Blackfoot Blackfoot people are found in Canada and the USA: the Blackfoot Confederacy is in southern Alberta and consists of Siksika, Blood, and Pikani (North Peigan); the South Peigan occupy the Blackfeet Indian Reservation in Montana, USA. The language is called Siksiká which means Blackfoot. Parts of the Bible were first published in Blackfoot in 1890.
Gospel of John The Blackfoot Gospel of John called Annaahk John Manistsitsinikatahpi Jesus Manistsipaitapiihpiai was translated by Wycliffe Bible Translators and Blackfoot people and published by the Canadian Bible Society in 1979. A slight revision was made in 2025-2026 to both the text and audio.

Translated by Wycliffe Bible Translators. Reviewed by Blackfoot people with help from Wycliffe/SIL and the Canadian Bible Society. Published by the Canadian Bible Society, 1979, 2026.

Annaahk John Manistsitsinikatahpi Jesus Manistsipaitapiihpiai

ki omáa Jesus itsitápoowa omiim niʼtómoyi niitsínihkatoohpi Olives.
Kii ki áíʼkskanaotonni ki óómahkaoʼka Jesus máttsskitapoowa omiima ómahkitawatsimoihkaaoʼpi. Ki ánniiksayii akáítapiiyi Jesus otáótoyisstsiiwokiksi. Ki ostóyi itáakáopiiwa. Aíssksinimaatsiiwaiksi.
Ki ánniksayii sotámaistóoyi omííksiska áíssksinimaatstohkatoomikska natowókakihtsimaani, ki annííksi anistápssi Pharisees. Itóʼtsipiiya myáʼyi aakííyi. Sotámitsissipoyattsiiyaawáyi. Iyíssinoʼtoyiiyaawayi otsitóʼtsipahtsaʼpssi amíi nínaayi. Omátoomaatsi.
Sotámanistsiiyaawa amíi Jesus “Óóki áíssksinimaatstohki. Nitsítókamayissinoʼtoannaana áámo akííwa otáohkimattsiiʼssoayaa amíi omátoomaatsi. Mosesa itaníkkiwa otátowokakihtsimaani ááhkohtayoohsínaahsi óóhkotooki ánniai anistápokaʼpaakiiksi. Kii, kistówa tsá kanistsítsiihtaahpa? Tsá kitákaniihpa?”
Óóki, áámohka iihtanííyaawa otáíssaaksikkiakatahsaawa Jesus. Áíssaakohkoonimiaawa mááhkohtohtóipiaahpiaawa ostóyi.
Óóki. Jesus sotámotahskaohsiwa ki itsítssínaakiwa ksááhkomm. Iihtsínaakiwa oʼkítsisi. Kii osótamomaanistawaanikkaiksi “Tsáa kitáakaniihpa?” Ki Jesus itssksípoipoyiwa, itanístsiiwaiksi, “Ki ikkamítsspiihtsiihki kiistóaawa kátaoʼmaikakokaʼpipaitapiiyi ánnayii ákohkottotoomohtawayakiiwayi óóhkotooki.”
Sotámattsitsiitáakotahsskaohsiwa, itsítssínaakiwa ksááhkoyi.
Ki omííksi otáʼyoohtsissaawa áámohk Jesus otáániihpihka itáipíyiyiistapooyaawa. Omííksi ómahkssimmiksi ánniksayii íítoomistapooyaawa. Ki ánniai Jesus niʼtsitápiiwa itamíʼtsayistapoowa. Ki omíi aakííyi, sákiitoʼtsíkayissaipoyiiyinai. Jesus máttsitsiitáaksipoipoyiwa. Itanístsiiwayi, “Óóki, aakííyi. Anná annííksiska? Kátaiʼtsstsiihpa kitáótoiʼmoki?” Áániiyinai “Saa. Annoohka mátsitsstsiihpa.” Ki itanístsiiwayi, “Ki niistówa kinóóhkattsaotoiʼmo. Annoohka sotámomatapoot. Kii stámiksiwáatoota kipahtsáʼpssiistsi. Pináttokaʼpipaitapiiyit.”]
