If you have would like a copy of this version please contact info@davarpartners.org

The Gaddi New Testament

This work is licensed under Creative Commons Attribution-ShareAlike 4.0 License.

यीशुऐ गान्दै टैमैं तिनी अक्की मणु जो हेरू जैडा जन्मा थऊँ ही अंधा थू। तसेरै चेलै तैस थऊँ पूछु, “हे गुरू जी, कुणी पाप करूरा थू, ईनी मणुऐ या सेरै माता-पितै कि ऐह जन्मा थऊँ ही अंधा हा?”
यीशुऐ जवाव दिता, “ना ता ईनी पाप करूरा थू, ना ही सेरै माता-पितै, पर ऐह ठेरैतांये अंधा हा कि प्रमात्मैं रा सामर्थ ऐस मन्ज प्रकट भून। जिनी मिन्जो भैजुरा, असिओ तसेरै कम दिनै-दिनै ही करना जरूरी हा; अतै रात भूणैबाळी हा जैत मन्ज कोई कम ना करी सकदा। जैहणै तक अऊँ ऐस संसारा मन्ज हा, तैहणै तक संसारा री ज्योती हा।”
ऐह बली करी तिनी धरती पुर थूकु, अतै तैस थूका सितै जैड़ी चिक्क सिजी सो तिनी तैस अंधे री हाख्री मन्ज मळी करी, तिनी बल्लू, “गच्छ अतै शीलोम रै कुण्ड़ा मन्ज धोई लै।” (शीलोम रा अर्थ हा भैजुरा) तिनी गिच्ची करी अपणी हाख्री धोई लेई अतै हेरदा हेरदा फिरी आ।
ता तसेरै पड़ेही अतै जियें तैसिओ पैहलै भीख मंगदै हेरू थू, बलणा लगै, “कै ऐह सो हि निय्आ जैडा भीख मंगदा थू?”
कुछ मणुऐ बल्लू, “ऐह ता सो हि हा,” होर बलणा लगै, “ना सो निय्आ पर तैस साईयें हा।” ता तिनी बल्लू, “अऊँ सो ही हा।”
ता सो तैस थऊँ पुछणा लगै, “तेरी हाख्री कियां खुली गई हिन?”
तिनी जवाव दिता, “यीशु नां रै अक्की मणुऐ चिक्का सेड़ी करी अतै मेरी हाख्री मन्ज मळी करी मिन्जो सितै बल्लू, ‘शीलोम रै कुण्ड़ा मन्ज गिच्ची करी धोई लै,’ अतै मैंई गिच्ची करी धोई अतै अऊँ हेरना लगी पैंऊ।”
मणुऐ तैस थऊँ पूछु, “सो मणु कड़ी हा?” तिनी बल्लू, “अऊँ ना जाणदा।”

