If you have would like a copy of this version please contact info@davaraudiobibles.org

Text: Halbi New Testament, CC-BY-SA-4.0, The Love Fellowship. Audio: Halbi New Testament Audio Biible, CC-BY-SA-4.0, Davar Partners International, The Love Fellowship, 2023

Halbi New Testament

Halbi Bible by The Love Fellowship is licensed under Creative Commons Attribution-ShareAlike 4.0 License.

“खबड़दार राहा! तुमी मानेमन के दकातो काजे आपलो धरम चो काम नी करा, नाहले आपलो सरग चो बुआ ले काई बले फल नी पाआसे।” “ऐईकाजे जिदलदाय तुय दान करसे, तेबे आपलो पुरे तुरी नी बजाव, जसन कपटी, सभामन आउर खोरीमन ने करू आत, बल्ले लोग हुनमन चो बड़ाई करोत। मय तुमचो ले सते बलेंसे कि हुनमन आपलो ईनाम पाऊन चुकला। मान्तर जिदलदाय तुय दान करसे, तेबे जोन तुचो उजा हाथ करेसे, हुनके तुचो डेबरी हाथ नी जानुक सको। बल्ले तुचो दान गुपत रओ, आउर तेबे तुचो बुआ जोन गुपत ने दकु आय, तुके ईनाम देयदे।”

“जिदलदाय तुय पारथना कर से, तेबे कपटीमन चो असन नी हो, कसनबल्लोने लोगमन के दकातो काजे आराधना घरमन ने आउर सड़कमन चो मोड़या थाने उबा होऊन भाती पारथना करतोर हुनमन के अच्छा लागु आय। मय तुमचो ले सते बलें सें कि हुनमन आपलो ईनाम पाऊन चुकला। मान्तर जिदलदाय तुय पारथना कर से, तेबे आपलो बाकरा ने जा; आउर कपाट ढ़ाकुन भाती आपलो बुआ ले जोन गुपत ने आसे पारथना कर। तेबे तुचो बुआ जोन गुपत ने दकेसे, तुके ईनाम देयदे। पारथना करतो समया दुसर जातिमन चो असन बकर-बकर नी करा, कसनबल्लोने हुनमन समजु आत कि हुनमन चो खुबे बोललो ने हुनमन चो सुना जायदे। ऐईकाजे तुमी हुनमन चो असन नी बना, कसनबल्लोने तुमचो बुआ तुमचो मांगतोर ले पयले ची जानेंसे कि तुमचो काय-काय जरूरतमन आय।”
“आउर तुमी ऐ रीति ले पारथना करा:
‘हे आमचो बुआ, तुय जोन सरग ने आशीष; तुचो नाव पवितर माना जाओ।’
‘तुचो राज ऐओ। तुचो इच्छा जसन सरग ने पुरा होऊ आय, असने धरतनी थाने बले होओ।’
‘आमचो दिनभर चो रोटी आजी आमके देस।’
‘आउर जोन परकार आमी आपलो अपराधिमन के छमा करलु से, असने ची तुय बले आमचो अपराधमन के छमा कर।’
‘आउर आमके परीक्षा ने नी आन, मान्तर खराप ले बचाव; (कसनबल्लोने राज आउर पराकरम आउर महिमा हरमेशा तुची ची आय।’” आमीन।)
“ऐईकाजे अगर तुमी माने चो अपराध छमा करा से, तेबे तुमचो सरग चो बुआ बले तुमके छमा करेदे। आउर अगर तुमी मानेमन चो अपराध छमा नी करासे, तेबे तुमचो बुआ बले तुमचो अपराध छमा नी करेदे।”

“जिदलदाय तुमी उपास करा, तेबे कपटीमन चो असन तुमचो मुंह थाने मुरमुरा नी छाऊ रवो, कसनबल्लोने हुनमन आपलो मुंह बनाऊन रऊ आत, बल्ले लोग हुनमन के उपासी जानोत। मय तुमचो ले सते बलें सें कि हुनमन आपलो ईनाम पाऊन चुकला। मान्तर जिदलदाय तुय उपास कर से तेबे आपलो मुण्ड थाने तेल लगाव आउर मुंह धो, बल्ले लोग नाई मान्तर तुचो बुआ जोन गुपत ने आसे, तुके उपासी जानो। ऐ हाल ने तुचो बुआ जोन गुपत ने दके से, तुके ईनाम देयदे।”

