℗ 2005 Hosanna Grabado por Vina, Solola, Guatemala

Miskito - 1998 Edition (NT)

Parisi nani walan nahki Jisas kau nina blablikra nani ailal bri kan, Jan ba wal, bara kau upla manis sin tahbi dauki kan ba, (sakuna Jisas pali mita tahbi daukras, ai disaipilka nani mita lika.) Jisas naha walan ba ra, Judia wina takan kli Galili ra waia.
Ai impakanka ra, witin Sameria tawanka bâk luaia kan. Bamna witin Sameria tawanka kumi ra balan, nina ba Sicar; baha ba lika Jekob mita ai luhpia Josep ra tasba kum yabata ba wal baila kan. Bahara sika Jekob layawanhta mâki banhwi kan ba bâra kan. Jisas yabal wihka pali wapan ba mita swapan kan bamna, layawanhta ba lamara iwan; baha piua ba lika pat yu wan lal kat baila kan. Disaipil nani ba lika, plun wiria atki piaia dukiara tawan ra wan kan. Baha sim awarka ra, Sameria wina mairin kum balan lî panhkaia, bamna Jisas bui win:
—Lî wirâ aik diaia.
Sakuna Ju nani ba Sameria uplika nani wal diara briras bamna, mairka ba naku Jisas ra win:
—Man ba Ju uplika kum sma, ¿bara nahki man bui yang ra lî diaia makabisma, kan yang na Sameria wina mairka sna na?
Bara Jisas pana win:
—Gâd diara yabi ba kaikram kata, bara ya sin man ra lî makabi ba, kasak pali mai wisna man bui witin ra lî makabaia kapram; bara witin mita lî rayakira ba maikbia.
Mairin ba bila:
—Mâsa, dîa ni lî panhkaia kat sin âpu sma ba, bara liwanhta na sin pakni pali sa. ¿Bamna ani wina lî diaia aikma ki? Yang nani damiki Jekob naha liwanhta na wankan; witin pali sin naha wina din, ai luhpia nani bara ai daiwra nani sin. ¿Bamna dîa man kau tara sma ki witin ba wal?
Jisas pana win:
—Ani uplika nani naha laya wina di ba, sut kli din daukbia; sakuna yaura yang mita lî yarka dibia ba, kli din daukbia apia. Kan yang lî diaia yamna ba, witin wina lî aubi kabia raya ban kaia ra.
Pana mairin ba bila win:
—Mâsa, baha laya ba aik dimna bara kli diran ai daukbia apia ba mata, bara naha liwanhtika ra kli bal lî panhkamna apia.
Jisas mita win:
—Man wih mayam wini brih, nahara kli bal.
Mairin ba pana win:
—Yang mayi âpu.
Bamna Jisas mita win:
—Man aitani aisaram, mayam âpu; kan man pat waitna matsip brih swiram, bara nanara brisma ba sin, man mayam apia sa. Naha man kasak aisaram.
Naha walan ba ra, mairin ba bila:
—Mâsa, yang kaikisni man na prapit kum sma. Wan damika nani Sameria wina kan ba, naha ilka ra Gâd ra ai pura suni mayuni kan; sakuna man nani Ju nani bila, Jerusalem ra baman Gâd ra wan pura suni mayunaia sa.
Jisas pana win:
—Mairin, yang ra pain ai wals, piua ba aula bara man nani Aisa ra puram suni mayuni kama naha ilka ra balras kira, baku sin Jerusalem ra waras kira. Man nani Sameria uplika nani ba, yaura puram suni mayunisma sapa sin kaikras; sakuna yang nani lika kaikisna, yaura puri suni mayunisna ba, swaki sakan lâka ba Ju nani wina aula bamna. Piua ba aula, bara baha ba nanara pali sika, bara Aisa ra ai pura suni mayuni banhwi ba lika, ai pura suni mayunbia kasak tânka ra bara Spirit ra sin. Aisa ba baku brin daukisa, witin ra ai pura suni mayuni banhwi ba baku daukbia. Gâd ba Spirit sika, bamna witin ra ai pura suni mayuni banhwi ba baku daukbia, kasak tânka ra bara Spirit ra sin.
Mairin ba mita pana win:
—Yang kaikisna Misaya ba balbia (baha wiaia ba, Kraist); bara witin balbia ba ra, diara sut tânka ba param wan wibia.
Jisas mita win:
—Baha ba yang sika, man wal aisisna ba.
Baha pali piua ra disaipil nani ba aidrubi balan, bara witin nani sut aihka luki kan, Jisas mairin kum wal man aisi kan bamna. Sakuna witin nani kumi sin karnika âpu kan makabi walaia dîa want sapa, bara Jisas ra sin makabi walras kan, dîa muni mairin ba wal man aisi kan sapa. Bamna mairin ba ai laya watla ba swi si tawan ra wan, bara upla nani ra win:
—Man nani bal kaiks, nahki waitna kum yang dîa daukri ba sut ai win. ¿Naha apia ki Kraist ba?
Bamna witin nani tawan ba wina taki, Jisas ra aidrubi balan. Kau aidrubi balras kan ba ra, disaipil nani Jisas ra win:
—Smasmalkra, plun wiria pan pis.
Sakuna witin mita win:
—Yang piaia dukia brisna, baha man nani kaikras sma ba.
Bamna disaipil nani ba pana pana tawi makabi wali kan:
—¿Upla kum mita witin ra plun piaia sal yan ki?
Sakuna Jisas mita win:
—Yang pati sika witinka ai blikan ba kupia lâka daukaia, bara ai warkka sin sut pali daukaia. Man nani wisma: ‘Kau kati walhwal ba ra insla mâ nani krikaia piua kabia’; sakuna yang mai wisni: Namkra nani buki insla nani ba ra kaiks, mâ ba pat pihwan sa, mahka krikaia piua sika. Insla mâ kriki uplika ba ai mana brisa, bamna insla mâ wahbisa raya ban kaia ba briaia, bara baku lika mâ mangki ba bara mâ kriki ba wâlsut lilia kabia. Bamna kasak pali sika, sturi aisanka kum naku win ba: ‘Upla kum mâ mangkisa bara upla wala sika mâ kriki ba.’ Yang bui man nani ba mai blikri anira mâ mangkras sma ba wina mâ krikaia, upla wala wark takan ba wina yamnika briaia.
Sameria uplika nani baha tawanka ra iwi banhwi kan ba tila, manis Jisas ra kasak lukan, dîa baha mairin aisin natka wina: “Dîa daukri ba sut, witin bui yang ra ai win.” Baku bamna, Sameria uplika nani bal Jisas ra makaban, witin nani wal takaskbia; bamna witin baha nani wal yu wâl takaskan, bara kau upla manis kasak lukan, Jisas pali aisin walan ba mita. Bamna Sameria uplika nani mita mairin ba ra win:
—Nanara yang nani kasak lukisni, man wan wiram ba baman apia, kuna yang nani pali mita witin wina walri bamna; bara yang nani sin tânka brisna, witin ba kasak sa tasba aiska Swaki Sasakrika sa.


