If you have would like a copy of this version please contact info@davarpartners.org

Bareli Pauri New Testament, CC-BY-SA-4.0, Friends Missionary Prayer Band (Text), Bareli Pauri New Testament Audio Bible, CC-BY-SA-4.0, Davar Partners International, Bridge Connectivity Solutions, 2022 (Audio).

Bareli Pauri New Testament

Bareli Pauri New Testament (TLF)

Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.

येसु इनी भीळ काजे देखीन बोयळा पोर चोळ गोयू, एने जेतार बोस गोयू ती तेरा चेला तेरेनचा आव्या. एने येसु तेरो मूय उगाळीन तीनु काजे यो सिकाळने बाज गोयू.

“सोयावा छे जे आत्मान दिन छे, काहाकि सोरगोन राज तिंदरो छे.”
“सोयावा छे जे, दुख कोरतेला, काहाकि तीनुक शांती जोळसे.”
“सोयावा छे, जे नम्र छे, काहाकि चे धोरतीन अधिकारी होयसे.”
“सोयावा छे जे, धोरमोन भूकला एने तीसला छे, काहाकि चे आफराय जासे.”
“सोयावा छे जे, जू दयावू छे, काहाकि तिंदरे पोर दया कोरायसे.”
“सोयावा छे जे, जिंदरा मोने चुखला छे, काहाकि परमेश्वर काजे देखसे.”
“सोयावा छे, जे मेवाळने वावा छे काहाकि चे परमेश्वरोन पुऱ्या कोवायसे.”
“सोयावा छे जे, जे धोरमोन कोरता, वेला कोरसे, काहाकि सोरगोन राज तिंदरेमा छे.”
“सोयावा तुमु, जेतार माणसे मारेन कोरता तुमरो छोळ कोरसे, एने तोकलीत देसे, झूट बुल बुलीन तुमरे खिलापमा आखा भातीन भुंडली वाते कोरसे.” तेत्यार खुशी कोरीन मुजामा रोयजू, काहाकि तुमरेन कोरता सोरगोमा मोटलो फोव छे, इनान कोरता, कि चे तीनु भविष्य कोरता काजे जे तुमरे पेहेले होता, इना रितीसी छळ कोरला होता.


तुमु धोरतीन मीठो छे; बाकीन अगर मीठान सोवाद बीगळी जाय ती चो पोछो काहना चीजोसी खारो कोरायसे? ओवतेन चो काय कामोन नी होय, निसतो एरू कि बारथे नाखाय जाय एने माणसोन पायो तोवे रोंदवाय जाय. तुमु जोगोन विजावो छे जो सोहोर बोयळा पोर बोसलो छे चो डीकाय नि सोके, एने माणसे दिवू धोपाळीन मापो तोवे नी बाकीन दिवठनीपोर मेकतला, तेत्यार तीनासी घोर मायला आखा माणसो काजे विजावो पुगतलो छे. इना रितीसी तुमरो विजावो, माणसोन सामने चोमके कि चे तुमरा वारला कामो काजे देखीन तुमरु बास जू सोरगोमा छे, महिमा कोरे.

यो मा सोमजू, कि मी नियमशास्त्र नीती भविष्य कोरतान किताब काजे ढाकणे आवलु छे, ढाकणे नि, बाकीन पुरो कोरणे आवलु छे. काहाकि मे तुमु काजे छाचलीन कोयो, कि जेतार तोक सोरग एने धोरती ढोव नि जाय तेत्यार तोक नियम शास्त्रामा गोथो एक मातरू या एक टिंबु बी बीना पुरू होये नि टोवे. इनान कोरता जू कुदू इना नानलीसी नानली आग्यामा गोथू काहना एक काजे तूळे, एने तोसोच माणसो काजे सिकाळे, चू सोरगोन राजोमा आखा गोथू नानलु कोवायसे; बाकीन जो कुदु तिनी आग्यान पालन कोरे एने तीनु काजे सिकाळसे, चू सोरगोन राजोमा महान कोवायसे. काहाकि मी तुमु काजे कोयो, कि कोदि तुमरी धारमिकता, पुजारा एने फरुशीन धारमिकतासी बोडीन नि रोये, ती सोरगोन राजोमा कोबी जाता नी आवळे.

“तुमु सोमवी लेदला छे, जूनला वाराण माणसो काजे यो कोयलो होतो कि ‘खुन मा कोरु,’ एने ‘जू कुदू खुन कोरसे चू बोंदीघोरोमा दोंडोन कोरता ठोहरसे.’” बाकीन मे तुमु काजे यो कोयो, कि यु कुदु आपना भाशो पोर रीस कोरसे, चू कुरोटमा दोंडोन लायक रोयसे, एने यु कुदू आपना भाशो काजे गांडवायलु कोयसे चू महासभान दोंडोन कोरता रोयसे; एने जो कुदु कोये, “हे बिना दिमाकोन चू नोरोग आगठान दोंडोन कोरता रोयसे.” इनान कोरता कोदि तू आपनी भेट वेदी पोर लावे, एने चा तू फोम कोरे, कि मारा भाशोन मोनोमा मारेन कोरता काहीन खिलाप छे, ती आपनी भेट वेदीन सामने छुळ दे, एने जायीन पेहेले आपना भाशो पुठी समजुता कोर एने ती आवीन आपनी भेट चोळाव. जेतार तोक तू आपना झोगळ्या पुठी वाटी पोर छे, तेरे पुठी मामार सोमजुता कोरले कोदि ओसो नि होये कि झगळू तुसेक न्याय कोरणे वावा काजे सोपे, एने न्याय कोरने वावू तुसेक सिपायळा काजे सोप देये एने तू बंदी घोरोमा नाखाय जासे. मे तुसे काजे छाचलीन कोयो कि जेतार तोक तू कोवडी-कोवडी भोर नि आपे तेत्यार तोक चा गोथू छुटी नि सोके.