Óóki. Ki ánnika omáa Jesus, ki máttáisitsipssatsiiwa omíi ótapiiʼsini. Áániiwa, “Niistówa ánnahkaoʼka iihkotsííwa matápiiyi mááhkitaʼpawaawahkaaniaiks ksistsikóínattsi. Omáa matápiwa ikkámohtaisapoosi niistóyi ákitsaitaʼpawaawahkaawa isskíinattsi. Ákaissksitsipaitapiiwa ksisstikóinattsi. Ánni iihtóʼtsstsiiwa niipáítapiʼssini.”
Óóki. Omííksayii anistápssiiyaawa Pharisees, ánnihkayii itanístsiiyaawa Jesus, “Kiistówa kítawattsíʼpoatomoohsi ánnoohka. Mátakitsstsiihpa kááhkstsinaoʼmaiʼtooki.” Ótsskánikkoaayaawayi, “Niistówa imaksíʼpoataomoohsiiniki nitákohkottomaiʼtookoowa nitáániihpi, takaa niistówa nítssksiniihpa nómohtoʼtoohpi kii nitákitapoohpi. Kiistóaawa kimátssksiniʼpoaawa nómohtoʼtoohpi ki nitáakitapoohpi. Kiistóaawa kitáíʼtómanistsskskaʼtsimaahpoaawa matápiiksi manistáísskskaʼtsimaahpiaawa. Ki ánnihkayii kómohtsawaomaiʼtookihpoaawa nanistáítsinikaʼsspi.
Niistówa ánnohka mátsitsstsiihpa naáhkohtaokakihtsimatai opahtsáʼpssini. Kii ikkamókakihtsimaainiki nitákokámoʼtokakihtsimaa, takaa nimátsiʼtaokakihtsimaahpa. Annááhka nitóʼtsskookahka, nínnahka nitáóhpokáokakihtsimaamawa. Kii kitáwattatoaʼpokakihtsimaanoaawaistsi itanáʼsiwa aotóíʼpoyoʼki nátsitapiiyi níʼtoyihka ákstsinaaʼnistoomiaawa; ákohtomaiʼtoayaawa. Óóki nistówa nitáíʼpoatomoohsi kii annááhka nitóʼtsskookahka nínnahka ninóóhkattaiʼpoatomooka.”
Ki omííksi sotámanistsiiyaawa Jesus, “Ki anná annaahka kínna?” Itanístsiiwaiksi, “Kiistówaawa kimátssksinookihpoaawa ki kimátssksinoaawaawa nínna. Kitssksinóókihpoaawahtopi, kitákoohkattssksinoawaawa nínna.”
Ánniai áániiwa Jesus. Omii ómahkitawaatsímoihkaaoʼpi omii itáíkkitstakioʼpi iihtáópommaoʼpi, ánnimaoʼka otsítaniihpi áámohka. Ki mátsitsinnáwaatsi. Takaa mátomaoʼtsstsííwa itáaksiʼnitahpi.
Óóki. Ki ánnika, ki máttáisitsipssatsiiwa omíi ótapiʼsini. Áániiwa, “Niistówa táksiistapoo. Ki aviistapooyiniki kitákitsiyikaʼpssammokihpoaawa. Ki kiistóaawa aáíʼniinoainiki kimátakssiinomootspoaawa kipahtsáʼpssoaawaistsi. Kii omiim nitákitapoohpim kiistóaawa kimátakohkottsitoʼtoohpoaawa.”
Ki omííksi istóʼtotamaʼpssiiksi Jews ki ánniksayii áwaaniiyaawa, “Máʼkawaaniiwa ‘Omiim nitáyakitapoohpim kiistóáawa kimátakohkottsitoʼtoohpoaawa.’ Ikánistohtako ánni áwaaniiwa mááhksiʼnitohsi. Máʼkanistaiʼpoyiiwa.”