मणु तैस मणु जो जैडा पैहलै अंधा थू फरीसी बलै लेई गै। जधैड़ी यीशुऐ तसेरी हाख्री खोलूरी थी, सो विश्रामदिन थू फिरी फरीसीये भी तैस थऊँ पूछु कि तसेरी हाख्री कियां खुली गई। तिनी बल्लू, “तिनी मेरी हाख्री मन्ज चिक्क लाई, फिरी मैंई धोई दिती, अतै अबै हेरना लगी पैंऊ।”
ऐसा गल्ला पुर कुछ फरीसी बलणा लगै, “ऐह मणु प्रमात्मैं री कनारी थऊँ निय्आ, क्ओकि सो विश्रामदिन जो ना मन्दा।” बाकी बलणा लगै, “पापी मणु ऐसै चमत्कार कियां दसी सकदा?” ता तियां मन्ज फूट पैई गैई।
तियैं तैस अंधे सितै फिरी बल्लू, “तिनी तेरी हाख्री खोली हिन। तू तसेरै बारै मन्ज कै बलदा?” तिनी बल्लू, “सो भविष्‍यवाणी करनै बाळा हा।”
पर यहूदी अगुवै जो विस्वास ना भूआ कि सो अंधा थू अतै अबै हेरना लगू हा, ता तियैं तसेरै माता-पिता जो हैदी करी तियां थऊँ पूछु, “कै ऐह तून्दा पुत्र हा, जैसियो तुहै बलदै थियै कि अंधा पैदा भच्छुरा हा? फिरी सो अबै कियां हेरना लगी पैऊ हा?”
तसेरै माता-पिता जवाव दिता, “अहै जाणदै कि ऐह इन्दा पुत्र हा, अतै अंधा ही पैदा भच्छुरा; पर अबै अहै ऐह ना जाणदै कि ऐह कियां हेरना लगी पैंऊ हा अतै कुणी सेरी हाख्री खोली हिन। ऐह समझदार हा, ऐस थऊँ ही पुछी लेय्आ; ऐस अपणै बारै मन्ज अप्पू ही दस्सी दिणा।” ऐह गल्ला तसेरै माता-पिता ठेरैतांये कणैई क्ओकि सो यहूदी अगुवै थऊँ डरदै थियै, क्ओकि यहूदी सब मिली गच्छुरै थियै कि अगर कोई बलदा कि सो मसीहा थू ता, सो मणु यहूदी रै सभागार थऊँ कड्ड़ी दिणा थू। ऐसा व्जहा थऊँ तसेरै माता-पिता बल्लू, “ऐह समझदार हा ऐस थऊँ ही पुछी लेय्आ।”
ता तियैं यहूदिये तैस मणु जो जैडा अंधा थू दूई बरी हैदी करी बल्लू, “प्रमात्मैं री जय-जयकार कर। अहै ता जाणदै हिन कि सो मणु पापी हा।”
तिनी जवाव दिता, “अऊँ ना जाणदा कि सो पापी हा कि ना; अऊँ अक्क गल्ल जाणदा कि अऊँ अंधा थू अतै अबै हेरना लगू हा।”
तियैं तैस सोगी फिरी बल्लू, “तिनी तिजो सोगी कै करू? अतै कियां तेरी हाख्री खोली हिन?”
तिनी तियां सोगी बल्लू, “अऊँ तुसिओ बली बैहुरा, अतै तुहै ना हुणु; अबै दूई बरी कजो हुणना चाहन्दै हिन? कै तुहै तसेरै चेलै बणना चाहन्दै हिन?”
ता सो तसेरी ही बुराई करीके बलणा लगै, “तू ही तसेरा चेला हा अहै ता मूसा रै चेलै हिन। अहै जाणदै हिन की प्रमात्मैं मूसा सोगी गल्ला करूरी; पर ऐस मणु जो ना जाणदै कि ऐह करा रा हा।”
तिनी तियां जो जवाव दिता, “ऐह ता हैरानी री गल्ल हा कि तुहै ना जाणदै कि सो करा रा हा, तांभी तिनी मेरी हाख्री खोली दिती। अहै जाणदै कि प्रमात्मां पापी री ना हुणदा, पर अगर कोई प्रमात्मां रा भक्त भोआ अतै तसेरी मर्जी पुर चलदा भोआ ता सो तसेरी हुणदा हा। संसारा शुरू भूणै थऊँ लेई करी अज तक ऐह हुणनै मन्ज ना आ कि कुणकिए जन्मा रै अंधे री हाख्री खोली भून। अगर ऐह मणु प्रमात्मैं री कनारी थऊँ ना भुन्दा ता, कुछ भी ना करी सकदा थू।”
तियैं तैसिओ जवाव दिता, “तू ता बिलकुल पापा मन्ज जमुरा, तू असिओ कै सखांदा हा?” अतै तियैं तैसिओ यहूदी रै सभागार थऊँ बाहर कड्ड़ी दिता।

यीशुऐ जैहणै ऐह हुणु कि तियैं सो मणु बाहर कड्ड़ी दिता ता तैस सोगी मूल्ळी करी तैसिओ बल्लू, “कै तू प्रमात्मैं रै पुत्रा पुर विस्वास करदा?”
तिनी जवाव दिता, “हे स्वामी, सो प्रमात्मैं रा पुत्र कुण हा, कि अऊँ तैस पुर विस्वास करूं?”
यीशुऐ तैस सोगी बल्लू, “तैंई तैसिओ हेरूरा भी हा, जैडा तिजो सोगी गल्ला करू करदा अऊँ सो ही हा।”
तिनी बल्लू, “हे प्रभु अऊँ विस्वास करदा।” अतै तैसिओ प्रणाम करू।
ता यीशुऐ बल्लू, “अऊँ ऐस संसारा मन्ज न्याय तांयें छूरा ताकि जैड़ै ना हेरदै सो हेरन, अतै जैड़ै हेरदै हिन सो अंधे भूच्ची गान।”
जैड़ै फरीसी तैस सोगी थियै तियैं ऐह गल्ला हुणी करी तैस सोगी बल्लू, “कै अहै भी अंधे हिन?”
यीशुऐ तियां जो बल्लू, “अगर तुहै अंधे भुन्दै ता पापी ना भुन्दै; पर अगर अबै बलदै कि अहै हेरदै हिन ता तून्दा पाप तियां माफ ना भूणा।

Feti si यूहन्‍ना 9