Havaangit 2
2
NAKATA 2
Anengnek Naguyuk tuniyauyuk
1Pentecostim uvlua tikittuk. Tapfumani tapkua katimalektillugit, 2tayyainak nipi kilangmin kaitauyuk anugigaaluktun-ilivluni tatattugu iglu ikhivaktillugit. 3Tapkunungalu ingnit ukaktitun hagyaektun avittugit tikittain atuni. 4Tamangmiglu Anengnimik Naguyumik ilumektauyun ukagahualekhutik allatun Anengnim Naguyum ukaktimatik.
5Tapfumanilu Jerusalemi Jewmiut naguyun akuihimavaktun nunanin tamainin. 6Tamna nipi tuhaanagman inuit amigaitun katimalektun agligutakpiakhutik atuni tuhaagamik inmitun. 7Kuglukpiagamik agligutakhutik ukainaktun, “Tapkua ukayuktun Galileemiungilat? 8Kanuk tapkunanga tamapta tuhaalekkita uvaptitun atuni? 9Uvagut ilavut Parthiamiun, Medemiullu, Elamiullu, Mespotamiamiullu, Judeamiullu, Cappadociamiullu, Pontusmiullu, Asiamiullu, 10Phyrygiamiullu Pamphyliamiullu, Egyptmillu Cyrenean Libyam nunaanillu, allat akuihimayun Romenin, 11Jewmiut, ukpeguhuktuntauk Jewmiutun, Cretemiullu, Arabiamiullu. Kanuk tamapta tuhaalektugut tapkunanga ukalengmata uvaptitun Godim havaangit alianaktun pivlugit” 12Tamangmik agligutakpiaktun kuglukpiakhutik ingmingnik apekhuivlutik, “Una kanuitpa?” 13Alla ukpektaitun ukaktugaluit, “Tapkua imiinakpallaagamik wainmik nutaamik.”
Peter ukauyyiyuk Anengnivilingni
14Petermli, 11n nangekatigigamigit, nipikuktuyumik ukautiyain, “Judeamiun, tamapfilu Jerusalemilegapfi tayya, naunaitumik ukagviginiagapfi tuhaayyavapfinga. 15Hapkua angutit imingngitpiaktun, taima ihumagaluaktilluhi, uvlaami 9mungaglihangman, 16nalautaiyim Joelim ukautigiyagaluanga una imaatun.
17'Uvlut kingullit tikitpata, God ukaktuk, Anengniga aitutiginiagiga inungnun tamainun. Engnihi, panihilu hivuniugiyaktiakhunguyun, inuhuktullu hagyaektunik tautugniaktun, inukuallu hinnektukhunguyun.
18Kivgamnullunin angutinun, angnanullu Anengniga aitutiginiaktaga tapkua uvlut tikitpata, hivuniugiyaktiakhunguyullu.
19Aahin kuglugnaktunik takupkaihunguyunga kilangmi, naunaituniglu nunami ataani, augmik, ingnegmiglu taaktumiglu paulingmik.
20Hikeneglu taakhiniaktuk, tatkiglu auktunitniaktuk, Atangum uvlua tikitinagu, tamna uvluk kuglugnakpiaktuk akhun.
21Talva kinalika kukuakumi Atangum atianun annauyyauniaktuk.'
22“Israelmiuyuhi, uvamnun tuhaagitti; ukautigilektaga Jesus Nazarethmiutak, inuk naunaekhimayuk Godmin ilipfingni hapengnaktutigun, aglingnaktunik naunaituniglu pivagami ilipfingniitillugu, tamna ilihimayakhi. 23Tamna inuk ilipfingnun tuniyauhimayugaluak God pipkaivangman ilihimavluni, ilipfilu pitkuyatin naluyun kikiaktuktaukuvlugu tukutaukuvlugulu tapkununa. 24Godimli Jesus annautitpagaa tukuyyutaata kapianangningaanin, makittitugu, tuku tigulimaimagu tamna. 25Davidim ukautigiyaa imaatun,
'Hivumni ihumangingnaktaga Atanek, talekpimniiman kuglugnakhavunga.