Ki áaʼnistsiiwaiksi omáa Jesus, “Kiistóaawa kómohtoʼtoohpoaawa annóo ksááhkomma, ki ánnihkayii niʼtói kómohtaohkananistaiksimsstaahpoaawa. Niistówa isspóóhtsi nómohtoʼtoo. Ki ánnihkayii iihtóóhkiitsiiwa niksímsstaani. Kiistóaawa kitsítsitapiihpoaawa annóo ksááhkomma. Niistówa nimátsitsitapiihpa. Kikáátanistohpoaawa aáíʼniinoainiki kimátakssiinomootsspoaawa kipahtsáʼpssoaawaistsi. Ikkámsaomaiʼtookiinoainiki nitámssi, aáíʼniinoainiki kimátakssiinomootspoaawa kipahtsáʼpssoawaistsi.”
Ki ánniai omííksi áánistsiiyaawa Jesusi, “Tsa kanistáíksimsstááhpa kááhkami.” Ki Jesus sotámanistsiiwaiksi, “Áamok pitsistóyika ki ánnohka, kitáísksawaanistohpoaawa nitámihpi. Ki iikákaoi nanistáakohtsiʼpoyihpi kiistóaawa; ikákawoyi kómohtakokakihtsimatohpoaawaistsi; kii, ki annááhka nitóʼtsskookahka iikókamoʼtaʼpssiwa, ki ánnohka nikáákanistawa matápiiwa nitááníyihpistsi annaahka nitóʼtsskookahka.” Jesus niitapáwaaniiwa kínnooni Áʼpistotookiiyi. Omííksi ótssitsipssataiksi omátotsistapiʼtookaatsaaiksi. Ki ánnihkayi Jesus iihtanístsiiwaiksi, “Niisto ánnaoʼka annaahka Matápiiwahka. Kiistóaawa aiʼsspipipóʼtookiinoainiki ki ánnikayii kitákitssksiniʼpoaawa niistóakaoʼka. Kii mátsitsstsiihpa nitáwattanisttotsiihpi. Nikáksaanistoohpiaawa nitáíssksinimaatsiyihpi nínna. Ki annaahka nitóʼtsskookahka, nínnahka nítohpokaʼpaissiimoka. Nimátsiʼtsitaisskikkaatsiksi. Takaa táíssksawanisttotsiihpi kanáʼpaisistsi iihtáyaahsiʼtakiáttsaahpistsi.”
Óóki. Áámostska omáa Jesus otáíʼksistanistoohsaistsi, itakáítapiiyi ómohtomatapomaiʼtookiksi.
Óóki. Ki ánnika omáa Jesus máttáísitsipssatsiiwa omiiksi otsíímaiʼtookiksi Jews. Áánistsiiwáíksi “Ikkamíítaʼpomaiʼtookiinoainiki, kitákitanisttotsiihpoaawa nitáániihpi. Ki kitákitookámoʼtssksiniihpoaawa amánissini manistsííhpi. Ki omííhka kitsííkamoʼtssksiniihpoaawayihka kitákohtsiksisstoipoʼtootspoaawa.”
Itanístsiiyaawa Jesusi, “Kimaʼkanissi nitáksiksisstoipoʼtootsspinnaan. Ikánistohtakowa ánni kitáwaaniihpi niistónnaana ánnikskaoʼki annííksiska áísskohtaʼpoʼtakiáttsaaikska. Anistápssoʼpi Jews iihtsístapaahkoyipaitapiioʼpa Abraham. Ki ánniai matonoawanistapssoʼpa anniiksiska áísskohtaʼpoʼtakiáttsaaiksi. Nimátanistapsspinnaan annííkska áísskohtaʼpoʼtakiáttsaiksi. Nimátakstsinaiʼksisstoipoʼtootsspinnaan.”
