Luke 20
20
NAKATA 20
Jesus hakugigmanganlunin inuit apekhiyun
(Mt. 21:23-27; Mk. 11:27-33)
1Ilaani Jesus angayyuvikpagyuamiitillugu ilihauyyivluni ukauyyivlunilu unipkainik inungnun tapkua angayyuvikpagyuakut ataningit, tiitigaktillu, inuit atanikpaillu tapfumunga upangniktun 2ukautivlugu, “Kia havakuyaatin hapkuninga kia pitkuyaatin? ukautitigut.” 3Kiuyain, “Uvangatauk apeginahualektapfi, ukallautihinga, 4Johnim baptaiegutaa nakin piva, Godmin inungninlunin?” 5Tapkuali apekhuivlutik ingmingnik ukaktun, “Ukagupta, 'Godmin' ukangniaktuk, 'Hug ukpegingitpakpihiuk?' 6Ukaguptalunin 'Inungnin', inuit tamangmik millugniaktaatigut uyaganik John nalautaiyiunahugivagamitku. 7Talva naunaktumik kiuyaat nakin pimangan. 8Jesusim ukallautiyain, “Uvangalu havakuiyiga ukautigiyunaitaga.”
Hivuniunek ahiakagvikun
(Mt. 21:33-46; Mk. 12:1-12)
9Talva Jesus ukallautinahualektuk inungnun uminga hivuniunengmik, “Inuk ahiakagvikhaminik havaktuk, aahin havaktit munakhikugamigit aullaktuk nunamun allamun utekhimaitumik kilamik. 10Katihivik tikinman, tapfuma kivgani tiliyaa havaktinun ahianiktukuvlugu ahiakagvingmin. Havaktilli kektuktagaluangat aullaktitugu tunihihimaitumik. 11Aahintauk inum kivgani alla tilingmagu havaktit kektukpagat tamnatauk naglikhaktitugu igitugu tunihihimaitumik. 12Aahin kivgak pingahuat tiliyauman, tapkua aanektaat igitugulu. 13Kinguagun atanek ahiakagvingmun ukallaktuk, 'Tayya kanuk piniakkik? Ilaa engniga nagugiyaga tiliniagiga tapkua nangakuvlugu.' 14Havaktilli takugamitku tamna ingmingnik ukallaktun, 'Tamayya kinguvaghekhiyi, takki tukulakput tapfuma kinguvakhainik pikuvluta.' 15Tapkua anipkagamitku tamna ahiakagvingmin inuktagiyaat. Talva ahiakagvilik tikitkumi havaktinun huliniakka? 16Ila tikiniaktuk tukutkuvlugit havaktit havakukuvlugit allat ahiakagvimini.” Tapkua tuhaayun tuhaagamitku tamna ukaktun, “Godim tamna pitailugu” 17Jesusim iigivlugit ukallaktuk “Kanuk una tiitigakhimayuk, 'Uyagak igitauhimayuk igluliuktinin iglukpaum kiglingata ataani iliyauyugaluak'? 18Uyagagmun tapfumunga inuk katakpiagumi ahigugniaktuk, inmilu uyagak iyukakumi inugmun navingniaktaa tapfuma uyakam. 19Tapfumanilu tiitigaktit angayyuvikpagyuakut ataningita tigunahualektaat Jesus ekhigiyagaluangit inuit. Ilihimagaluaktun Jesusim unipkautigimatik tapkua hivuniunengmi.
