Luke 18
18
NAKATA 18
Hivuniunek uilgaktukun uktuktikunlu
1Talva Jesusim inuit ukautiyain hivuniunengmik tapkua kengainakuvlugit nutkakhimaitumik. 2Ukallaktuk, “Iglukagvingmi uktukti ituk ekhiungitpiakhuni Godmun inungnunlunin, 3takananilu angnak uilgaktuk naiyuktuk tamanlu uktuktimun pulaakatakpiaktuk tukhiagvigivlugu ukainakhuni, 'Akihaktuglanga akigamnin' 4Hivungani tamna tuhaayumangngitpiaktuk angnangmun, kinguagunli inminik ukallaktuk 'Uvanga ekhigiyuitkaluaktillugit God, inuillu, 5uilgaktuk tamna atanguhekpallaaman uvamnun akihaktugniagiga unagukpallaanakhavunga tukhiagutaitigun.' ” 6Atanek ukallaktuk, “Tamna uktukti nagungitkaluakhuni ukangman taimaitumik nalaugitti, 7Godimtauk pilluani akihaktugunaitpagit kukuakpiangmata inminun uvluk taman? Ikayuknahangniakka tapkuninga? 8Ukautigipfi, kilamik akihaktugniaktain. Inum engnigali nunamun tikitkumi katkangniakka ukpegnengmik inungni?
Pharisekun manilekhiyikullu
9Aahintauk Jesusim una hivuniunek unipkautigiyaa inuktigun ingmingnik nagunahugimata hukauneknahugivlugit allat. 10“Angutik malguk angayyuvikpagyuamun itekatigiktuk kengagiaktugumavlutik, aipa Pharisekut ilangat, aipangali manilekhiyiuyugaluak. 11Pharisek tamna nangekhuni inminik kengaktuk imaatun, 'God kuyagigipkin inuktitun allatun-itnginama, tuhuyuktutun, ilumugngitutunlunin, allatuyuktutunlunin, ikumatunlunin manilekhiyitun-itnginama kuyakpiaktunga. 12Sundailgulmi negitailingnaktunga malguektukhunga, tamaiyamnin tamainin ilagingnik tunihivaktungalu.' 13Manilekhiyili aahivakiyauyumi kilangmunlunin aglugumangngitugaluak kanguhukpallaagami hakianili patekhugu ukallaktuk, 'God, nagliginga huinekitukpiagama'. 14Ukautigipfi, tamna aivaktuk ihumagiyauyunaekiyauvluni aipaminin, Kinalika inminik ataniukiyauyumagumi kanguhuktitauhunguyuk, inugli inminik anangayangitkumi ataniukiyauhunguyuk.”
Jesusim nutakat naguguktitain
(Mt. 19:13-15; Mk. 10:13-16)
15Talva inuit nutakatik kagitiyain Jesusmun aktuinakuvlugit, maligutaitali takugamitigit pitailiyagaluangit ihuakakhugit. 16Jesusimli tapkua inminun kaitkugamigit ukaktuk, “Nutakat uvamnun kailit aahivaktailugit tapkua Godim atanguvia naminigimayyuk. 17Ilumun ukautigipfi, kinalika Godim atanguvianik pingitkumi nutagaktun tapfumunga itegunaituk.”
Manigiektuk aiyukalektuk inuhengmik nungulaitumik piyumagumi
(Mt. 19:16-30; Mk. 10:17-31)
18Talva atanguyauyuk kaivluni apekhiyuk Jesusmun, “Ilihauyyi naguyutin, humik piniaktukhauvik inuhengmik nungulaitumik pikakuvlunga?” 19Jesusim ukallautiyaa, “Hug naguyumik taivinga? God kihimi naguyuk. 20Pitkuyainik ilihimagaluaktutin, 'Allatuktailutin, inuaktailutinlu, kukitailutinlu, ikutailutinlu nuakatikun, angutin angnanlu nagugilugik.” 21Tamna ukallaktuk, “Hapkua pitkuyain tamaita malikpaktagaluatka inuhuktutimnin.” 22Jesusim tamna tuhaagamiuk ukallautiyaa, “Atauhengmigli pingitkaluaktutin. Tamaiyatin tamaita niuvgutigikit ilingayun aitukuvlugit taima pitkutinik akituyunik pikakhunguyutin kilangmi, aahin kaigiagin maliglunga.” 23Tapfumali tamna tuhaagamiuk kuviahugunaektuk pikutain amigaitpiangmata. 24Jesusimlu iigigamiuk ukaktuk, “Manigiektum tikiyyutaa Godim atanguvianun aiyungnakpiaktuk. 25Negyuk camel mitkutim iyagun itegluni tapfuma itegvikhaa aiyungnaitkiak manigiektum tikiyyutaanin Godim atanguvianun.” 26Tapkua tamna tuhaagamitku ukaktun, 'Kinatauklunin annauyyauniakka?” 27Ukaktugaluak, 'Hullika inungnun piyuminaktpiaktuk Godmunli tamna piyuminaitpiaktugaluak.”
28Peterlu ukaktuk, “Ilaa uvagut igluvut kimaktavut malikuvlutin.” 29Ukallautiyainli, 'Ilumun ukautigipfi, inum igluni, nuliyanilu, katangutinilu, angayukanilu, nutakanilu kimagumigit Godim atanguvia pivlugu, 30tapkuninga pikangniaktuk amigaektugluni tayya, ilaanilu inuhengmik nungulaitumiglu.
Jesus ukagiaktuk pingahuanik tukuyyutimigun
(Mt. 20:17-19; Mk. 10:32-34)
31Jesusim 12n ilagigamigit ukallautiyain, “Ilaa Jerusalemungaulektugut, nalautaiyit ukauhiit tiitigautigimayyuk Inum engniga, ilumukuvlugit. 32Tamna tuniyauniaktuk Jewmiungitunun, tapkua mitautiginiaktaat naglikhaktitumavlugu tivguaktugumavlugulu, 33aahin ungulakhunguyaat tukutumavlugulu, uvlugli pingahuangni makiktitauniaktugaluak.” 34Tapkuali tapkuninga kangekhiyuitugaluit ukakhimayain naunaktutun-ilivagmata tapkununga.
Angut takpiituk takpikhipkaktauyuk Jesuskun
(Mt. 20:29-34; Mk. 10:46-52)
35Jerichomonlu Jesus tikilektillugu inuk takpiitpiaktuk apkutim hanianiituk tukhiakhuni. 36Tamnalu inugiektumik tuhaagami apekkutigiyain. 37Inuit uniutiyaat ukakhutik, “Jesus Nazarethmiutak apkuhainalengman.” 38Takpiituglu tukhulauktuk “Jesus Davidim engniga, nagliginga” 39Inuillu hivulliuyun tanektaat nipaekuvlugu tamnali nipikuktuyumik tukhulaukpaktuk “Davidim engniga nagliginga” 40Jesusim nutkakhuni tahiuktaukuyaa inminun, kainman apegiyaa, 41“Humik piyumavin uvamnin?” Tamna ukaktuk, “Atanek, takpikhipkaktauyumavlunga.” 42Jesusim ukallautiyaa, “Tautuglegin ukpegnivit naguhipkagmaatin”. 43Tayyainaglu tautuglektuk maligahuakhugu kuyagivlugu God. Inuit tamangmik takugamitku kuyagiyaat God.
Àwon tá yàn lọ́wọ́lọ́wọ́ báyìí:
Luke 18: Sperry
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©1972 Canadian Bible Society
