.
9ಅನ್ನನೆ ಪೇತ್ರ ಜೈಲ್‍ಯಿಂಜ ಪೊರಟಿತ್ ದೂತಂಡ ಬಯ್ಯ ಪೋಯಂಡ್, ದೂತ ಮಾಡ್‍ನದೆಲ್ಲ ಸತ್ಯಾಂದ್ ಅರಿಯತೆ, ಅಂವೊ ಒರ್ ದರ್ಶನ ಕಂಡಂಡುಂಡ್‍ೕಂದ್ ಗೇನ ಮಾಡ್‍ಚಿ. 10ಅಯಿಂಗ ಮೊದಲನೆ ಪಿಂಞ ದಂಡನೆ ಕಾಪಯಿಂಗಳ ದಾಟಿತ್, ಪಟ್ಟಣಕ್ ಪೋಪ ಇರ್‍ಂಬ್ ಪಡಿರ ಪಕ್ಕ ಬಪ್ಪಕ, ಅದಾಯಿತೇ ಅಯಿಂಗಕ್ ತೊರ್ಂದತ್. ಅಯಿಂಗ ಪೊರಮೆ ಬಂತ್ ಒರ್ ಬೀದಿನ ನೇರೆ ದಾಟ್‍ಚಿ. ಒಮ್ಮಕೆ, ಆ ದೂತ ಅಂವೊನ ಬುಟ್ಟಿತ್ ಪೋಚಿ.
11ಅಕ್ಕ ಪೇತ್ರಂಗ್ ಎಚ್ಚರ ಆಚಿ. ಅಕ್ಕು ಹೆರೋದಂಡ ಕೈಯಿಂಜಲೂ ಯೆಹೂದ್ಯಂಗ ಪಾರಕಾತಂಡಿಂಜ ಎಲ್ಲಾ ಕಾರ್ಯತ್ಂಜ ನನ್ನ ಬುಡ್‌ತ್‌ವಕ್ ಒಡೆಯ ತಾಂಡ ದೂತನ ಅಯಿಚತ್‍ೕಂದ್, ನಾಕ್ ಇಕ್ಕ ನೇರಾಯಿತು ಗೊತ್ತಾಚೀಂದ್ ಎಣ್ಣ್‌ಚಿ.
12ಅಂವೊಂಗ್ ಇದ್ ಚಾಯಿತೆ ಗೊತ್ತಾನ ಪಿಂಞ ಮಾರ್ಕ ಎಣ್ಣುವ ಪೆದ ಉಳ್ಳ ಯೋಹಾನಂಡ ಅವ್ವನಾನ ಮರಿಯಡ ಮನೆಕ್ ಪೋಚಿ. ಅಲ್ಲಿ ದುಂಬ ಜನ ಕೂಡಿತ್ ಪ್ರಾರ್ಥನೆ ಮಾಡಿಯಂಡಿಂಜತ್. 13ಪೇತ್ರ ಪೊರಮೆ ಉಳ್ಳ ಪಡಿನ ತಟ್ಟ್‌ವಕ ರೋದೆ ಎಣ್ಣುವ ಪಣಿಕರ್ತಿ ನೋಟ್‍ವಕ್ ಬಾತ್. 14ಅವ ಪೇತ್ರಂಡ ಸ್ವರತ್‍ನ ಗೊತ್ತ್ ಮಾಡಿತ್, ಅವಕ್ ಎಣ್ಣುವಕ್ ಕಯ್ಯತ ಕುಶೀಲ್ ಪಡಿನ ತೊರಕತೆ ಒಳ್‍ಕ್ ಓಡಿ ಪೋಯಿತ್, ಪೇತ್ರ ಪೊರಮೆ ನಿಂದಂಡುಂಡ್‍ೕಂದ್ ಎಲ್ಲಾರ್‌ಕು ಎಣ್ಣ್‌ಚಿ. 