If you would like a copy of this version please contact info@davaraudiobibles.org

Dangi New Testament, CC-BY-SA-4.0, The Love Fellowship. Dangi New Testament Audio Bible, CC-BY-SA-4.0, Davar Partners International, The Love Fellowship, 2022.

Dangi New Testament

Dhanki Bible (ડાંગી) by The Love Fellowship is licensed under Creative Commons Attribution-ShareAlike 4.0 License.

તે દિસમા બાપ્તિસ્મા દેનાર યોહાન આના, તો યહૂદિયા વિસ્તારને રાનમા ઈસા પરચાર કરુલા લાગના કા, તુમી પાપના પસ્તાવા કરા કાહાકા સરગના રાજ આગડ આનાહા. જીસા દેવ કડુન સીકવનાર યશાયાના ચોપડામા યોહાનને બારામા ઈસા લીખેલ આહા કા,
“રાનમા આરડનાર યોહાનના જાબ ઈસા આહા કા,
પ્રભુના મારોગ તયાર કરા, તેના મારોગ નીટ કરા.”
તે યોહાનના આંગડા ઊંટને કેશાના બનવેલ હતાત, અન તો તેને કંબરલા કાતડાના પટા પોવેલ હતા. અન તેના જેવન તીડા અન રાન માસલા મદ હતા. યરુસાલેમ સાહારના લોકા અન અખે યહૂદિયા વિસ્તારના લોકા અન યરદન નયને મેરાને દેશસા મોઠે ભાગના લોકા યોહાન પાસી ગેત. અખા લોકા તેહના પદરને પાપના સ્વીકાર કરનાત યરદન નયમા યોહાનકન બાપ્તિસ્મા લીનાત.
પન પકા ફરોસી લોકા અન સદુકી લોકા તે બાપ્તિસ્મા લેવલા યેત તી હેરી ન યોહાન તેહાલા સાંગના, ઓ જહરવાળા સાપને જીસા વેટ લોકા, તુમાલા દેવને રગપાસુન બચુલા કોન વાટ દાખવના? યે રીતે તુમી યેનાર સજા પાસુન બચુલા સાટી પસ્તાવા કરનાહાસ ત સોબ ઈસા કામ કરા, તે પરમાને જીવન જગા. તુમી પદરને મનમા યી નોકો ઈચારા કા, દેવ આમાલા સજા નીહી કરનાર કાહાકા ઈબ્રાહિમ આમના બાહાસ આહા. મા તુમાલા સાંગાહા કા, દેવ યે દગડા માસુન તુમને જાગાવર ઈબ્રાહિમને સાટી વંશ ઉત્પન કરી સકહ. દેવ દરેક માનુસના નેય કરુલા તયાર આહા જો પસ્તાવા નીહી કર, તેને જ જીસા કુરાડ લીની એક માનુસ તે મુળને આગડ જે બેસ ફળ નીહી દે તે ઝાડલા કાપી ટાકુલા તયાર આહા. યે સાટી દરેક માનુસ જો યે ઝાડને જીસા જો બેસ ફળ નીહી દે, તેલા દેવ ગુનેગાર ઠરવીલ અન બળતે ઈસતોને ભટીમા ટાકી દીજીલ.
તુમી પસ્તાવા કરા તે સાટી મા તુમાલા પાનીકન બાપ્તિસ્મા દેહે, માને માગુન જો યેવલા આહા તો માને કરતા મોઠા આહા અન ઢોંગા પડીની તેને ચપલે કાહડુલા પન મા યોગ્ય નીહી આહાવ (જીસા એક નોકર તેને માલીક સાટી કરહ). તુમાલા મા પાનીકન બાપ્તિસ્મા દેહે, પન તો દેવના પવિત્ર આત્માકન અન ઈસતોકન તુમાલા બાપ્તિસ્મા કરીલ. તેના સુપડા તેને હાતમા આહા તો તેના ગહુલા ખળામા બરાબર ઉપનીલ ભરીટ દાના ગોળા કરી મુસકીમા ભરી ઠવીલ અન ભુસા કાયીમને ઈસતોમા ટાકી દીલ.


માગુન ઈસુ ગાલીલ વિસ્તાર માસુન આના અન યરદન નયમા બાપ્તિસ્મા કરનાર યોહાનકન બાપ્તિસ્મા લેવલા આના. પન યોહાન તેલા ના પાડીની સાંગ કા, મા તુને હાતકન બાપ્તિસ્મા લેવલા પડ, તુ માપાસી કજ આનાહાસ? પન ઈસુની તેલા સાંગા, “આતા ઈસા જ હુયુદે, કાહાકા યે રીતે આમી યી અખા કરજહન જી દેવ આપા સહુન ગવસહ.” તાહા યોહાન ઈસુલા બાપ્તિસ્મા દેવલા તયાર હુયના. ઈસુ બાપ્તિસ્મા લીની પાની માસુન બાહેર આના તાહા લેગજ આકાશ ઉગડાયના અન દેવના આત્માલા કબુતરને રુપમા ઈસુવર ઉતરતા હેરના. અન આકાશ માસુન ઈસા એક જાબ આયકાયના કા, યો માના લાડકા પોસા આહા તેનેકન મા પકા ખુશ આહાવ.

Feti si માથ્થી 3