If you have would like a copy of this version please contact info@davarpartners.org

Bareli Pauri New Testament, CC-BY-SA-4.0, Friends Missionary Prayer Band (Text), Bareli Pauri New Testament Audio Bible, CC-BY-SA-4.0, Davar Partners International, Bridge Connectivity Solutions, 2022 (Audio).

Bareli Pauri New Testament

Bareli Pauri New Testament (TLF)

Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.

ओवतेन येसु ढोंड्यामा चोळीन पोल धोळे गोयू, एने तेरा सोहोर आव्यु. एने देख, काहनास माणसे लखवा बिमारी वावा काजे खाटला पोर मेकीन तेरेनचा आव्या येसु तिंदरू भुरसू देखीन तिना लखवा बिमारी वावा काजे कोयू, “हे पुऱ्या हिंमत धोर तारो पाप माफ होय गोया.” देखू, इनापोरसी घोणा शास्त्री विचार कोऱ्या, “यु ते परमेश्वरोन बुराई कोरतेलू.” येसु तिंदरी मोनो मायली वाते जानीन कोयू “तुमु माणसे आपना-आपना मोनोमा भुंडा विचार काहा कोर रोया?” सुधो काय छे, यो कोयनो, “तारा पाप माफ होय गोया,” नीती यो कोयनो, “उठ एने चाल फिर?” बाकीन इनान कोरता कि तुमु जान लेयु कि माणसोन पुऱ्या काजे धोरती पोर पापोन माफी आपनेन होक छे तेत्यार चू लखवा बिमारी वावा काजे कोयू, “उठ तारो खाटलो चूट, एने तार घोर जात रोय.” चू उठीन तेरे घोर जात रोयू. माणसे यो देखीन नोवलाय गोया एने परमेश्वरोन महिमा कोरणे बाज गोया जू माणसो काजे यु होक आपलु छे.


चा गोथू ओगु जायीन येसु मत्ती नावोन एक माणसो काजे फावू लेनेन चोवकी पोर बोस रोयलु देख्यू, एने तिना काजे कोयू, “मारे पोछोव आवती रोय.” चू उठीन तेरे पोछोव आवती रोयू.
जेतार चू घोरमा खाणेन कोरता बोश्यू ती घोना सोवटा फावू लेणे वावा एने पापी आवीन येसु एने तेरा चेला साते खाणो खाणे बोश्या. यो देखीन फरुशी तेरा चेला काजे कोयू, “तुमरु गुरु फावू लेणे वावा एने पापी साते काहा खातलू?” यो सोमवीन येसु तीनु काजे कोयू, “डाक्टर वारला आरेगलान कोरता नि बाकीन बिमारी वावान कोरता गोरोजोन छे. इनान कोरता तुमु जायीन एरू मतलब सिक लेवू मे बलिदान नि बाकीन दया मांगतलु काहाकि मे धोरमीन कोरता नि, बाकीन पापी काजे बुलावने आवलु छे.”


तेत्यार योहानोन चेला येसुनचा आवीन कोया, “काय मतलब छे कि आमु एने फरुशी ओतरा उपास कोरतेला, बाकीन तारा चेला उपास नि कोरतेला?” येसु तीनु काजे कोयू, “काय वोरात्या, जेतार तोक लाडुस तिंदरे साते छे, दुख कोर सोकतेला?” बाकीन चे दाहळा आवसे जेतार लाडुस तिंदरेमा गोथू निकाव लेसे, तिने टेमे चे उपास कोरसे. कुरा कापळा काजे थीगवो जूनला छिंदरा काजे नि लागाळतला, काहाकि चो थीगवो तिना छिंदरामा गोथो काहीन एने हापकी लेतलो, एने चा जादा फाट जातलो छे. एने माणसे नोवलू आंगुरोन रोस जूनला ठाहरामा नि मेकतेला, काहाकि ओसो कोरणेसी बुदलो फाट जातलो छे, एने आंगुरोन रोस वाये जातलो छे एने बुदलो फाट जातलो छे; बाकीन नोवल आंगुरोन रोस नोवला बुदलामा भोरतेला छे एने चे दुयू वाचीन रोयतेला.