15ಅಯಿಂಗ ಅವಕ್: ನೀಕ್ ಪುಚ್ಚಿ ಪುಡ್‌ಚಿತುಂಡ್‍ೕಂದ್ ಎಣ್ಣ್‌ಚಿ. ಆಚೇಂಗಿ ಅವ, ಎಣ್ಣ್‌ನದ್ ನೇರ್ಂದ್ ಎಣ್ಣಿಯಂಡೇ ಇಪ್ಪಕ, ಅಯಿಂಗೆಲ್ಲ, ಅದ್ ಅಂವೊಂಡ ದೂತನಾಯಿತಿಕ್ಕೂಂದ್ ಎಣ್ಣ್‌ಚಿ. 16ಆಚೇಂಗಿ, ಪೇತ್ರ ಇಂಞು ಪಡಿನ ತಟ್ಟಿಯಂಡೇ ಇಂಜತ್. ಕಡೇಕ್ ಅಯಿಂಗ ಪಡಿನ ತೊರ್‌ಪಕ ಅಂವೊನ ಕಂಡಿತ್ ಅಯಿಂಗಕ್ ಆಶ್ಚರ್ಯ ಆಚಿ. 17ಅಂವೊ ಅಯಿಂಗೆಲ್ಲ ಮುಂಡತೆ ಇಪ್ಪಕಾಯಿತ್ ಕೈಯಿಲ್ ಸನ್ನೆ ಮಾಡಿತ್ ಅಂವೊನ ಒಡೆಯ ಎನ್ನನೆ ಜೈಲ್‍ಯಿಂಜ ಕೊಂಡ್ ಬಾತ್‍ೕಂದ್ ವಿವರವಾಯಿತ್ ಎಣ್ಣಿತ್, ಈ ವಿಷಯತ್‍ನ ಯಾಕೋಬಂಗು ಬೋರೆ ಯೇಸುನ ನಂಬ್‍ನ ದೇವಡ ಮಕ್ಕಕೂ ಅರಿಚಿಡೀಂದ್ ಎಣ್ಣಿತ್, ಅಂವೊ ಪೊರಟಿತ್ ಬೋರೆ ಎಲ್ಲಿಕೊ ಪೋಚಿ.
18ಪೊಲಾಕ ಆನ ಪಿಂಞ ಪೇತ್ರಂಗ್ ಎಂತಾಚೀಂದ್ ಕಾತಂಡಿಂಜಯಿಂಗಕ್ ದುಂಬ ಪೋಡಿ ಆಚಿ. 19ಹೆರೋದ ಪೇತ್ರನ ತ್‍ೕಡ್‌ವಕ್ ಅಯಿಂಗಕ್ ಆಜ್ಞೆ ಮಾಡ್‍ಚಿ. ಅಯಿಂಗಕ್ ಅಂವೊನ ಕಂಡ್‌ಪುಡಿಪಕ್ ಕಯ್ಯತೆ ಆಚಿ. ಅಕ್ಕ ಹೆರೋದ ಕಾಪಯಿಂಗಳ ವಿಚಾರಣೆ ಮಾಡಿತ್ ಅಯಿಂಗಳ ಕೊಲ್ಲ್‌ವಕ್ ಆಜ್ಞೆ ಮಾಡ್‍ಚಿ. ಬಯ್ಯ, ಹೆರೋದ ಯೂದಾಯ ಪ್ರಾಂತ್ಯತ್‍ನ ಬುಟ್ಟಿತ್ ಕೈಸರೈ ಪಟ್ಟಣಕ್ ಪೋಯಿತ್ ಅಲ್ಲಿ ವಾಸಯಿಂಜತ್.