“आपलो काजे धरतनी ने धन रूंडा नी करा, जोन थाने कीड़ा आउर काई नशाऊ आत, आउर जोन थाने चोर सेंध लगाऊ आत आउर चोरू आत। मान्तर आपलो काजे सरग ने धन रूंडा करा, जोन थाने ना तो कीड़ा आउर ना काई नशाऊ आत, आउर जोन थाने ना चोर सेंध लगाऊ आत आउर ना चोरू आत। कसनबल्लोने जोन थाने तुचो धन आसे हुता तुचो मन बले लगु रयदे।

“देंह चो दीया आँईक आय: ऐईकाजे अगर तुचो आँईक छुकछुका आसे, तेबे तुचो सपाय देंह बले उजर होयदे। मान्तर अगर तुचो आँईक घिन-घिना रयदे, तेबे तुचो पूईतराय देंह बले अंधार होये दे; ऐई कारन हुन उजर जोन तुचो थाने आसे अगर अंधार होयदे तेबे हुन अंधार भारी बड़े होयदे!

“कोनी माने दुय मालिकमन चो सेवा नी करूक सके, कसनबल्लोने हुन गोटक ले बईर आउर दुसर ले मया संगायदे, नाहले गोटक ले मिलुन रयदे आउर दुसर के तुच्छ जाने दे। तुमी माहापुरू आउर धन दुनो चो सेवा नी करूक सकास। ऐईकाजे मय तुमचो ले बलेंसे कि आपलो जीव चो काजे ऐ चिन्ता नी करा कि आमी काय खाऊंदे आउर काय पीऊंदे; आउर ना आपलो देंह चो काजे कि काय पिंदुदें। काय जीव भात ले, आउर देंह फटीई ले बडुन भाती नुआय? बादरी चो चड़ीईमन के दका! हुनमन ना तो बुने सोत, ना काटु आत, आउर ना बेड़ामन ने सकलु आत; फेर बले तुमचो सरग चो बुआ हुनमन के खुआयसे। काय तुमी हुनमन ले जादा मल्या नुआहास? तुमचो ने कोन आसे, जोन चिन्ता करून आपलो उमर ने गोटक घड़ी बले बड़ाऊक सके?
“आउर फटीई चो काजे केंव चिन्ता करे सास? सोसन चो फुलमन उपरे धिआन करा कि हुनमन कसन बाडु आत; हुनमन ना तो मसागत कर सोत, ना काटे सोत। तेबले बले मय तुमचो ले बलेंसे कि सुलेमान बले, आपलो पुईतराय धनमाल ने हुनमन थानले काचीई असन फटीई पिन्दुन नी रलो। ऐईकाजे जिदलदाय माहापुरू भाटा चो लाटा के, जोन आजी आसे आउर काली के भाटी ने जलाया जायदे, असन फटीई पिन्दाऊ आय, तो हे अल्पबिश्वासीमन, तुमके हुन ऐमन ले बडुन भाती केंव नी पिंदाये?
“ऐईकाजे तुमी चिन्ता करून ऐ नी बोला कि आमी काय खाऊंदे, नाहले काय पीऊंदे, नाहले काय पिंदुदें। कसनबल्लोने दुसर जाति ऐ सपाय तीजमन चो खोज ने रऊ आत, मान्तर तुमचो सरग चो बुआ जाने से कि तुमके ऐ सपाय तीजमन चो जरूरत आसे। ऐईकाजे पयले तुमी माहापुरू चो राज आउर हुनचो धरम चो खोज करा तेबे ऐ सपाय तीजमन बले तुमके मिरून जायदे। आउर काली चो चिन्ता नी करा, कसनबल्लोने काली चो दिन आपलो चिन्ता खुद करेदे; आजी चो काजे आजी ची चो दुख खुबे आय।”

Feti si मत्ती 6