येसु हिनुक जे वाते कोयने बाज रोयू होतु, कि देखू, एक सरदार आवीन तीनाक नमस्कार कोऱ्यु एने कोयू, “मारी पुराय हिमी मोरली छे, बाकीन आवीन आपनु हात तिनी पोर मेक दे, ती ची जीवती होय जासे”. येसु उठीन आपना चेला साते तेरे पोछोव चाल पोळ्यु. एने देख्यू, एक बायोर जिनी काजे बारा साल गोथी लुय वोयनेन बिमारी होती, एने पोछोव गोथी आवी तिनान डोगलान कुपरा काजे छिम लेदी. काहाकि ची आपना मोनोमा कोयती होती, “ओगर मे तेरा डोगला काजे बी छिम लीस ती वार होय जायीस.” येसु फिरीन तिनीक देख्यू एने तिनीक कोयू, “पुराय हिंमत बांध; तारू भुरसू तुसेक वारू कोरलु छे” आखरी ची बायोर तिने टेमे वारू होय गोयी. जेतार येसु तीना सरदारोन घोरमा पुग्यू एने वाजा वाजाडणे वावा एने गोरदी काजे कोचाट कोरतेला दिख्यू, तेत्यार कोयू, “छेटा होय जावू, पुराय मोरी नी, बाकीन सुवली छे” इनापोरसी चे तेरी मोजाक कोरणे बाज गोया, बाकीन जेतार गोरदी निकवी गोयली ती चू माहाय जायीन पुरायीन हात धोऱ्यु, एने ची जीवती होय गोयी. एने इनी वातोन खोबर तिना आखा देसमा पसरी गोयी.

जेतार येसु चा गोथू गोयू, ती दुय आंदवा तेरे पोछोव यो कोयता जायीन आव्या, हे दाऊदन पुऱ्या, आमरेपोर दया कोर, जेतार चू घोरोमा पुग्यू ती चे आंदवा तेरेनचा आव्या, एने येसु तीनु काजे कोयू, “काय तुमु काजे भुरसू छे, कि मे यो कोर सोको.” चे येसु काजे कोया, “होव प्रभू.” तेत्यार चू तिंदरा डूवा काजे हात लागाळीन कोयू, “तुमरा विस्वासोन अनसारे तुमरेन कोरता होये.” एने तिंदरा डूवा उगळी गोया, येसु तीनु काजे जोताळीन कोयू, “सावधान, कुदु इनी वातो काजे नी जाणे” बाकीन चे निकवीन आखा देसोमा तेरा काम चमत्कार पसराव देदा.

जेतार चे बारथे जाता होता ती देख्यू माणसे एक मुका काजे जीनामा भुंडली आत्मा होती तेरेनचा लाव्या. एने जेतार भुंडली आत्माक नीकाव देदा, ती, मुकु बुलने बाज गोयू; इनापोरसी भीळ वाहरायीन कोयने बाज गोयी कि, इस्राईलमा ओसो कोदि नि देख्या. बाकीन फरुशी कोया “यु ने भुंडलीन आत्मान सरदारोन मदतसी भुंडली आत्माक निकावलू.”

येसु आखा देसोमा एने गावोम फिरतू रोयू, एने तिंदरा प्रार्थना घोरमा प्रचार कोरतू एने राज्यान वारली खोबर प्रचार, एने भाती-भातीन बिमारी एने कोमजूरी काजे वारू कोरतू रोयू. जेतार चू भीळ काजे देख्यू ती तीनु माणसो पोर गिन आवी काहाकि चे तीनु गाडरान तोसा जिंदरु कुदु राखवाव्या नी होय, कासावीस एने भटकलान ओसा होता. तेत्यार चू आपना चेला काजे कोयू, “पाकला खेते ते जुदा सोवटा छे बाकीन दाहळक्या कोम छे इनान कोरता मामार खेतोन मालिकनचा विनता कोरो कि आपना खेत काटने कोरीन दाहाळक्या मुकली दे.”

Feti si मत्ती 9