“तुमु सोमवी लेदला कि कोवाय गोयलो होतो, ‘व्यभिचार नी कोरनो.’ बाकीन मे तुमु काजे यो कोय, कि जू कुदु बायर पोर भुंडली नोजोर नाखे चू आपना मोनोमा तिनी पुठी व्यभिचार कोर लेदू. कोदि तारू जेवळ्यु डूवू तुसेक ठूकर खावाळे, ती हिनाक निकावीन नाख दे; काहाकि तारेन कोरता यो वारलो छे कि तारा डीलोमा गोथो एक सोर जाय एने तारो डील नोरोगमा नि नाखाये. कोदि तारो जेवळ्यु हात तुसेक ठूकर खावाळे, ती हिनाक काटीन नाख दे; काहाकि तारेन कोरता यो वारलो छे कि तारा डीलोमा गोथो एक सोर जाय एने तारो आखो डील नोरोगमा नि नाखाये.”

यो बी कोवाय गोयलो होतो, “जो कुदु आपनी लाडी काजे छुळनेन कोरे ती हिनीक छुळनेन चिट्ठी आप देये. बाकीन मे तुसे काजे यो कोय कि यो कुदु आपनी लाडी काजे भुंडला विचार सीवाय काहनला वोजेसी छुळ देये, ती चू तेरे जुव गोथू व्यभिचार कोरतेलु छे; एने यो कुदु तिनी छुळली पुठी वियाव कोरे, चू व्यभिचार कोरतेलू छे.”

एने तुमु सोमवी लेदला छे कि जूनला वाराण माणसो काजे कोवाय गोयलो होतो, “झुटी कोसोम मा घाले, बाकीन प्रभून कोरता आपनी कोसोम काजे पुरी कोर”. बाकीन मे तुसे काजे यो कोयो कि कोबी कोसोम मा घाले; नि ते सोरगोन, काहाकि चो परमेश्वरोन सिहासन छे. नि धोरतीन, काहाकि तेरे पाय मेकनेन जागु छे, नि यरुशलेमोन, काहाकि चो महाराजोन सोहोर छे. आपना मुनकान बी कोसोम मा घाले काहाकि तू एक झोटा काजे बी धोव्वु, नि कावू कोर सोकलु छे. बाकीन तूमरी वात “होव कि होव, कि नि कि नि होये काहाकि जो काहीन इनासी जादा रोयतलो छे चू बुराईसी रोयतलु छे.”


“तुमु सोमवी लेदला छे कि कोवाय गोयलो होतो, डूवान बोदले डूवू, एने दातोन बोदले दात”. बाकीन मे तुमु काजे यो कोय कि बुराई कोरणेवावान सामना मा कोरु; बाकीन जू कुदू तारा जेवळ्या गालो पोर थापुळ देये, तेरे भूनी दिसरू बी फिराव दे. कोदि कुदू तारे पोर रावन्या कोरीन तारो डोगलो लेणे हिंडे, ती हिनाक कुट बी लेणे दे. जो कुदू तुसे काजे कूस भोर लीजाणे कोरे, ती तेरे पुठी दुय कूस जा. जो कुदू तारे जुव मांगे, तीनाक आप; जु तारे जुव उदारे लेणे कोरे, तिनाक मोना मा कोरे.


“तुमु सोमवी लेदला छे कि कोवाय गोयलो होतो, आपना साते वावा पोर मोंग कोरुजू, एने आपना दुष्मोन साते दुष्मोनी”. बाकीन मे तुमु काजे यो कोय कि आपना दुष्मोन पोर मोंग कोरजू एने आपनुक तोकलीत आपनेवावान कोरता प्रार्थना कोरु, जीनासी तुमु आपना सोरग मायला बासोन पुऱ्या ठेरायसु काहाकि चू वारलो एने भुंडला दुयू पोर आपनु दाहळू उगाळतलु छे, एने धोरमी एने अधोरमी दुयू पोर पाणी पाळतेलू छे. काहाकि कोदि तुमु आपनेपोर मोंग कोरणे वावा पोर मोंग कोरे, ती तुमरेन कोरीन काय फायदू होयसे? काय फावू लेणे वावान बी ओसात नि कोरतेला?
“कोदि तुमु आपना भाशो काजेत नमस्कार कोरे, ती काहनो मोटो काम कोरतेला? काय बिन यहुदि बी ओसा नी कोरतेला?, इनान कोरता जुवे कि तुमु पुरा बोनु, जोसू तुमरू सोरगो मायलु बास पुरु छे”.

Feti si मत्ती 5