San Mateo 11
11
1Tti chi uluxani Jesús‑ni utixxi'e bixa anka nu uin ka benne tsi'inu (12) rudhetinieha, nianna tti bedábie ata dueha, nna deyye lhe'e adíru ka yiesi se'e itúba ka daka niha. Lhe'e ka yiesiha ugwekie rule'enie ka benne lhe rigixxi'anie ke ka tisa ge Tata Do Yebáha lhe.
Juan benne rugadi indaha udhelhe ka benne kini ugíake gwannaba tisake Jesús‑ni
(Lc. 7:18-35)
2Atti tee Juan benne rugadi indaha lhe'e lisiyyaha, bine ge nu runi Cristuha. Nianna tti udhelhe ttu chupa ka benne rudhetinieha 3kini gwannaba tisake, ráke bie:
―¿Si lu nuní Cristu benne chi ga'anna isia, o teeki kwedatu attu benne subi ak?
4Jesús‑ni nna bekabie gekani, ree:
―Gwaleyya nna gwalikixxi'en Juan‑ni ge nu chi riyieninle lhe ge nu chi rilenle runia lhe. 5Gwaligá na: Ka nu xua lokinna chiba relákinna lhe ka nu ridá natsa‑na chiba redá tsekana, nna ka nu raka yiesu lepra latikinna nna chigaba reyakakana, lhe anágaba ka nu anka kwechu‑na chigaba reyienkinna nna ka nu chi uttiha nna gwa reyaka bengabakana. Anágaba ka benne dii abittu geke tee chigaba riyienkanie ka tisa ge Tata Do Yebáha. 6¡Karubáru benne abittu rudú chupana lebie de rilánie nu runia‑ni!
7Laka reru'una ka nu rudhetini Juan‑ni deyyakana, nianna tti udulo Jesús‑ni rigixxi'anie ka benne se'e niha, rigixxi'anie ke ge Juan‑ni, ree ke:
―¿Bí biriale gwalannile lo yu bisi ata lanú benne se'e? ¿Si gwagíale ttu yettixtila ruttá beha na ak? 8Ganna abíba nna, ¿núla nuha gwagíale ganna? ¿Si ttu nubiyú nukuna xo tse raka ragalha loni ak? ¡Ko'o! Neti ria, ka nu ruku xo tsekinna, lhe'e lisi ka nu rinnabia xeni‑naliba se'e luesi ka nuná. 9Ganna abíba nna, ¿núla gwagíale ganna? ¿Si ttu profeta ge Tata Do Yebáha ak? Gwalí galá, neti ria, lebi'i biriale gwagíale ttu benne xxenirula ra lebie tti ttu benne anke profeta. 10Ge Juan‑ni nuha rinne Tata Do Yebáha lo ka yetsi geeha tti rulise Xi'inieha, ree benneha:
Neti idhelhaa ttu benne tsie nnerue lolu kini kixxi'e ka tisa kia‑ni.
Benneha idhalie neda gelu.
11Netiru ria: delo iyá ka benne chi uli yiesi lo yu‑ni, labí chi biria ttu benne ra xxeniru lebie tti Juan benne rugadi indaha. Ttaka delo iyá ka benne rinnabia Tata Do Yebáha, benne ra gwexxaru leeha, xxenirula ra lebie tti Juan‑ni. 12Juan‑ni, ttili uduloe rigixxi'e ka tisa ge Tata Do Yebáha nna axtaba nnanna ixeba ka benne ruinke doelha akake benne innabia Tata Do Yebáha ke meskiba ttixa rateke nna sunruba ka benne re tsitsi leke gwa ridaake rakake benne rinnabie. 13Kumu iyába ka profeta ge Tata Do Yebáha lhe bia bennabi bodha'an Tata Do Yebáha len Moisés‑ni, debá nnanna do Juan‑ni gwa rigixxi'aruke ge nu aka. 14Naba lebi'i ganna si gweyya lele ge nu ria‑ni, Juan‑niba nuní anke Elías benne chi ga'anna esie. 15¡Ata sia nagale, gwaludo nagale ganna gwankale nu dika iyienini!
16’¿Bí len utsania ka benne se'e nnanna? Ka benne se'e nnanna ankake attiba ka nuto rise'ekana rittakana ata raka i'iya‑na ribesi'en luesikani, rákana: 17“Ri'itu gwa bekwesibatu ka iyyaxtila getu‑ni, ttaka lebi'i nna abígaba beya'ale, lhe anágaba gwa bilhagabatu le'a ge ka benne yattiha nna lebi'i nna abígaba uresile.”
