SAN MATEO 21

Akxni tanuchalh la'acha'an Jerusalén an Jesús

(Mr. 11:1-11; Lc. 19:28-40; Jn. 12:12-19)

1Akxni waniycha ixtacha'ant'ajun la'acha'an Jerusalén, chi ixtacha'antacha la'acha'an Betfagé, a'stitawk'acha ixtat'ajun tan junkan Laka Olivojnin, an Jesús jamala'achalhcha ixt'uyunk'an ixt'alhtanan. 2Jajuniy:

―K'ap'inchi'it an tan tasuy la'acha'an, k'ala'ch'ip'ina'it ch'iyawkanta la'atam xanati burro chi t'ayalh ixjas'at'a, k'ax'ot'iya'it'it chi akilalhiminiyawi an la'at'uy. 3Li xamati tu'u tajunan, k'a'una'it li yucha an Jamach'alhkati jama'lhtask'iniy, li wa tukan kajaxta'nicho'oya'.

4Tacha ani tapasalh, para li kawalhi tacha an ixnajunta an yu ixlichiwiniy ixchiwinti Dios, akxni nawlh:

5K'a'uni an istsi la'acha'an Sión:

“La'mintancha amiRey, yucha jantu ayajk'atsay,

puminta la'atam burro, jas'at'a burrojo puminta,

ixjas'at'a la'atam jatapakxat yu mak'uk'anan.”

6Pus an ixt'alhtanan an Jesús, ta'alhcha, chi chunchacha ta'ilhtulh tacha an jajunilh. 7Talhiminilhcha an xanati burro chi an xajas'at'a, talak'aymuk'anilhcha ixla'la'ch'itk'an chi yucha putawk'alhcha. 8Chi mu wanajcha lhilhuw, ixtamamaniycha ixla'la'ch'itk'ani an laka tij, chi an ali'in ixtala't'e'e'iycha xax'oy k'iw, ixtamamaniycha an laka tij. 9An yu ixtap'ulanan chi an yu astan ixtamintachalh, ixtalhit'asaycha, ixtalaknajun:

―¡Alhp'asi an isTs'alh David! ¡Oxi yu an Dios makminta! ¡Hosanna kanawkalhi an lakt'iyan!

10Akxni tanuchalhcha la'acha'an Jerusalén an Jesús, chux an lapanakni an yu ancha jamacha'an sawalhcha ixtalhakapu'an, ixtalaknajun:

―¿Tisiyuchacha aniya?

11Pus an ali'in lapanakni tanajun:

―Ani Jesús, yucha lhichiwiniy ixchiwinti Dios, jamacha'a Nazaret, xalakaat'un Galilea.

Yu ixtajast'anan laka tajtan

(Mr. 11:15-19; Lc. 19:45-48; Jn. 2:13-22)

12Tanuchalhi laka tajtan an Jesús, jalakxkawxtu'olhi an yu ixtajast'anan chi ixtajatamawnan laka tajtan. Jala'ma'pusp'itni'olhi an ixmesajk'an an yu ixtamapaxay tumin chi an ixtants'ik'an an yu ixtast'ay paloma. 13Jajuniy:

―Ts'o'muk'akanta tan najunta: “An kincha'a putapaynin cha'a kajunkana'”, walh uxitnan wa mimpa'alhawnachak'ani ilht'ut'at'it.

14Ixli'astan an laka tajtan, an Jesús tala'cha'alh yu wa la'la'lhtulu'un chi yu wa lakch'anlht'ulukun, chi jak'uch'ulhcha. 15Walh an xalaj'ajin sacerdotejnin chi an xamaestrojnin lhamap'a'sin, mu ixtala'ts'incha tacha an laj'oxi tanlhun ixlak'ilhtuy an Jesús, chi ixta'asmat'acha li an jas'at'an ixtalhit'asaycha an laka tajtan, ixtalaknajun: “¡Jama'alhtaxtununi an ists'alh David!”, pus talhitalh'amalh. 16Chi tajuniy an Jesús:

―¿Asmat'a tacha an talaknajun?

An Jesús jajuniy:

―Chun, ik'asmat'a. ¿Jant'u a't'am p'unawt'at'iti tan najunta?:

La ixmilhpatk'an an jas'at'an chi an lakt'ikt'inka yu tats'ik'iyka

ilht'u li oxi katamilhpanin.

