Mateo 4
4
Petukso Ni Satanas I Hisus De Ilang
(Mk. 1:12-13; Lu. 4:1-13)
1Pagkatapos di ninon ay inikag ni Ispiritu i Hisus de lugel a ilang tangani sosubukan ni Satanas a petukso. 2Nun duman di eya ay an namangan ni misan ano nun apat a puwu a adow ay dingan natigeng di eya a masakut. 3Ta dinumatong i Satanas a sinabi na diya, “Be ikamo i matud a Anak nun Makedepat ay yediin yu a tinapay i beto ide a oyo.” 4Misan tinubeg eya ni Hisus ni magioyo, “Ay te duman de kasulatan a,
‘An la dehil de pápangan nagkeedup i agta ta de belang surut a geapo de Makedepat.’”
5Ay dingan inikag eya ni Satanas de Herusalem de tibing ni palokoan ni beloy a pighandogen de Makedepat. 6Ta sinabi pa diya ni Satanas, “Be matud kamo a Anak nun Makedepat ay tumagbong kamo gepo dio ta te duman de kasulatan a,
‘Pinagtutugun ni Makedepat de manga anghel na ide tangani aalagean de ikamo. Ta bobolan kamo ni kumot de tangani wet kamo nassingkog de kabetoan.’”
7Misan ay sinabi diya ni Hisus, “Matud ngan non misan ay te duman pala de kasulatan a,
‘Wet mo sosubukan i Panginoon mo a Makedepat.’”
8Pagkatapos ninon ay inikag ni Satanas i Hisus de maditas a masakut a kalasan ta pinasayed na diya i pesan a nasasakopan dio de putok i pati kayamanan dio. 9Ta sinabi diya ni Satanas, “Talage a boboy ko i kapangyedihan ni pesan a oyo dikamo be noluhud kamo a gepodi deko.” 10Dingan tinubeg ni Hisus, “Lumayu ka deko Satanas ta te duman de kasulaton a,
‘Magpodi ka la de Panginoon mo a Makedepat ta diya ka la magtabeng.’”
11Ta dingan winalat eya ni Satanas ta dinumatong pan di i manga anghel ide a tinumabeng diya.
Te Gepo I Hisus Ni Pagyedi Na De Galilea
(Mk. 1:14-15; Lu. 4:14-15)
12Nano ay nun nabereta ni Hisus a nabbilanggo di i Huwen ay inumampulang eya de Galilea. 13Misan an di eya nappataan de Nasarit ta de Kapernam a benwaan de kaginglan ni uluataben a Galilea de lugel ni Sabulan pati Neptali. 14Ta de maginon ay pinamatoden i sinabi ni magsasabi a Isais a,
15“Gesurut ok dikamo a getaan de dipa ni Horden de lugel a Galilea a te makmuk a an Hudyo a ikamo a tage lugel a Sabulan pati Neptali a kadepit de uluataben. 16Gesurut ok dikamo a an te katinggesan tungkul de Makedepat ta magi madumos i esip yu a nagkatakut a ugnay de kalebunin yu misan ay nekita kamo ni kamatoden a tallang ta pepatallang di i esip yu ni Panginoon.”
Inon i sinabi ni Isais. 17Gepo nun nanon ay nagsabi i Hisus ni piyon a bereta ta sinabi na, “Magipinagsosol kamo de mammalotin yu ta nádetong di i panahon a te kapangyedihan i Makedepat de innawa ni agta ide.” Inon i sinabi ni Hisus.
Pepeta Ni Hisus I Apat A Mag-iekan
(Mk. 1:16-20; Lu. 5:1-11)
18Nano ay nun getotul i Hisus de kaginglan ni uluataben a Galilea ay kinta na un aduwa a magwele a i Simon a pengalanan a Pedro pati Andres a weli na ta gesabud ide. Ta ide ay mag-iekan. 19Sinabi dide ni Hisus, “Sumut kamo deko ta ikamo ay yeyedi ko a mag-aakit ni agta tangani nosut pala ide deko a tuloy.” 20Ta nun nanon pala ay winalat de un sabud de a sinumut ide de Hisus.
21Pagkalayu de ni untik ay kinta na pala i magwele a Santiago pati Huwen a mangának ni Sebedeo. Ta ide pati ama de ay gepakapiya ni pokut de nunde bengka de. Ide ay inikag pala ni Hisus 22kanya tambing de a winalat i bengka de pati ama de ta sinumut ide de Hisus.
Magioyo I Pagtodu Pati Pagpapiyon Ni Hisus
(Lu. 6:17-19)
23Nano ay kinumulukang i Hisus de bulubenwaan de sákup ni Galilea a nagtodu eya de pigmitengan ide ni Hudyo ide. Ta nagsabi eya ni piyon a bereta a ti papalano a te kapangyedihan i Makedepat de innawa ni agta pati nagpapiyon pala eya ni agta ide misan ano a orom de. 24Ta kinumálat i bereta a tungkul diya de pesan a lugel de sákup ni Siria kanya inadde de diya i manga agta a te attanan a kalase a orom pati apdis, i te manga libong ide, i nagkopugtusan ide pati lungpo ide ta pinapiyon na ide a pesan. 25Ta inumabut diya i makmuk a agta a tage lugel ni Galilea, Dikapolis, Hudia, benwaan a Herusalem pati lugel de dipa a Orat a Horden.
Àwon tá yàn lọ́wọ́lọ́wọ́ báyìí:
Mateo 4: due
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 1977 Wycliffe Bible Translators, Inc. All rights reserved