Jesus itanístsiiwaiksi, “Óóki. Kitákanistohpoaawa niitsiiyi. Niʼtóyi kanístsspoaawa amííksisk áisskohtaʼpoʼtakiáttsaaikska. Kómohtanistsspoaawa annohk ánni kitáískssipahtsaʼpssoaayi. Kítsskohtoiksimsstattsootspoaawa kááhksipahtsaʼpssoaayi niʼtói ánni niitsskohtóistsistotoahpi amííksisk áísskohtápoʼtakiattsaaiksi. Kitákohkottsiksisstoipoʼtoohpoaawa, kááhkstattanistssoaayi. Takaa nínna nítohkoyímmoka. Amáa áísskohtaʼpoʼtakiattsaawa matákaisksohpokaʼpaissiimiiwaatsiksi amíi otánikapiimakki otsitapíímiksi. Otánikapiimakki ohkóayi ákaisksitaʼpaitapiiyinai. Niistóakaoʼka Áʼpistotookiwa ohkóyi. Ánnihkayi nómohtanii niistówa ikkamíksisstoipoʼtoinoainiki kitákitsiitaʼpiksisstoipoʼtootspoaawa. Kimátakattanistapsspoaawa ánni annííksiska áísskohtaʼpoʼtakiáttsaaiksi.
Nítssksiniihpa kómohtsistapaahkoyipaitapiihpoaawa Abraham. Kii kitsínaoʼkaisstakkihpoaawa kááhkiʼnikkssoayi. Kómohtaisstakkihpoaawa kááhksiʼnikkssoayi kitsawákoʼtsissoaayi nitáániihpistsi. Niistówa ánnoohka nómohtaiʼpoyii omíístsi nitsiníʼpinnaanistsi nínna. Kiistóaawa kitáwaanisttotsiihpoaawa kitáániyihpoaawaistsi kínnoaawa.”
Óóki otsítanikkaiksi, “Nómohtoʼtsipaitapiihpinnaan Abraham. Ánnahkaoʼka nitáonnimmannaana.” Jesus itanístsiiwaiksi “Kitónnimmawaawahtopi kitákanistsipaitapiiyihpoaawa ostóyi manistsípaitapiiyihpi. Kitsííkamoʼtanistohpoaawa nómohtoʼtoohtsiihpistsi Áʼpistotookiwa, ki kiistóaawa kitáíssaksiʼnikkihpoaawa. Abraham mátanistapitapííwaatsi. Kiistóaawa annaahka kitáónnimmawaawahka otáwaanisttsiihpi kinóóhkattawanisttsiihpoaawa.” Óóki. Sotámanistsiiyaawa Jesusi, “Niʼtsitópiiyi nitáonnimmannaana. Áʼpistotookiwa ánnahkaoʼka. Níniitaʼpohkoyimmokinnaana. Nimáátsamaakiipokayihpinnaana.”
Jesus sotámaniiwa, “Kitáónimmawawahtopi Áʼpistotookiwa kitákakomimmokihpoaawa. Áʼpistotookiwa ánnahkaoʼka nómohtoʼtoo. Ki ánnohkai ánnoma tsítaʼpaitapiiyi. Nimátawattsitoʼtoohpa. Ostóyi nitóʼtsskooka. Kitákanistohpoaawa kómohtsaotsistapiʼtsiihpoaayi nitáániihpistsi. Kómohtsaotsistapiʼtsiihpoaayaawa kítsaohkottonissoayi tanistápawaaniihpi. Niʼtói kanístsspoaawa annaahka kitáónnimmawaawahka Makáʼpatoʼsiwahka, ki ostóyi ánnayi kitsííksstaahpoaawa kááhkawanisttotsissoaayi otsitsííhtaanistsi. Ánniika piitsistóyika ki ánnika póóhsapoohtsika ostóyi áíksimiʼnikkiwa. Mátsitsstsiʼpa mokámoʼtaʼpi oostóyi. Sayíípitsiisi mátakohtsikííwaatsi. Ánniai niitssíwa. Ííksayiipitsiwa. Ki sayíípitssini iihkánohtoʼtsstsiiwa oostóyi. Niistówa nitáómaniiʼpoyii ki ánnihkayi kómohtsawaakomaiʼtookihpoaawa. Kítohkanaissksiniiʼpoaawa mátsitsstsiihpa makáʼpii nááhkohtotoiʼmokoyi. Kímaʼksaomaiʼtookihpoaissksi? Nitáomaniiʼpoyi. Aʼpistotookiwa otsitapíímataiksi otáyoohtookaiski otáániihpistsi. Kiistówaawa kómohtsawayoohtoawaawa Áʼpistotookiwa kítsaitapiimáyissoaayi.”
