Muria, Far Western: Muria Far Western (NT)

Muria Far Western

असके सयताननिकेडाल येसुना परिक्षा आयि इन्जोर पवित्र आत्माता लावते ओर वारु पल्लातिगा हतुर। ओर च्याळिस दियांग, अनि च्याळिस नरकांग उपास कितुर असके ओन कर वसतु। असके परिक्षा केवाल हेरे वास, “निमा परमेस्वरनोर मरि आन्दि ते इव कल्क रोटिंग आयिंग इन” इन्जोर इतुर। मति येसु ओन,
“ ‘मानेय केवल रोटितेय आयो,
मति परमेस्वरना टोडिताल पसियान्ता सबोय पोल्लोते जिवित मन्दानुर’ ”
इदाम पवित्र पुस्तकतिगा कोटता मन्ता इन्जोर उत्तर हितुर। असके पजा सयतान ओन पवित्र सहेर येरुसलेमतिगा ओतुर अनि मन्दिरता कोडितिगा निपिहतुर, अनि सयतान येसुन इतुर, “निमा परमेस्वरनोर मरि आन्दि ते आपुनतुन अडिय मुटहा, बाक्याकि ‘ओर निया बारेते आपुना स्वरगदूतकुन आग्या हियानुर, अनि ओरक निया कालकुन कल्क पळमाकि इन्जोर आपुना कयदिगा येतानुर’ ” इदाम पवित्र पुस्तकतिगा कोटता मन्ता इन्जोर इतुर। येसु ओन,
“ ‘निया परमेस्वर प्रबुना परिक्षा केमा’
इदाम वने पवित्र पुस्तकतिगा कोटता मन्ता” इन्जोर इतुर। पजा सयतान ओन उन्दि पकाय ऊचो मटा पोरो ओतुर अनि दुनियाता सबोय राज्य अनि अदेना हजोरपण तोहच, “निमा अडिय अरस नाकुन नमस्कार कियाकि ते नना इद सबोय निकुन हियाका” इन्जोर ओन इतुर। असके येसु ओन, “हे सयतान लक हन,
‘निया परमेस्वर प्रबुना आरादना किम, अनि केवल ओनाय सेवा किम’
इदाम पवित्र पुस्तकतिगा कोटता मन्ता इन्जोर इतुर।” असके सयतान ओना हेरेटाल हतुर। अनि सान्डे स्वरगदूत वासुन ओना सेवा कियाला लागतुंग।


बपतिस्मा हेवाल युहन्नान बन्दि बनेहकितोर इन्जोर येसु केन्जतुर असके ओर गलील प्रदेशतिगा हतुर। अनि ओर नासरतुन तासिस जबुलुन अनि नप्तालि लोकुरा देशते सिना हेरे गलील नहार हेरे मन्ता कफरनहुम सहेरतिगा हन्जुन मन्दिला लागतुर।
“जबुलुन अनि नप्तालि लोकुरा देश,
नहारता हेरे अनि यरदन नदिता होदपाकाळ,
अनि यहुदि आयोर लोकुरा गलील प्रदेश,
इदाम आन्दारते मतोरक लोकुरक उन्दि हजोर वेळिचि हुळतुरक,
अनि बोर हायानाता हरतिगा अनि दळमितिगा उदस मतोर ओर लोकुरा पोरो वेळिचि मान्जतु।”
इन्जोर परमेस्वरना पोल्लो वेहवाल यशायाहना द्वारा इन्ज मतोर ओद पोल्लो पुरा आयि इन्जोर इदाम आतु। ओद बेराताल “स्वरग राज्य हेरे वाता इन्जोर पस्तेमाम्ट” इदाम येसु वेहाना सुरुवात कितुर।


येसु गलील नहारता टका हेरे हन्जोर मतोर असके इवुर तमोलोरक अर्थ पतरस पोरोयतोर शिमोनिन, अनि ओनोर तमो अन्दरियास नहारतिगा जालि वाटानपा हुळतुर, ओरक ढिवरोह मतोरक। येसु ओरकुन, “नावा परके वराट; नना मिकुन मीन्क पयाना बदला मानेयतुन परमेस्वरना हेरे ततवाल बनेकियाका” इन्जोर ओरकुन इतुर। सान्डेय ओरक जालिनुंग तासिस येसुना परके वातुरक।
येसु अगडाल मुने हतुर असके असा इवुर तमोलोर अर्थ जबदिनोर मरि याकुब अनि ओनोर तमो युहन्नान हुळतुर। ओरक आपुनोर बाबो जबदिनसंग डोंगातिगा आपुना जालिनुंग सवरे किन्दुरक। येसु ओरकुन वने केयतुर। ओरक सान्डेय डोंगातुन अनि आपुना बाबोन तासिस येसुना परके वातुरक।


असके येसु सबोय गलील प्रदेशतिगा वलियसोर यहुदि लोकुरा समाज मन्डलितिगा स्वरग राज्यता सोबाता पोल्लो वेहचोर सबोय प्रकारता बिमारि अनि कमजोरितुन सुदरे किसोर मतोर। अनि ओना यश सबोय सिरिया प्रदेशतिगा फयलेमात। अनि अलग अलग प्रकारता बिमारिते अनि दुःखते मतोरक अनि दुष्टात्माते पकाय तकलिपते मन्तोरक लोकुरकुन, अनि मिरगिता बिमार लोकुरकुन, अनि लकवा बिमार लोकुरकुन इदाम सबोय बिमार लोकुरकुन ओना हेरे ततुरक अनि येसु ओरकुन सुदरे कितुर। गलील प्रदेश अनि दिकापुलिस प्रदेश, येरुसलेम सहेर, यहुदि प्रदेश अनि यरदन नदिता होद पाकाडाल लोकुरा भीळता भीळ ओना परके वातुरक।

Feti si मत्ति 4