Inuk akilekhiyukhaumangan maninik Caesarmun
(Mt. 22:15-22; Mk. 12:13-17)
20Talvangaanin iigivagaat Jesus tilivlugit apekhuiyun inuit ilumukhektukhutik ukauhiit ihuigiyumavlugit imakaagiyumavlugulu inuit ataningningnun, atanengmunlu. 21Tapkua apegiyaat, “Ilihauyyi, ilumugavin ilihimagaluaktugut ukauyyigavin ilihauyyivlutillu ilumuktumik, ekhigingitgaluakhugit inuit tamaita. 22Caesarmun maninik akilekhigupta naamakpa naamangngitpalunin?” 23Jesusimli tapkua apekkutikhain ihuigigamigit ukaktuk, 24“Maniuyagmik takupkaktilanga. Umani kia niakuguanga atingalu una?” Ukaktun, “Caesaum”. 25Ukallautiyain, “Talva Caesaum piyutainik tunihigitti Caesarmun, Godimtauk piyutainik tunihigitti Godmun.” 26Tapkuali inuit takuangngi ihuigilimaekpiaktaat ukauhiagun, aahin kiuyyagikpiangman tapkununga agligutakpiaktun nipliyuikivlutik.
Apekkut tukungayun makiyyutaitigun
(Mt. 22:23-33; Mk. 12:18-27)
27Tapfumani Sadducekut upaktaat. Tapkua tukungayun inupkaktaulimainahugiyain. 28Aahin apegigamitku ukallaktun, “Ilihauyyi, Moses tiitigakhimavaktuk imaatun, angutim angayua tukutpan nutagaitumik nuliani kimakhugu, tapfuma tukungayum nukaata nuliagiyakhagiyaa angnak kimakhimayuk nutaganikuvlugu angayua pivlugu. 29Ilaa uvaptingni nukagit 7nguyun itpaktun. Hivullik nulianikaaktillugu tukuyuk, nutagaitumik 30tugliatalu, 31pingahuatalu nuliagiyaa tamna nutagaitumik, allat tamangmik pivaktun tukuvlutik. 32Kinguagunlu angnak tukuyuktauk. 33Tukungayun makilviani talva kia nuliaginiakkauk? Nukagit 7n tamangmik pihimayagaluangat.” 34Jesusimli ukallautiyain, “Inuit nunamiitun nulianikpaktun uinikpakhutik, 35inuilli tapfumani tukungayunin makiktitaugumik naguvlutik nulianiyunaektun uiniyuitkivlutiglu, 36aahin tapkua tukukigunaektun ihalguliktun-itniagamik Godim kitungaginmagit inupkaktitauvlutik. 37Tukungayun makiktitauhungumata Moses ilihauyyiyuk unipkautigigamiuk ukpik Atanek taivlugu Abraham Godinganik, Isaacimlu Godinganik, Jacobimlu Godinganik. 38Tukungayun God Godigingitaat, inuyun kihimi, tapfumunga tamangmik inugamik.” 39Tiitigaktit ilait kiuyun, “Ilihauyyi kiuyyagikpiaktutin.” 40Talvagaanin kanguhukpallaagamik apekhingitun tapfuminga.
Apekkut Messiahkun
(Mt. 22:41-46; Mk. 12:35-37)
41Jesusim ukallautiyait, “Kanuk ukaktauvat Davidim Christ engnigivagnahugivlugu? 42David inmi ukakhimangman Psalmni,
'Atanek atanimnun ukallaktuk, Talekpingma tunganun ingitin,
43akigatin itigakpit ataanungautikaaktinagit.'
44Davidim tamna taigamiuk atanengmik, kanuk engnigivauk?”
Jesusim tiitigaktit ihuigiyain
(Mt. 23:1-36; Mk. 12:38-40; Lk. 11:37-54)
45Inuit tamangmik nallautillugit Jesusim maligutini ukallautiyain, 46“Upingakhitailuhi tiitigaktinin, pihugumainakpiangmata annugakaktillugit takiyunik, hallutauyumavlutik inungnin niuvaavingni, atugvingnilu ikhivautait nagutkiat atugumainaktun negikataugagamiglu atanekpaini. 47Tapkuali uilgaktun piyutain aagiyain piyutigivlugit, kengakpakhutik amihumik ilumukhektutun-ilivlutik pivaktun. Tapkua ilaa ihuigiyaukiyauhunguyun.
Àwon tá yàn lọ́wọ́lọ́wọ́ báyìí:
Luke 20: Sperry
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©1972 Canadian Bible Society