18’Aná ria, kumu Juan‑ni bisiana, labí ri'a rona, lebi'i nna rálale: “Espíritu ge nu xxegwiha‑ba yu'u lati nuná.” 19Nnanna nna neti benne daya yebáha bisiaya roa lhe ri'iyaa lhe, lebi'i nna redenálale: “Nuní ankana ttu nu ro xxatta lhe ankana ttu nu ri'a lhe. Rutsálana ka gwekixa lhe ka nu ruin tulha lhe.” Ttaka atti rilenri'i elha ruin ge ka xi'in Tata Do Yebáha, la'ania nna rite denri'i deki elha rieni rapa Tata Do Yebáha nuha rapa ka benneha.
Jesús‑ni rigise ka benne se'e lhe'e ka yiesi se'e daka Galilea
(Lc. 10:13-16)
20Nianna tti udulo Jesús‑ni utise ka benne se'e lhe'e ka yiesi ata chi benie ixeru ka milagru. Utise kana kumu labí chi bodúna kana nna odaxxukana neda ge Tata Do Yebáha. Nianna tti ree kana:
21―¡Gwalíchi lele xa benne lhe'esi Corazín, lhe gwalíchi lele xa benne lhe'esi Betsaida! Kumu ganna ttixka lhe'esi Tiro‑ni lhe Sidón‑ni lhe, chi uka ka milagru ka nu chi uka lagwi gele‑ni, ka nuha la nukala chi bodúna kana nna bodaxxukana neda ge Tata Do Yebáha ganna ttixka. Nianna tti uku xo ttipa gekani lhe udelha tee ikikani kini ula'a loo deki chi bodúna kana. 22Netiru ria: La sá atti uin Tata Do Yebáha elhuxtisi ge ka benne, la'ania adírula elha disa tsitsi ugwebie le, lebi'i ka benne lhe'esi Corazín lhe ka benne Betsaida lhe, attichula elha disa tsitsi uyú ka benne se'e lhe'e ka yiesi Tiro lhe Sidón lhe. 23Lebi'i nna ka benne lhe'esi Capernaum, ¿si rakinle deki yebáha‑li eyapile? ¡Ko'o! Neti ria, lhe'e belha'a chulhaha ata uyúle elha disaha‑li iginnile. Kumu ganna lhe'esi Sodoma‑ni uka ka milagru chi uka lagwi gele‑na, la'ania nna yiesiha abittula bise'e lo nuha, sa rerula nuha axta nnanna ganna ttixka. 24Netiru ria: La sá atti uin Tata Do Yebáha elhuxtisi ge ka benne, la'ania adírula elha disa tsitsi ugwebie le, lebi'i ka benne lhe'esi Capernaum attichula elha disa uyú ka benne lhe'esi Sodoma‑ni.
Jesús‑ni raxie ka benne tee elhaxchacha iki geke
(Lc. 10:21-22)
25Nianna tti unne Jesús‑ni ree Tata Do Yebáha:
―Tata, kwinalu ankalu Xxana yebáha lhe yiesi lo yu‑ni lhe. Xxeni ra lelu kumu chi bele'elu iyá nuní len ka benne abittu tte raka geke nna bekatsilu nuní len ka nu yuu lhe len ka nu rite dárukinna lhe. 26Gwalí galá xa Tata, kumu anába uka le kwinalu aka.
27Nianna ree ka benne se'e niha:
―Tata kiaha iyába chi betebie lasi náya lhe anágaba lanú nu gwalíga ankabienna neti benne ankaa Xi'inieha, sunruba Tata kiaha gwankabianie neti, lhe anágaba Tata kiaha lanú nu ankabienna benneha, sunruba neti benne ankaa Xi'inieha gwankabiatie lhe sunrugaba ka benne raka lasia ule'enia ke Tata kiaha kini uinbiake bie.
28’Iyá ttele, lebi'i ata abitturu ruchíale lo nu ratele‑na lhe ata ruchacha xxatta ikile lhe, gwaltá len neti kini neti nna unia ki eyaka lele ge nu ratele‑na. 29Gwaludo tisa ge nu rodha'anaa uinle lhe gwaludheti tti runia‑ni kumu neti ankaa ttu benne re besi lasia lhe labí ra xxeni lasia lhe. Ganna aníha uinle, la'ania nna xen su lasiba edú lele. 30Kumu iyába nu rodha'anaa uinle, labí tsitsi anka nuní, gwadaabari'i udori'i tisa ge nuní.
Àwon tá yàn lọ́wọ́lọ́wọ́ báyìí:
San Mateo 11: zae
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2014, Wycliffe Bible Translators, Inc. All rights reserved.