17Pus jalaj'oslicha an Jesús, taxtulhcha an la'acha'an, alhcha la'acha'an Betania, anchacha la'akujchalh.

Tan xixli xak'iw higo

(Mr. 11:12-14,20-26)

18Wats'isin ancho'olhcha an tan ay la'acha'an, walh chawanalhcha. 19Chi waniy an laka tij la'ts'ilh a'atam xak'iw higo, pus alh, pero jantu tu'u la'cha'aninilh xajatawk'at, wa si xax'oy, chi juniy:

―¡Jantu a'tam katawk'anini mijatawk'at!

Walh watukan xixli an xak'iw higo. 20Chi mu tala'ts'incha an ixt'alhtanan, talhi'a'niycha, tajuniy:

―¿Tasu li wa lascha xixli an xak'iw higojo?

21Pus an Jesús, jajuniy:

―Iklajunaw, li jak'iklak'a'ininat'it sawalh, li jantu wa tamj tamjcha p'ast'ak'at'it, jantu wa tacha ani k'ilhtulh an xak'iw higojo k'at'i'ilht'ut'it, layi k'a'una'it ani a'stitawk'a: “K'a'ost'i, an alamalhcha k'at'a'uchi',” chi kajuna'. 22Chi wa tuchicha k'at'ap'aynisk'ina'it, li jak'iklak'a'ininat'it, k'axt'a'nik'ana'it'it.

Ixlasakmintik'an xalaj'ajin sacerdotejnin chi yu laktatanincha

(Mr. 11:27-33; Lc. 20:1-8)

23Akxni cha'alhcha laka tajtan an Jesús, an xalaj'ajin sacerdotejnin chi an laktatanincha yu ancha jamacha'an, tala'cha'alhi akxni ixmasut'ajun, chi tajuniy:

―¿T'asu li ch'unch'ach'a lay lak'ilht'uy ani tanlhuni? ¿Tisiyuchacha makawniyan li k'alak'ilht'u?

24Yucha ja'alhtaylh jajuniy:

―Wachu aklalhisakmiyaw la'atam chiwinti, li akilajunaw, wachu aklajunawi tuchini laycha chuncha iklhilak'ilhtuy ani tanlhun. 25Tacha an ixjama'paxanan an Juan, ¿tisiyuchacha ixlijuniya, Dios u wa yucha an lapanaknicha ixtalhijuniy?

Pus wa chuncha tsukulhcha talhilakchiwiniy, talajuniy:

―Li kajunaw li Dios, akintajunan: “¿P'us ch'i li jant'uch'a k'iklak'a'it'iti?” 26Chi li kajunaw li wa yu'uncha an lapanaknicha ixtalhijuniy, jalhitalhamniti an lapanakni, mu ixchuxk'ani takiklaka'iy li an Juan ixchiwinti Diosi ixlichiwiniy.

27Pus tajuniy an Jesús:

―Jantu ijk'atsayaw.

Pus yucha wachu jajuniy:

―Wachu jantu aktilajuniwi tuchini chunchacha lay iklhilak'ilhtuy ani tanlhun.

Pulhamacha'xan ixt'uyunk'an ts'alan

28’Chi, ¿t'asuch'a lhiwilayat'iti? Pumatam lapanak ixjalhit'ajun ixt'uyunk'an ists'alan, chi an lapanak juniy an xapumatam ists'alh: “Kints'alh, k'ap'inchi tapatsana an tan ikch'anta ki'uva.” 29An ts'alh alhtaylh an ixpay, juniy: “Jantu ijk'uxa'an.” Pero ixli'astan, astan nawlh, chi alh. 30Chi an pumatam ts'alh wanajcha chuni junkan li ka'alh tapatsana', yucha najun: “Chuni kimpay, ak'ana'.” Pero yucha jantu alh. 31¿Ani ixt'uyunk'an ts'alan, tisiyuchacha yu ilhtulh an yu jalhijunilh an ixpayk'ani?

Ta'alhtaylh an Jesús, tajuniy:

―Yucha an p'ulhnaj junikalh.

