Mateo 4
4
Sa Pagpanulay Ki Jesus
(Mateo 4:1-11; Marcos 1:12-13; Lucas 4:1-13)
1Inuwit si Jesus hu Balaan ha Ispiritu duun hu pinakabulung-bulung ha lugar ta daw masulayan hi Satanas. 2Suminalang si Jesus hu pagkaen seled hu kap-atan ha aldaw daw daleman, aman su maiwas haena tungkay gayed nauhul. 3Dayun si Jesus inubayan hu Manunulay daw ikagiyi, “Ku Batà ka hu Dios ikagiyi haini sa mga batu ha mabuhat ha supas.”
4Ba tuminubag si Jesus, “Sa lalang hu Dios nakasulat en ha tagyanaen, ‘Kenà iyan dà igkauyag hu etaw sa kalan-enen ta sa lalang hu Dios iyan tag-ila hu kinabuhì.’”
5Dayun si Jesus dinuma hi Satanas duun hu kinatangkawan ha atep taena ha Timplu diyà ta Jerusalem 6daw ikagiyi, “Ku Batà ka hu Dios sabay ka duun taini ta sa insulat ha lalang hu Dios tagyanaen,
‘Suguen hu Dios sa mga balinsuguen din hu pagbantay ikaw daw tamuken ka kandan ta daw harì ka mabugel.’”
7Ba tuminubag si Jesus, “Sa lalang hu Dios nakasulat en ha tagyanaen, ‘Harì agsulaya sa Dios ha Magbabayà hu alan.’”
8Aman dinuma en paman si Jesus hi Satanas duun hu matangkaw tungkay ha bubungan daw ipaahà kandin sa kadagway hu alan ha mga ginharian ta kalibutan, 9dayun inikagiyan din si Jesus, “Saini ha agkaahà nu iman ig-ila ku ikaw ku lumuhud daw sumimba ka kanak.”
10Ba si Jesus tuminubag, “Awà ka dini ta kanak, Satanas, ta sa lalang hu Dios nakasulat en ha tagyanaen, ‘Iyan dà sa Dios ha Magbabayà hu alan angayan ha simbahen daw alagaran.’”
11Aman uminawà si Satanas diyà ta kandin, dayun nakauma sa mga balinsuguen hu Dios diyà ki Jesus hu pag-alima kandin.
Sa Puunaan Hu Pagtudlù Hi Jesus
(Mateo 4:12-17; Marcos 1:14-15; Lucas 4:14-15)
12Su mapaliman hi Jesus ha si Juan Ha Tagpamautismu naprisu en luminikù haena diyà ta Galilea. 13Suminagad diyà ta Nazareth daw migtimà diyà ta Capernaum ha kilid hu danaw, saena ha lugar tagngaranan hu Zebulon daw Neftali. 14Nahitabù haena ta daw matuman sa inikagi hi Isaias sa prupita ha tagyanaen,
15“Sa bugtà ta Zebulon daw ta Neftali payanaen en ta dagat layun ta Jordan iyan sa Galilea ha tagtimaan hu kenà mga Judio. 16Duun pa sidan tagtimà hu kasukileman ha bugtà hu kamatayen ba naahà dan sa tungkay masiga ha nakailaw kandan.”
17Sugud taena ha panahun nanunultul si Jesus hu kagi din, “Hinulsuli sa mga salà nuy ta madani en sa pagharì hu Dios inyu.”
Sa Pag-umaw Hu Haepat Ha Mamamaling
(Mateo 4:18-22; Marcos 1:16-20; Lucas 5:1-11)
18Su taghiphipanaw si Jesus duun hu kilid taena ha Danaw ta Galilea naahà din si Simon ha tagngaranan daan ki Pedro daw sa suled din ha si Andres. Tagpamaling sidan duun taena ha danaw ta mamamaling man sidan. 19Inikagiyan sidan hi Jesus, “Dumuma kaw kanak ta agbuhaten ku inyu ha mamamaling hu mga etaw.” 20Aman sagunà dan inawaan su mga baling daw duma ki Jesus.
21Su malugay-lugay naahà hi Jesus sa mga migsuled daan ha iyan si Santiago daw si Juan sa mga batà hi Zebedeo ha tagpamandayan dan su kandan ha baling duma ki Amay dan duun ku barutu. Aman inumaw sidan hi Jesus 22dayun sagunà inawaan si Amay dan duun ku barutu daw duminuma ki Jesus.
Sa Pagbulung Hu Madakel Ha Agkadaluwan
(Mateo 4:23-25; Lucas 6:17-19)
23Nalekep hi Jesus sa alan ha banuwa ha sakup ta Galilea. Duun hu mga simbahan hu mga Judio migtudlù si Jesus hu Maayad ha Tultulanen mahitenged hu pagharì hu Dios daw naulian din daan sa alan ha mga dalu hu mga etaw. 24Sa tultulanen mahitenged kandin nakalekep diyà ta prubinsya ta Siria, aman pinan-uwit dan diyà ta kandin sa mga etaw ha agkangadaluwan hu hurà mag-iling ha dalu daw sa agkangasakitan. Sa duma kandan agkangabidbid daw amin mga minatay en sa dibaluy ha lawa din daw sa duma tinaguan en hu mga busaw. Ba alan sidan naulian hi Jesus. 25Madakel tungkay sa namanduma kandin ha nangapuun diyà ta Jerusalem daw duun hu mga prubinsya ta Galilea daw ta Judea daw duun taena ha lugar ta Decapolis daw hu duma ha mga banuwa diyà ta layun ta Jordan.
Àwon tá yàn lọ́wọ́lọ́wọ́ báyìí:
Mateo 4: bkd
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2015, Wycliffe Bible Translators, Inc. All rights reserved.