Yu wâl ningkara, Jisas Sameria wina taki mahka impakan Galili kuntrika ra. Kan Jisas pali mita wisata, prapit kum ai tasbaya ra yamni kulkras sa. Galili ra wan ba ra, baha uplika nani mita witin ra pain brin, kan baha uplika nani ba Insal luan yua Liliaka ra Jerusalem ra wan, bara Jisas bahara dîa daukan ba kaiki banhwan kan bamna.
Bara Jisas Galili wina kli Kena ra wan, bahara sika witin mita lî wina wain daukata ba. Bahara wihta tara kum bâra kan, witin ai luhpia waitna Kapernaum ra siknis pali bri kata. Naha wihtka tara na walan, Jisas kli Judia wina Galili ra balan, witin wih Jisas ra makaban, ai watla ra wih ai luhpia waitna sikniska ba wina rakbia, pat pruaia man sa bamna. Jisas pana wisata:
—Man nani sip kasak lukras sma, wark aihka nani ba kaikras kaka.
Sakuna wihtka tara ba bila:
—Dawan, aihni bal kau luhpi pruras ba ra.
Jisas mita naku wisata:
—Wamtla ra kli tawi was; man luhpiam ba raya sa.
Waitnika ba Jisas bîla kat kasak lukan. Bamna witin ai watla ra auya kan ba ra, ai albika nani witin ba prawaia taki wih, naku win:
—¡Man luhpiam waitna ba raya sa!
Bamna wihtka ba ai albika nani ra makabi walan, ai luhpia waitna ba dîa piua wina mahka yamni takan sapa. Alba nani ba bila:
—Nahwala tutni wan aklak wina ai rihka ba swin.
Baku bamna, aisika ba ai kupia kraukan, baha pali piua ra kata Jisas witin ra wisata ba: “Man luhpiam ba raya sa”; bara witin ai watla uplika sut aikuki Jisas ra kasak lukan.
Naha ba, aima wâl sika Jisas mita sain aihka daukan ba, witin Judia wina Galili ra balan piua ra.

Feti si Jan 4