Mateo 1
1
Ke Kepuun ni Hisu Kristu
(Lucas 3:23-38)
1Ini se guhud te kepuun ni Hisu Kristu, kevuwaran ni David wey kevuwaran dema ni Abraham.
2Si Abraham ke amey ni Isaac,
ne si Isaac ne amey ni Jacob,
si Jacob ne amey ni Hudah wey ke menge suled din.
3Ne si Hudah ne amey en ni Paris ki Sara,
(si Tamar ke iney ran);
ne si Paris ne amey ni Iserum,
ne si Iserum ne amey ni Aram;
4ne si Aram ne amey ni Aminadab,
ne si Aminadab ne amey ni Naasun,
ne si Naasun ne amey ni Salmun,
5ne si Salmun ne amey ni Buus
(si Rahab ke iney rin),
si Buus ne amey ni Ubid
(si Ruth ke iney rin),
si Ubid ne amey ni Isai,
6ne si Isai ne amey ni Datù David.
Si David ke amey ni Salomon
(ke iney rin ne esawa rengan ni Uriya);
7Si Salomon ne amey ni Rubuam,
si Rubuam ne amey ni Abiyas,
si Abiyas ne amey ni Asa,
8si Asa ne amey ni Husapat,
si Husapat ne amey ni Huram,
si Huram ne amey ni Usiyas,
9si Husiyas ne amey ni Hutam,
si Hutam ne amey ni Akas,
si Akas ne amey ni Isikyas,
10si Isikyas ne amey ni Manasis,
si Manasis ne amey ni Amun,
si Amun ne amey ni Husyas,
11ne si Husyas ne amey ni Hikunyas wey ke menge suled din. Ini se hewii ne neviyag ke menge Israyil diyà te inged ne Bebilunya.
12Guna su diyà dan en te inged ne Bebilunya ne nevuwad si Hikunyas ne iyan din anak ne si Selatil,
si Selatil ne amey ni Serubabil,
13si Serubabil ne amey ni Abiyud,
si Abiyud ne amey ne Iliyakim,
si Iliyakim ne amey ni Asur,
14si Asur ne amey ni Saduk,
si Saduk ne amey ni Akim,
si Akim ne amey ni Iliyud,
15si Iliyud ne amey ni Iliasar,
si Iliasar ne amey ni Matan,
si Matan ne amey ni Jacob,
16si Jacob ne amey ni Jose, ke esawa ni Maria ne iney ni Hisus ne ed-ingaranan ki Mesiyas, ne iyan din meana ne impasad te Eleteala ne Ebperetuen te langun.
17Ketà be ne igenat ki Abraham taman te kineanak ki David ne sepulù wey epat ne lapis. Ne igenat ki David taman te kinekeviyag dan diyà te inged ne Bebilunya ne sepulù wey epat ded ne lapis. Ne igenat te kinekeviyag dan taman te kineanak ki Hisu Kristu ne sepulù ded dema wey epat ne lapis.
Ke kineanak ki Hisu Kristu
(Lucas 2:1-7)
18Iring kayi se ned-ulaula te kineanak ki Hisu Kristu. Nepesaran en se ed-esawaen ke iney rin ne si Maria ni Jose, ugaid ne warà den pà mekedtimpung ne netuenan ni Maria te mehingey sikandin egenat te gehem te Kedesenan ne Ebpetuntul te Menusiyà. 19Si Jose ini ne egkeesawa rin ne metidtu ne etew, ugaid ne warà din metueni ke engkey se amey rut te vatà. Tembù be nepegitung din se kenà din edleusan te ed-esawa si Maria asal ed-usayen dà te meeles su apey kenà meyeyai si Maria.
20Ne gewii rin te ebpegpegitung kayi ne nekelipereng sikandin ne mibpekita ke suluhuen te Kerenan kayi te tehinep din se egkahi te, “Jose, sikuna ne kevuwaran ni David, kenà ka egkeandek ne ebpengesawa ki Maria su arà se ibmehingey rin ne egenat te gehem dut te Kedesenan ne Ebpetuntul te Menusiyà. 21Ne ed-anak sikandin te meama ne iyan nu id-ingaran ne si Hisus su sikandin ke ebpelihaun te menge etew rin dut te menge salà dan,” ke se suluhuen.
22Langun kayi ne ned-ulaula su apey metuman ke impekahi rengan te Kerenan dut te ebpelambas te lalag din ne egkahi te, 23“Ebmehingey ini se raha ne warà pà mebeyugi ne ed-anak te meama ne iyan id-ingaran ne si Imanwil” (ne iyan din meana ne “Ke Eleteala ne kayi en te kenitew”).
24Guna su nekehimerat si Jose ne midtuman din ke insuhù dut te suluhuen te Kerenan ne mid-esawa rin si Maria. 25Ugaid ne warà din pà uvaya si Maria taman te warà pà mid-anak. Guna su mid-anak en ne mid-ingaranan ni Jose ini se batà ne meama ki Hisus.
Àwon tá yàn lọ́wọ́lọ́wọ́ báyìí:
Mateo 1: mbi
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 1989, Wycliffe Bible Translators, Inc. All rights reserved.