ಹೆರೋದಂಡ ಚಾವ್
20ಇಕ್ಕ ಹೆರೋದ, ತೀರ್ ಪಟ್ಟಣತ್‍ರ ಜನಡ ಕೂಡೆಯು ಸೀದೋನ್ ಪಟ್ಟಣತ್‍ರ ಜನಡ ಕೂಡೆಯು ದುಂಬ ಚೆಡಿಲ್ ಇಂಜತ್. ಆಚೇಂಗಿ ಆ ನಾಡ್‍ಕಾರಂಗ ಒರೇ ಮನಸ್ಸ್‌ಲ್ ಹೆರೋದ ರಾಜನ ಕಾಂಬಕ್ ಬಾತ್. ಅಯಿಂಗ ರಾಜಂಡ ಮನೆಲ್ ಮುಕ್ಯ ಅದಿಕಾರಿಯಾನ ಬ್ಲಾಸ್ತನ ಕೂಟ್‍ಪುಡ್‍ಚಿತ್, ಅಂವೊಂಡ ಸಹಾಯ ಬೋಂಡೂಂದ್ ಬೋಡಿಯಂಡತ್. ಪಿಂಞ ಅಯಿಂಗ ಹೆರೋದ ರಾಜನ ಕಾಂಬಕ್ ಪೋಯಿತ್, ರಾಜ ಅಯಿಂಗಡ ಕೂಡೆ ಸಮಾದಾನ ಆಂಡೂಂದ್ ಬೋಡಿಯಂಡತ್. ಎನ್ನಂಗೆಣ್ಣ್‌ಚೇಂಗಿ, ಹೆರೋದಂಡ ನಾಡಿಂಜಲೆ ತಿಂಬಕುಳ್ಳ ಸಾಮಾನೆಲ್ಲ ಪೋಯಂಡಿಂಜತ್. 21ಗೊತ್ತ್ ಮಾಡ್‍ನ ಒರ್ ದಿವಸತ್‍ಲ್ ಹೆರೋದ, ರಾಜ ವಸ್ತ್ರತ್‍ನ ಇಟ್ಟಂಡ್, ಸಿಂಹಾಸನತ್‍ಲ್ ಅಳ್‌ತಿತ್, ಅಯಿಂಗಡ ಮಿಂಞ ತಕ್ಕ್ ಪರ್ಂದತ್.
22ಅಲ್ಲಿ ಕೂಡಿತ್ಂಜ ಜನ: ಇದ್ ಮನುಷ್ಯಂಡ ತಕ್ಕ್ ಅಲ್ಲ, ಇದ್ ದೇವಡ ತಕ್ಕ್‍ೕಂದ್ ಜೋರಾಯಿತ್ ಕೂತ್ ಕೊಡ್‍ತತ್.
23ಅಂವೊ ದೇವಕ್ ಮಹಿಮೇನೆ ಕೊಡ್‍ಕತಗುಂಡ್, ಒಡೆಯಂಡ ದೂತ ಅಂವೊಂಗ್ ಅಕ್ಕಲೆ ಒರ್ ಕ್ರೂರ ಕಾಯಿಲೆ ಬಪ್ಪಕ್ ಮಾಡ್‍ಚಿ. ಪುಳು ಅಂವೊನ ತಿಂದಗುಂಡ್, ಅಂವೊ ಚತ್ತ್ ಪೋಚಿ.
24ಆಚೇಂಗಿ ದೇವಡ ವಾಕ್ಯ ದುಂಬ ಪಬ್ಬಿಯಂಡೇ ಇಂಜತ್.
25ಬಾರ್ನಬ ಪಿಂಞ ಸೌಲ, ಅಯಿಂಗ ಯೆರೂಸಲೇಮ್‍ಲ್ ಮಾಡ್‍ವಕ್ಕುಳ್ಳ ಸೇವೇನ ಪೂರ್ತಿ ಮಾಡ್‍ನ ಪಿಂಞ ಮಾರ್ಕ ಎಣ್ಣುವ ಇಂಞೊರ್ ಪೆದವುಳ್ಳ ಯೋಹಾನನ ಕಾಕಿಯಂಡ್ ಯೆರೂಸಲೇಮ್ಂಜ ಪುನಃ ವಾಪಸ್ ಬಾತ್.
Àwon tá yàn lọ́wọ́lọ́wọ́ báyìí:
ಅಪೊಸ್ತಲ 12: ಕೊಡವ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2017, New Life Literature (NLL)