Àwọn Ẹsẹ Bíbélì Tí Ọ̀pọ̀ Èèyàn Mọ Mat 6

Pín

Ghɛn yɛ luŋ nɛ lu se kiile keleŋ ɛ məme ɛysak nə Feyine, gese nɛɛye ka əb kɛŋen, é əb náà fo əbfua nɛ̂ vin se ghɛn əbjim.

Ke me se lu ge ghàà ghɛn yɛ gel kum likebvəchi bek ge likebvəchi lu nɛ̀ ngɛkse wene. Kechii lóó ke yɛ ki sɛ wene sɛ ngɛkse.

Mɛ me se suuye se ghɛn ge, ghàà ghɛn yɛ fof kum kefaa kɛ yiɛ gese nɛ̀ kɛ nəə se geese yɛ chii, gese nɛ̀ ndəy sɛ yɛ mak se əbghun. Ɛychii lɛ báà se chia əbfua-əbyíɛ́ne nɛ əbghune chia ndəyse-a?

Wɛ̀ yɛ loo jem wɛ̀ lii ɛ wɛ̀ məme ndaa è tɛk əbchio ndaa è yɛ jem se Ba ə viɛ wɛ əb yɛ́nen əbnəə wɛ ɛ́ nɛɛyen ɛ kenlete é əb náà laame wɛ̀.

Lɛɛ ka loo ghɛn yɛ jem: Ba ə wɛs wɛ əb luun ɛ ɛyyio, nɛɛy é ghele yɛ ngvəmle ɛyghel ə yiɛ, Nɛɛy é ɛysak ə yiɛ gwiy se ghele, é ghele yɛ nɛɛy kenəə kɛ wɛ̀ kɛŋen ge ɛ́ yɛ nɛɛy ɛ ntiɛ, kɛn ka ke luun ɛ ɛyyio.

Fó əbfua-əbyíɛ́ne se ghɛs lan vin

è lɛyse mbee sɛs ka ghɛs lɛyse sɛ ghel ghɛ ɛ́ jasen se ghɛs.

Nɛɛy é ghɛs jia lii se ɛymomse; tɛɛke ghɛs se ɛyfime. [Bek ka ɛysak ə əbfone luun yiɛ, nɛ̀ kediake gese nɛ̀ ɛykoksee, əbliy əbjim. Amen.]

Ghɛn lòò è yɛ lɛyse mbee sɛ ghele nɛɛyen se ghɛn, é Ba ə wɛn wɛ əb luun ɛ ɛyyio yɛ lɛyse sɛne.

Ghɛn liɛ nfek se əmnənme, əm sɛɛ jia lem əbfua-əbyíɛ́ne, kaa wiy, ki wiy techia, dî nɛ Ba ə wɛn wɛ əb luun ɛ ɛyyio yiɛse ghene. Ghɛn lɛ báà se chia əmnən-a?

Ghàà ghɛn yɛ baate ɛykɛŋ ə yɛn lɛme ɛ ntiɛ fɛn bene fɛ lòó babvəlese laa, é əblee baŋ, nɛ gese lu ghaa lòó ɛchoŋe choŋ. Ghɛn yɛ baaté ɛykɛŋ ə yɛn lɛme nɛ lu ɛyyio bene lòó babvəlese jia laa, é əblee jia baŋ, nɛ gese lòó ɛchoŋe jia kol è lii è choŋ. Ke lu dî bek ge ɛykɛŋ ə wele lóó lu ghááy, ɛytem ə wene yɛ lu fô.

Lòó wel jia yɛ fɛl se ɛbay ɛbaa, buu dî, é əb yɛ koŋe əblee bane əblee, kene əb yɛ yionen se əblee, kiye əblee lolo. Lòó ghɛn jia yɛ fɛl se Feyine gese fɛle se əbkaa.

Feyine lɛ nɛɛy nɛ əbgii wɛ əb kuyɛn əbkwak keke kejuŋ, əbgii wɛ əb kuyen lan nɛ loo lu ɛ likebvəchi ɛ́ kwaay se kiy, é əb jia nɛy loote nɛɛy é ghɛn yɛ kek kejuŋ-a, ɛybeeme yɛne bɛɛne layte ghɛ lɛ?

Wɛ̀ yɛ lóó foo kefaa se wele ketan, ghàà wɛ̀ nɛɛy ge əbkoy ə viɛ əbkiye keele kenəə kɛ əbkoy ə viɛ əbtaa nɛɛyen, ka ɛyfoo ə yiɛ yɛ lu ɛ kenlete, é Ba ə viɛ wɛ əb yɛ́nen əbnəə wɛ wɛ̀ nɛɛyen ɛ kenlete náà laame wɛ.

Jesus gese suuy ge: Ghɛn yɛ toknen se yɛ loo nɛɛy kenəə kejuŋe ghɛn yɛ din ge ghele yɛn, bek ge ghɛne nɛɛye dì é ghɛn jia yî kiile əbmakte se Ba ə wɛn wɛ əb luun ɛ ɛyyio.

Ghɛne yɛ loo bam əbfua-əbyíɛ́ne ghàà ghɛn yɛ lu ɛysen ɛysen ka ghele əbbuame lóó ɛ́ gvənse ɛykek se nɛɛy ge ghele keele ge ghene bame əbfua-əbyíɛ́ne. Mɛ suuye əbluuy se ghɛn ge ghene kiilemen əbmakte ə ghen əbjim əbjim. Wɛ̀ yɛ loo bam əbfua-əbyíɛ́ne, wɛ̀ ko suu ɛykek ə yiɛ, è sol nɛ̀ keyióséne, ka ghele jia yɛ ke ge wɛ̀ bame, é yɛ ke kɛn ba ə viɛ wɛ əb yɛnsen wiy ge wɛ̀ bame. É Wen wɛ əb yɛ́nen əbnəə wɛ əb luun ɛ kenlete náà me laame wɛ̀.