If you have would like a copy of this version please contact info@davaraudiobibles.org

Odki New Testament © The Pakistan Bible Society (Text), Odki New Testament Audio Bible ℗ 2024, Davar Partners International (Audio)

Odki New Testament

जिसे बेले ईशु ये बाता केहती चुकला, ते गलील कनु चाह्‍ला गेला, ते यरदन नदी चे पार यहूदिया चे प्रदेस मां आला। तब बङी भीड़ ओचे भांसु टुरती पली, ते ओणे ओठे वानु चंगा करले।
तब फरीसी ओची परीक्षा गेहणे वास्ते आती कर किहुं लाग़ले, “का हर हेक वजह कनु आपणी घराआली नु त्याग़णे वाजिब छै?”
ईशु ने उत्तर ङिला, “का तम्ही पवित्रशास्त्र मां कोनी पढ़ले कि जेह्णे वानु बणाले, ओणे शुरु कनु मर्द ते असतरी बणाती कर केहले, ‘ये वजह मर्द आपणे आई-ब़ा कनु अलग़ हुती कर आपणी घराआली चे लारे रिही ते वे ङोनी हेक तन हुवे?’ तां वे हमा ङोन कोनी, पर हेक तन छी। ऐवास्ते जानु नरीकारा ने जोड़ले, ओनु इन्सान अलग़ ना करो।”
फरीसिया ने ईशु नु केहले, “बल्ति मूसा ने ईं का ठहराले कि त्यागपत्र ङिती कर विनु छोड़ती ङिया?”
ईशु ने वानु केहले, “मूसा ने तम्चे मना ची कठोरता ची वजह तम्हानु आपणी-आपणी घराआली नु छोड़ती ङेणे ची आज्ञा ङिली, पर शुरु कनु इसड़े कोनी हुते। ते मैं तम्हानु किहे पला, कि जको कुई व्यभिचार नु छोड़ती कुई नेरी वजह कनु आपणी घराआली नु त्याग़ती कर ङुजी लारे बीहा करे, ओ व्यभिचार करे, ते जको वे छोड़ली आली लारे बीहा करे, ओ वी व्यभिचार करे।”
चैला ने ईशु नु केहले, “अगर मर्दा चा असतरी लारे इसड़ा सम्बन्ध छै, ते बीहा करने आच्छे कोनी।”
ईशु ने वानु केहले, “सारे हा वचन ना मन सग़ी, हेको ओही कर सग़े जाई सहायता नरीकार कर सग़े। कांकि कोच्छ हीजड़े इसड़े छी जको आई चे ढिड्डा कनु ही इसड़े जमले। ते कोच्छ हीजड़े इसड़े छी जानु बन्दा ने हीजड़े बणाले, ते कोच्छ बन्दी इसड़ी छी, जेह्णे स्वर्ग़ा चे राज़ मां जाणे वास्ते बीहा कोनी करने चा फैंसला करला। जको ऐ उपदेशा नु गेहणे चाहवे ऊं गिहो।”


तब लौक ब़ाला नु ओचे गोढु आणले कि ओ वांचे उपर हाथ मेहलो ते प्राथना करो, पर चैला ने वानु धमकाले। ईशु ने केहले, “ब़ाला नु माये गोढु आऊं ङिया, ते वानु मना ना करा, कांकि स्वर्ग़ चा राज़ इसड़ा चा ही छै।”
ते ईशु वांचे उपर हाथ मेहलती कर उठु चाह्‍ला गेला।


हेक बन्दे ईशु चे गोढु आले ते ओनु केहले, “हे गुरु, मैं किसे भले काम करे कि अनन्त जीवन गिहे?”
ओणे ओनु केहले, “तु माये कनु भलाई चे बारे मां कां पूछी पला? भला तां हेक ही छै, पर अगर तु जीवन मां जाणे चाहवी, तां ओचीया आज्ञा नु मनले कर।”
ओणे ईशु नु केहले, “किसी आज्ञा?”
ईशु ने केहले, “ये आज्ञा छी, ‘हत्या नी करनी, व्यभिचार नी करना, चोरी नी करनी, कूड़ी ग़वाही नी ङेणी। आपणे ब़ा ते आई चा कद्दर करियो’ ते ‘आपणे पड़ोसीया लारे आपणे समान प्रेम राखीयो।’ ”
ते ओ जवाना ने ईशु नु केहले, “यां सब नु तां मैं मनले छै, हमा माये मां किसी बाते ची कमी छै?”
ईशु ने ओनु केहले, “अगर तु सेद्ध हुवणे चाहवी तां जा, आपणे सब कोच्छ बेचती कर कंगाला नु ङे, ते तनु स्वर्ग़ा मां धन मिली, ते आती कर माये भांसु टुरती पड़।”
पर ओ जवान ईं सुणती कर उदास हुला ते चाह्‍ला गेला, कांकि ओ ब़ोहत धनवान हुता।
बल्ति ईशु ने आपणे चैला नु केहले, “मैं तम्हानु सच्‍च किहे पला कि धनवान चे स्वर्ग़ चे राज़ मां जाणे मुश्किल छै। तम्हानु बल्ति किहे पला कि नरीकारा चे राज़ मां धनवान चे जाणे कनु ऊंठा चे सुई चे दुक्‍का महु निकलती जाणे आसान छै।”
ईं सुणती कर चैला ने ब़ोहत अचम्भित हुती कर केहले, “बल्ति काया उद्धार हो सग़े?”
ईशु ने वांचे सनु ङेखती कर केहले, “इन्साना कनु तां ईं ना हो सग़ी, पर नरीकारा कनु सब कोच्छ हो सग़े।”
ऐचे उपर पतरस ने ओनु केहले, “ङेख, अम्ही तां सब कोच्छ छोड़ती कर दुधे भांसु टुरती पले, तां अम्हानु का मिली?”
ईशु ने वानु केहले, “मैं तम्हानु सच्‍च किहे पला कि नवीं सृष्टि मां जिसे बेले मैं इन्साना चा पूत आपणी महिमा चे सिंहासना उपर ब़ेसी, तां तम्ही वी जको माये भांसु टुरती पले छिवा, ब़ारहा सिंहासना उपर ब़ेसती कर इस्राएल चे ब़ारहा गोत्रा चा न्यां करा। ते जेह्णे वी घर, जा भावां नु, जा ब़ेहणीया नु, जा ब़ा नु, जा आई नु, जा ब़ाला-ब़च्‍चा नु, जा खेता नु माये नांवा वास्ते छोड़ती ङिले, ओनु साओ गुणा मिली, ते ओ अनन्त जीवन चा अधिकारी हुवी। पर ब़ोहत से जको पेहले छी, वे भांसु हुवे, ते जको भांसु छी, वे पेहले हुवे।

Feti si मत्ती 19