Ki amóksi istóʼtotamaʼpssiksi Jews áánistsiiyaawa Jesusi, “Níniitáʼpómanistoohpinnaana anniihka kitááʼnistohsi kitsítotoisapokaʼpitapiiyi annííksiska Samaritans, ki ááhkitsstsiihpa makáʼpatoʼsi kitsíístomatai.”
Jesus sotámaniiwa “Ki niistówa mátsitsstsiiʼpa makáʼpatoʼsi nitsíístomatai. Nitsikáínaimmawa nínna, ki ki istóaawa kimátoohkainaimmokihpoaawa. Nimáátaʼpaisskiihpa nááhkáínaimmokoohsi. Áʼpistotookiwa ánnahkaoʼka áʼpaisskima nááhkainaaimmokoohsi. Ki oostóyi ánnahkaoʼka áókakihtsimaawa niistówa nitómanissi kii kiistóawa kitsawómanissoaayi. Kitákanistohpoaawa niitsííyi. Kanáítapiiyi nitánistsiʼtookiksi nitáániihpistsi mátakohkoiʼnííwaiksi.”
Osótamanikka omííksi istóʼtotamaʼpssiksi Jews, “Ánnohka áámohka kitáániihpihka ninóóhkohtoʼtssksiniihpinnaan otsítsstsissi makáʼpatoʼsi kitsíístomatai. Annaahka Abrahamahk, akáíʼniiwa. Ki óómiksika isskóóhtsiksika áwaatoyiʼpoyiiksika ákaohkanaiʼniiyaawa. Kiistówa kitáwaani kítohkananistaiʼtookiksi kitáániihpistsi mátaksiʼnííwaiksi. Kiistówa kimátoʼtsksspipoyimawa Abraham. Ostóyi ákaiʼniiwa, ki níʼtoi omiiksi áwaatoyiʼpoyiiksi. Tsá kanistápaʼpaiksimsstááhpa kááhamihpi!”
Jesus sotámaniiwa, “Niistówa ikkámawattsspipoʼtoohsiiniki, ki ánniayi mátakohpanioʼpaatsiksi. Nínna Áʼpistotooki ánnahkaoʼka nitáísspipoʼtooka. Niʼtówahkaoʼka annaahka kanistáínihkatawaawahka Áʼpistotooki. Kiistóaawa kimátomaikakssksinoawaawa. Niistówa ninóóhkssksinoaawa. Nitáániihtopi nitsawáíssksinoahsi nitááksayiipitsi, ánni kiistóaawa kanistáísayiipitsspoaawayi. Ki ninóóhkssksinoawa, ki nitanistáíʼtoawa otáániihpistsi.
Kómohtsiistapaahkoyiipaitapiihpoaawa Abrahama. Óstoyi ííksskaʼohtsiʼtaamssiwa ótssksinissi nitákitsinóyissi niistóyi ánnohka nitsítsipaitapiihpi. Ki ánnoohka nikáínooka, kii ííkohtsiksimatsiʼtakiwa.”
Óóki. Jesus otsítanikka omííksi istóʼtotamaʼpssiiksi Jews, “Kiistówa kimátomayisitsippoisstoyiimihpa, kii kitáwaanii kitsinóahsi annaahka ákaisamiʼniwahka Abraham.”
Jesus itanístsiiwaiksi, “Óóki. Kitákanistohpoaawa niitsííyi. Niistówa ánnahkaoʼka annaahka áísksitaisstsiiwahka; otsítsaomiitaisstsiihpi Abraham nitaissksitaisstsii.”
Óóki. Ánniayi omííksi istóʼtotamaʼpssiiksi Jews itomátapoʼtakiyaawa óóhkotoki mááhkohtsisskaiʼtatahpiaawa Jesus. Ki Jesus sotámikaksiistapáaatsiiwaiksi. Ki ánnimayi stámitsakskihtsima omii ómahkitawaatsimoihkaaoʼpi.

Feti si John 8