26Talvunga umatiga kuviahukpiaktuk, ukagalu aliahukpiakhuni, aahin timiga naguyumik negiugniaktuktauk,
27napatiga kimagunainangni napatikagvingmi, kivgaglu naguyuk nungutitautailiniaktantauk..
28Aahin naunaekpagatin apkutit inugutilgit uvamnun, kuviahuktitangmalu uvamniihimagavin.'
29“Katangutitka, naunaitumik ukautigipfi hivulliptigun Davidkun. Tukuvaktuk iluvektauvluni, iluvgaalu nunaptingniituk uvlumi. 30David nalautaiyiuyuk ilihimavaktuk kingullini ilangat ataninguktitauhunguman, God taimatun inminun ukagiakpangman. 31Talva inmi ilihimavaktuk ukagiakhuni Christim makiyyutagun ukakhuni 'Kimaktauyunainman napatikagvingmi' aahin timagun 'nungutitauyunainmanllu'. 32Tamna Jesus Godim makittitaa, tamaptalu tapfuminga ilihimayiuyugut. 33Talva maiyuktitaukaktillugu Godim talekpianun pigamiuglu Anengnek Naguyuk ukagiaktauyuk Angutiminin, aituktuk ilipfi takuyapfingnik tuhaayapfingniglu tayya. 34David ilaa inmi maiyukhimangngitpiaktuk kilangmun. Inminik ukaktuk,
'Atanek Atanimnun ukallaktuk, Talekpingma tunganun ingitin,
35uvanga akigautin ilitinagit itigavit ataanun.
36“Talva Israelmiut tamangmik ilihimalit tamanik, Godim Jesus Ataninguktimagu Christguktitugulu, tamna ilaa ilipfi kikiaktukpagakhi.” 37Inuillu tamna tuhaagamitku kuviagunaekpiaktun umatimingni ukallautivlugit Peter apostleslu allat, “Katangutitka, huliniakkita?” 38Peterm ukallautiyain, “Ihumaliukigitti tamapfi baptaiektauluhilu Jesus Christim atianun huinekutihi ihumagiyauyunaekuvlugit, aituhiakhunguyuhilu Anengnimik Naguyumik. 39Tapfuma ukagiyauta pinagialik ilipfingnun kitungapfingnunlu tapkunungatauk tamainun ungahikpiaktumiitunun, tamaitalunin Atangum Godipta kaitkupagit.”
40Ukauyyiyuk allanik amigaitunik akhun ukakhuni, “Annauyyauhimaluhi hapkunanga inungnin umalektunin tayya huinekivallaamata.” 41Talva tapkua Peterm ukauhiit nagunahugigamitigit baptaiektauyun, tapfumanilu inuit 3000guyun ilauvaktun ukpekatigiktunun.
Ukpeguhuktun pitkuhiitigun
42Tapkualu ilihainaktun apostlit ilihauyyutainik, naiyukatigikhutik atautikun, negikatigikhutiglu kengakhutiglu. 43Tamangmik agligutakpiaktun, naunaitunik hapengnaktuniglu apostlit pimata. 44Ukpeguhuktun itkatigiktun tamaiyaillu pinagialgit tamainun kuyagingnakhutik. 45Tapkualu pikutitik niuvgutigiyain, iglutiglu, tunipkaivlutik tamainun ikayuktauyukhauyunun. 46Uvluk taman angayyuvikpagyuami katimavaktun, iglumingni negivakhutik, negivlutik kuyahuktillugit, 47God kuyagivlugu nagugiyauvlutiglu inungnin tamainin. Uvluk tamanlu tapkununga annauyyaulektun allat ilaulektun Godim pitkumatik.
Àwon tá yàn lọ́wọ́lọ́wọ́ báyìí:
Havaangit 2: Sperry
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©1972 Canadian Bible Society