Pus an Jesús jajuniy:

―Klajunaw li an yu talaklhach'inin tanlhun lhimapalhlhi'at chi an wa aya talay t'akunin, tatap'ulhniyani tatanuyachalh an la ixlich'alhkat Dios. 32Mu takimasunichincha an jama'paxanaj Juan yu oxi tij, walh uxitnan jant'u k'iklak'a'it'it, apalij yucha an talaklhach'inin tanlhun chi an wa aya talay t'akunini takiklaka'ilh. Pero uxitnan masi chuxi la'ts'in'o'ot'it, jant'u mak'a'unt'iti mintala'alhink'an, jant'u k'iklak'a'it'it.

Laj'ayajk'atsanin lapanakni

(Mr. 12:1-12; Lc. 20:9-19)

33’K'a'asmatp'alat la'atam pulhamacha'xan: ixt'ajun pumatam jamalakaat'un lapanak, yucha ch'anlhicha ix'uva chi kurralhnulhcha, chi ilhtulhcha tan kapach'itkana an uva, chi yawlhcha a'atam torre, yu palhistakna.

’Chi ixli'astan jamach'ixta'nilhcha tichi yu'uncha lapanakni an ixlakaat'un, chi yucha alhcha ma'at. 34Akxni chilhcha ixpaku an uva, jamala'achachalhcha ixma'tsukunin an jamalakaat'un lapanak, para li an yu jamach'ixta'nita ixlakaat'un kataxta'nilhcha yu ixnawin. 35Pero an yu jamach'ixta'nikanta lakaat'un, t'o' tach'apa'ochalhi an ixma'tsukunin an jamalakaat'un: pumatam stakcha talakasamalh, an pumatam tama'nilhcha, chi an pumatam stakcha talakat'alhmalh. 36An jamanawin lakaat'un a'tam jamala'achapalhchalhi ali'in ixma'tsukunin, palaycha ixluwk'an, pero an yu ixjamach'ixta'nikanta lakaat'un wanajcha chuni ta'ilhtupalh.

37’Ixli'astan makminchalhcha yu ists'alh an jamalakaat'un lapanak, mu ixnajun: “Ani mu kints'alh, kata'asmatniya'.” 38Pero akxni tala'ts'ilhcha an ists'alh, an yu ixjamach'ixta'nikanta lakaat'un, talajuniy: “Yucha anicha yu jamanawin kajuncho'oya an lakaat'un. Kama'niw, walh ki'anuchak'ani kajuna an yu ixnawin ka'ixwalh.” 39Pus tach'apachalh, tatamakxtulhi an tan ch'ankanta uva, tama'nilh.

40’Chaway akxni kamina an jamanawin an tan ch'ankanta uva, ¿t'asuch'a lhiwilayat kaja'ilhtuya an yu tatapatsay tan ch'ankanta uvaja?

41Yu'uncha ta'alhtaylh, tajuniy:

―Kajama'ni'oya', jantu k'is katijamak'akxanilh, chi xamati'incha kajamach'ixta'nicho'oya an ixlakaat'un, yu kataxta'niya wa tukani yu ixnawin akxni ixpakucha an ix'uva.

42An Jesús jajuniy:

―¿Jant'u a't'am p'unawt'at'iti an tan ts'o'muk'akanta?, tan najun:

An chiwx an yu wa tala'amaj'alh an yu tayajuy cha'a,

apalij yucha yu palay lhitapalay chaway.

Yucha an Diosi chuncha ilhtulh.

Chi chaway sawalhcha lhi'a'niyaw.

43Xliyu iklalhijunaw, li uxitnan k'amaxt'unik'ana'it'iti an ixlich'alhkat Dios, chi ali'ini kajaxta'nikana yu taja'asmatnan sawalh. 44Yu la ix'ukxni ani chiwx katamayanta, wanaj lakt'ikt'i kajun'oya', chi yu kaputamaya ani chiwx, wanaj po'xmi kajun'oya'.

45Akxni chunchacha ta'alha'asmat'olh an Jesús, an xalaj'ajin sacerdotejnin chi an fariseojnin, talhimacha'xalhi li yu'uncha ixjalhichiwint'ajun. 46Pus ixtach'apayawputuncha, wa yu tatalhanajlalh, mu an lapanakni an yu ancha jamacha'an ixtakiklaka'iya li yucha ixchiwinti Diosi ixnajun.

Àwon tá yàn lọ́wọ́lọ́wọ́ báyìí:

SAN MATEO 21: tpp

Ìsàmì-sí

Pín

Daako